කටකතා පැතිරුනාට ඇත්ත දන්නේ මම…

මාව අයින් කරන තැනට වැඩ සිද්ධ වුණා… මගේ තාත්තා පිළිකාවක් හැදිලා නැතිවුණා…

සහෝදර ප්‍රේමය තරම් තවත් උත්තරීතර ප්‍රේමයක් මේ මිහිපිට බැඳී ඇතිද? එලෙස බැඳුණු සහෝදරත්වයක් ගොඩනැඟුණු ආදර කතාවකට පණපොවන ආදරණීය කතාවක් තමයි ‘පාරදිගේ’ ටෙලිනාට්‍යය. ඉතින් තම සහෝදරයාගේ දියුණුවට වගේම ඔහුගේ රැකවරණයට නිරන්තරයෙන්ම සොයා බලන ආදරණීය නැඟණියක් අපට හමුවුණා. හැබැයි ඉතින් තම සහෝදරයා පවුලේ අයට හොරා කරන සිදුවීම් මාලාව තම නැඟණිය දැනගත්දාට මොනවගේ ඉරණමක් උදාවෙයිද කියා අප කාටවත් තවම හිතාගත නොහැකිය. ඉතින් මේ දිනවල විකාශ වන ‘පාරදිගේ’ ටෙලිනාට්‍යයේ ‘රුවිනි’ ලෙසින් ඔබට සමීප වන ආදරණීය නැඟණිය තමයි නිත්‍යා දේවින්දි. ඇය මේ දිනවල ‘පාරදිගේ’ සැරිසරණ අතරතුර ‘මව්රට – හාට්’ පිටු අතරතුර නතර කරගත්තේ මේ විදියටයි.

නිත්‍යාව මේ දවස්වල ‘පාරදිගේ’ සැරිසරන බව අපි දකිනවා. කොහොමද ‘පාරදිගේ’ යන ගමනේ සොඳුරු අත්දැකීම්?

මෙතෙක් මම රඟපාපු ටෙලිනාට්‍ය අතර සුවිශේෂී නිර්මාණයක් ලෙසට ‘පාරදිගේ’ ටෙලිනාට්‍ය හඳුන්වන්න කැමැතියි. මගේ රංගන ජීවිතයට ගොඩාක් දේවල් මම ‘පාරදිගේ’ යනගමන් එකතු කර ගැනීමට වාසනාව ලැබුණා. විශේෂයෙන්ම ප්‍රවීණ රංගන ශිල්පීන් රැසක් සමග මට වැඩ කරන්න ලැබීම සතුටක්. ඒ වගේම දැනට ටෙලිනාට්‍ය ක්‍ෂේත්‍රයේ ඉහළින්ම සිටින නිර්මාණවේදියෙක් වන ජයප්‍රකාශ් සිවගුරුනාදන්ගේ නිර්මාණයක වැඩ කිරීමට මාව තෝරාගත් එතුමාටත්, ඒ වගේම චාමර සමරවික්‍රම අයියාටත් මම විශේෂ ස්තුතිය පුදකරනවා අපේ මේ මාධ්‍ය සාකච්ඡාව පටන්ගැන්මට පෙර ඔවුන්ව අමතමින් කතාවට මුලපිරීමට.

ඔබේ මුල්ම රංගනය අපි දැක්කේ ‘මුතුලෙන්දොර’ ටෙලිනාට්‍ය තුළින්. ඒ ගැන යමක් පැවැසුවොත්?

2019 දෙරණ අවුරුදු කුමරිය තරගාවලියේ අවසන් දොළොස් දෙනා අතරට මාව තේරුණා. ඒ හරහා තමයි මම කලා ක්‍ෂේත්‍රයට සම්බන්ධ වන්නේ. ‘මුතුලෙන්දොර’ ටෙලිනාට්‍යයේ නෙලුම්ගේ චරිතය තමයි මම නිරූපණය කලේ. ඒ ටෙලිනාට්‍ය පසුගිය කාළේ දහවල් කාලයේ තමයි විකාශය වුණේ. ඒ කාලය තුළින් වෙනම ප්‍රේක්‍ෂක පිරිසක් මට සමීප වුණා. නමුත් ඒ සියල්ලටම වඩා දැන් ‘පාරදිගේ’ ටෙලිනාට්‍යයේ මම නිරූපණය කරන ‘රුවිනි’ චරිතයට හොඳ ප්‍රතිචාර ලැබෙනවා.

ඇයි ඔබ හිටිගමන් ‘මුතුලෙන්දොර’ ටෙලිනාට්‍ය තුළින් ඉවත් වුණේ?

‘මතුලෙන්දොර’ ටෙලිනාට්‍යයේ විවිධ ප්‍රශ්න මතුවුණා. නමුත් මම කිසිම මොහොතක ඒ නිර්මාණයට අසාධාරණයක් කිරීමට මම උත්සාහ කළේ නැහැ. මාව ඒ නිර්මාණයෙන් ඉවත් කරන තැනට ප්‍රශ්න මතුවෙලා ආවා. ඒ නිර්මාණයේ වැඩ කරපු පිරිස තමයි මාව ඉවත් කළේ.

හැබැයි පැතුරුණු කටකතාව නම් වෙනස් දෙයක් නේද?

කාට මොනවා කියන්න බැරි. ඕනෑම කෙනෙකුට විවිධ දේවල් කටකතා තුළින් පතුරන්න පුළුවන්. නමුත් ඇත්ත දන්නේ මම විතරයි. මම ටෙලිනාට්‍යවල රඟපාලා අතරමග චරිත දාලා යන කෙනෙක් කියලා විවිධ කටකතා පැතිරුණා. නමුත් මම කවුද, කොහොම කෙනෙක්ද කියලා ‘පාරදිගේ’ ටෙලිනාට්‍ය එයට පිළිතුරු දෙයි. මට ලැබෙන චරිතයට උපරිම සාධාරණයක් කරමින් නිර්මාණය සාර්ථක කිරීමට තමයි මම නිරන්තරයෙන්ම උත්සාහ කරන්නේ.

‘මතුලෙන්දොර’ නිර්මාණයෙන් පසු ඔබ මේ ක්‍ෂේත්‍රය ගැන ගොඩාක් කලකිරීමෙන්ද සිටියේ ඔබට සිදුවුණු දේවල් එක්ක?

ඇත්තටම ඔව්… මම ගොඩාක් කලකිරීමකින්, වේදනාවකින් තමයි හිටියේ. නමුත් ඒ හැම වේදනාවක්ම නැතිවුණා ‘පාරදිගේ’ ටෙලිනාට්‍යයේ වැඩ කරමින් කාලය ගෙවී යන විට.

ඔබේ ජීවිතයට ආපු ප්‍රශ්නත් එක්ක කොහොමද මේ සියල්ලටම මුහුණ දුන්නේ?

මගේ පියා 2018 වසරේ පිළිකාවක් හැදිලා නැතිවුණා. එදායින් පසු අපේ ජීවිතවලට විවිධ ප්‍රශ්න ආවා. මගේ මව නිර්භීත, ශක්තිමත් ගැහැනියක්. ඇයගෙන් ශක්තිය අපට ලැබුණා. ඒ වගේම කිසිම මොහොතක මගේ අයියා මාව තනිකළේ නැහැ. මගේ පවුලේ සියලුම දෙනාම මං එක්ක හිටියා.

වසන්ත විතාණගේඋපුටා ගැනීම මව් රට