''මම රඟපානකොට අප්පච්චිව පේනවා නම් ඒක ජානමය කාරණාවක්'' - සජිත ඇන්තනි
කලා ක්‍ෂේත්‍රයේ අස්සක් මුල්ලක් නෑර අක්මුල් විහිදුණු දැවැන්තයෙකු වූ ජැක්සන් ඇන්තනිගේ රංග ආභාසය ලේ උරුමයෙන් ම හිමි වූ ඔහු ජැක්සන් ඇන්තනිගේ young version එක ලෙස ද හැඳින්වීම අතිශයෝක්තියක් නොවෙයි. මේ දවස්වල හැමෝම ඔහුව හඳුන්වන්නේ නාඩගම්කාරයෝහි සරා ලෙසයි. ඔහු සජිත ඇන්තනි.
කොහොම ද මේ දවස්වල ජීවිතේ?
මේ දවස්වල එතරම් ශුභදායී තත්ත්වයක් නැහැ. ගෝලීය අර්බුදකාරී තත්ත්වයක් පවතින මේ වගේ මොහොතක කලාකරුවන් ලෙස අසීරු තත්ත්වයකයි අප සැවොම සිටින්නේ. එකී පරිසරයට හැඩගැසීම තුළ කාලය ගෙවනවා.
කලා කටයුතු කොහොම ද?
මේ දවස්වල මං ජනතාව අතර සිටින්නේ නාඩගම්කාරයෝහි සරා විදිහට. එහි රූගත කිරීම් සිදු කරනවා. නලින් පෙරේරා සංගීතඥයාගේ තනුවකට කළ මගේ අලුත් ම ගීතය නුදුරේ ම එළිදක්වන්න බලාපොරොත්තු වෙනවා. ඒ වගේ ම චිත්‍රපට හතරක හා නාට්‍ය තුනක ඉදිරියේදී මාව දකින්න ලැබේවි.
කලා ක්‍ෂේත්‍රයේ ඇසූ පිරූ තැන් ඇති ජැක්සන් ඇන්තනි ශ්‍රේෂ්ඨ කලාකරුවාගෙන් ඔබේ රංගන ජීවිතයට ලැබුණේ මොන වගේ පන්නරයක් ද?
ජැක්සන් ඇන්තනි පවුලේ ඉපැදීම සම්බන්ධයෙන් මං දෙවියන් වහන්සේට ස්තූතිවන්ත වෙන්න ද, දෛවයට ස්තුතිවන්ත වෙන්න ද කියලා මට තේරෙන්නේ නැහැ. කලාව ගැන හදාරන්නෙකුට අපේ පවුල පාඨශාලාවක් වගෙයි. අම්මගෙන් ලැබුණු ගායන ආභාසය අප්පච්චිගෙන් ලැබුණු රංගන කෞශල්‍යය සමග පුංචි කාලේ පටන් ම කලාවට පිවිසෙන්න මට ලොකු උත්තේජනයක් ලැබුණා. වේදිකා නාට්‍යයක අප්පච්චි රඟපානකොට ඔහුට ලැබුණු අත්පොළසන් නාදයේ උත්කර්ෂය පුංචි කාලෙදී ම මටත් දැනුණා. කලාව තුළ මං ඉදිරියට ගමන් කර තිබෙනවා නම් එහි ගෞරවය වැඩි ප්‍රමාණයක් අප්පච්චිට අයිතියි.
රංගනය තුළින් ඉදිරි ගමනක් යාමට පවුලේ ආභාසය පමණක් ප්‍රමාණවත් කියා ඔබ හිතනවා ද?
ඕනෑ ම ක්‍ෂේත්‍රයකින් ඉදිරියට යෑමට නම් කාරණා තුනක් සම්පූර්ණ විය යුතුයි කියා මා විශ්වාස කරනවා. ප්‍රථමයෙන් ම කුසලතාව තිබිය යුතුයි. කුසලතාව ප්‍රගුණ කිරීමට අත්දැකීම් ලැබිය යුතුයි. ඒ වගේ ම කුසලතාව ප්‍රායෝගිකව පුරුදු පුහුණු වීම තුළ එය ප්‍රගුණ කළ යුතුයි. කුසලතාව මට හිමි වුණේ පියාගෙන් හා මවගෙන්. උප්පත්තියෙන් ලැබුණු කුසලතාවයේ ගෞරවය ඔවුන්ට නිතැතින් ම හිමිවෙනවා. ඒ වගේ ම ඒ කුසලතාව මුවහත් කර ගැනීම මහන්සි වී රංගන ව්‍යායාම කිරීම වගේ ම මිනිසුන් අතරට යාමට මාත් දැඩි වෙහෙසක් වගේ ම ප්‍රමාණවත් කාලයක් වැය කළා. මං කැලණිය විශ්වවිද්‍යාලයේ නාට්‍ය හා රංග කලාව පිළිබඳව විශේෂවේදි උපාධියක් හැදෑරුවා. අබා චිත්‍රපටයෙන් පසුව කලා ක්‍ෂේත්‍රයේ මාව නොපෙනුණෙත් අධ්‍යාපනයට සම්පූර්ණ කාලය වැය කිරීමේ අවශ්‍යතාව නිසයි.
ඔබ ජැක්සන් ඇන්තනිව ෆලෝ කරනව ද නැත්නම් ඔහුගේ රංග ආභාසය ජානමය වශයෙන් ඔබට හිමි වෙලා ද?
මං චරිතයක් නිරූපණය කරන කොට කලින් දැකපු චරිතයක් හිතාගෙන ඒ නිරූපණය කරන්නේ නැහැ. පිටපත කියවලා එහි අන්තර්ගතය තුළින් පරිකල්පනය කරන චරිත තුළයි මං ජීවත් වෙන්නේ. යමෙකුට මං රඟපාන කොට මගේ අප්පච්චි පේනවා නම් එය ජානමය කාරණාවක්. මං අම්මට කතා කරනකොට වුණත් අම්මා මගේ කටහඬට අප්පච්චි කියල රැවටෙනවා. මං ඇවිදින විධිය, කතා කරන විධිය අප්පච්චි වගේ කියලා ක්‍ෂේත්‍රයේ බොහෝ දෙනෙක් කියනවා.
අතීතයට සාපේක්ෂව වර්තමානය තුළ කලාකරුවන්ව සහෘදයන්ගේ මතකයේ රැඳෙන්නේ ඉතාමත් අඩුවෙන්. එවැනි තත්ත්වයක් ගොඩනැඟී තිබෙන්නේ ඇයි?
කලාව හා පුද්ගලයා අතර තියෙන සම්බන්ධය වර්තමානය වෙද්දී තරමක් දුරයි. ඒ නිසා ම රසිකත්වය මේ වෙනකොට තරමක් වෙනස් වෙලා තියෙනවා. අප්පච්චි පවසනවා බයිස්කෝප් යුගය ගැන එක ම චිත්‍රපටය හත් අට වතාවක් බලපු අවස්ථා වගේ ම ප්‍රතිවීරයා එනකොට තිරය කපපු අවස්ථා ගැන ඔහු පවසනවා. එවැනි සාඩම්බර අතීතයක් පැවතුණත් වර්තමානයේ චිත්‍රපටයක් බලන්න චිත්‍රපට ශාලාවකට පැමිණෙන රසික පිරිස ඉතාමත් සීමිතයි. නමුත් මං විශ්වාස කරනවා කලාකරුවන්ට මතක හිටින චරිත බවට පත්වෙන නිර්මාණ තවමත් බිහි වෙනවා කියලා.
සරා කියන්නේ ඒකට හොඳ ම උදාහරණයක් නේද?
ඔව්. ඇත්තට ම පසුගිය දවසක නාඩගම්කාරයෝහි සරාට පොලුවලින් පහර දෙන දර්ශනයක් තිබුණා. සරාට ආදරය කරන පුංචි දරුවෝ ඒ දර්ශනයෙන් පස්සේ කලබලයට පත් වෙලා වගේ ම බියට පත්වෙලා. මවුපියෝ බොහොමයක් දෙනා මට පෞද්ගලිකව කතා කරලා කිව්වා. දරුවන්ගේ හිත හදන්න පොඩ්ඩක් එයාලට කතා කරන්න කියලා. මා වීඩියෝ කෝල් අරන් ඒ දරුවන්ට මං හොඳින් පුතේ කියලා කිව්වා. ඒ වගේ ම අමාරුවෙන් සල්ලි එකතු කරල ගත්ත ත්‍රීවීල් එකේ සරාගේ පින්තූරය ගහගන්න තරමට සරා ආදරණීය චරිතයක් බවට පත්වෙලා. ලෝකය කොතරම් යාවත්කාලීන වුණත් රසිකත්වය එලෙසින් ම පවතිනවා කියලා එතකොට මට හිතෙනවා.
තරු ගුණය පවත්වාගන්න ඔබ කරන ව්‍යායාම මොනව ද?
තරු වර්ග කිහිපයක් ඉන්නවා. මම ව්‍යායාම් කරන තරු ගුණය රඳා පවතින්නේ බාහිර ස්වරූපය මත නෙමෙයි කියලා මම විශ්වාස කරනවා. එයට හොඳ ම උදාහරණය නාඩගම්කාරයෝහි සරාගේ චරිතයට ජනප්‍රිය ම නළුවා සම්මානය හිමි වීම. කසිප්පු බොන දුප්පත් නහරකාරයෙක් වෙච්ච සරාට මිනිස්සු ආදරේ කරලා ජනප්‍රිය ම නළුවා සම්මානය දෙනකොට මට හිතුණ මිනිස්සු මට ආදරය කරන්නේ බාහිර ස්වරූපයට නෙමෙයි කියලා. ඒ නිසා මං සෑම විට ම ව්‍යායාම් කරන්නේ මගේ රංගන කෞෂල්‍යය වර්ධනය කර ගන්න, පරිකල්පන ශක්තිය වැඩි දියුණු කර ගන්න වගේ ම නිරීක්ෂණය තුළින් චරිතවල ස්වභාවය හඳුනාගන්න.
පියා මෙන් ඔබත් අනාගතයෙදී පිටපත් රචකයෙකු ලෙස කලඑළි බසීවි ද?
ඔව්. මං ගොඩක් කැමතියි පිටපත් රචනයට. එනිසා ම මගේ නිර්මාණකරණයට මං සජ් ක්‍රියේෂන් කියලා ආයතනයක් බිහි කළා. සිනමා නිර්මාණ, ටෙලි නාට්‍යය, වෙළෙඳ දැන්වීම්, මියුසික් වීඩියෝ ආදී සෑම නිර්මාණයක් ම එහිදී කිරීමට බලාපොරොත්තු වෙනවා. මේ වෙනකොට කළුවර කියන මගෙ ම ගීතයක රූප රචනාවක් වගේ ම නදීමාල්ගේ ආදරියේ ගීතයේ රූප රචනාව මගේ ආයතනයෙන් කිරීමට අවකාශ හිමි වුණා. චිත්‍රපට වගේ ම ටෙලි නාට්‍යවල පිටපත් රචනය මේ වෙනකොට ම මං කරගෙන යනවා. ඒවා නිර්මාණයන් විදිහට දවසක දොරට වැඩීමයි මගේ එක ම සිහිනය.
පවුලේ විස්තර කොහොම ද?
ආදරය, විවාහය, බැඳීම් මං ගොඩක් ගෞරව කරන සංකල්පයන්. ඒ ගෞරවනීය හැඟීම මං ඉගෙන ගත්තෙ අපේ පවුලෙන්. මගේ පවුලේ අම්මා, අප්පච්චි, අක්කා, අයියා ඉන්නවා. මේ වෙන කොට එය විස්තෘත පවුලක් බවට පත්වෙලා. මට බුවීව වගේ ම අයියට එමි අක්කාවයි අරණ්‍යා චූටි දුවවයි ලැබුණා. අක්කට මිලාන් අයියව ලැබුණා. පවුලෙ සංස්කෘතිය විශාලනය තුළ එය තවත් ශක්තිමත් වුණා කියලා මට හිතෙනවා.
කලා කටයුතුවලට බුවීගෙන් ලැබෙන සහයෝගය කොහොම ද?
බුවී කියන්නේ සංසාරේ පතාගෙන ආපු මට ලැබිය යුතු ම කෙනා කියලයි මට හිතෙන්නේ. සමහරක් වෙලාවට මටත් වඩා මාව ඇයට තේරෙනවා. ඒ වගේ ම බුවී මට ලැබුණු දා පටන් මගෙ නිර්මාණකරණයෙත් ලොකු දියුණුවක් ඇති වුණා.
උපුටා ගැනීම මවුබිම
