මොහොමඩ් අලිගේ අන්තිම සටන

‘සමනලයකු සේ පාවී යන්න... මී මැස්සකු සේ දෂ්ඨ කරන්න...‘  70 දශකයේ ලෝක බොක්සිං ක්‍රීඩකයන් අතර අතිශය ජනප්‍රියත්වයට පත්වූ මේ වදන්පෙළ සිය මුෂ්ටි ප්‍රහාරයෙන් මෙන්ම වේගවත් වාග් ප්‍රහාරයෙන් ද ප්‍රතිවාදීන්ට භීතිය ගෙනදුන් ලෝක බොක්සිං වළල්ලේ ශ්‍රේෂ්ඨතම ක්‍රීඩක මොහොමඩ් අලිගේය. ඔහු එකල පැවැසූ මෙවැනි බොහෝ කියමන් යටි අරුතක් සහිත ඉතා ප්‍රබල ඒවා විය. එනිසාම එවැනි බොහෝ ආලාප ඔහුගේ ජනප්‍රියත්වය වැඩි කිරීමට හේතුවක් වී තිබිණි. එහෙත් අද වනවිට 72 හැවිරිදි වියේ පසුවන අලි ගත කරමින් සිටින්නේ ඔහුගේ ජීවිතයේ අවසන් කාලපරිච්ඡේදයයි. සිය ප්‍රතිවාදීන් පළමු වටයේදීම බිම හෙළන්නට තරම් ශක්තිමත්ව සිටි බොක්සිං වළල්ලේ අසහාය වීරයා වූ මොහොමඩ් අලි අද ඔත්පලය. එදා ප්‍රතිවාදීන්ට ඉදිරියේ හිස නොනැමූ මේ අපරාජිත ක්‍රීඩකයා අද පාකින්සන් රෝගයට පරාජය වෙමින් සිටින්නේ ඉතා කනගාටුදායක ලෙසින්ය. එකළ සටන්කාමී අදහස්වලින් ක්‍රීඩාලෝලීන් උද්යෝගයෙන් මුසපත් කළ අලිට අද හරිහැටි කතා කිරීමට පවා අපහසුය. දශක දෙකකට වැඩි කාලයක් පුරා පාකින්සන් රෝගයට ගොදුරුව සිටින ඔහුගේ වත්මන් තත්ත්වය එයයි. අලිගේ රෝගී තත්ත්වය නරක අතට හැරීම මේ වනවිට ඔහුගේ පවුලේ සාමාජිකයන් අතර දැඩි කතාබහට ලක්ව තිබේ. ඔහුගේ සොයුරකු වන රහ්මාන් අලි පසුගියදා නිව්යෝක් නුවර ‘සන්ඩේ පීපල්‘ පුවත්පතට ප්‍රකාශ කර තිබුණේ සිය සොයුරාගේ ජීවිතය ගැන තවදුරටත් විශ්වාසය තබන්නට නොහැකි බවය. මේ වනවිට අමෙරිකාවේ ඇරිසෝනා ප්‍රාන්තයේ කෙන්ටකි නගරයේ පිහිටා ඇති ‘ලුවිස්විල්‘ නම් වූ සිය උපන්බිමේ සුපිරි මන්දිරයේ අලි ගත කරන්නේ ඉතා දුක්මුසු ජීවිතයකි. අලි ගැන සොයා බලමින් ඔහුට සාත්තු කිරීමේ වගකීම බාරව සිටින්නේ ඔහුගේ සිවුවැනි බිරිය වූ ලොනී සහ ඔහුගේ බාල සොයුරිය මැරිලින්ය. උදෑසනින් නහවා, කවා පොවා ආලින්දයේ විශාල සුවපහසු අසුනක හිඳුවන අලි අනතුරුව සිය බොක්සිං ජීවිතයේ ස්වර්ණමය කාලපරිච්ඡේදයේ දී ක්‍රීඩා කළ තරග සහ පැරැණි ගොපලු චිත්‍රපට නරඹමින් කාලය ගත කරයි. ඔහුගේ දෙදෙනික ශාරිරික ව්‍යායාම වැඩ සටහන ද, කලට වේලාවට ආහාරපාන ලබාදීම සිදුකෙරෙන්නේ බිරිය අතිනි. තමා වඩාත්ම ප්‍රියකරන මුනුපුරා වන ජේකොබ් ‘ස්කයිප්‘ මගින් සම්බන්ධ කරදෙන ලෙස සිය ඉඳහිට බිරියගෙන් හෝ සොයුරියගෙන් ඉල්ලා සිටී. 15 හැවිරිදි ජේකොබ් ඔහුගේ දියණියක වන කාලයිලාගේ පුත්‍රයෙකි. එකල අලී ප්‍රචලිතව සිටියේ ක්‍රීඩා ජීවිතයේ මෙන්ම පෞද්ගලික ජීවිතයේදීත් කිසිදාක මානසිකව ඇද නොවැටුණු දැඩි ආත්ම ශක්තියකින් යුතු ක්‍රීඩකයකු ලෙසය. ඔහු තරම් දැඩි ආත්ම ශක්තියක් තිබූ ක්‍රීඩකයකු එකල බොක්සිං වළල්ලේ නොසිටි බව විචාරකයන්ගේ අදහසය. ඔහුගේ ආත්ම විශ්වාසය තරමටම ආත්ම වර්ණනාව ද ඉහළින්ම තිබිණි. ඔහු නිරතුරුවම තමා ගැනම උදම් ඇනූ පුද්ගලයෙකි. එහෙත් එවැනි සාධක ඔහුට ලෝක බොක්සිං වළල්ලේ ශ්‍රේෂ්ඨතම ක්‍රීඩකයා ලෙස වැජඹීමට බෙහෙවින්ම බලපෑවේය. ‘මම තමයි ශ්‍රේෂ්ඨයා...‘ බොක්සිං වළල්ලේදිත්, ඉන් පිටතදිත් ඔහු නිතර නිතර එසේ කීවේය. 1942 වසරේ දී කැසියස් මර්සෙලස් ක්ලේ නමින් උපන් ඔහු මොහොමඩ් අලි නමින් සුන්නි ඉස්ලාම් භක්තිකයකු බවට පරිවර්තනය වූයේ බොක්සිං වළල්ලේ සිය පළමු පරාජය ලැබීමෙන් පසුවය. 1964 දී එවකට 22 හැවිරිදි යොවුන් ක්‍රීඩකයකු ලෙස හෙවිවේට් බොක්සිං වළල්ලේ සිය පළමු තරගයට මුහුණදුන් අලි එතැන් සිට නොනවත්වා 31වැනි තරගය දක්වා ජයග්‍රහණ අත්කර ගනිමින් අසමසම වාර්තාවක් තැබුවේය. ඔහු බොක්සිං වළල්ලේ පළමු පරාජය ලැබුවේ 1971 දී ජෝ ෆ්‍රෙසියර් හමුවේය. ක්‍රීඩාවෙන් සමුගන්නා විට තරග 61කට සහභාගිවී සිටි අලී පරාජයට පත්ව තිබුණේ තරග 5කින් පමණි. ඔහු ජයගත් තරග 56න් අවස්ථා 37කදීම ප්‍රතිවාදී ක්‍රීඩකයා බිමට ඇද දමා ‘නොකවුට්‘ කිරීමට ඔහු සමත්විය. අඩි 6කුත්, අඟල් 3ක් උසැති මේ සද්දන්ත කළු ජාතික ක්‍රීඩකයා බොක්සිං වළල්ලේ මෙන්ම ඉන් පිටතදීත් දැඩි සටන්කාමීත්වයෙන් පිරුණු චරිතයකි. වර්ගවාදයට එරෙහිව නැගී සිටිමින් කළු ජාතිකයන්ගේ නිදහස වෙනුවෙන් දැවැන්ත අරගලයක නිරතවූ මාටින් ලූතර් කිංගේ අනුගාමිකයකු බවට පත්වූ අලි එකළ අමෙරිකාවේ වියට්නාම ආක්‍රමණය දැඩි ලෙස හෙළා දුටු අමෙරිකානුවන් අතර ඉදිරියෙන් සිටියේය. වියට්නාම යුද්ධය අරභයා ඔහු කළ ඇතැම් ප්‍රකාශවලට අතිශය ජනප්‍රියත්වයක් ලැබිණි. කළු ජාතිකයන්ගේ නිදහස වෙනුවෙන් ඔහු කළ ඇතැම් ප්‍රකාශ අදටත් වලංගුය. ‘ජීවිතය කියන්නේ හරියට බොක්සිං තරගයක් වගෙයි. පරාජය තීරණය කෙරෙන්නේ ඔබ බිම ඇද වැටුනාම නෙවෙයි. නැගිටීම ප්‍රතික්ෂේප කළාමයි.‘ වරක් ඔහු එසේ කීවේය. සිය ජීවිත කාලයේ හොඳම කාලය බොක්සිං වළල්ලේ ගෙවා දැමූ මොහොමඩ් අලිට ජීවිතයේ සැඳෑ සමය ගෙවීමට සිදුවූයේ අවාසනාවන්ත පාකින්සන් රෝගයත් සමගය. ඉදිරි දිනෙක මේ අසහාය වීරයා මාරයා ඉදිරියේ පරාජයට පත්වනු ඇත. එහෙත් බොක්සිං වළල්ලේ ඔහු ලැබූ ශ්‍රේෂ්ඨත්වයත්, කීර්තියත් කිසිදාක මැකී නොයයි.

 උපුටා ගැනීම සිළුමිණ