කාලෙන් කාලෙට අලුත් මූණු ආවට මට ලැබෙන චාන්ස්වල අඩුවක් නැහැ…

මගේ ඉන්ස්ටග්‍රෑම් එකත් හැක් කරලා තිබුණා…ජනප්‍රිය වෙන්න FB ඉන්න ඕනේ නැහැ…

ජනප්‍රිය, තරු අතර තවමත් සුන්දරත්වයෙන් හැඩවන සුන්දර රුවක් ලෙසට රුවන්ගි රත්නායක ටෙලිනාට්‍ය ක්‍ෂේත්‍රයේ විවිධ චරිත හරහා ඔබට සමීප වුණා. ඉතින් ඇය මේ දවස්වල පොලිසියට බැඳිලා තවත් සුන්දර කතා වස්තුවකට හැඩගැහෙන මොහොතක ඇය සමග කතා කිරීමට හිතුවා.

රුවන්ගි පොලිසියට බැඳිලා නේද මේ දවස්වල?

සුමින් ගල්හේන අධ්‍යක්‍ෂණය කරන නවතම ටෙලිනාට්‍යයේ මම ‘පොලිස් කාන්තාවක’ගේ චරිතයක් නිරූපණය කරනවා. ඉතින් ඒ ටෙලිනාට්‍යයේ වැඩකටයුතුත් එක්ක දොම්පේ ප්‍රදේශයේ සැරිසරනවා.

ඔබ නිරූපණය කළ අනෙකුත් චරිතවලට වඩා මේ චරිතයේ වෙනසක් දැනෙනවාද?

පොලිස් ඇඳුම ඇන්දා කියලා මට වෙනසක් දැනුණේ නැහැ. මොකද මම මෙයට පෙර ප්‍රියන්ත කොළඹගේ අධ්‍යක්‍ෂණය කළ ටෙලිනාට්‍යයක පොලිස් චරිතයක් කළා. හැබැයි චරිත ස්වභාවය තුළ එකිනෙකට වෙනස් බවක් මම දකිනවා.

රටේ තිබෙන මේ ‘කොවිඩ්’ ප්‍රශ්නයත් එක්ක රටවටා රූපගත කිරීම් සඳහා සම්බන්ධ වීම අවදානම් නේද?

මම එහෙමයි කියලා එක දිගට වැඩ බාරගෙන කරන කෙනෙක් නෙවෙයි. වැඩ නොකර ගෙදරට වෙලා ඉන්නත් බැහැනේ. මට හොඳයි කියලා දැනෙන වෙනස් චරිතයක් ලැබුණොත් විතරයි මම සම්බන්ධ වෙලා වැඩ කරන්න යන්නේ.

දවසින් දවස එකතුවෙන අලුත් තරුත් එක්ක රුවන්ගිට නිර්මාණවල අඩුවක් තියෙනවද?

විවිධ ‘රියැලිටි’ වැඩසටහන් හරහා එහෙමත් නැතිනම් ‘ටික්ටොක්’ හරහා මේ ක්‍ෂේත්‍රයට කාලෙන් කාලෙට අලුත් පිරිස එකතු වෙනවා. ඉතින් එහෙම කවුරු සම්බන්ධ වුණත් මට තිබෙන ආරාධනාවල අඩුවක් නැහැ. මොකද මේ ක්‍ෂේත්‍රයේ යන්න ඕන පිළිවෙළ අපි දන්න නිසා. අලුත් මුහුණු දකිනවා. ආයේ කාලයත් එක්ක ඒ කවුරුත් දකින්නට නැහැ. එතැනින් කිහිප දෙනයි ඉතුරුවෙලා ඉන්නේ. හැබැයි මම අවුරුද්දක් රඟනොපා හිටියත් ප්‍රේක්‍ෂකයන්ට මාව අමතක නොවීම ගැන සතුටුයි. පාරට බැස්සත් අහවල් නාට්‍යයේ, අහවල් චරිතය මම හොඳට රඟපානවා කියලා මට කියනවා.

ජනප්‍රියතාවය රඳවා ගන්න ෆේස්බුක් ගොඩදෙනෙක් භාවිත කරනවා. ඒත් ඔබට ෆේස්බුක් ගිණුමක් තවම නැහැ නේද?

මම අද වෙනකල් ෆේස්බුක් ගිණුමක් පාවිච්චි කරලා නැහැ. හැබැයි මගේ නමින් විවිධ අය ෆේස්බුක් ගිණුම් හදාගෙන කටයුතු කරන බව මම දකිනවා. ජනප්‍රියතාවය රඳවා ගැනීමට ෆේස්බුක් අවශ්‍යයි කියලා මම හිතන්නේ නැහැ.

ඔබ පාවිච්චි කළ ඉන්ස්ටග්‍රෑම් ගිණුම තව කවුද හැක් කරලා තිබුණා නේද?

ඔව්… මම පාවිච්චි කළේ ඉන්ස්ටග්‍රෑම් ගිණුමක් විතරයි. ඒකත් පහුගිය අප්‍රේල් 20දා කවුද හැක් කරලා තිබුණා. මගේ තිබුණු පින්තූර සියල්ලම මකලා තිබුණා. හැබැයි කවුරුවත් එය අවභාවිත වෙන විදියට මොනවත් කරලා තිබුණේ නැහැ. මම මාසයකින් විතර නැවැත එය හදා ගත්තා.

කලා ක්‍ෂේත්‍රයේ කැදලිවලට කිරි සුවඳ හමන කාලෙක ඔබේ කැදැල්ලට ඒ සුන්දර දවස් ප්‍රමාද ඇයි?

මම විවාහ වෙලා දැන් ටික කාලයක් වෙනවා. ලබන අවුරුද්දේ විතර එය ගැන හිතනවා. පුංචි දරුවෙක්ගේ මුහුණක් බලන්න මමත් ගොඩාක් ආශාවෙන් ඉන්නේ.

උපුටා ගැනීම මව් රට