සුනිල් ආරියරත්න කියලා නිර්ධාට කතා කළේ කවුද?
පසුගිය කාලයේ මහාචාර්ය සුනිල් ආරියරත්න යැයි කියා ගන්නා ව්‍යාජ පුද්ගලයකු විසින් ඔහුගේ චිත්‍රපටයකට රංගනයෙන් දායක වීමට අවස්ථාව ලබා දෙන බව කියමින් බොහෝ දෙනකුට දුරකතන ඇමතුම් හා කෙටි පණිඩුඩ ලබා දී ඇති බව අපට දැනගන්නට ලැබුණා. මෙම වංචනික ක්‍රියාවේ දිගින් දිගට ම නිරත වූ ඔහු කවුදැයි මේ වන තෙක් හඳුනාගෙන නැහැ. මේ පුද්ගලයාගේ වංචනික ක්‍රියාවට හසුවූ එක් රංගන ශිල්පිනියක වන නීර්ධා උයන්හේවාගෙන් සත්‍ය තොරතුරු විමසන්නට හදගැස්ම අපි ඇයට කතා කළා.
කොහොම ද මේ දවස්වල ජීවිතේ?වසංගතය හේතුවෙන් රටේ පවතින තත්ත්වයත් එක්ක මම කරපු ටෙලි නාට්‍යවලිනුත් ඈත්වෙලා ඉන්නේ. එම නිසා මේ දවස්වල ජීවිතේ නිදහසේ ගෙදර ම තමයි ගෙවෙන්නේ.
පහුගිය දවස්වල වැඩිය දකින්න ලැබුණේ නැත්තේ ඇයි?මම වැඩවලට සම්බන්ධ වෙලා හිටියා. ජාතික රූපවාහිනියේ විකාශය වුණ නාලන් මෙන්ඩිස් මහත්මයාගේ 'නෑනාලා' කියන ටෙලි නාට්‍යයේ මම රඟපෑවා. එහි මගේ චරිතය ගොඩක් ජනප්‍රිය වුණා. විශේෂයෙන් නාලන් මෙන්ඩිස් මහත්මයාගේ නිර්මාණවල කතාබහට ලක්වෙන චරිත මට ලැබිලා තිබෙනවා. ඒ වගේ ම ස්වර්ණවාහිනියේ බස් එකේ ඉස්කෝලේ කියන ටෙලි නාට්‍යයටත් රංගනයෙන් දායක වුණා. ක්ෂේත්‍රයේ කිහිප දෙනකුටත් කොරෝනා වැළඳුණු නිසා එම නාට්‍යයෙන් කියලා අයින් වුණා. මොක ද මම අම්මා, තාත්තා එක්ක ඉන්නේ. ඒ දෙන්න ම වයස නිසා පරිස්සම් වෙන්න ඕන කියලා හිතුණා. මම ටෙලි නාට්‍ය පහක් හයක් එකවර භාර අරගෙන රඟපාන, ගොඩක් කාර්ය බහුල රංගන ශිල්පිනියක් නොවෙයි. මම අවුරුද්දකට භාර ගන්නේ නිර්මාණ දෙකක් හෝ තුනක් පමණයි. නමුත් මම රඟපාන එම චරිත හරහා ජනප්‍රිය වෙනවා. මම පසුපස හඹාගෙන ගොස් රංගනයේ යෙදෙන්නේ නැහැ. මම මේ ක්ෂේත්‍රයට පැමිණිලා අවුරුදු 23ක් පමණ වෙනවා. ඇත්තට ම මට සතුටුයි මම ආපු ගමන ගැන.
ඔබව ඉදිරියේදී දකින්න පුළුවන් නිර්මාණ මොනවා ද?ගොඩක් නිර්මාණවලට කතා කළා. නමුත් මම භාර ගත්තේ නැහැ. ඉදිරියට නිර්මාණ කිහිපයක් ම එන්න තිබෙනවා. සම්පූර්ණයෙන් ම රූගත කිරීම් අවසන් කරපු නිර්මාණත් කිහිපයක් ම විකාශය වෙන්න තිබෙනවා. කොටස් 15ක් 20ක් පමණ රූගත කළ නිර්මාණත් කිහිපයක් ම තිබෙනවා. ඒවා නම් විකාශය වෙයිද නැත්ද කියන්න මම දන්නේ නැහැ.
පහුගිය දවසක මුහුණ දුන්නු ඇබැද්දිය ගැනත් ගැන කතා කරමු?නෑනාලා ටෙලි නාට්‍යයේ අවසන් ෂෙඩූල් එකේ හිටිය සහය අධ්‍යක්ෂවරයා සති දෙකකට පමණ පෙර මට කතා කරලා කිව්වා මහාචාර්ය සුනිල් ආරියරත්න අලුතෙන් කරන චිත්‍රපටයට අක්කව ගන්න හොයනවා. මම අක්කට නම්බර් එක දෙන්නම්. අක්කා වට්ස්ඇප් එකෙන් කෝල් එකක් ගන්න කියලා. මම කිව්වා සුනිල් සර්ට මගේ නම්බර් එක දෙන්න කියලා. ඊට පසුව සුනිල් ආරියරත්න යැයි කියන පුද්ගලයා මට දුරකතන ඇමතුමක් දුන්නා. රවීන්ද්‍ර විස්තරේ කිව්වා නේද කියලා අහලා නීර්ධා ඔයාට වට්ස්ඇප් තියෙනව ද? මට වට්ස්ඇප්වලින් තමයි කතා කරන්න ඕනෙ කියලා කිව්වා. මට ඒ මොහොතෙත් පොඩි අමුත්තක් දැනුණත් ඔහු ඊට පසුව කිව්වා මගේ ඡායාරූප කිහිපයක් එවන්න කියලා. ඒක සාමාන්‍ය නිසා මම ඡායාරූප කිහිපයක් යැව්වා. ඔහු කරපු චිත්‍රපට සියල්ලේ ම ඡායාරූප එවලා තිබුණා.
මහාචාර්ය සුනිල් ආරියරත්න මහත්මයා සමග මම මීට පෙර කතා කරලා තිබුණේ නැහැ. ඉතින් මම හිතුවා එතුමාගේ චිත්‍රපටයකට සම්බන්ධ වීමට ලැබීම ලොකු භාග්‍යයක් කියලා. ඔහු මට චරිතය සඳහා ලොකු මුදලක් දෙන්නත් පොරොන්දු වුණා. ඒකත් මට එකපාරට හිතා ගන්න බැරි වුණත් මම හිතුවා ඒ ඔහුගේ විධිය කියලා.
චිත්‍රපට සංස්ථාවත් සමග සම්බන්ධ වෙලා මුහුරත් එක ලබන සතියේ පවත්වන්න සංවිධානය කරලා තිබෙනවා, ඒ සඳහා සම්මුඛ සාකච්ඡාවක් කර ගන්න අවශ්‍යයි කියලා කිව්වා. නමුත් ඔහු කාර්ය බහුල නිසා රාත්‍රී 9ට පමණ ඇමතුමක් ගත්තාට කමක් නැද්ද ඇසුවා. සුනිල් සර් ගැන තිබුණු ගෞරවය නිසා මම කිව්වා සර්ට පහසු වෙලාවක ගන්න කියලා. රාත්‍රී 9.30ට පමණ අරගෙන මට කිව්වා මේ සාකච්ඡාව කරන්නේ ඔයාගෙ දැනුම බලන්න. මේ රෙකෝඩ් කරන්නේ ඔක්කොම ඉරියව් හොඳින් බලා ගන්න අවශ්‍ය නිසා මගේ පැත්තේ කැමරාව ඔන් කරන්න කිව්වා. ඔහු කැමරාව ඔන් කරන්නේ නැති බවත් කිව්වා. ගැටලුවක් තිබෙනවා ද කියලත් ඇහුවා. වැදගත් විධියට කතා කරන නිසා මම ගැටලුවක් නොමැති බව පැවැසුවා. පැය භාගයක් පමණ චිත්‍රපට ගැන සහ සාමාන්‍ය දැනීම ගැන ප්‍රශ්න ඇහුවා.
ඊට පසුව ඔහු කිව්වා මුඩුක්කු සංස්කෘතිය ගැන දැන ගන්න ප්‍රශ්න කිහිපයක් අහන්න තිබෙනවා ඒ ගැන අමුවෙන් කතා කරන්න අවශ්‍ය බව. පසුව ඔහු සමලිංගිකයන් පිළිබඳව ප්‍රශ්න කිහිපයක් ඇසුවා. මම ඒවට සාමාන්‍ය ලෙස පිළිතුරු දුන්නා. ඔහුට සමහර වචන මගේ කටින් කියවගන්න අවශ්‍ය වුණා. පසුව ඔහු කාන්තා සමලිංගිකත්වය ගැන කතා කරන්න අවශ්‍ය බව පැවැසුවා. ඒත් සමග ම මම දුරකතනය විසන්ධි කළා. මම කනගාටු වෙනවා ඒ පුද්ගලයාට සිය සැරයක් පමණ සර් කිව්ව එක ගැන. මේ සිද්ධිය නිසා මම විශාල අපහසුතාවකට පත් වුණා.
මේ පුද්ගලයාගේ හැසිරීම පිළිබඳව ඔබට මුලින් සැකයක් ඇති වුණේ නැද්ද?කිහිප වතාවක් ම පොඩි පොඩි සැක මතු වුණා. නමුත් මේක සහාය අධ්‍යක්ෂවරයෙක් හරහා ලැබුණු ඇමතුමක් නිසා මම විශ්වාස කළා. නමුත් මම නැවත වතාවක් සහය අධ්‍යක්ෂවරයාට කතා කරලා ඇහුවා මේ සුනිල් ආරියරත්න කියලා හොඳට ම විශ්වාස ද කියලා. ඔහු කිව්වා ඒ සුනිල් ආරියත්න ම තමයි කියලා.
මේ ඇත්ත ම සුනිල් ආරියරත්න නොවෙයි කියලා ඔබ දැනගත්තේ කොහොම ද?මම වට්ස්ඇප් හරහා ගත්ත ඇමතුම විසන්ධි කළාට පසුව ඔහු සාමාන්‍ය ඇමතුමක්වත් අරගෙන ඇයි ඇමතුම විසන්ධි කළේ කියලා ඇහුවේ නැහැ. අනිත් එක මම සෑහෙන අපහසුතාවට පත්වුණා. මට රාත්‍රියේ නින්ද ගියෙත් නැහැ. මම උදේ ම නාලන් මෙන්ඩිස් අයියට කතා කරලා සිද්ධිය පැවැසුවා. ඊට පසුව මම මහාචාර්ය සුනිල් ආරියරත්නයන්ගේ දුරකතන අංකය හොයාගෙන එතුමාට කතා කරලා සිදු වූ දේ පැවසුවා.
මේ ගැන මහාචාර්ය සුනිල් ආරියරත්නයන්ගෙන් ලැබුණේ මොනවගේ ප්‍රතිචාරයක් ද?රංගන ශිල්පිනියන් කිහිප දෙනකුට ම මෙවැනි සිද්ධීන් වෙලා තිබෙන බව ඔහු පැවසුවා. ඔහු නම් වශයෙන් කිහිප දෙනෙක් ගැන පැවසුවා. ඔහු ඒ ගැන පොලිසියේ පැමිණිල්ලක් දමා තිබෙන බවත් පැවැසුවා.
ඔබ මේ සඳහා නීතිමය ක්‍රියාමාර්ගයක් ගත්තා ද?ඔව්. මම එදා හිටියේ ගාල්ලේ. මම ගාල්ලේ පොලිසියේ පැමිණිල්ලක් දැම්මා. මහාචාර්ය සුනිල් ආරියරත්න මහත්මයත් පොලිසියට පැමිණ කටඋත්තරයක් දුන්නා. ව්‍යාජ සුනිල් ආරියරත්නව හඳුන්වා දුන් සහය අධ්‍යක්ෂවරයාවත් පොලිසියට කැඳෙව්වා. නමුත් ඔහු පළමු දිනයේදී පොලිසියට පැමිණියේ නැහැ. දෙවැනි දිනයේදී පැමිණියා. ඔහුව අත්අඩංගුවට ගත්තා. මට සහය අධක්ෂවරයා සමග කිසිදු ගැටලුවක් හෝ තරහක් නැහැ. මම ඔහුටත් ඒ බව පැවැසුවා. ඔහු මේ සිද්ධියට සම්බන්ධයි ද නැද්ද කියන එක ගැන මම දන්නේ නැහැ. මේ පුද්ගලයා පිළිබඳව තොරතුරු කිසිවක් ම ඔහු පැවැසුවේ නැහැ. පසුව දැඩි කොන්දේසි මත ඇප මත ඔහුව නිදහස් කර තිබුණා. මට සිදුවූ අපහසුතාවට සහ නැවත මෙවැනි දෙයක් කිසිවෙක්ට නොවෙන්න අවශ්‍ය නිසායි මම නීතිමය පියවරක් ගත්තේ. නමුත් මීට පෙර බොහෝ දෙනෙක්ට මේ ව්‍යාජ පුද්ගලයා කතා කරලා තිබුණා. මම ඒ ගැන දැනුවත්ව සිටියේ නැහැ.
මීට පෙර මෙම ව්‍යාජ පුද්ගලයා සම්බන්ධයෙන් කිසිවෙක් නීතිමය ක්‍රියාමාර්ග අරගෙන තිබුණේ නැද්ද?නැහැ. මමත් පුදුම වුණා ඒ සම්බන්ධව. මොකද මම පුදුමාකාර විධියට අපහසුතාවට පත් වුණා මේ නිසා. දැන් අවුරුද්දක පමණ කාලයක සිට මේ පුද්ගලයා විවිධ අයට කතා කරලා තිබුණත් කිසිම කෙනෙක් පොලිසියේ පැමිණිල්ලක් දාලා තිබුණේ නැහැ.
මේ සිද්ධිය වාර්තා කිරීමේදී සමාජ මාධ්‍ය හැසිරීම ගැන ඔබේ අදහස කුමක්ද? සමහර මාධ්‍ය වගකීමෙන් තොරව පළ කරන අසත්‍ය ප්‍රචාර නිසා මම තවත් අපහසුතාවට පත්වුණා. අපිත් දුරකථනයෙන් පුවත් බලනවා. නමුත් මම මගේ සිද්ධිය හරහා තේරුම් ගත්තා සමහර සමාජ මාධ්‍ය වෙබ් අඩවි පවත්වාගෙන යන්නේම බොරුවෙන් කියන එක. මේ ගැන විශාල වශයෙන් විවිධ සමාජ මාධ්‍යවල වාර්තා කළා. නමුත් ඔවුන්ගේ හෙඩ් ලයින් එක වෙලා තිබුණෙ ව්‍යාජ සුනිල් ආරියරත්න සමග නිර්ධා විශාල මුදලකට වීඩියෝවක් කරයි වගේ මාතෘකා. බොහෝ දෙනෙක් මේ වගේ පුවත්වල කියවන්නෙ හෙඩ් ලයින් එක විතරයි. එහෙම කියවලා වැරදි අදහසක් ගත්ත බොහෝ දෙනෙක් මට කතා කරලා මේක ඇත්ත ද කියලා ඇහුවා. සමාජ මාධ්‍ය වෙබ් අඩවිවලට අවශ්‍ය වීව්ස් ගන්න විතරයි. ඒ හරහා සිදුවෙන හානිය ගැන ඔවුන්ට තැකීමක් නැහැ. මේ වගේ අසත්‍ය හෙඩින් භාවිත කෙරෙන එකෙන් ඇත්තට ම මම තවත් අපහසුතාවට පත්වුණා. ඒ නිසා මේ වගේ සම්මුඛ සාකච්ඡාවකින් හරි සත්‍ය මිනිස්සුන්ට කියන එක මට වැදගත්. මොක ද එතැන කිසි ම අසභ්‍ය සිදුවීමක් සිදු වුණේ නැහැ. ඔහු සමලිංගිකයන් පිළිබඳ ප්‍රශ්න ඇසුවා පමණයි. ඒ සිදුවීම නිසා සිදුවූ අපහසුතාව සහ එම පුද්ගලයාගේ වංචනික ස්වාභාවය හෙළි කිරීම සඳහායි මම නීතිමය ක්‍රියාමාර්ගයක් ගත්තේ.
උපුටා ගැනීම මව්බිම
