දාන්න ඕන නීති ඔක්කොම දාලා මාව හිර කරන්නෙ දුව විතරයි
ගයාන් වික්‍රමතිලක කියන්නේ පුංචි තිරය වගේම සිනමාවේ විවිධ චරිත ස්පර්ශ කළ රංගන ශිල්පියෙක්, පුංචි තිරයේ පෙම්වතා වෙන්න තවමත් වාසනාවන්ත වූ ඔහු පුංචි තිරයේ ඉන්න දරදඬු විසේකාර, මුරණ්ඩු චරිතයක්. ඒත් ඒ මුරණ්ඩුකම් පුංචි දියණිය ඉදිරියේ නොපෙන්වා දුවණියට ආදරණීය අප්පච්චි වූ චතුරිකා පීරිස්ට ආදරණීය සැමියා වූ ඔහු ඔහු ගැනත් පවුල ගැනත් මේ විදිහට අපත් සමඟ කතාබහ කළා.
ගයාන් ඉස්සර වැඩිපුර නිර්මාණ එක්ක හිටපු රංගන ශිල්පියෙක්. දැන් ඉදහිට දකින්නේ?
මම කාලී චිත්‍රපටයට සම්බන්ධ වුණා. ඒ වගේම හිරු නාළිකාවේ තවම විකාශය වෙන රැල්ල වෙරළට ආදරෙයි නාට්‍යයේ දකින්න ලැබෙනවා. ඊට අමතරව මන්දාරම් කතාවේ නාට්‍යයේ හිටියා. දැනට මේ ටික තමයි.
දැන් ඉස්සර වගේ ඉල්ලුමක් නැද්ද? එහෙම නැත්තම් ඔබව කළු චරිතවලට කොටු කිරීමත් එක්ක ලැබෙන නිර්මාණ ප්‍රතික්ෂේප කරනවද?
ඇත්තටම කිව්වොත් ඒක තමයි වෙන්නේ. ඉල්ලුම තියෙන්නේ එකම චරිත ස්වභාවයන් තියෙන චරිතවලට. රැල්ල වෙරළට ආදරෙයි නාට්‍යයේ රළු චරිතයක් කරන්නේ. ඒ වගේ චරිත වලට එක දිගට ආරාධනා ලැබුණා. ඒ චරිතය ඇතුළේ මට දෙයක් කරන්න නැත්තම් මම ඒ වගේ චරිත කරලා වැඩක් නැහැ කියලා තමයි හිතන්නේ. තවම ප්‍රේමවන්තයාගේ චරිතයටත් ආරාධනා ලැබෙනවා. ගෙවිම් හොඳට කළත් ඒ වගේ චරිතවලින් ඈත් වෙන එක හොඳයි කියලා හිතුණා. මොකද තියෙන හැම ටී.වී. චැනල් එකේම මාව දුෂ්ටයා විදිහට දකින්න මම කැමති නැහැ.
ඔය කොටුවෙන් පනින්න චතුරීකාට කියන්න ඔබට ගැළපෙන චරිතයක් එක්ක හොඳ පිටපතක් ලියන්න කියලා?
එයා මේ දවස්වල ටෙලි පිටපතක් වගේම චිත්‍රපටයක් කරන්න පිටපතක් ලියනවා. ඉක්මනින් එහි වැඩ ආරම්භ කරන්න බලාපොරොත්තු වෙනවා. නමුත් මම ඒ තුළින් දකින්න ලැබෙයිද කියන්න බැහැ. අපි කරන්න ඉන්න තව නිර්මාණ තුනකුත් තියෙනවා. රටේ තියෙන ආර්ථික ප්‍රශ්න එක්ක දවසින් දවස බජට් කරන ගානට වඩා ලොකු මුදලක් යට කරන්න වෙන නිසා ටිකක් බලාගෙන ඉන්නවා අපේ නිෂ්පාදනය ක් කරන්න. බලමු ඉතින් මොනවද කරන්න පුළුවන් කියලා.
ඔබ රංගනයෙන් දායක වූ පරණ නිර්මාණ සඳහා තවමත් ඔබට ප්‍රතිචාර ලැබෙනවා නේද?
ඔව්. ඉස්සර කරපු චරිතවලට තවමත් ආදරේ කරන ඒ ගැන මතක් කරන රසිකයින් ඉන්නවා. බොඳ මීදුම්, සේපාලිකා වගේ නාට්‍ය සඳහා, කියා දෙන්න ආදරේ නාට්‍යයේන් ඉවත් වෙලා දැන් අවුරුද්දක් විතර වෙනවා. නමුත් සීසර් වසන්තට තවම ගොඩක් අය ආදරෙයි. ඇයි ඒ චරිතයෙන් ඉවත් වුණේ කියලා අහනවා. තවදුරටත් ඉන්න තිබ්බා කියනවා. ඒ වගේ ආදරණීය ප්‍රතිචාර ලැබෙනවා .
චතුරිකා පීරිස් ඔබේ ජීවිතයට සම්බන්ධ නොවුණා නම් ගයාන් අධ්‍යක්ෂණයට යොමු නොවෙන්න ඉඩ තිබ්බද?
එයා මගේ බිරිඳ නොවුණා නම් මට කොහොමත් නාට්‍ය අධ්‍යක්ෂණය ට සම්බන්ධ වෙන්න ලැබෙන්නේ නැහැ. එයා තමයි මගේ හයිය. මගේ හෙවණැල්ල. මටයි දෝණිටයි ලොකුම රැකවරණය එයා තමයි. පුද්ගලික ජීවිතේ වගේම කලා ජීවිතේට එයා මට හයියක්.
කලාව එක්ක බොහෝ කලක් ඉන්න ඇයට නිර්මාණ තෝරා ගැනිමේ රසය වැඩිපුර ඇති. ඔබ චරිත තෝරා ගනිද්දි වාරණ දාන්නෙ නැද්ද?
මට ඉන්නේ ඔළුවයි මොළෙයි කන්නෙ නැති බිරිඳක්. එයා මට අම්මා වගේ. නිතරම මගේ දේවල්වලට සහය දෙනවා.
මට ලැබෙන චරිත ගැන එයා කිසිම දෙයක් කියන්නේ නැහැ. මම නිර්මාණ ප්‍රතික්ෂේප කරද්දී හෝ චරිත තෝරද්දි එයා කියන්නේ ඔයාට දැනෙන දේ කරන්න. හිතලා බලලා තීරණ ගන්න කියලා විතරයි. ඉස්සර නම් අවුරුද්දකට නිර්මාණ අටකට නවයකට විතර ආරාධනා ලැබෙනවා. දැන් ඊට වඩා අඩුවෙන් ආරාධනා ලැබුණත් සමහර නිර්මාණවල කොලිටි බජට් එක්ක මටම හිතෙනවා ඒවාට සම්බන්ධ නොවී ගෙදර ඉන්න එක ඊට වඩා හොඳයි කියලා , ආර්ථිකයට බලපෑමක් තිබ්බත් මම ගන්න තීරණයට එයා එකඟයි.
එතකොට බොහෝ දෙනෙක් කියනවා වගේ විවාහයෙන් පස්සේ ඇගේ රංගනයට ඔබ අගුළු දැම්මද?
චතුරිකාව නිර්මාණවලින් දකින්න නැත්තේ එයා මට වඩා චරිත තෝරන නිසයි. එයාට හරි යන චරිත නැත්තම් එයා රඟපාන්නේ නැහැ. ඒ වගේම දෝණී නිසා කොළඹින් පිට රූගත කිරිම්වලට සම්බන්ධ වෙන්න එයා කැමති නැහැ . ඒ හේතුව නිසයි එයාව දකින්න නැත්තේ. මම නම් නීති දාලා නැහැ. එයාගේ නිදහසට මම බාධා කරන්නෙ නැහැ .
දෛවයයි, ඉරණමයි, කර්මයයි විශ්වාස කරන මිනිස්සු අතරේ ගයාන් ජීවිතේ දකින්නෙ කොහොමද?
මම කිසිම දෙයක් සියයට සියයක් විශ්වාස කරන්නෙ නැහැ. හඳහන වුණත් විශ්වාස කරන්නෙ සියයට පනහක් විතරයි. අපි නැකත් වෙලාව බලලා වැඩ කරන මිනිස්සු නෙමෙයි. හිතුණු වෙලාවට වැඩ පටන් ගන්නවා. ඒ වෙලාව තමයි අපේ සුබ වෙලාව. දුවට අකුරු කියෙව්වේ, නම දැම්මේ ඔය කියන වෙලාවල් බලලා නෙමෙයි. ඒත් දුව එයාගේ වයසට වඩා බුද්ධිමත්. ඒ වයසේ ළමයින්ට එකතු කිරීම දන්නෙ නැහැ. ඒත් අපේ දුව ආරාධනාට පුළුවන්. සැප්තැම්බර් 11දාට තමයි අවුරුදු පහක් ලබන්නේ එයාට ,
අපිට හිතුණොත් දවල්ට නිදාගෙන රෑට ඇහැරිලා එළි වෙනකල් ෆිල්ම්ස් බලනවා. මහා රෑ කිරිබත් කන්න ඕන වුණොත් උයාගෙන කනවා. අපිට ලැබෙන මොහොතේ අපි සුන්දර විදිහට ජීවත් වෙනවා. අපි හිතන පතන විදිහ වෙනස් කර ගත්තම හරි
මාපියන්ගේ ජාන, පරම්පරාවේ ජාන එක්ක දුව ආරාධනාට කලා හැකියාවක් නැහැ කියලා කියන්න බැහැ?
එයා හරි ආසයි මේකප් කරන්න. එයා එයාව රිද්දගන්න හරි බයයි, තුවාල වෙයි කියලා හරියට පරිස්සම් වෙනවා. එයා තමන් ගැන හරියට හිතන දරුවෙක්. එයා නර්තනයට ආසයි. ඒ නිසා අපි චන්න උපුලි ළඟට නර්තනය පුරුදු වෙන්න යවන්න ඉන්නේ. එයා නිතරම කියන්නේ මයි ලයිෆ් මයි ෆැමිලි කියලා දවසට එකපාරක් හරි කියන්න අමතක කරන්නේ නැහැ. ආදරේ උපරිමයෙන් ඕන. මොන්ටිසෝරී ඇරෙද්දි මම හරි චතුරිකා හරි හිටියේ නැත්තම් අවුල් වෙනවා. ඒ වගේ දරුවෙක් මට ඉන්නේ. එයා කැමති දේ කරයි. බල කරන්නේ නැහැ ,
ගයාන්ට වැඩිපුර නීති දාන්නේ බිරිඳට වඩා දෝණී කියලා ආරංචියි?
ඔව්, දැන් මට යාළුවෙක් හමුවෙන්න එළියටවත් යන්න බැහැ. හොරෙන් යන්න ඕන. ආවට පස්සේ කොහෙද ගියේ, කීයටද ගියේ, මොනවද කළේ මේ ඔක්කොම රිපෝට් කරන්න ඕන. මගේ අම්මා හෝ චතුරිකාවත් කවදාවත් මගෙන් එහෙම ප්‍රශ්න කරන්නේ නැහැ. දාන්න ඕන නීති ඔක්කොම දාලා මාව හිර කරන්නෙ එයා විතරයි. මොකද අපි එයාව කොයිම මොහොතකවත් තනි කරන්නේ නැහැ, චතුරිකා හරි මම හරි එයා එක්ක ඉන්නවාමයි. බැරිම වුණොත් විතරයි අම්මා ළඟ පොඩි වෙලාවකට දාලා යන්නේ, අපේ වැඩවලට වඩා එයාගේ මානසික නිදහස අපිට වටිනවා. ඒ නිසා තමයි එයාට නිතරම අපිව ඕන.
චතුරිකාට වඩා ගෙදර කෝකියාගේ වගකීම දරන්නෙ ගයාන් කියලා බොහෝදෙනෙක් කියනවා, ඒ ගැන කියලම අපි කතාබහ අවසන් කරමු?
ගෙදර සාමාන්‍යයෙන් උයන්නෙ මම. මට රසට උයන්න පුළුවන්, චතුරිකාට හදිස්සියක් වුණොත් පරිප්පුවක් හදා ගන්න පුළුවන්. එයාට මස් මාළු එළවළු රසට උයන්න බැහැ. සැන්විච් එහෙම රසට හදන්න පුළුවන්. ඉතින් ගෙදර උයන්නේ මම තමයි. ජිම් ගිහින් ගෙදර ඇවිත් කාල වේලාව අරන් මම රසට උයනවා. ඒක කරන්නේ හරි සතුටින්. මම කෑම හැදුවේ නැත්තම් පූර්ණිකාගෙ ගෙදර ගිහින් රස්නෙන් රසට මොනවා හරි කාලා එනවා.
හර්ෂණී වීරරත්න
උපුටා ගැනීම සිළුමිණ
