බලාපොරොත්තු තියා ගන්න බැහැ , ඒ නිසා සතුටින් හිනා වෙලා දවසේ වැඩ ටික කරගෙන ඉන්නවා...
මේ දවස්වල හිරු නාලිකාවේ ටෙලි සිනමා සිත්තමේ රූපගත කිරීම් කළා. අහස් මාලිගා ටෙලි නාට්‍යයේත් වැඩ කරගෙන යනවා. සුරංග අල්විස් අධ්‍යක්ෂණය කළ The Game චිත්‍රපටයේ වැඩ අවසන් කළා. තව සුළු ගැටලු කිහිපයක් පැන නැඟිලා තියෙනවා. ඒ ටික නිරාකරණය වුණා ම චිත්‍රපටය තිරගත වේවි.
ඉදිරියේදී විකාශය වීමට නියමිත නිර්මාණත් ඇති?
ඔව්. ටෙලි නාට්‍ය නම් ගොඩක් එන්න තියෙනවා.
මේ දවස් වැඩ කටයුතුත් එක්ක කාර්ය බහුල ද?
ඔව්. රූපගත කිරීම් සහ අනෙකුත් වැඩ කටයුතු එක්ක වැඩ වැඩි අවුරුද්දක්.
ටෙලි නාට්‍ය සහ චිත්‍රපට යන අංශ දෙක ම නියෝජනය කරන කෙනෙක් විධියට වැඩි ඇල්ම කොයි පැත්තට ද?
ටෙලි නාට්‍යවලට තමයි වැඩියෙන් ආදරේ. චිත්‍රපටයක් කියන්නේ හැමෝට ම තියෙන ලොකු හීනයක්. හැමෝ ම ඒ හීනයට ආදරෙයි. මමත් ඒ හීනෙට ආසයි. නමුත් මම වැඩිපුර කරලා තියෙන්නේ ටෙලි නාට්‍ය. චිත්‍රපටවලට මට වැඩිය ආරාධනා ලැබිලා නැහැ.
චරිත තෝරා ගනිද්දි මොන වගේ අංශ කෙරෙහි ද අවධානය යොමු කරන්නේ?
ස්ක්‍රිප්ට් එකත් බලලා හොඳ නිර්මාණයක් ද බලනවා. හැබැයි මට කළු චරිත තමයි ගොඩක් ලැබුණේ. කළු චරිත කළා ම වැඩිපුර ලැබෙන්නේ කළු චරිත මයි. ඒ නිසා ඉදිරියේදී කළු චරිතවලට සීමා වෙන්නේ නැතිව නිර්මාණවලට සම්බන්ධ වෙනවා.
කළු චරිතවලට ලැබෙන ප්‍රේක්ෂක ප්‍රතිචාරත් කළු ද?
ඒක ප්‍රේක්ෂකයන්ගේ බුද්ධිමත්කම මත තමයි රැඳිලා තියෙන්නේ. මගේ චරිතවලට ප්‍රේක්ෂකයෝ බැනලා මැසේජ් එවනවා. ඉතින් ඒක මට ලැබෙන චරිතයක් පමණයි. නමුත් මම චරිතය හරියට කරන නිසා තමයි එහෙම ප්‍රතිචාර ලැබෙන්නේ.
අලුතින් ක්‍ෂේත්‍රයට එන අයට ලැබෙන අවස්ථා අඩු වෙලා ද?
හැම දා ම පෙම්වතියගේ චරිතය කරන්නත් බැහැ. අලුතින් එන අයට ඒ චරිත ලැබෙන්න ඕනේ. එතකොට තමයි ලස්සන. නමුත් තමුන්ගේ හැකියාවෙන් ක්‍ෂේත්‍රයේ රැඳිලා ඉන්න පුළුවන්.
පවුල් ජීවිතේ කොහොම ද?
පවුල් ජීවිතේ ඉතින් අපි යාළු වෙච්ච කාලේ වගේ ම හොඳ විදියට ගත කරනවා.
පවුල් ජීවිතේ අලුතින් බලාපොරොත්තුත් ඇති?
මේ වසංගත තත්ත්වයත් එක්ක බලාපොරොත්තු තියා ගන්න බැහැනේ. ඒ නිසා සතුටින් හිනා වෙලා දවසේ වැඩ ටික කරගෙන ඉන්නවා. මේ තත්ත්වය සමනය වෙලා ටාගට් එකකට වැඩ කරන්න පුළුවන් විධියට කාලයක් උදා වුණා ම බලනවා.
ඔබ ක්‍ෂේත්‍රයට ඇවිත් කොච්චර කල් ද?
ක්‍ෂේත්‍රයට ඇවිත් අවුරුදු නවයක් වෙනවා.
ඒ කාලය තුළ ලබා ගත් දෑ එක්ක ක්‍ෂේත්‍රයේ අලුතින් කරන්න බලාපොරොත්තු වෙන දේවල් මොනව ද?
ක්‍ෂේත්‍රයේ අලුතින් දේවල් කරන්න කියලා මම ලොකු චරිතයක් නොවෙයි. මේක මමත් රංගනය පිළිබඳ හදාරමින් යන ගමනක්. මම විෂයක් විධියට රංගනය හදාරලා නැහැ. නමුත් එදිනෙදා කරන නිර්මාණත් එක්ක රංගනය පිළිබඳව හදාරමින් යනවා. අලුතින් ක්‍ෂේත්‍රයට එන අයටත් රංගනය පිළිබඳ හදාරලා නැත්නම් එදිනෙදා ලැබෙන ප්‍රායෝගික පුහුණුව එකතු කරගෙන තමන්ගේ ගමන සාර්ථක කර ගනිමින් ඉදිරියට යන්න ඕනේ.
ප්‍රේක්ෂකයන් වෙනුවෙනුත් යමක් කිව්වොත්?
ප්‍රේක්ෂකයෝ නිසයි අපි මෙතන ඉන්නේ. මම කරන චරිතත් එක්ක ප්‍රේක්ෂකයන්ගෙන් එතරම් පැසසුම් ලැබිලා නැහැ. මට මතකයි ගරුඬ මුහුර්තය යූ ටියුබ් එකෙන් බලලා මට හිංසාවෙන විධියේ කමෙන්ට් ප්‍රේක්ෂකයෝ දාලා තිබුණා. ඇයි දන්නේ නැහැ එහෙම කියන්නේ. ඒ චරිතයේ ස්වභාවය. එහෙම නැතිව මම දරුණු මනුස්සයෙක් නොවෙයි. ඒ වුණාට චරිතවලට බනින හෝ නොබනින මට ආදරය කරන හොඳ නරක කමෙන්ට් දෙන ප්‍රේක්ෂකයෝ සියලු දෙනාට ම මම ආදරෙයි.
මව්බිම
