මේ ගමන අවබෝධයෙන් යා යුතුයි - රෙබේකා දිල්රුක්ෂි
පෙරළෙන ගල් කැට පෙරළී යන්ට නොදී ඒ ගලෙන් ශක්තිමත් බැම්මක් සාදා ගැනීම කීයෙන් කී දෙනාද සිතන්නේ. කුඩා කාලයේ සිඟිති සිත්තුළ විවිධ තරාතිරන් කියමින් ලොකු නෝනලා ලොකු මහත්වරු වෙනවා කියන අය අතර පුංචි කෙල්ලෙක්ගේ හිතේ හැමදාම ඇතිවූයේ ලෝකයේ නමක් රඳවා පවතින්නට පුළුවන් රංගන ශිල්පිනියක් වීමය. මවුපියන්ගේ සෙනෙහස හැමදාම ලබා ගත්තේ මේ දඟකාර කෙල්ල එලෙසිනි.බණ්ඩාරවෙල මධ්‍ය මහා විද්‍යාලයේ සහ පල්ලියේ නාට්‍ය හා ගීතිකා කණ්ඩායමෙන් ඇගේ කලා ගමන ඇරැඹීය. පාසලේ කැපී පෙනෙන ශිෂ්‍යාවක් වූ අතර නාට්‍ය කණ්ඩායමේ රැජනද, මිහිරි මධුර හඬ ඇගේ පාසල් ශ්‍රවණාගාරයේ රැව් පිළිරැව් එදා දුන්නා. පාසල් පළාත් සමස්ත ලංකා දක්වා කිහිප වතාවක්ම හොඳම නිළිය සම්මානය හිමිකර ගැනීමට සමත් විය.නාට්‍ය හා රංග කලාව විෂය ධාරාව හදාරමින් 2012/2013 කොළඹ ශ්‍රීපාලි මණ්ඩපයේ විද්‍යාර්ථයක බවට තේරී පත්වූවාය. විශ්වවිද්‍යාලය වසර හතරක කාලසීමාවෙන් පසු ලලිත කලාවේදී උපාධිධාරිනියක් ලෙස සමාජයට අවතීර්ණ විය. විශ්වවිද්‍යාල කාල සීමාව තුළදී වේදිකාව ඇගේ ගෙදර බවට පත් කරගත් අතර යෞවන සම්මාන රාජ්‍ය සම්මාන උලෙළවලදී හොඳම නිළියට හිමි සම්මානය කිහිප වතාවක්ම හිමිකර ගත්තාය. ඉන් නොනැවතුණු ඇය කලාවේ පිපාසය නිසාම ටෙලි නාට්‍ය සහ සිනමාවට අවතීර්ණ වීමට ගත වූයේ කෙටි කාලසීමාවකි. වේදිකාව, ටෙලිනාට්‍ය, සිනමාව යන ත්‍රිත්වයම අතික්‍රමණය කරමින් මේ දිනවල නාලිකා කිහිපයකම විකාශය වන ටෙලි නාට්‍ය අතරින් ස්වාධීන රූපවාහිනී නාලිකාවේ විකාශය වන ‘ටේක් කෙයා’ නාට්‍යයෙන් හා සසික හේරත්ගේ කුලුඳුල් සිනමා නිර්මාණය වන ‘සිහින සමීකරණ’යේ ප්‍රධාන නිළියක් බවට පත්වන ඇය ප්‍රේක්ෂක සිත් සතන් අමන්දානන්දයට පත් කරමින් ආදරය දිනාගෙන ඇත. ඇය නමින් රෙබේකා දිල්රුක්ෂිය. මේ ඇය සරසවිය සමඟ කළ කතා කතාබහයි.
කුඩා කාලයේ ඉඳන්ම රංගන ශිල්පිනියක් වීම පමණද හිතේ තිබුණේ.?
මම පල්ලියේ සහ පාසලේ නාට්‍ය කණ්ඩායමේ කැපී පෙනුණු ශිල්පිනියක් බවට පත්වුණා. මට උගන්නපු ගුරුවරු මාව ආදරයෙන් වැලඳ ගත්තා. ඒ මගේ රංගනය නිසා. මට කවදාවත් කිසිම බලාපොරොත්තුවක් තුළ පසුගමනක් තිබුණේ නැහැ. මගේ ගමන කිසිවෙකුට වළක්වන්නත් අවස්ථාවක් ඕන උනෙත් නැහැ. ඒ ගමනට මට හැමදාම දෙමව්පියන් මගේ ස්වාමියාගෙන් ලැබෙන්නේ නොමසුරු සහයෝගයක්. මම හිතන්නේ මම පෙර භවයේ සිට පතාගෙන ආපු දෙයක් වෙන්නැති මේ ලැබිල තියෙන්නෙ. එකින් එකට ගැළපුණු පුරුක් කෙනෙකුට ලැබෙනවා කියන්නේ ආශිර්වාදයක් නිසාමයි. මගේ පන්තියේ ගොඩක් දෙනෙකුට තිබුණු හීන අතරට මටද එහෙම හීන ලෝකයක් තිබුණා. ඒත් සැබෑ ලෝකයට අවතීර්ණ වන විට අපි තේරුම් ගත යුතුයි අපිට යා යුතු ගමන් මාර්ගය කුමක්ද කියා ඒ නිසා තමයි මම වෘත්තීමය නිළියක් බවට පත්වන්නට තීරණය කළේ.
පාසල් කාලයේ සිටම වේදිකාවට දැඩි ප්‍රිය කරන කෙනෙක් නේද?
ක්ෂේත්‍රයට පිවිසෙන ඕනම රංගන ශිල්පියෙක්ගේ හා ශිල්පිනියකගේ පළමු තැන පාසල් වේදිකාවයි. මම දකින විදිහට ක්ෂේත්‍රයේ ඉන්න බහුතරයක් වේදිකාව ස්පර්ශ කරලා ආපු අයයි. ප්‍රවීණයන්ගෙන් ලද ආභාසය නිසා අද ක්ෂේත්‍රයට එන බොහෝ දෙනෙක් එන්නේ ප්‍රායෝගික හා න්‍යායාත්මක අවබෝධයක් අරගෙනයි. මම ඒ අවබෝධය රැගෙන ක්ෂේත්‍රයට ආපු නිසා මට විවිධ අධ්‍යක්ෂකවරුන් යටතේ වේදිකාව පරිශීලනය කරන්න ලැබුණා. ඒ නිසා මට යෞවන සම්මාන හා රාජ්‍ය සම්මාන උළෙලවලදී හොඳම නිළිය සම්මානය ගන්නත් අවස්ථාව උදාවුණා. මගේ ජීවිතයේ මම වේදිකාවට ඇත්තටම පෙම්බදිනවා.රංගන ශිල්පියකුට හෝ ශිල්පිනියකට ඉගෙන ගන්න තියෙන හොඳම තැන වේදිකාවයි. ඒ ටූ ඉසඩ් හැදෑරීම් කරනවා නම් වේදිකාව තරම් තවත් තැනක් නැහැ. මම ඒ තරම් වේදිකාවට ආදරෙයි. වේදිකාව ගැන එහෙම අවබෝධයක් නැති පිරිසකුත් ක්ෂේත්‍රය තුළ සිටිනවා. මම නම් කියන්නේ ක්ෂේත්‍රයට පිවිසෙන අලුතෙන් එන ඕනෑම කෙනෙකුට ප්‍රායෝගික හා න්‍යායාත්මක දැනුමක් රැගෙන ක්ෂේත්‍රයට පිවිසෙන්න කියලයි. එහෙම අවබෝධයකින් තොරව ඕනෑම ක්ෂේත්‍රයක ගමන් කරන්න අමාරුයි.
ලලිත කලාවේදී උපාධි ධාරිනියක් වූ ඔබට රැකියාවක් කරන්න හිතුණෙම නැද්ද?
උපාධිය ලැබුණාට පස්සේ මට ගුරු වෘත්තියේ රැකියා අවස්ථාව ලැබුණා. ඒත් මගේ අරමුණ කරා ආපු ගමන මට එහෙම උණානම් යන්න හම්බවෙන්නේ නැහැ. පළමු පත්වීම ලැබෙන්නේ දුෂ්කර පළාත්වලට එහෙම ගියානම් කාලයෙන් කාලයට පළාත් වෙනස් කර කර පාසල්වලට ගිහින් උගන්වන්න තිබුණා. මම ගුරු වෘත්තියට අකමැතියි කියනවා නෙවෙයි. මම කොළඹට එන්නේ රංගන ශිල්පිනියක් ලෙස ගමන ආරම්භ කරන්න. කෙනෙකුගේ අරමුණක් තියෙනවානේ. ඒ අරමුණ ඉෂ්ට සිද්ධ කරගන්න යම් කැප කිරීමක් කරන්න වෙනවා. මෙතනට එන්නට මම විශ්වවිද්‍යාලේ ඉන්න කාලේ මගේ මුල්ම සිනමා පටයට මම රංගනයෙන් දායක වෙන්නේ. ඒ විසාකේස චන්ද්‍රසේකරගේ ‘සයපෙති කුසුම’ සිනමාපටයටයි. එදා කවදාවත් මම හිතුවේ නෑ මම ෆේර්ම් පුරවන්න ගියාට ඒ සිනමාපටයට අන්තර්ජාතික මට්ටමෙන් සම්මානය ලබයි කියලා. ඒ ආශිර්වාදය නිසාම මට අද ගමනක අරමුණක් වුණා. මගේ ජීවිතයේ මම හැමදාම බලාපොරොත්තු වෙන්නේ ලැබෙන දේන් සතුටු වෙනවා ඇරෙන්න සිහින ආකරයක් කර ගන්න නෙවෙයි. ඒ ඒ උපාධිය නිසාත් මගේ හැකියාව නිසාත් මට රැකියා අවස්ථා ගොඩක් ලැබුණා. ඒ රැකියා සියල්ලම පසෙකලා තමයි මම අද මේ තැන ඉන්නේ. ආත්ම තෘප්තිය මම ජීවිතයේ ලබන ලොකුම සතුටයි.
යෞවන හා රාජ්‍ය නාට්‍යය උළෙලවලින් පසු ඔබට හොඳ මාවතක් එළිපෙහෙළි වෙනවා නේද?
විශ්වවිද්‍යාලයට ප්‍රවේශ වුණාම මම හැදෑරූ විෂය පථය තුළ උගන්නපු සියලුම ගුරුවරු මා කෙරේ විශ්වාසය ඇතිවුණා. ඒ විශ්වාසය නිසාම මගේ ගමනට ලොකු අත්වැලක් වුණා. මම අර ප්‍රථමයෙන් කිව්වා වගේ සයපෙති කුසුම සිනමා පටයේ ෆේර්ම් පුරවන්න මට අවස්ථාව ලැබුණා. ඒ අවස්ථාවත් හිමිකර දෙන්නේ මගේ ගුරුවරයෙක්. ඒ හිටපු කුඩා කුඩා රූප රාමු තුළ මගේ කතන්දරේ ගොඩාක් ඈතට ලියවුණා.එතන යන විට මම කිසිදු දෙයක් දැනගෙන නෙවෙයි ගියෙත්. ඒ ගමන තමයි මම හිතන්නේ හොඳම දෙය නොදැන යාම. දැනගෙන හිටියා නම් සමහර විට නොයන්නත් තිබුණා. ඒත් සිනමා පටයකට දායක වෙන්න කියපුවාම ලොකු ආසාවක් ඕනෑම කෙනෙකුගේ හිතේ ඇතිවෙනවානේ. ඒනිසා මම කිසිදු විටක දෙවරක් සිතුවේ නැහැ.
සය පෙති කුසුමෙන් පසු ඔබට ටෙලි නාට්‍ය කිහිපයකටම අවස්ථාව ලැබුණා නේද?
නාමල් ජයසිංහගේ සහෝදරයා ටෙලි නාට්‍යයේත්, තණමල්විල කොල්ලෙක්, වීදුරු මල්, මෙට්‍රෝහීන, තත්පරයක් දෙන්න, කොඩි ගහ යට, සකර්ම, සුසුම් රස්තියාදුව, ටේක් කෙයාර් වැනි නාට්‍ය රාශියක් මට එක දිගට ලැබුණා. මේ සියලු නාට්‍ය මට ලැබුණේ මාව දැන හැදුනුම් කම මත නෙවෙයි. මම රඟපාන දේවල් දැකලා මට එන්න කිව්වේ ඔඩිෂන්වලට ඔඩිෂන් එක පාස් වෙලා තමයි මේ සියලූම නාට්‍යවලට දායකත්වය දුන්නේ රංගනයෙන්. ගොඩක් දෙනෙක් මේ නාට්‍යය තුළ මගේ චරිතයන් කතා කළා. පසුගිය දවස් වල පැවැති සම්මාන උළෙලෙ වලදී මගේ නම කතා කරන්නට උණා. ඒ මම කළ චරිත ප්‍රේක්ෂකයාගේ සිත් තුළ තැන්පත් වී තිබූ නිසයි. සම්මාන ලැබෙනවාට වැඩිය ප්‍රේක්ෂකයන් මාව වැලඳ ගැනීම මට වටිනවා. එය රංගන ශිල්පීනියකට හොඳ ආශිර්වාදයක් වෙනවා ක්ෂේත්‍රය තුළ. මගේ වෘත්තිය රංගනය නිසා මට ඔවුන් තමා වටින්නේ.
පුළුල් තිරයේ සිහින සමීකරණය කොහොමද?
ඇත්තටම මේ වන විට දිල්කිට හොඳ ප්‍රතිචාර ලැබෙනවා. විශේෂයෙන් සසික අයියාට මම විශේෂ ස්තුතියක් කරනවා. මේ සිනම පටයට තෝරා ගත්තට මා කෙරෙහි විශ්වාසය තබලා.මේ චරිතයට ප්‍රවිෂ්ට වෙන්නේ ඉස්සෙල්ලා මම ගොඩක් අධ්‍යයනය කටයුතුවල නිරත වුණා.නාගරීකරණික යුවතියක් මුදල්වලට කරන්න දෙයක් නැති නිසා විවිධ දේවල්වලට පෙළඹෙමින් මත් ලෝලීනියක් ලෙස තම ජීවිතයම අඳුරු කරගත් ආකාරය. වර්තමානයේ සිදුවෙන බහුලම කතා සාරාංශයක් මේ තුළ තිබීම නිසා සමාජයට අලුත් යමක් දෙන්න රංගනයෙන් පුළුවන් වුණ එක ගැන මම සතුටු වෙනවා. සිනමා රංගනයේ පළමු ප්‍රධාන චරිතය සිහින සමීකරණයේ දිල්කිගේ රංගනයයි. දිල්කි නිසා මට සිනමාවේ තවත් දොරටු කිහිපයක්ම විවර වුණා. අධ්‍යක්ෂකවරයා ප්‍රමුඛ සියලූම කණ්ඩායම් මට මේ චරිතයට හොඳ සහයෝගයක් ලබා දුන්නා ප්‍රවිෂ්ට වෙන්න. එය ක්ෂේත්‍රය තුළ තිබෙන හොඳ ලක්ෂණයක් ලෙස මම හැමදාම දැක්කා. සජිත සහ කසුනිගෙන් ලැබුණු සහයෝගය කියල නිම කරන්න බෑ ඒ චරිතය තුළ.අපි අපිට උදව් කර ගැනීම තමයි හැම ගමනකටම තිබිය යුත්තේ. සාමූහික එකතුවක් තුළින් ඕනෑම දෙයක් කිරීමේ පහසුව උදාවෙනවා. ඒ නිසා කිසිවකුට ඒ බැමි ලිහන්න බෑ ඒ සාමූහික පැවැත්ම නිසා.
දිල්කී අභියෝගාත්මක චරිතයක් නේද?
අභියෝගාත්මක චරිතයක් නිසාම තමයි මම හරිම ආසාවෙන් කළේ. යම් පණිවිඩයක් සමාජයට දෙන්න චරිතයක් තුළින් පුළුවන් වෙනවා නම් ප්‍රේක්ෂකයා එම චරිතයේ වැලඳ ගන්නවා නම්. ඒ රංගනයේ යෙදෙන ශිල්පියා හෝ ශිල්පිනිය චරිතයට සාධාරණයක් කළා කියලා මම විශ්වාස කරනවා. මේ චරිතය කරන්න මම ගොඩක් ප්‍රායෝගික අත්දැකීම් හා ප්‍රායෝගික ක්‍රියාකාරකම්වල නියැළුණා.. ඒ තුළින් තමයි මම මේ චරිතයට ප්‍රවිෂ්ට වුණේ. විවිධ ප්‍රදේශවල සිදුවන දේවල්, විවිධ පුද්ගලයන්ගේ ඇසුර, මත්ද්‍රව්‍ය ලබාගත් පසු තරුණියක්ගේ හැසිරීම් රටාව. මම ඉතාම සියුම් අන්දමින් සිහින සමීකරණ වෙත සමීප වුණා.
දිල්කිටද මේ දවස්වල කතා කරන්නේ නැතිනම් රෙබෙකාටද කතා කරන්නේ?
දෙදෙනාටම කතා කරනවා. ඒත් රෙබේකා පැත්තකින් තියලා ඩිල්කිට තමයි විශේෂ ස්තුතියි ප්‍රකාශ කරන්නේ. අද පවතින ආර්ථික රටාවත් එක්ක ජනතාවට හොඳ නතචබටධපථ එකක් තිබුණොත් මොන දේට වියදම් කරත් නියම දේ ලබාගන්නවා. මේ සිනමා පටය පුරාවට කතා කරන්නේ හොඳ නිර්මාණාත්මක දෙයක් ඒ නිසා ප්‍රේක්ෂකයෝ මේ සිනමා පටයේ වැලඳ ගන්නවා. ඕනෑම නිර්මාණයක් තුළ සිනමාත්මක නිර්මාණයක් වුණොත් ප්‍රේක්ෂකාගාරයට ප්‍රේක්ෂකයන් ඇදී එනවා.ජීවිතයේ මිනිසුන්ට කොච්චර ප්‍රශ්න තිබුණත් තමන්ගේ අතේ වියදමින් ඉතිරි වන මුදලින් කීයක් හරි විනෝදාස්වාදයට වෙන්කරනවා කියන්නේ කොච්චර වටිනවද.ඒ නිසා අපි හොඳ දේ හැම වෙලේම සමාජයට දිය යුතුයි.
සහින සමීකරණ සිනමා පටයත් සමඟ සිනමාවේ ගමනක්ද දිගටම ආරම්භ කරන්නේ?
මම වේදිකාවටත් ටෙලි නාට්‍යයටත් සිනමාවටත් යන ත්‍රිත්වයට එක හා සමානවම ආදරේ කරනවා. මම වෘත්තීමය වශයෙන් රංගන ශිල්පිනියක්. එක පැත්තකින් සියලු ලැබීම් තිබුණු රැකියාවල් දාලා රක්ෂාවක් හැටියට රංගනය තෝරා ගැනීම නිසා ගුණාත්මක හොඳ නිර්මාණ සියල්ලටම මගේ රංගනය ලබා දෙනවා. ඒත් වේදිකාව හා සිනමාව කියන ද්විත්වයට මම වඩාත් ප්‍රිය කරනවා.
දිල්කි වගේ ප්‍රශ්න ගොඩකට මැදි වුණොත් රංගන ජීවිතයත් විවාහ ජීවිතයත් කොහොමද සමබර කරගන්නේ?
මගේ ස්වාමියත් මමත් එකම විශ්වවිද්‍යාලයේ විද්‍යාර්ථීන්. අපේ ජීවිත ගමන පටන් ගන්නේ ශ්‍රී පාලියෙන්. ඔහුත් මාත් එකම මාවතක ගමන් කරන නිසා අපේ ජීවිතවලට ගැටලුවක් නැහැ. මට ඔහුගෙන් හොඳ ආරක්ෂාවක් සහ මේ ගමනට හොඳ සහයෝගයක් ලැබෙනවා. දිල්කි ප්‍රශ්න තුළ වෙලාගෙන සිටියාට අපි ප්‍රශ්න තුළ ජීවත් වෙන්නේ නැහැ. අපි එකිනෙකාට අවබෝධය තිබෙන නිසා. හොඳ ගමනක් අපි අපේ ජීවිත ආරම්භ කරලා තියෙන්නේ. අපේ ගමනේ අපේ ප්‍රශ්න වෙනුවට නිර්මාණයි හැමදාම තියාගන්නේ. ඒ නිසා අපේ ජීවිත සමබරයි.
නිර්මාණයකට දායක කරගන්නට ප්‍රධාන, උප ප්‍රධාන චරිත දෙන්නම් කියලා විවිධ අයුරින් යෝජනා ගෙනවා නේද ක්ෂේත්‍රය තුළ?
මටත් විවිධ අයුරින් යෝජනා ගෙන ආවා. ඒ දේවල්වලට හිස නැමුවා නම් මම අද මෙතන නෙවෙයි ඉන්නේ. එහෙම කොට්ඨාසයකුත් ඉන්නවා. හැකියාව තියෙනවා නම් කිසි කෙනෙක් ගාව දනින් නැමෙන්න ඕනේ නැහැ.නිර්මාණවේදිනියක් ලෙස නිවැරදි ගමනක් යනවා නම් කිසිවකුට බයවෙන්න වුවමනාවකුත් නැහැ. චරිතය ලබා දුන්නොත් චරිතයට සාධාරණයක් කිරීම තමයි මගේ නම් ඒකායන අරමුණ.
ඉදිරි පියවර කොහොමද තබන්න කැමති?
මේ සිනමා පටය ප්‍රදර්ශනයත් සමඟ පසුගිය කාලයේ විකාශය වූ ටෙලි නාට්‍ය හා දැනට නාලිකා කීපයකම විකාශය වන ටෙලි නාට්‍ය සමඟ හොඳ නිර්මාණ කිහිපයකටම කතා කරලා තියෙනවා. සසංකාර මාලා කතාවක්, අළු පාට දෙදුනු සහ සිනමා පට කිහිපයකටම ඉදිරියේදී දායකත්වය දෙන්න බලාපොරොත්තු වෙනවා. මේ අතරින් කිහිපයක් දැනටමත් රූපගත කිරීම් කරමින් පවතින්නේ. හොඳ නිර්මාණ කිහිපයකින් ඉදිරියේදී දැකගන්න පුළුවන් වෙයි ප්‍රේක්ෂකයන්ට .මේතාක් මේ ගමනට උදව් කරපු සියලු දෙනාටම මෙය මම ස්තුති කරන්න අවස්ථාවක් කරගන්නවා.
උපුටා ගැනීම සරසවිය
