සිහින සමීකරණ ලයිෆ් එකට ගයිඩ් ලයින් එකක්
සසික හේරත් අධ්‍යක්ෂණය කරනු ලබන ‘සිහින සමීකරණ’ සිනමා නිර්මාණය හරහා රන්දික ගුණතිලකව මේ දිනවල රිදී තිරයෙන් දකින්න ලැබෙනවා. ඔය අතරේ පුංචි තිරයෙන් ද ලලයි ලිලයි ලයි නිර්මාණයෙන් ද දැඩි කතාබහට ලක්වෙන චරිතයක්. ඉතින් මීවිත අපි අද රන්දිකට මේ ඉඩකඩ වෙන් කරන්න අදහස් කළා.
රන්දික ‘සිහින සමීකරණ’ තුළින්ම මේ කතාව පටන් ගත්තොත්?
පසුගිය 07 වැනිදා ඉඳලා මම රංගනයෙන් දායක වුණු සිහින සමීකරණ සිනමා නිර්මාණය තිරගත කිරීම ආරම්භ කළා. මෙය සසික හේරත් කියන තරුණ අධ්‍යක්ෂවරයාගේ කුලුඳුල් සිනමා නිර්මාණයක්. මම, සජිත ඇන්තනී, කසුනි කාවින්දි, රෙබෙකා දිල්රුක්ෂි, අශාන් ඩයස්, පූජන දන්දෙනිය වගේ පිරිසක් මෙයට රංගනයෙන් දායක වෙනවා.
සිහින සමීකරණ තුළින් සමාජයට දෙන පණිවුඩය?
මේ චිත්‍රපටය ඇතුළේ තියෙනවා යම්කිසි පණිවුඩයක්. ඒ වගේම මේ මොහොතේ මේ සමාජය ඇතුළේ සිද්ධ වෙන කතාවකුත් තියෙනවා. මම දකින විදිහට මේ චිත්‍රපටය ලයිෆ් එකට පොඩි ගයිඩ් ලයින් එකක්. තාරුණ්‍යයට හොඳ ගයිඩ් ලයින් එකක්. ලයිෆ් එකේ එක මොහොතකදී අපි කාත් එක්කද ඉන්නේ, අපි මොකක්ද කරන්නේ කියලා තීරණය කරන්න වෙනවා. ඒ තීරණය ගන්න අවශ්‍ය සාධක කිහිපයක් ඕනෑ වෙනවානේ. මම හිතනවා මේ චිත්‍රපටය තාරුණ්‍යයට හොඳ සාධකයක් වේවි කියලා.
මේ චිත්‍රපටයට ආරාධනාව ලැබුණේ කොහොමද?
මට ඒ ගැන ඇත්තටම ලොකු මතකයක් නැහැ. කොහොමහරි සසික අයියා හෝ අපේ ඉන්දික ධර්මතිලක අයියා හරි තමයි මට කතා කළේ. මට කතා කරලා කිව්වා වැඩක් තියෙනවා කරන්න සජිත ඇන්තනී එක්ක කියලයි කිව්වේ. මට ඇත්තටම පෞද්ගලිකව ආසාවක් තිබුණා අපේ පරම්පරාවේ නළුවෙක් වුණ සජිත ඇන්තනී එක්ක රඟපාන්න. ඒ ආසාවත් එකක් සසික අයියාව හම්බවෙලා වැඩේ කතා කරලා ඔහුට අවශ්‍ය විදිහට හුවමාරු කරගත්තා.
සිහින සමීකරණ රූගත කරලා කොච්චර කාලයක් වෙනවාද?
මට මතක විදිහට 2020 වසරේ හෝ 2021 වසරේ තමයි රූගත කිරීම් සිදු කළේ. ඒ කියන්නේ කොරෝනා වසංගතය පටන් ගන්නවාත් එක්කමයි අපි ෆිල්ම් එක ඉවර වෙලා යනකොට කොරෝනා වසංගතයට රට වැහුවා.
සජිත එක්ක රඟපාන්න ලැබුණු අත්දැකීම් ගැනත් කතා කළොත්?
මට මීට කලින් සජිතව හම්බවෙලා තිබුණේ නැහැ. සජිතව දැකලා විතරයි තිබුණේ. චිත්‍රපටවලින්, ටීවී එකෙන් තමයි දැක්කේ. දැන් මේ චිත්‍රපටයේ සජිතයි මායි රඟපාලා අවුරුදු පහකට විතර ආසන්නයි. හැබැයි ඒ මිත්‍රත්වය අපි මැරෙන තුරාවටම තියේවි. අපි දෙන්නාගේ මිත්‍රත්වය ඇති වුණේ සිහින සමීකරණ චිත්‍රපටය හින්දයි. හැබැයි පස්සෙ කාලෙක අපි දෙන්නට අපි දෙන්නා තේරුම් ගත්තට පස්සේ මගේ ජීවිතයට හොඳ සමීප මිත්‍රයෙක් වුණා.
මේ ඔබේ කී වැනි චිත්‍රපටයද?
මම මීට කලින් විසා අයියාගේ පාංශු, චන්න අයියාගේ යූටර්න්, ඉන්දික ෆර්ඩිනැන්ඩුගේ වෙඩි නොවදින ළමයි චිත්‍රපටවලට දායක වුණා. ඊට පස්සේ මට මතක විදිහට සසික අයියත් එක්ක සිහින සමීකරණ චිත්‍රපටයට දායක වුණා. තව අරුණ ජයවර්ධන අයියාගේ හැපි බර්ත් ඩේ කියන චිත්‍රපටයටත් දායක වුණා.
ඔබ රඟපෑ චරිත අතරින් ඔබට දැනෙන්න රඟපාන්න ලැබුණු චරිතය මොකක්ද?
ඇත්තටම එහෙම හිතුණ දවසක මම රඟපාන එක නවත්වනවා. ඒක මම ඇත්තටම කියන්නේ. මට දැන් හිතුණොත් මම මේක කළා ඇති, මෙතැනින් එහාට මට කරන්න දෙයක් නැහැ කියලා හිතුණොත් එහෙම රඟපෑම නවත්වනවා. මම කරපු චරිතය බලලා ආපහු මෙහෙම කරනවා නම් හොඳයි කියලා හිතෙන තැනට වැඩ කරන්නේ නැහැ. මොකද මට වගකීමක් තියෙනවා. මම වෙනුවෙන් මුදල් වියදම් කරන කෙනෙක් ඉන්නවා. මම වෙනුවෙන් නිර්මාණයක් භාරදීපු අධ්‍යක්ෂවරයෙක් මට ඉන්නවා. මම වෙනුවෙන් ලියපු මනුස්සයෙක් ඉන්නවා. ඊට අමතරව සියයට දෙසීයක වැඩ රාජකාරි ටිකක් නිෂ්පාදන අංශයෙන් සිද්ධවෙනවා. ඉතින් ඔවුන්ට මම වගකියන්න ඕනෑ. ඒ අය මං වෙනුවෙන් තමයි ඒ මහන්සිය වෙන්නේ. ඊළඟට මාව බලන ප්‍රේක්ෂකාගාරයක් ඉන්නවා. ඒ අයට මම වගකියන්න ඕනෑ. ඒ නිසා මම කරපු කිසිම චරිතයකට සහ කරන කිසිම චරිතයකට කවදාවත් උත්සාහ කරලා නැහැ, මේක තෘප්තිමත් මේක තෘප්තිමත් නැහැ කියලා කියන්න.
ඔබට ලැබෙන මූල්‍ය වටිනාකම ගැන හිතනවද?
මම මුදල් ගැන හිතනවා. හේතුව මගේ තාත්තයි මමයි සතුටින් ජීවත් වෙන්න ඕනෑ. මගෙන් කවුරුවත් ඇවිල්ලා උදව්වක් ඉල්ලුවොත් මම එයාට ඒ උදව්ව කරන්න පුළුවන් වෙන්න ඕනෑ. මම මිනිස්සු ගොඩකගේ උදව්වලින් ආපු මිනිහෙක්. ඉතින් මට එයාලට ඒක කරන්න පුළුවන් වෙන්න ඕනෑ. එතැනදි ඒ වැඩේට අධ්‍යක්ෂවරයාට අවශ්‍ය ප්‍රමාණයක් තියෙනවානේ. මම ඒ ප්‍රමාණය කරනවා එතැනින් එහාට මම ඒ ගැන හිතන්න යන්නේම නැහැ. ඒක මම කරපු තවත් එක වැඩක් විතරයි.
උදාරයි, කණ්ඩමාලේ කියන වචන සාමාන්‍ය ජීවිතයේදී පාවිච්චි වෙනවාද?
ඇත්තටම මම ඒක පාවිච්චි කරන්නේ ඇක්ෂන් කට් එක ඇතුළේදී විතරයි. හේතුව මට කියලා පෞද්ගලික ජීවිතයක් තියෙනවා. මම කැමැතියි ඒකේ ජීවත්වෙන්න. ඒකේ ජීවත්වෙන විදිහක් තියෙනවා. ආර්ට් මගේ රස්සාව.
හැබැයි ඔය වචන මේ දවස්වල හරි ජනප්‍රියයි?
ඇත්තටම ඒක ජනප්‍රිය වෙලා තියනෙවා. නමුත් ඒක මට අදාළ එකක් නෙවෙයි.
ලලයි ලිලයි ලයි හි උදාරයි උදාරයි කියන වචන පිටපතේ තිබුණද?
රසික සුරවීරආරච්චි කියන ඉතා දක්ෂ පිටපත් රචකයා ලියලා එවපු වචන තමයි අපි මේ දර්ශන තලයේදී භාවිතා කරන්නේ. නැතිව මට ආපු වචන නෙමෙයි.
ලලයි ලිලයි ලයි දර්ශන තලයත් සුන්දර ඇති නේද?
මෙහි රඟපාන සියලුම දෙනා මගේ ඇත්ත ජීවිතයටත් සමීපයි. ඒ අයගෙන් එන රියැක්ෂන් ඉතා අවංක ඒවා. අනික අපේ සුසංයෝගය ඉතා හොඳට මැච් වෙනවා.
උමා අසෙනි එක්ක රඟපෑම ගැනත් කතා කළොත්?
උමා අසෙනි කියන්නේ මම මීට කලින් වසර ගණනාවක ඉඳලා දන්න හඳුනන සහෝදර රංගන ශිල්පිනියක්. අපේ අක්ක කෙනෙක් වගේ. මට මේ චරිතය මහ ලොකු මහන්සියක් වෙලා කරන්න අවශ්‍යතාවය නැහැ. එයාගෙයි මගෙත් ඇක්ෂන් රියැක්ෂන් හරි නැචුරල්. අපි දෙන්නා එකට තියටර් එකේ වැඩ කරලා තියෙනවා. අපි සහෝදරයෝ වගේ ඉන්න හින්දයි මේ තරම් මේ චරිත සාර්ථක වෙලා තියනේනේ. ඒකයි මේ චරිත මේ තරම් රසිකයන්ට දැනෙන්නේ.
සුපුන් රත්නායක ඔබේ රංගන ජීවිතයේ හැරවුම් ලක්ෂ්‍යයක් වුණා නේද?
මම මේ යන පාර්ත් එක පහසු කරලා දෙන්න ආපු කෙනෙක් විදිහට ඔහුව දකිනවා. එයා මට දෙන උදව්වෙන් මම උපරිම ප්‍රයෝජන ගන්නවා කියලා විශ්වාස කරනවා.
රන්දිකගේ ජීවිතයෙන් හීන තිබෙනවාද?
මම දන්නේ නැහැ මේ කරන නිර්මාණයෙන් පස්සේ ඊළඟට මොනවා කරාවිද කියලා. මම මේ මොහොතේ ජීවත්වෙනවා, හෙට උදේ ගුඩ් බායි කියන්න වුණොත් ගුඩ් බායි කියනවා. ගුඩ් මෝනින් කියන්න පුළුවන් වුණොත් ගුඩ් මෝර්නින් කියනවා එච්චරයි. ජීවත් වුණා හිටියා සතුටින් ගියා.
රන්දික නැඟීඑන නළුවාට හිමි සම්මාන ලබා ගැනීම ගැන කතා කළොත්?
2019 වසරේ රයිගම් ටෙලි සම්මාන උළෙලේදී නැඟීඑන නළුවාට හිමි සම්මානය ලබාගන්නවා. ඊට පසුව සුමති ටෙලි සම්මාන උළෙලේදී වසර දෙකක් හොඳම සහාය නළුවාට හිමි සම්මානය ලබාගන්නවා.
අනික සම්මාන ලැබීම වගේම සම්මාන රාත්‍රිය ගැන මගේ තියෙන්නේ මෙවැනි අදහසක්, අපිට ඔය සම්මානයක් හෝ ඇගැයීමක් ලබනවා කියන්නේ මගේ ක්ෂේත්‍රයේ එහෙමත් නැතිනම් කර්මාන්තයේ එක දවසක් විතරයි. එතැනින් පස්සේ මේ ක්ෂේත්‍රය ඇතුළේ ඊට පහුවෙනිදාට මට ගෙවන වැටුප වැඩිවෙන්නේ නැහැ. අනික ඔය සම්මානය හම්බවෙන්නේ මේ කර්මාන්තයට නෙමෙයි. රන්දික ගුණතිලකට. මම කලින් දවසේ වැඩ කළේ රුපියල් පන්දහසට නම් අවෝර්ඩ් එකත් අරගෙන ඊට පහුවෙනිදාම විසිපන් දහසයි කියන්න බැහැ. හේතුව මේ කර්මාන්තයට නෙමෙයි සම්මානය හම්බවෙන්නේ, රන්දික ගුණතිලකට. මම අර හිටපු සාමාන්‍ය මනුස්සයා විදිහටම වැඩ කරන්න ඕනෑ. සම්මාන රාත්‍රිය එක දවසක්. ඒක අපි ගෙදර ගෙනිහිල්ලා කොහේ හරි තැනක තියනවා. චූටි නංගිට හිතුණොත් එයා ඕක පිහදායි. නැත්නම් මට හිතුණොත් මම ඕක පිහදායි. එතැනින් එහාට ඒකට කරන්න පුළුවන් දේ මොකුත් නැහැ. මම ඇගැයීමකට ලක්වෙච්ච නළුවෙක්. ඊළඟ මොහොතේ මට බැහැ හිතෙන හිතෙන විදිහට දේවල් කරන්න. මිනිස්සු මාව අගය කරලා තියෙන්නේ. එතකොට අගය කරපු මිනිස්සුන්ට මම වග කියන්න ඕනෑ. ඒක නිසා ඊළඟ මොහොතේ ලැබෙන වැඩේට මට සිද්ධ වෙනවා සියයට දෙසීයක් මහන්සි වෙන්න. හේතුව මම සම්මානනීය නළුවෙක් විදිහට මගේ නම හැඩ ගැසිලා තියෙන්නේ. ඒකට මම වගකියන්න ඕනෑ. මම වැඩ කරන්නත් ඕනෑ.
දිනේෂ් විතාන
උපුටා ගැනීම දිවයින
