දැනට මගේ හිසට ශල්‍යකර්ම 5ක් කරලා තියෙනවා, තව එකක් කරන්නත් තියනවා
කලා ක්ෂේත්‍රය තුළ විශිෂ්ට ගණයේ නිර්මාණ ශිල්පියෙක් ලෙස බොහෝ දෙනෙක්ගේ ආදරය, සෙනෙහස දිනාගත්ත චරිතයක් තමයි චාමර ප්‍රියදර්ශන කියලා කියන්නේ. ඔබ ඒ ආදරය කළ රංගන ශිල්පියාව ඒ විහිළු කතා, ඒ ආදරණීයකම, ඒ රඟපෑම අමතක කරන්නට බැරී තරමට චාමර ප්‍රේක හදවත් වැළඳගෙන තිබුණා. කෙදිනක හෝ රටේ ජනප්‍රිය නළුවෙක් වෙන්න හීන දැකපු චාමර බොහෝ දුක් ගැහැට විඳ කලා ක්ෂේත්‍රයට පිවිසි රංගන ශිල්පියෙක් බව බොහෝ දෙනා දන්නා කරුණක්.
“මම හීන දැක්කේ කවදාහරි නළුවෙක් වෙන්න. ඒ හීනයට එන්න මම නොවිඳිනා දුක් වින්දා. රගපාන්න එන්න කලින් මම මේසන් බාස්ලට අත්වැඩ දීලා තියෙනවා. අද මම පාරේ යනකොට මිනිස්සු මාව අඳුරනවා. අම්මා ඒ වෙලාවට දැනෙන සතුට කියලා නිම කරන්න බැහැ. මම පටන් ගත්ත තැන මතක තියෙන නිසා අදටත් චාමර කියන්නේ සරල කොල්ලෙක්”
චාමර සමග කතා කරපු බොහෝ පුවත්පත් සාකච්ඡාවල මේ වචන ටික කියන්න ඔහු කවදාවත් අමතක කරේ නැහැ. කොහොම වුණත් කලා ක්ෂේත්‍රයේ දිගු ගමනක් යන්නට වටපිටාව සකස් කරගනිමින් ජය කණුවට ළඟා වුණු චාමරට හිටි හැටියේම මීට වසරකට ඉහතදී ඉතාමත් අවාසනාවන්ත ලෙස රිය අනතුරකට මුහුණ දීමට සිදුවුණා. ජීවිතයත් මරණයත් අතර මහා සටනක් කරලා මාස ගණනාවක්ම නේවාසිකව ප්‍රතිකාර ලබලා මේ වෙනකොට චාමර සුව අතට පත්වෙමින් සිටිනවා. චාමරට ආදරය කරන ප්‍රේක්ෂක ඔබ චාමරව නැවත පුංචි තිරයේ දකින්නට හැමදාමත් ඔහුව නිරෝගී සුවය ප්‍රාර්ථනා කළා. චාමර සුව අතට ළඟාවන මුත් චාමර අනතුරට ලක්වීමට පෙර රංගනයෙන් දායකවූ ‘රැහේ’ ටෙලි නාට්‍යය මේ දිනවල සියත TV හරහා විකාශය වෙනවා. ‘රැහේ” ටෙලි නාටයයේ‘සින්නා’ ගේ චරිතයෙන් ප්‍රේක්‍ෂකයන් හමුවට එන චාමරව අනතුරෙන් පසු සුව අතට පත්වෙන වෙලාවේ චාමර සමග කතාබහ කරන්නට අප අමතක කළේ නැහැ. අනතුරෙන් හිසට සිදු වූ හානියත් මග බොහොම දේවල් චාමරගේ මතකයෙන් ඈත්ව තිබුණත් චාමර දුරකථනයට ප්‍රතිචාර දැක්වූවේ ඉස්සර ඉඳපු චාමර ලෙසින්ම කියලා ඉබේට්ටම වගේ දැනුනා. ඉතින් ඔහු අපිත් සමඟ කතා බහ කලේ මෙන්න මේ විදිහටයි.
මට දැන්නම් ගොඩක්ම සුවයි. ඒත් මට තව එක ශල්‍යකර්මයක් කරන්න තියෙනවා. ඒ ශල්‍යකර්මයක් කරාට පසේ තව මාස හතර පහකින් නැවත පෙර මම ඉඳපු තත්වයටම සුවවේවි කියලා බලාපොරොත්තුවෙන් ඉන්නවා. දැනට මගේ හිසට ශල්‍යකර්ම පහක් කරලා තියෙනවා. ගිය අවුරුද්දේ පෙබරවාරි 15 වැනිදා තමයි මම අනතුරට ලක්වූයේ. අනතුරට ලක්වෙලා කළුබෝවිල රෝහලේ දැඩිසත්කාර ඒකකයේ දින 20ක් විතර මම ප්‍රතිකාර ලබලා තියෙනවා. මාස හතර පහක්ම මම කොහෙද හිටියේ, මාව බලන්න ආවේ කවුද කියලා මට මතක නැහැ. මගේ හිසට වගේම දකුණු අත ස්ථාන දෙකකින් අස්ථි බිඳීමක් වෙලා තිබුණා. බරපතලම හානිය වූයේ මගේ හිසට ඇත්තටම මාව අනතුරකට පත්වෙලා මම මේ ඉන්නේ රෝහලේ කියලා මම දන්නේ මාස පහක් විතර ගියාට පස්සේ. දෙයක් මතකයට ගන්න, කෙනෙක්ව අඳුරගන්න මට මාස අටක් විතර ගියා.
මම ඉදිරියට කරන්න සූදානම් වෙන්නේ අවසන් ශල්‍යකර්මය කියලා වෛද්‍යවරු කියලා තියෙන්නේ. ඒකත් කරන්නේ හිසටමයි. මගේ යාළුවෝ, හිත මිත්‍රාදීන්, නෑදෑයෝ මට සුවය පතලා බෝධි පූජා කරලා තියෙනවා. සොයලා බැලුවා මං ගැන. ඒ ආශීර්වාදවලින් වගේම දෙවියෝ වගේ මට ජීවිතය දෙන්න වෙහෙසුනු වෛද්‍යවරු හෙද හෙදියන් නිසා අද මම ආයෙම නැගිටලා මේ විඳිහට ඉන්නවා. වෙච්ච රිය අනතුර මට මතක නෑ අද වෙනකම්. හිසට වුණු හානිය එක්ක. අවුරුද්දක, දෙකක ඇතුළත සිද්ධ වෙච්ච දේවල් මුකුත්ම මතක තිබුනේ නැහැ. මගේ මතකය සාමාන්‍ය අතට එන්න අවුරුද්දක් විතර ගියා. වෛද්‍යවරු කියලා තිබුණේ හිසේ අභ්‍යන්තර ලේ ගැලීමක් සිදුවෙලා නිසා සියයට 50 ජීවිත අවධානමක් තියෙනවා කියලා.
ඇත්තටම එදා මෝටර් බයිසිකලය පැද්දේ දිනේෂ්. දිනේෂ්ට සීරිමක්වක් වෙලා තිබුණේ නැහැ. අනතුර වුණෙත් අපි නවාතැන් ගෙන ඉඳපු තලවතුගොඩ නිවස කිට්ටුවමයි. දිනේෂ් අදටත් මන් ළඟින්ම ඉන්නවා. එයත් දන්නේ නැහැ එදා මොකක්ද වුනේ කියලා. මමත් අහන්නේ මොකක්ද මට වුනේ කියලා. ඇත්තටම මට අදටත් හිතාගන්න බැහැ මොකක්ද එදා ඒ වෙලාවේ වුනේ කියලා. මම මෝටර් බයිසිකල් පදිනෙත් නැහැ. රෑ වෙලා දිනේෂ් එක්කවත් එලියට යනෙත් නැහැ. එදා මොන එකකට එලියට යන්න හිතුනද කියලා මට හිතාගන්න බැහැ. මම අනතුරට පත්වෙලා සිහිය නැතුව ඉන්නකොට තදින්ම මානසික මට්ටමින් පවා වැටිලා තිබුනා. මම දන්නේ නැහැ දිනේෂ් මගේ ළඟට වෙලා දවස් ගණන් අඩලා තියෙනවා. යාළුවට කරන්න දෙයක් නැහැ, ඒක මගෙ වෙලාව. අපි දෙන්නගෙම ජීවිත බේරුන එක ගැන මට ලොකු සතුටක් තියෙනවා.
මගේ අයියයි, නංගියි අම්මයි තාත්තයි මාව ගොඩ දාගන්න අප්‍රමාණ දුකක් වින්දා. එයාලා මට නොපෙනෙන්න අඩපු දවස් අනන්තයි අප්‍රමාණයි. මාව බලාගන්නේ පොඩි දරුවෙක් වගේ. මගේ මතකය නැවත ගන්න පුදුමාකාර වෙහෙසක් එයාලා ගත්තා. රෝහලේ ඉඳලා ගෙදර එනකොට මට කතාකරන්න බැරුව හිටියේ, ඒකට අවශ්‍ය ව්‍යායාම මට කෙරෙව්වා. මගේ ගෙවල් මහනුවර. මාව අනතුරට පත්වුණාම අම්මයි, තාත්තයි ගම දාලා ඇතුකෝට්ටේ අයියාගේ ගෙදර ආවා මාව බලාගන්න. තාමත් අම්මලා ඉන්නේ කොළඹ. මං වෙනුවෙන් කලාශිල්පීන්, යාළු මිත්‍රයෝ, ප්‍රේක්‍ෂකයෝ, නෑදෑයෝ බාර හාර පිංකම් විශාල වශයෙන් සිදුකලා. සතුන්ව නිදහස් කළා. මිල මුදල් වලින් පවා මට ගොඩක් හිත මිත්‍රයෝ උදව් කළා. මම වෙනුවෙන් වචනයකින් හරි සුවය පතපු ආශීර්වාද කරපු සියලුම දෙනාට ගොඩක් පිං. කිසිම කෙනෙකුට මේ වගේ අවාසනාවන්ත සිදුවීම් නම් වෙන්න එපා කියලා තමයි මම නිතරම ප්‍රාර්ථනා කරන්නේ කියලයි ඔහු අවසාන වශයෙන් පැවසුවේ. ඉතින් මේ ආදරණීය කලාකරුවා චාමර ඒ සිනහව, විහිළු කතා ටික අරගෙන ආයෙම ඉක්මණට පුංචි තිරෙන් මුණ ගැහෙන්න. ශල්‍ය කර්මයත් සාර්ථක වෙලා ඉක්මනින් නිරෝගී සුවය ලැබෙන්න කියලත් අපි හදවතින්ම ප්‍රාර්ථනා කරනවා.
උපුටා ගැනීම saaravita.lk
