ජීවිතය ගෙවුණෙ සෙට් එකයි රූගතකිරීම් එක්කයි…
රඟපෑම වෙනුවෙන් ජීවිතයම කැපකළ කෙනෙක් මම… ලැබුණු පිටපත් ගණන අසීමිතයි… අන්තිමට මට මාවත් අමතක වුණා…
‘සබීතා පෙරේරා’ නම් සුරූපී නිළි තාරකාව ගැන පාඨක ඔබට හඳුන්වා දෙන්නට යමක් ඇත්දැයි නොදන්නෙමි.., කෙටියට යමක් ලියන්නේ නම්, ජේ සෙල්වරත්නම් තම නවතම නිර්මාණය සඳහා යොවුන් කෙල්ලක සහ කොල්ලකු හොයන විට ප්‍රේම් ජයන්ත්ගේ පුත් ජගත් රොහාන් සහ ස්ටැන්ලි පෙරේරාගේ දූ සබීතා පෙරේරා ඔහුට හමුවිය.මේ අලුත් මුහුණ දෙක දමා ඔහු නිර්මාණය කළ පෙම් පුවත ‘සබීතා’ නමින් තිරගත වූයේ 1980 වසර වර්ණවත් කරවමිනි.
ඊස්ට්මන් වර්ණ චිත්‍රපට ඒ තරමට ප්‍රසිද්ධ නැති ඒ කාල වකවානුවේ කළු – සුදු සැලෝලයිට් පට හරහා නිර්මාණය වූ ‘සබීතා’ චිත්‍රපටය බොක්ස් ඔෆිස් වාර්තා පිහිටු වූයේය. බොකුටු කොණ්ඩයක් තිබූ ලස්සන කොල්ලකු වූ ජගත් රොහාන් පළමු චිත්‍රපටයෙන්ම පල්ලම් බහිද්දී දුඹුරු ඇස් ඇති හැඩකාර කෙල්ලක වූ සබීතා පෙරේරා එක රැයින්ම සිංහල ‘රිදී තිරය’ දෙවනත් කළ සුපිරි තරුවක බවට පත්විය.
‘ආධුනික කෝඩකාරියකගේ නමින් ඔබ මේ චිත්‍රපටය නම් කරන්නට සිතුවේ ඇයිදැයි.., ජේ. සෙල්වරත්නම්ගෙන් සිනමා විචාරකයකු එහි මුහුරත් උළෙල මොහොතේ ඇසූ විට.., අනේ මන්දා… ඒ අලුත් මුහුණ මගේ ඇස් ඉස්සරහට පැමිණි මොහොතේ මම ඇගෙන් නම මොකක් දැයි ඇහුවා. ඈ අලංකාරව සිනාසී මට කිව්වා… ‘සබීතා’ කියා… එතකොටත් මම මගේ අලුත් චිත්‍රපටයට වෙනස් නමක් සොයමින් හිටියා. එක්වනම මට කියැවුණා ෂා… ඒ නම අපූරුයි. මගේ චිත්‍රපටයටත් ‘සබීතා’ කියලා නම තියමු කියලා.
අනුමානයට වාගේ ‘සබීතා’ පෙරේරා රඟපෑ පළමු චිත්‍රපටයටම ‘සබීතා’ කියා නම තැබීමට ජේ. සෙල්වරත්නම්ට සිතුණු සිතුවිල්ල ඔහුට මෙන්ම සබීතා පෙරේරාටද වාසනාව ගෙන ආවේ නොසිතූ ලෙසය. ඒ සටහන් වූයේ… එක්දහස් නවසිය අනූවේ පරණ කතාවකි.. මේ ‘දෙදහස් විසිඑකය.’ කාලය මොන තරම් වෙනස්කම් සිදු කළද, සබීතා පෙරේරාගේ ප්‍රතිරූපයට හෝ ජනප්‍රියත්වය වෙනස් වී නැත. ඈ… තවමත් ජනකාන්තය… සම්මානනීයය. ඉතින්.., හදවත ගැඹුරින්ම ඈ හා දොඩමලු වීමට සිතක් උපන්නේද ඈ සතු ඒ අද්විතීය බව නිසාමය.
පළමුව ස්තුති කරනවා, ‘හාට්’ සමග කතාබහට ඔබ පැමිණීම ගැන?
ස්තුතිය පිළිගන්නවා. මම කොහොමත් මාධ්‍ය සමග සුහදයි. මාධ්‍ය මඟහැරීමේ කලාවක් කවදාවත් මා තුළ තිබුණේ නැහැ.
ඔබේ නිහතමානී සුහද බව දෙන තොරතුරු අසා තිබෙනවා?
මඟතොටකදී ප්‍රේක්‍ෂකයනට වුණත් මම ඒ සුහද ප්‍රතිචාරය දක්වනවා. ඔවුන් මා වටකර ගනිද්දී මගේ දුක – සැප විමසද්දී මට දැනෙන සතුට හරිම ආත්මිකයි.
හැබැයි ‘රංගනය’ හිටි අඩියේ අතහැර දැමීමෙන් ඔබ ප්‍රේක්‍ෂකයට අසාධාරණයක් කළා නේද?
ඒක වැරැදි වැටහීමක්. මම රංගනය අතහැර දමා නැහැ. හොඳ නිර්මාණයක් සඳහා ආරාධනා ලැබුණොත් මම එය බාර ගන්නවා.
‘ඇඩ්‍රස් නැහැ’ චිත්‍රපටයට පසුව ඔබ රංගනයට තිත තැබුවේ නැතිද?
නැහැ… මෑතකදී මම ඉතාම ගුණාත්මක චිත්‍රපට නිර්මාණයකට දායක වුණා. ඉතාම ආශාවෙන් බාරගත් එම තිර පිටපතෙහි මා කළ රංගනය දැඩි කැපවීමක් මත කළයුතු චරිත නිරූපණයක් හා බැඳී තිබුණා. එහි මට හැකි උපරිමය මා කළේ ලොකු ආශ්වාදයකින්.
ඒ ගැන තොරතුරු ටිකක් කියමුද?
වරදවා හිතන්න එපා… ඒ ගැන කතා කිරීම මඳකට නතර කර දමනවා නම් හොඳයි. මොකද… තවම එය ‘ෆ්‍රෙස් රිලීස්’ කරලාවත් නැති නිසා.
‘පවුල’ යන බැඳීම තුළ සාර්ථක රංගනයක් කිරීමට වෙන්නැති ඔබ නිතර රංගනයට තිත තැබුවේ?
ඒ අදහස නම් හරියටම හරි.., කලාව වෙනුවෙන් ජීවිතය කැප කළ නිළියන් අතර මා ප්‍රමුඛව සිටිනවා… රංගනය වෙනුවෙන් කළ කැපකිරීම්ද අපමණයි. පුද්ගලිකය කියලා නිදහස් ජීවිතයක් මට තියෙනවා දැයි කියන කාරණය මගේ හිතට අමතක වන තරමට නිළියක ලෙස මම ඉතාම කාර්යබහුල වුණා. ලැබෙන තිරපිටපත් ගණන අසීමිත නිසා ඒ සඳහා කාලය වෙන්කර ගන්න ලොකු සටනක් කළා.
කෙටියෙන් කියනවා නම් ජීවිතයේ බොහෝ දවස් ගෙවුණේ ‘සෙට්’ එක සහ රූගත කිරීම් සමගයි. ඒ අසීමිත කලබලය තුළ මට සබීතා පෙරේරාව අමතකව ගිය වාරද අනන්තයි.ඒ වාගේම මා දිනූ දේ.., මගේ ජීවිතයට ඒ කැපකිරීම තුළ මා ලබාගත් දේ හරිම අමිලයි… ඒ අමිල වටිනාකම තුළ ජීවිතය මට උරුම කළ නිරාමිස සතුට බුක්ති විඳින අතර, මට හිතුණා ජීවිතයට යම් අස්වැසිල්ලක්, විවේකයක් ලබාගත යුතුයි කියලා.
අන්න ඒ විවේකයේදී මම නැවැත සබීතා පෙරේරා කියන නිළියක නොවන සාමාන්‍ය චරිතයට සේන්දු වුණා… එතැනදී තමයි මගේම කියන ජීවිතය සමග විවාහය යන බැඳීම මට මුණගැහුණේ. එතකොට මට හිතුණා සාර්ථක බිරියක සහ මවක වීම තුළද මම පුද්ගලිකව මගේ ජීවිතය ජයගත යුතුයි කියලා. එයට අවැසි අස්වැසිල්ල ලබා ගන්නට තමයි මම දීර්ඝකාලීන රංගනයට තිත තැබුවේ.
විවාහය සුපිරි තරුවක ලෙස නම තබා ගැනීමට බාධාවක් කියන මතය තුළ ඔබ එදා හිටියා නේද?
නැහැ… මම එහෙම හිතුවේ නැහැ.., හැබැයි නිළි වෘත්තිය නිසා මගේ ජීවිතය තුළ වූ දැඩි කාර්යබහුල බව නිසා විවාහය ගැන මම හිතන අවස්ථා අවම වී තිබුණා.
කෙසේ හෝ ඔබ විවාහ වී මවකගේ සහ බිරියකගේ චරිතය හරි අපූරුවට දැන් රඟපානවා?
ඔව්… මගේ පවුල් ජීවිතය තුළ මා ඉතාම තෘප්තිමත්ව කාලය ගෙවනවා.
ටෙලි තිරය තුළද ඔබ ලද ජනප්‍රියත්වය අසීමිතයි?
සත්තකින්ම… රිදී තිරය තරමටම මම පුංචි තිරය තුළද ප්‍රේක්‍ෂකයනට සමීප වුණා. තෝරාබේරා ගන්නට බැරි තරම් ටෙලිනාට්‍ය පිටපත් මා වෙත ගලා ආවා… ඒ සමහර චරිතයන් හරිම ගුණාත්මකයි. මා අතහැර දැමූ සමාජ චරිත රඟපා ඒ ඒ රංගනවේදිනියන් හොඳම නිළියට හිමි සම්මාන ගන්නා අවස්ථාද මම දුටුවා.
එවැනි ගුණාත්මක චරිත ඔබ අතින් මඟහැරුණේ ඇයි?
පවුල යන බැඳීම තුළ මගේ භූමිකාවෙහි හිස්තැන් තබන්නට මට ලෝබ හිතුණු නිසා ඒ මඟහැරීම සිදුවුණා.
ඔබ අද ඒ ගැන පසුතැවෙනවද?
අපොයි නැහැ.., ජීවිතයේ පළමු තැන මා හැමදාමත් දුන්නේ මගේ පවුලටයි. හැමදේටම වඩා ඒ සොඳුරු පසන් නිවෙස මට ප්‍රථමයි.
ඔබ රඟපෑ චරිතයන් අතර හොඳම චරිත කිහිපයක් ගැන කතා කරනවා නම්..?
එය වර්ගීකරණය කිරීම අසාධාරණයි, නමුත් මේ මොහොතේ මගේ හිතට පැමිණි චරිත කිහිපයක් ගැන කතා කරන්න කැමැතියි.‘සිසිල ගිනිගනී’ හී ඇනට් එහි පළමු පෙළ අතර සිටිනවා. දෙවැනි ගමන, විරාමය, ඇඩ්‍රස් නැහැ වැනි සම්භාවනීය චරිතයන් වාගෙම බඹසර බිසව්, සබීතා, නැවැත හමුවෙමු වැනි වාණිජමය චිත්‍රපට චරිතයන්ද මගේ මතකයෙහි සුවිශේෂීව තිබෙනවා. ඒ අතර මම තදින් ඇලුම් කරන ටෙලි චරිතයන්ද කිහිපයක් ගැන කතා කරන්නම ඕනෑ.
පිටගම්කාරයෝ හී යොවුන් ලියක අවධියේ සිට මහලු මවක වනතුරුම මා රඟපෑ චරිතයට මම හරිම ළැදියි. ඒ වාගෙම අකාල සන්ධ්‍යා, ඇසළ කළුවර ටෙලි කතාවන් තුළද මම හරිම ළෙන්ගතුව රඟපෑ චරිත තිබුණා. ඒ සියල්ල නැවැත විකාශනය වන සෑම අවස්ථාවකම මම නොවරදවාම නැරැඹුවා. තවමත් ප්‍රේක්‍ෂකයන් ඒ ඒ චරිතයන්ට දක්වන ඇල්ම මගතොටදී ඔවුන් දක්වන ප්‍රතිචාර ඔස්සේ අත්වින්දාය.
ඔය අතර සුදත් මහ දිවුල් වැවගේ, දන්දෙලු ගිනි’ ටෙලි කතාවද මගේ රංගන ජීවිතයේ සුවිශේෂීම සංධිස්ථානයක්… වාමාංශික කතා තේමාවක් රැගත් ඒ ටෙලිකතාවෙහි මා රඟපෑ චරිතය හරිම ප්‍රබලයි. චිත්‍රපටයකවත් මම එවැනි උද්වේගකර චරිතයක් රඟපාලා නැති තරම්.., එය නැවැත විකාශනය වනතුරු මම ආශාවෙන් පෙරුම්පුරා බලා සිටිනවා. ඒ වගේම එය නැවැත විකාශනය කරන්නැයි කියා මම රූපවාහිනි සේවයෙන්ද ඉල්ලා සිටියා. ළඟකදී ‘දන්දෙලු ගිනි’ නරඹන්නට හැකි වේයැයි සිතනවා.
‘සෙට්’ එකේදී ඔබ ඉතාම නම්‍යශීලී රංගනවේදිනියක්?
ඔව්… මා තුළ වූ යමක් අධ්‍යක්‍ෂවරයාට ගන්නට අවැසි නම් මම ඔහු හමුවේ ඉතාම සන්සුන්ව නම්‍යශීලීව ඒ සඳහා ඉඩ දෙනවා. ඒ වාගෙම අනෙකුත් සහෝදර ශිල්පීන්, ශිල්පිනියන් සමග සුහදව වැඩ කිරීමේ පුරුද්ද සහ හැකියාව මට කවදත් තිබුණා.
කොයිතරම් සුහදව හිටියත් යම් අසුන්දර අත්දැකීම්ද ඔබ අත්වින්දා?
ජනප්‍රිය සිනමා තරු කොයිකාටත් කටකතා සහ කැපිලි – කෙටිලි තිබුණා. එය එදත්, අදත්, හෙටත් එහෙමයි. ඉතින් මමද එයට බඳුන් වුණා. හැබැයි ඒ සියල්ලට මා දුන් උපේක්‍ෂාසහගත ප්‍රතිචාරය නිසා ඒ සියල්ල හරි ඉක්මනින් සමනයකට පත්වුණා.
IFA සම්මාන උළෙල සඳහා ශ්‍රී ලංකාවට පැමිණි ‘විවේක් ඔබ්රෝයි’ ඔබේ රූ සපුව ගැන ප්‍රසිද්ධියේ වර්ණනා කළා?
එහෙම දෙයක් වුණාද? අනේ මට මතකත් නැහැ වගේ. මං ලස්සන යැයි ඔහු කීවා නම් ඇත්තටම එය සතුටක්.
ඔබ ගැන ඔබට හිතෙන විදිය පවසනවා නම්..?
‘සබීතා පෙරේරා’ ඇත්තෙන්ම වාසනාවන්තයි.., ඒ වගේම සරල ජීවිත රටාවක් තුළ ලද දෙයින් සතුටට පත්වීම තුළ මම තෘප්තිමත්ව සිටිනවා.
දමයන්ති රේණුකා ප්‍රනාන්දුඋපුටා ගැනීම මව් රට
