විදුලියට වඩා වේගවත් උසේන් බෝල්ට්ගේ ජීවිත කතාව...

‘ඩොමිනෝ සෙල්ලම් කරන්න මම හරි ආසයි...ඒක ඇත්තටම නියම ක්‍රීඩාවක්... ඒ වගේම හිත සන්සුන් කරන ක්‍රීඩාවක්... කිංග්ස්ටන්වල මගේ ගෙදර මිදුලේ යාළුවොත් එක්ක පැය ගාණක් තිස්සේ මම ඩොමිනෝ සෙල්ලම් කරන්න ඇති...අපේ තාත්තා ඩොමිනෝ කප්පිත්තෙක්...මම හැදී වැඩුණේ ඒවා බල බලා... උසේන් සෙන්ට් ලියෝ බෝල්ට්, ලොව වේගවත්ම මිනිසා ඔහුගේ ලන්ඩන් හෝටලයේ අසුනකට බරවී සිය ජිවිතයේ ප්‍රීතිමත් සිදුවීම් සිහිකරයි.

කුඩා කාලයේ උතුරු ජැමෙයිකාවේ සිය පවුලේ සාමාජිකයන් හා ගතකළ කටුක ජීවිතය... ජලය හිඟ කාලයේ ඈත ගංගාවට ගොස් ජලය පිරවූ පනිට්ටු ඔසවාගෙන පැමිණෙන හැටි...ඔහු සිතට ගලාගෙන එන විදිහට කියවාගෙන යයි. වැල්ඩෙන්සියා ප්‍රාථමික විදුහලේ ඉගෙනුම ලැබූ යුගයේ තම හොඳම මිතුරා වූ නුගෙන්ට් වෝකර් ජූනියර් (ඔහුව හඳුන්වන්නේ එන් ජේ නමින්) අදටත් තම පෞද්ගලික කලමනාකරු ලෙස කටයුතු කරමින් ඒ මිත්‍රත්වය රැකගෙන සිටින බව බෝල්ට් කියන්නේ ආඩම්බරයෙනි. "එදා මම පුංචි කාලේ ඉස්කෝලේ යන්න මම ලෑස්තිවෙලා එනතුරු එන් ජේ අපේ මිදුලේ බලාගෙන හිටියා. අදත් එයා තමයි මගේ කලමනාකරු වෙලා ලෝකේ වටේ මාව එක්කරගෙන යන්නේ..." සිය මිත්‍රත්වයේ අගය බෝල්ට් එසේ පැහැදිලි කරයි. මේ සියලු තොරතුරු ඇතුළත්වන්නේ බෝල්ට්ගේ ක්‍රීඩා ජීවිතයත්, පෞද්ගලික ජීවිතයත් අළලා සකස් කළ Faster Than Lightning (විදුලියට වඩා වේගවත්) නමින් යුත් ඔහුගේ චරිතාපදානයේය. එය වෙළෙඳපොලට නිකුත් ක‍ෙළ් මීට සති දෙකකට පෙරය. දරිද්‍රතාවයෙන් පිරුණු බෝල්ට්ගේ කුඩා කාලයත්, ක්‍රීඩකයකු ලෙස ජීවිතය ජයගත් ආකාරයත් ඉතා සරලව හා පැහැදිලිව ලියා ඇති මේ පොත මෑත කාලයේ නිකුත් වූ අන්තර් ජාතික ක්‍රීඩකයකුගේ හොඳම චරිතාපදානය යැයි විචාරකයෝ කියති. එහි අඩංගු ඇතැම් කරුණු මගින් අදාළ පුද්ගලයන්ගේ චරිතයට හානි නොවූවද, ඇතැම් විට ඔවූහූ එම කරුණු හේතුවෙන් සිත් තැවුලට පත්වනු ඇතැයි ද විචාරකයෝ කියති. එහෙත් බෝල්ට් සිය චරිතාපදානයෙන් තම ජීවිතයේ සත්‍ය තොරතුරු සඟවන්නට උත්සාහ නොකිරීම එක් අතකින් ඔහුගේ අවංකභාවය පෙන්නුම් කරන බව විචාරකයන්ගේ අදහසය.

"මවුපියන්ගෙන් මට ලැබුණේ මිශ්‍ර ගතිගුණ රැසක්". ඉස්කෝලේ 8.00ට පටන් ගත්තත්, තාත්තා ගෙදර ඉන්දැද්දී මාව පාන්දර 5.30ට ඇහැරවනවා. ඒත් අම්මා නම් මට උදේ 7වෙනකල්ම නිදාගන්න ඉඩදෙනවා. අම්මා නම් මාරයි...එයා මට පුංචි පුංචි දේවල් ගොඩක් උගන්නලා තියෙනවා. ඒ ඔක්කොම එක අතකට එයාගේ ලේසියටයි මට උගන්නලා තියෙන්නේ කියලා තේරුණේ කාලයක් ගියාමයි. ඔහු සිය ආදරණීය මව වන ජෙනිෆර් පිළිබඳ ඉතා සුන්දර සිදුවීම් ගොන්නක් සිය පොතට ඇතුළත් කර තිබේ. ඒවා ඉතා රසවත්ය. "මම අදටත් මගේ කමීසේ බොත්තමක් මහගන්න හොඳින්ම පුළුවන්. ඒක ඉගැන්නුවේ අම්මා. අම්මා කොච්චර කම්මැලිද කියනවා නම් හැම දෙයක්ම කරන්නේ අන්තිම මොහොතේ. ඉස්කෝලේ ඇඳුම්වල අඩුපාඩු පවා බලන්නේ අන්තිම මොහොතේ. ඒ වගේ වෙලාවට කමීසයක බොත්තමක් ගැලවෙලා තිබුණොත් ඉතිං මට උදව් කරන්නම වෙනවා. ඔන්න ඔහොමයි මම කමීස බොත්තම් මහන්න පුරුදුවුණේ..." මැරතන් වීඩියෝ ක්‍රිඩාවටත්, සංගීතයටත් දැඩි ලෙස ප්‍රිය කරන බෝල්ට් රාත්‍රී සමාජශාලාවල නිරන්තරයෙන්ම ගැවසෙන ඉතා සමාජශීලී පුද්ගලයෙකි. හෙතෙම ක්‍රීඩාවෙන් ලැබූ අසීමිත කීර්තිය ඔහුගේ රාත්‍රී සමාජශාලා ජීවිතය හේතුවෙන් පළුදු කරගත් අවස්ථා ඕනෑ තරම්ය. පසුගිය වසරේ ලන්ඩන් ඔලිම්පික් උළෙලේ රන් පදක්කම් දිනාගැනීමෙන් පසු එදින රාත්‍රී සිට පසුදින උදෑසන වනතුරු සිය කාමරයේ සුරූපි තරුණියන් තිදෙනකු හා ප්‍රීතිය සැමරූ බෝල්ට් මාධ්‍ය මගින් දැඩි විවේචනයට ලක්විය. එහෙත් සිය සුපුරුදු ජීවිත රටාව සඟවන්නට ඔහුට උවමනාවක් නැත.

මේ දිනවල ඔහු සිටින්නේ "විදුලියට වඩා වේගවත්" කෘතියට එල්ලවන විවේචන සොයා බලමින්ය. ක්‍රීඩාවෙන් ලැබුණු කෙටි විවේකයේ දී කිංග්ස්ටන් නුවර පිහිටි තම සුපිරි මන්දිරයේ අලුත්වැඩියා කටයුතු ලහි ලහියේ සිදුකෙරෙමින් පවතී. එය ඔහුගේ සිහින මාළිගාවය. "මම නිතරම යාළුවෝ ඇසුරු කරනවා. ඔවුන් නිතරම ගෙදර එනවා. අපි පාටි දානවා. හයියෙන් සින්දු අහනවා. මම කැමැති නැහැ මගේ අසල්වැසියෝ ඇවිත් කියනවට ඒයි මිනිහෝ සද්දේ වැඩියි. අඩු කරපං... කියලා. ඒ නිසා මම පිටට සද්දේ ඇහෙන්නේ නැති වෙන්න අවශ්‍ය කටයුතු කරනවා." ඔහු කියයි. ඔහුගේ සුපිරි මන්දිරයේ නිදන කාමර පහකි. ඉතා අලංකාර පලතුරු වත්තක් ද එහි ඇත. බෝල්ට්ගේ සුඛෝපභෝගී මෝටර් රථ නතර කර තැබීමට මිදුලේ පළාතක්ම වෙන්කර තිබේ. පිහිනුම් තටාකය ඇත්තේ ඊට යාබදවය. ඔහුගේ ආහාරපාන සකස් කර දීමට ඉස්තරම් සූපවේදියෙක් ද, ඇඳුම් පැළඳුම් සෝදා දීමට ලොන්ඩරි කරුවෙක් ද ඔහුට සිටියි. තමා ක්‍රීඩාවෙන් සමුගත් දිනෙක මීටත් වඩා විශාල හා සුඛෝපභෝගී නි‍ෙවසක් ඉදිකරන බව 27හැවිරිදි බෝල්ට් කියයි. මිදුලේ බාස්කට් බෝල් පිටියක් සකස් කරන බවත්, එවිට තම මිතුරන් හා බාස්කට් බෝල් ක්‍රීඩාවේ නිරතවෙමින් නිදහසේ කාලය ගත කිරීමට හැකි බවත් ඔහු කීවේය.

උපුටා ගැනීම සිළුමිණ