තට්ටේ ගාන්න බෑ කියපු නිසා චිත්‍රපටයක් මඟහැරුණා
බ්‍රෝ, හේලී, පැහැසරා ආදී ටෙලිනාට්‍ය කිහිපයකින්, එකිනෙකට වෙනස් චරිත තුළින් සහෘද සිත් තුළ අමතක නොවන මතකයක් එක්කළ ඇය සුධීක්ශා සමාධියි.
කොහොමද මේ දවස්වල ජීවිතේ?
මේ දවස්වල ගොඩක් පරිස්සමින් ගෙදරටම වෙලා ඉන්නවා. ආයෙත් ඉක්මනින්ම කලා කටයුතුවල නිරත වීමට බලාපොරොත්තු වෙනවා.
කලා කටයුතුවල විස්තර කොහොමද?
ඉරේෂ් ලොකුබණ්ඩාරගෙ අලුත් ටෙලිනාට්‍යයකට සම්බන්ධ වුණා. එය නුදුරේම විකාශය වේවි.
කලාවට පිවිසෙන්නේ කොහොමද?
චිත්‍රපටයක ස්ක්‍රීන් ටෙස්ට් එකකට සහභාගි වුණා. එයිනුයි ක්ෂේත්රයට පිවිසෙන්නේ.
ඒ චිත්‍රපටයට ඔබව තේරීපත් වෙනවාද?
ඔව්. ඒ චිත්‍රපටයට මාව තෝර ගත්තා. හැබැයි ඒකට සම්බන්ධ වෙන්න මට බැරි වුණා. මොකද මට ලැබුණු එම චරිතෙට මුළු කොණ්ඩෙම තට්ටෙ ගාන්න කිව්වා. ඒ නිසා ඒ චරිතයට සම්බන්ධ වීමට මට නොහැකි වුණා.
ඒ අවස්ථාව මඟහැරීම ගැන දුකක් නැද්ද?
රංගන ජීවිතය ආරම්භයේ දීම ලැබුණු ඒ අවස්ථාව ගොඩක් වටිනවා. ඒ කාලේ මං ගොඩක් පොඩියි. දැන් ඒ වගේ චරිතයක් ලැබුණොත් අනිවාර්යෙන්ම භාර ගන්නවා.
ඔබ ප්‍රවීණයන් සමඟ කරට කර කටයුතු කරන කෙනෙක්. ඔවුන්ගෙන් ලැබෙන සහයෝගය කෙබදුද?
ප්‍රවීණයන්ගෙන් ලැබෙන සහයෝගය මෙතෙකැයි කියන්න අපහසුයි. ප්‍රවීණයන්ට අප ලබාදෙන සහයෝගය හා ගෞරවය මතයි අපටත් ඔවුන්ගේ මඟපෙන්වීම හිමි වන්නේ. ඒ නිසා නිහතමානීව ඔවුන්ගේ දැනුම උකහා ගැනීම තුළ ඔවුනුත් හදවතින්ම උදවු කරනවා. බොහොමයක් නවකයන් තමන්ගේ වැරැදි අඩුපාඩු හදාගන්න නිහතමානී නොවීම මතයි ප්‍රවීණයන්ව මඟහැරෙන්නේ.
රංගනය හැදෑරීමක් කරල තියෙනවද? නැත්නම් හදාරන්න බලාපොරොත්තු වෙනවද?
රංගනය හැදෑරීම තුළයි මං ක්ෂේත්රයට පිවිසෙන්නේ. සාමාන්‍ය පෙළට වගේම උසස් පෙළට නාට්‍ය හා රංග කලාව විෂයක් ලෙස මං හැදෑරුවා. ඉන්පසුවත් මං රංගනය පිළිබඳ ඩිප්ලෝමා එකක් කරලා තියෙනවා.
වෘත්තීයමය රංගන ශිල්පිනියකට රංගනය හැදෑරීම තුළ ලැබෙන වටිනාකම මොකක්ද?
රංගනය කියන්නේ කොතෙක් හැදෑරුවත් හදාරා නිම කළ නොහැකි විශාල වපසරියක් ඇති විෂයක්. හැම තත්පරයකම රංගනය ගැන ඉගෙනගන්න අලුත් යමක් එකතු වෙනවා. මේ මොහොතේදීත් මං රංගනය ඉගෙන ගන්නවා. ඒ වගේම හදාරනවා.
මනාලියක් ලෙස නිරූපණය කිරීමට ලැබෙන අවස්ථා ඔබ බොහොමයක් මඟහරිනවා කියලා ආරංචියි. ඒකට හේතුව මොකද්ද?
මගේ කොණ්ඩය නිසා බොහොමයක් දෙනා උඩරට ක්‍රමයට මනාලියක් විදිහට අන්දවන්න උනන්දු වෙන්නෙ නැහැ. බටහිර පන්නයේ මනාලියන් ලෙසයි ගොඩක් නිරූපණය කිරීමට අවස්ථාව ලැබුණේ.
වෘත්තීය ජීවිතය තුළ මෙතෙක් ආ ගමන් මඟ ගැන සතුටුද?
ලැබුණ හැම චරිතයක් ගැනම ගොඩක් සතුටු වෙනවා. නමුත් පෞද්ගලිකව මං විශ්වාස කරනවා චරිතාංග රංගන ශිල්පිනියක් ලෙස මගේ හැකියාව ඉස්මතු කරන්න තවමත් අවස්ථාව ලැබුණේ නැහැ කියලා. මං කිසිම චරිතයකට කොටු වෙන්න කැමති නැහැ. ඉදිරියේදී මගේ හැකියාව ඉස්මතු වෙන අභියෝගාත්මක චරිත මට ලැබේවි කියා විශ්වාස කරනවා.
ඔබ වෘත්තීමය රංගන ශිල්පිනියක්ද?
ඔව්. මගේ වෘත්තිය රංගනය. නමුත් ආර්ථික තත්ත්වය ගොඩනඟාගන්න Curly Lounge ලෙස මගේම රූපලාවණ්‍යාගාරයක් පවත්වාගෙන යනවා. ඊට අමතරව මං වෙනත් රැකියාවකත් නිරත වෙනවා.
අනාගත බලාපොරොත්තු මොනවද?
කලාවෙන් ඉදිරියට යන්න, අලුත් නිර්මාණවලට දායක වෙන්න වගේම ස්වාධීන කාන්තාවක් ලෙස ජීවිතයේ පියවරෙන් පියවර ඉදිරියට යෑමයි මගේ එකම බලාපොරොත්තුව.
සුධීක්ශා පෙම්වතියක්ද?
ඒක ඉදිරියේදී කියන්නම්.
ආදරය ගැන මොකද හිතෙන්නේ?
ආදරය කියන්නේ පරිත්‍යාගයක්. තව කෙනෙක් වෙනුවෙන් ජීවත් වීමක්. ආදරණීය හැමෝම ජීවත් වෙන්නේ තව කෙනෙක් වෙනුවෙන්. ඒ හැඟීම හරිම සුන්දරයි.
උපුටා ගැනීම මව්බිම
