හෙද රස්සාවෙන් ඉවත්වෙලා රංගනය තෝරා ගත්තා
"අවුරුදු කුමාරි තරගය ජීවිතය වෙනස් කළා" නව පරපුරේ රංගන ශිල්පිණියක් වන විනූ පෙරේරා, ‘බඹරෙක් ඇවිත්’ සහ ‘සංචාරෙ’ යන ටෙලි නාට්‍ය මගින් මේ දිනවල ඔබට දැනගන්න පුළුවන්. ඇයගේ අලුත්ම තොරතුරු දැනගන්න මීවිත අපි මේ විදිහට කතාබහක යෙදුණා.
විනූගේ රංගන වැඩකටයුතු කොහොමද?
හිරු ටීවී විකාශය වන, චරිත් අබේසිංහ අධ්‍යක්‍ෂණය කරන ‘බඹරෙක් ඇවිත්’ ටෙලි නාට්‍යය, සියත ටීවී විකාශය වන, ලක්‍ෂමන් පුෂ්පකුමාර අධ්‍යක්‍ෂණය කරන ‘සංචාරෙ’ යන නාට්‍ය දෙකත් එක්ක මේ දිනවල ටිකක් කාර්බහුල වෙලා ඉන්නෙ.
බඹරෙක් ඇවිත් ටෙලියට ආරාධනා ලැබෙන්නෙ කොහොමද?
චරිත් අයිය කියන්නෙ මම කැමතිම කෙනෙක්. නමුත් මීට කලින් ඔහුත් එක්ක වැඩකරල නැහැ. ඔහු කළ වැඩ දැකල තියෙන්නෙ ටීවී එකෙන් විතරයි. එක දවසක් ෆේස්බුක් මාර්ගයෙන් මැසේජ් එකක් දාල මගෙ නම්බර් එක ඉල්ලල තිබුණා වැඩකට කියල. ඉන් පස්සෙ ඔහු මට කතා කරල කිව්ව මෙහෙ වැඩක් තියෙනව, ඒකට මාව තමයි තෝරාගෙන තියෙන්නෙ, කැමතිද කියල. මම කිසිම දෙයක් අහන්න ගියෙ නැහැ. කැමති වුණා.
මේ චරිතය ගැන කතා කළොත්?
මට ලැබිල තියෙන්නෙ මල්කාන්ති කියන චරිතය. මල්කාන්ති කියන්නෙ ඇයගේ මහත්තයාට ඇත්තටම ගොඩක් ආදරය කරන කෙනෙක්. මහත්තයා ගමට ආවාම ඔහුට ගමේම ගැහැනු ළමයි ආදරය කරනවනෙ. හැබැයි ඒ අයට එක එක හේතු තියෙනව ආදරය කරන්න. මේ අතර අනෙක් කාන්තාවන් එක්ක තියෙන ගැටුම්, ගමේ පිරිමින්ගෙන් තියෙන අඩංතේට්ටම්, ඇය ඒවාට මුහුණ දෙන හැටි වගේ දේවල් තමයි මේ චරිතය තුළ තියෙන්නෙ.
මල්කාන්ති ගැන ප්‍රේක්‍ෂකයො මොකද කියන්නෙ?
ඇත්තටම ගොඩක් හොඳ කියනව. නමුත් අපි සාමාන්‍යයෙන් කරන වැඩකදි ලැබෙන ප්‍රතිචාර තරම්ම නැහැ. මම දන්නෙ නැහැ ඒ ඇයි කියල. සමහර විට එක එක්කෙනාගෙ කැමැත්තත් එක්ක සිද්ධ වෙන දෙයක් නිසා වෙන්න ඇති. නමුත් කලාවේ ඉන්න අයගෙන් ඉතාම හොඳ ප්‍රතිචාර ලැබෙනව.
සංචාරේ ටෙලිය ගැන කතා කළොත්?
මේ නාට්‍යයේ මගේ චරිතය වෙන්න සෙනාලි. සල්ලිකාර, නපුරු බොස් කෙනෙක්. නමුත් ආදරය කරන කෙනාට පණ වගේ ආදරය කරන කෙල්ලෙක්.
විනූගේ චරිතයට මේ චරිතයට මොන වගේ සමානකමක්ද තියෙන්නෙ?
බොස් කෙනෙක් කියන එකෙන් විනූ සමාන නැහැ. නමුත් මම ගොඩක් නපුරුයි. ඉක්මණින් කේන්ති යනව. ඒක මගේ වරදක් වෙන්න ඇති. ඒ වගේ දේවල්වලින් ගොඩක් දුරට සමානකම් තියෙනව.
අලුත් ආරාධනා?
ඔව්, වැඩ කිහිපයකටම ආරාධනා ලැබුණා. නමුත් මම ඉගෙනගන්න අතරතුර තමයි නිර්මාණවලට සම්බන්ධ වෙන්නෙ. එහෙම වුණාම වැඩ ගොඩක් බදාගෙන කරන්න අමාරුයි. දැනට කරගෙන යන චරිත දෙක එකිනෙකට වෙනස්. තවත් එකක් භාරගත්තොත් ඒ දෙකටම වඩා වෙනස් දෙයක් කරන්න මම මහන්සි ගන්න ඕනා. කොහොම වුණත් මේ අතර මිනිස්සුන්ට දැනෙන්න දෙයක් කරන්න පුළුවන් චරිතයක් ලැබුණොත් කොහොම හරි කරන්න උත්සාහ කරනව.
විනූ ඇයි රඟපෑම තෝරාගන්නෙ?
ඇත්තටම රඟපාන්න ඕන කියන දෙයක් මගෙ හිතේ තිබුණෙ නැහැ. මම ගමේ අවුරුදු කුමාරිය වුණා. ඉතිං මට වුවමනා වුණා ටීවී එකේ අවුරුදු කුමාරියක් වෙන්න. අම්මා, තාත්තා කැමති වුණෙත් නැහැ. බලෙන් තමයි ආවෙ. එයාල අකමැති වුණාට මට උදව් කළා. 2019 වසරේදී ස්වාධීන රූපවාහිනියේ පැවැත්වුණ අවුරුදු කුමාරිය තරගයේ අවසාන පස් දෙනා අතරට තේරීපත්වෙන්න මට අවස්ථාව ලැබුණා. එතැනින් පස්සෙ ගොඩක් නිර්මාණවලට ආරාධනා ලැබෙන්න පටන්ගත්තා. මේ දේවල් එක්ක තමයි මගේ ජීවිතය වෙනස් වෙන්නෙ.
අවුරුදු කුමාරි තරගය විනූව මේ තරම් දුරක් අරගෙන එයි කියල එදා හිතුවෙ නැහැ?
ඔව්, එමෙ දෙයක් මම කවදාවත් හිතුවෙ නැහැ. නමුත් අවුරුදු කුමාරිය නොවී අද මම මේ වගේ තැනක ඉන්නව.
විනූගෙ විස්තර ටිකක් කියමු?
මගේ ගම වත්තල, උස්වැටකෙයියාව. පවුලේ ඉන්නෙ අම්මයි, මමයි, මල්ලියි. තාත්තා මීට මාස කිහිපයකට පෙර අපි අතරින් සමුගත්තා.
විනූගෙ වෘත්තිය රංගනයද?
ඔව්, මේ වන විට මගේ වෘත්තිය රංගනය. මම පෞද්ගලික අංශයේ හෙදියක් හැටියට කටයුතු කළා. නමුත් මේ වැඩකටයුතුත් එක්ක රැකියාව කරගෙන යන්න අපහසු වුණා. එතනදි මගේ තාත්ත කිව්වා, මෙහෙම කරන්න අමාරුයිනෙ, දෙකෙන් එකක් තෝරාගන්න කියල. එතනදි මම රංගනය තෝරාගන්නව.
හෙදිය කියන වෘත්තියට වඩා රංගනය වෘත්තිය හැටියට තෝරාගැනීම ගැන අද මොකද හිතෙන්නෙ?
පුංචිකාලෙ ඉඳන් මගේ ආසාව තිබුණෙ හෙදියක් වෙන්න. මගේ අම්මත් හරි කැමති වුණා මම ඒ ඇඳුම අඳිනව බලන්න. නමුත් මගේ ජීවිතය දැන් සම්පූර්ණයෙන්ම වෙනස්වෙලා තියෙන්නෙ. මිනිස්සුන්ගෙ ආදරය ලැබෙනව, ඉස්සර ටීවී එකෙන් මම දැකපු දැවැන්ත චරිත දැන් මගේ ඇස් දෙක ඉදිරියේ දකින්න ලැබෙනව. කතාකරන්න ලැබෙනව. මේ දේවල් එක්ක මම දැන් රංගන ජීවිතයට ගොඩක් කැමතියි.
ජනප්‍රියත්වය ගැන අදහස මොන වගේද?
තවම මම හිතන්නෙ නැහැ මට ලොකු ජනප්‍රියත්වයක් තියෙනව කියල සහ මම ඒක මනින්නෙ මිනිස්සුන්ගෙ ආදරයෙන්. හිණිපෙත්තටම ජනප්‍රියත්වයක් නැති වුණත් දන්න අතළොස්සගෙන් මට හොඳ ආදරයක් ලැබෙනව. ඒ ලැබෙන ආදරයට මම හරි ලෝබයි.
රඟපාන්න ආසාවෙන් ඉන්න චරිතයක් ඇති?
මගේ වයසත් එක්ක දැනට මට ලැබෙන්නෙ පෙම්වතියගේ චරිත. නමුත් මම කැමතියි ඉදිරියේදි ටිකක් අවලස්සන චරිතයක් කරන්න.
ක්‍ෂේත්‍රය ගැන දැනෙන්නෙ කොහොමද?
ඇත්තටම හොඳයි. මිනිස්සු කියන දේවල් නම් මේ ඇතුළෙ නැහැ. මට එහෙම දේවල් වෙලාත් නැහැ.
කැපිලි කෙටිලි නැහැ?
අනේ නැහැ. මම එහෙම හිතන්නෙ නැති නිසාද දන්නෙත් නැහැ. මොකද මගේ හැකියාව තව කෙනෙකුට ගන්න බැහැ වගේම තව කෙනකුගේ වටිනාකම මට ගන්නත් බැහැ.
ජනප්‍රියත්වයත් එක්ක ආදර යෝජනාත් එනව ඇති?
ජනප්‍රියත්වය නිසාද නැතිනම් ඇත්තටම ආදරේ හිතිලද කියල දන්නෙ නැහැ. ආදර යෝජනා නම් එනව. ඒ අතර සමහර ඒවා නම් හරිම කරදරකාරී වෙනව.
මහේෂ් එදිරිසිංහ
උපුටා ගැනීම දිවයින
