ලොකුවට හිතන්නේ නැතිව චාම් සරල ජීවිතයක් ගත කරනවා නම් කිසිම කෙනකුට වරදින්නේ නැහැ...
ටිකක් දුකෙන් ඉන්නේ මේ දවස්වල. අපේ වෘත්තිය කටයුතු නැවතිලා තිබෙන්නේ. නමුත් යම් සතුටකුත් තිබෙනවා ලැබිලා තිබෙන නිදහස ගැන. මමම ලියලා, මමම තනු නිර්මාණය කරලා ගායනා කළ ගීතයක් වන 'මුමුනනා ගී පදත්' සහ තවත් ගීත කිහිපයක් නිර්මාණය කළා. මේ ගීත යූටියුබ් හරහා අහන්න පුළුවන්. ප්‍රේක්ෂකයන්ගෙන් හොඳ ප්‍රතිචාර ලැබෙනවා.
ඒ කියන්නේ සුභානි දැන් ගී පද රසිකාවියක්ද?
මට ඇත්තටම ලියන්න ලොකු හැකියාවක් නැහැ. නමුත් මට ආසාවක් තිබුණා ලියන්න. ඒ ගීතයේ තනුව තමයි මුලින්ම මම නිර්මාණය කළේ. තනුව නිර්මාණය කරලා ගී පද රචකයන් දෙදෙනෙක්ට දුන්නා. නමුත් ඒක ඉක්මනින් කරලා දෙන්න ඔවුන්ගේ උනන්දුවක් තිබුණේ නැහැ. ඒ නිසා මමම ලියන්න පෙලඹුණා. අපහසු තැන් කිහිපයක් ආවා. නමුත් මම ඒක කොහොම හරි ලිව්වා. කොහොම වුණත් මම දිගටම ගී පද රචනා කරන්න බලාපොරොත්තුවක් නැහැ. තනු නිර්මාණය කිරීම සහ ගායනය තමයි මගේ වෘත්තිය. ඒකම දිගටම කරගෙන ඉන්නවා.
ඔබ මේ දිනවල රංගනයටත් සම්බන්ධ වෙලා තිබෙනවා නේද?ඔව්. හිරු නාළිකාවේ විකාශය වන දිවිතුරා ටෙලි නාට්‍ය සඳහා සම්බන්ධ වුණා. හිරු නාළිකාවෙන් මට ආරාධනාව ලැබුණා. මම නිරූපණය කරන්නේ මගේ වෘත්තියට සමීප චරිතයක් නිසා මම සතුටින් ආරාධනාව භාරගත්තා.
ලැබෙන ප්‍රතිචාර කොහොමද?හොඳ ප්‍රතිචාර ලැබෙනවා රසික රසිකාවියන්ගෙන්. දිගටම රඟපාන්න කියලත් රසිකයන්ගෙන් ප්‍රතිචාර ලැබෙනවා.
දිගටම රංගනයේ නිරත වෙනවද?දිගටම රංගනයේ යෙදෙන්න අදහසක් නැහැ. මේ ටෙලි නාට්‍යයේ මගේ චරිතය දිගු කාල පරාසයක් තුළ දිවෙන චරිතයක් නොවෙයි. මේ වගේ චරිතයක් ලැබුණොත් සම්බන්ධ වෙනවා හැරෙන්නට දිගටම වෘත්තියක් විදිහට රංගනයේ යෙදෙන්න අදහසක් නැහැ. රංගනය කියන්නේ ගැඹුරු දෙයක්. ඒ ගැන මම ඉගෙන ගෙන නැහැ. එම නිසා මට හිතෙන හැටියට හොඳම දේ මම ගායන කටයුතුවලින් ඉදිරියට යන එක.
දිවිතුරා ටෙලි නාට්‍යයට සම්බන්ධ වීම මොන වගේ අත්දැකීමක්ද?මේ ටෙලි නාට්‍යයේ ගායන ක්ෂේත්‍රයට සම්බන්ධ ශිල්පීන් සහ ශිල්පිනියන් කිහිප දෙනෙක්ම රංගනයෙන් දායකවෙලා තිබෙනවා. ඒ නිසාම ඒ අය සමඟ කටයුතු කිරීම මට පහසු වුණා. මේක සුන්දර ටෙලි නාට්‍යයක්.
ඔබට රියැලිටි වැඩසටහන්වල තරගකාරියක් විදිහට වගේම විනිශ්චයකාරවරියක් විදිහටත් අත්දැකීම් තිබෙනවා නේද?ඔව්. මම 1999 වර්ෂයේ 'තුරුණු ශක්ති' කියන රියැලිටි තරගයෙන් ක්ෂේත්‍රයට පැමිණි කෙනෙක්. ඒ වගේම මම රියැලිටි වැඩසටහන් කිහිපයකම විනිශ්චයකාරවරියක් විදිහටත් කටයුතු කරලා තිබෙනවා.
අද වන විට අපේ රටේ රියැලිටි වැඩසටහන් බොහෝ ප්‍රමාණයක් තිබෙනවා. මේවායින් බිහිවන තරු ක්ෂේත්‍රය තුළ රැඳෙන්නේ බොහෝම අඩුවෙන්. ඔබ හිතන විදිහට එයට හේතුව කුමක්ද?රියැලිටි වැඩසටහන් තුළින් බිහිවෙලා ක්ෂේත්‍රයේ රැඳෙන අයත් ඉන්නවා. නමුත් බහුතරයකට වෙන්නේ හොඳ නිර්මාණ බිහි කරලා රසිකයන් අතරට නොයෑමයි. ඒ වගේම මොන ක්ෂේත්‍රයක සිටියත් තමන්ට දෙයක් ලැබුණම ඒ දේවල් ගැන ලොකුවට හිතන්නේ නැතිව චාම් සරල ජීවිතයක් ගත කරනවා නම් කිසිම කෙනකුට වරදින්නේ නැහැ.
කොවිඩ් වසංගතය හේතුවෙන් වෘත්තීය කටයුතු සම්පූර්ණයෙන් නතර වෙලා, ඔබේ ක්ෂේත්‍රයේ බොහෝ අය ආර්ථික මට්ටමින් ගැටලුවලට මුහුණපාමින් සිටිනවා. මේ ගැන ඔබේ අදහස?ඔව්. ඇත්ත වශයෙන්ම මේ රටේ බහුතරයක් මුහුණ දෙන ගැටලුවක් මේක. අපි දැන් අවුරුදු 3ක පමණ සිට මුහුණ දෙන තත්ත්වයක් මේක. පාස්කු ප්‍රහාරයෙන් පසුව ප්‍රසංග වේදිකාවේ වැඩකටයුතු හරියාකාරව පවත්වන්න ලැබුණේ නැහැ. බොහෝ දෙදෙනෙක් මේ වනවිට ගැටලුවලට මුහුණ දීලා ඉන්නේ. මම එදා ඉඳන්ම සරලව, චාම්ව සහ අරපිරිමැස්මෙන් කටයුතු කළ කෙනෙක්. ඒ නිසා ලොකු අපහසුතාවකින් තොරව ජීවත් වෙනවා. නමුත් මේක ලොකු ගැටලුවක්.
ඉදිරියේදී එළි දකින නිර්මාණ මොනවාද?ඉදිරියේදී නිර්මාණ කිහිපයක් කරන්න බලාපොරොත්තුවෙන් ඉන්නවා. ටිකක් නිදහසේ මේ වැඩ ටික කරගෙන යන්න තමයි බලාපොරොත්තුව. ආරාධනා ලැබුණු නිර්මාණ කිහිපයකුත් තිබෙනවා.
පවුලේ විස්තර?මම මගේ සැමියා සහ දුව තමයි ඉන්නේ. දුවට දැන් අවුරුදු 4යි මාස තුනයි.
දුවටත් අම්මාගේ ගායන හැකියාවම තිබෙනවාද?අනිවාර්යයෙන්ම එයාට හොඳටම පුළුවන්. මාස 06 පමණ සිට එයා තාලයට ශබ්ද කරන්න පටන් ගත්තා. එයාට උගන්වන්න ඕන. තාම ඒකට වයස මදි. දුවව ගායන ශිල්පියෙක් කරන්න නම් අදහසක් නැහැ. දුව ගායනය විනෝදාංශයක් හැටියට පමණක් කරනවාටයි මම කැමැති.
අනාගත බලාපොරොත්තු මොනවද?එකම බලාපොරොත්තුව දුව. එයාට හොඳින් උගන්වන එක තමයි බලාපොරොත්තුව. ඊට අමතර කාටත් උදවු කරගෙන, හොඳ නිර්මාණත් කරමින් සතුටින් ජීවත් වෙන එකයි මගේ බලාපොරොත්තුව.
මව්බිම
