සක්කාරං නාට්‍යයේ පුංචි ජයවතී මම තමයි…
මම ගොඩක් කැමැති ගැමි චරිතවලට… මම ලබන අවුරුද්දෙ ශිෂ්‍යත්වෙ ලියනවා…
කවුද මේ පුංචි ජයවති? ඒ සිඟිති දියණියගේ රුව දුටු සැණින් ඔබ සොයන්නට ඇති. ඒ පුංචි දුවගේ සුරතල් හඬ වගේම ඇයගේ නර්තනයන්ද දැක මොහොතකට හරි සතුටු වෙන්නට ඇති. මේ පුංචි ජයවති අපිට හමුවුණේ ‘සක්කාරං’ ටෙලිනාට්‍යයෙන්. ඉතින් ඒ සිඟිති දියණියගේද දක්‍ෂතා ඔබ වරින්වර දැක තිබුණත් ඒ ගැන රටටම කියන්නට කිසිම මාධ්‍යයක් ඉදිරිපත් වෙලා නැහැ. ඉතින් ‘මව්රට’ ජාතික පුවත්පත මේ පුංචි දියණියගේ දක්‍ෂතාව ගැන රටටම කියන්නට අපි සෂායා දෙව්නාවි අප්සරා පුංචි දුවට කතා කළා.
සෂායා දුව මේ දවස්වල මොකද කරන්නේ?
අලුත් ටෙලිනාට්‍ය දෙකකට සම්බන්ධ වෙලා වැඩ කරගෙන යනවා.
අපිත් කැමැතියි ඒ මොනවද කියලා දැනගන්න?
‘ආරිවංශික’ සහ ‘ඉන්ටර්නැෂනල්’ දෙවැනි අදියර ටෙලිනාට්‍ය දෙකේ තමයි වැඩ කරන්නේ.
ඔබව ගොඩදෙනෙක් දැනහඳුනගත්තේ ‘ජයවති’ ලෙසට නේද?
‘සක්කාරං’ ටෙලිනාට්‍යයේ පුංචි ජයවති මම තමයි. ඒ ටෙලිනාට්‍යයේ මම කරපු චරිතය අදටත් ගොඩදෙනෙක්ට මතකයි.
ඔය පුංචි වයසට රෙද්ද, හැට්ටය ඇඳගෙන රඟපාන්න පුළුවන් වුණාද?
මුලදි නම් පොඩි අපහසුවක් දැනුණා. පස්සේ ඉතින් මම එයට හුරු වුණා. මම පෙර පාසල් යන කාලෙත් රෙද්ද, හැට්ට ඇඳගෙන වැඩිහිටි චරිත රඟපාලා තියෙනවා.
‘ජයවති’ චරිතයෙන් පස්සේ දුවට ආපසු රෙද්දයි හැට්ටෙයි ඇඳගෙන රඟපාන්න අවස්ථාව ලැබුණේ නැද්ද?
‘ආරිවංශික’ ටෙලිනාට්‍යයේ මම ‘යසවත්’ කියලා ගැමි චරිතයක් රඟපාන්නේ. එකෙත් රෙද්දයි, හැට්ටෙයි ඇඳගෙන තමයි රඟපාන්නේ. ඉදිරියේදී බලාගන්න පුළුවන් හැමෝටම.
දුව ගැමි චරිත රඟපාන්න ගොඩක් කැමතියි වගේ නේද?
ඇත්තටම ඔව්… මම ඒ වගේ දුප්පත්, අහිංසක ගැමි චරිත රඟපාන්න ගොඩාක් කැමැතියි. මට රඟපාන්න ආරාධනාවක් ලැබුණොත් මම ඉස්සෙල්ලාම බලන්නේ ගැමි චරිතයක්ද කියලා. ඊට පස්සේ පිටපත අපේ අම්මත් බලලා හොඳයි නම් මට රඟපාන්න කියනවා.
ඔයාට ටෙලිනාට්‍යවල මෙහෙම රඟපාන්න අවස්ථාව ලැබුණේ කොහොමද?
මම ඉස්සෙල්ලාම ‘දිදුල’ රූපවාහිනී නාළිකාවේ ළමා නිවේදකාවක් ලෙසට හිටියා. ඊට පස්සේ මාව දැකලා ‘සුභා තෙරණියෝ’ චිත්‍රපටයට රඟපෑමට අවස්ථාවක් ලැබුණා. ගොඩාක් මට රඟපාන්න අවස්ථාව ලැබුණේ ‘සක්කාරං’ ටෙලිනාට්‍යයේ ‘ජයවති’ චරිතය දැකලා තමයි. මම එයට කලින් ටෙලිනාට්‍යවල පොඩි චරිත රඟපෑවා.
ඉතින් දැන් දුව ඉගෙනගන්න පාසල කොහෙද?
දියගම කනිෂ්ඨ විද්‍යාලය, හෝමාගම.
දුව දැන් කීවැනි පන්තියේද?
මම හතර වසරේ.
දුවගේ පාසලෙන් අවසර දෙනවද රඟපාන්න?
ඔව්… මගේ පාසලේ මම විතරයි රඟපාන්න සම්බන්ධ වෙලා ඉන්නේ. පාසලේ විදුහල්පතිනි දමයන්ති සේදරාරච්චි ඇතුළු පාසලේ සියලුම ගුරුවරුන්ගෙන් මට ලොකු සහායක් ලැබෙනවා.
දැන් ඔන්ලයින් අධ්‍යාපනකරණයත් නතර කරලා. දුවට පහසුවක් වුණාද ඔන්ලයින් හරහා ඉගෙන ගැනීමට?
අනේ නැහැ මාමේ… ලබන අවුරුද්දේ මම ශිෂ්‍යත්වය විභාගය ලියනවා. පාසලට ගිහින් ඉගෙන ගන්න තරම් ලොකු දැනුමක් ඔන්ලයින් හරහා ඉගෙනගන්න අමාරුයි. පාසලේ ගුරුවරුන් ඔන්ලයින් හරහා දුන්න පැවරුම් වැඩ මම ඉතින් කොහොම හරි කළා. ඒත් මම කැමැති ඉක්මනින් අපට පාසලට ගිහින් ඉගෙනගන්න අවස්ථාව ලැබෙනවාට තමයි.
වසන්ත විතාරණගේඋපුටා ගැනීම මව් රට
