පුහු රැඩිකල් මත සමාජගත කර වීව්ස් වැඩි කර ගන්න යන්නෙ නෑ
මයුරි ලියනගේ නම් වූ ඇය නිවේදිකාවක් ලෙස සිය වෘත්තීය ජීවිතය ඇරැඹූවේ ලක්හඬ ගුවන් විදුලියෙන්. වසර විසි නවයක සේවා කාලය නිමා කරමින් පසුගියදා ඇය ලක්හඬින් සමුගත්තාය. නමුදු ඇගේ වෘත්තීය ජීවිතය එතැනින් නිමා නොවුණි. දැන් ඇය රංගන ශිල්පිනියක් ලෙසද ‘මයුරිගේ කතාව‘ යූ ටියුබ් නාළිකාව ඔස්සේද දැන් ඔබ හමුවනට එන්නීය.
මේ දවස්වල මොනවද ඔබේ අලුත් වැඩකටයුතු?
මම මේ වෙනකොට මගේම කියලා වැඩකටයුත්තක් ආරම්භ කරලා තියෙන්නෙ. “මයුරිගේ කතාව” නමින් මම යූ ටියුබ් නාළිකාවක් ආරම්භ කළා. දැන් මාස කීපයක් වෙනවා. ඒ නාළිකාවේ වැඩ කටයුතු එක්ක තමයි මේ දවස් ගෙවෙන්නේ. මගේම කියලා යමක් පටන් ගැනීමේ ආශාව, බලාපොරොත්තුව නිසාමයි, වසර ගණනාවක් තිස්සේ මම සේවය කරපු ලක්හඬ ගුවන් විදුලියෙන් ඉවත් වීමටත් තීරණය කළේ.
ඔබ දැන් රංගනයෙනුත් පුංචි තිරයෙන් අපිට මුණගැහෙනවා නේද?
ඔව්, ඒක මට අලුත් අත්දැකීමක්. මොනරා රූපවාහිනී නාළිකාවේ විකාශය වන කවිතා ටෙලි නාට්‍යයට තමයි මම මේ විදියට රඟපෑමෙන් සම්බන්ධ වෙන්නේ. මට මේ අවස්ථාව භාර ගන්න කියන ආරාධනය ආවේ මේ ටෙලි නාට්‍යයේ තිර පිටපත් රචිකාව බුද්ධිනි ජයවර්ධන ගෙන්.
මින් ඉදිරියටත් ඔබට රංගනයට අවස්ථාව හිමි වුණොත් ඕනෑම චරිතයක් භාර ගන්න සූදානම්ද?
නැහැ. රංගනය කියන්නෙ මම සමබරව කරගෙන යා යුතු දෙයක්. මොකද මම වසර 29ක් තිස්සේ නිවේදිකාවක් විදියට ගොඩනඟා ගත්ත නමක්, වටිනාකමක් තියෙනවා. මගේ වෘත්තීය ප්‍රතිරූපයට හානිවෙන චරිතාංගයක් මම භාර ගත්තොත් එතැනින් එහාට මිනිස්සුන්ට මම කියන, කරන දේවල් පිළිබඳ විශ්වාසයක් නැති වෙනවා. සාර්ථක රංගන ශිල්පිනියක් හෝ ශිල්පියෙක් වෙන්න නම් සෑහෙන හැදෑරීමක් එක්ක ඒ ගමන යන්න ඕන. ඒක ලේසි ගමනක් නෙවෙයි. මට ඒ තැනට එන්න ලොකු කාලයක් යාවි. ඕනම දෙයක් හරියට කරනවා නම් ඒ යන ගමන අමාරුයි තමයි. රම්‍යා වනිගසේකර, ෆර්නි රෝෂිනි, කමල් දේශප්‍රිය වගේ චරිත රංගනයට එන්නෙ ගුවන් විදුලි නිවේදන ක්ෂේත්‍රයේ අත්දැකීම් රාශියක් එක්ක. මං විශ්වාස කරන්නේ ඔවුන් ගුවන් විදුලි නිවේදන කාර්යයේදී ලබපු සාර්ථකත්වය, රංගන ක්ෂේත්‍රයෙන් සාර්ථක වෙන්න බලපෑවා කියලා.
ඔබට ලැබුණු ඒ චරිතයත් මාධ්‍ය ක්ෂේත්‍රයට සම්බන්ධ චරිතයක් නේද?
ඔව්, පුවත්පත් ආයතනයක කළමනාකාරවරියකගේ චරිතයක් තමයි මම රඟදක්වන්නේ. මගේ වෘත්තීය ක්ෂේත්‍රයත් ජනමාධ්‍ය නිසා ඒ චරිතයේ අන්තර්ගතය මට සමීපයි. නමුත් මම රංගනය කියන විෂයේදී සාර්ථකද කියන ප්‍රශ්නය මට තිබුණු නිසා මම රඟපෑ දර්ශන සහිත වීඩීයෝපටයක්වත් සමාජ මාධ්‍යට මුදාහැරියේ නැහැ. විශේෂයෙන් මතක් කරන්න ඕන කවිතා ටෙලි නාටකයට රංගනයෙන් දායක වෙන, රංගන ශිල්පී චන්දික නානායක්කාර මහතාව. මම ඔහු සමඟ පෞද්ගලිකව හෝ නිවේදන වෘත්තීය තුළවත් මුණගැසී කතා බහ කර නැහැ. නමුත් ඔහු මගේ රංගනය පිළිබඳ වටිනා ඇගයීමක් මගේ මුහුණු පොතේ පළ කරලා තිබුණා. ඒක මට ගොඩක් වටිනවා.
ඔබේ යූ ටියුබ් නාළිකාවට ලැබෙන ප්‍රතිචාර කොහොමද?
ඇත්තටම හොඳයි. විවිධාකාර ප්‍රතිචාර ලැබෙනවා. විශේෂයෙන්ම මට හිතෙනවා තරුණ පිරිසට වඩා මගේ වීඩියෝ ග්‍රහණය වෙන්නේ වැඩිහිටි පිරිසට කියලා. නමුත් මම ඒ පිරිසට සීමා නොවී තත්ත්වය වෙනස් කරන්න උත්සහ කරනවා. මගේ නාළිකාවෙන් විකාශය කරපු ඇතැම් බරපතළ සමාජ සංවාදවලට පස්සේ මට සමහර අය ඔවුන්ගේ සංවාද, වැඩසටහන් මෙහෙයවලා දෙන්න කියන ආරාධනයත් කරලා තියෙනවා. මම යූ ටියුබ් නාළිකාව පටන් ගන්න කලින් වසර 29 ක් තිස්සේ මේ රටේ ගුවන් විදුලි මාධ්‍යයට සම්බන්ධ වෙලා වැඩ කරපු නිවේදිකාවක් කියලා යූ ටියුබ් නරඹන ඇතැම් පිරිස් දන්නේ නැහැ. ඒ නිසා ඔවුන්ට මගේ යූ ටියුබ් වැඩසටහන් අලුත් දෙයක් සහ ඔවුන් ඒ නිර්මාණවලට කැමතියි. ඉදිරියේදී මගේ නාළිකාවෙන් අලුත් වැඩ ටිකක් කරන්න බලාපොරොත්තු වෙනවා. මාධ්‍ය ක්ෂේත්‍රයේ මම ගොඩනඟා ගත්ත ප්‍රතිරූපය හෑල්ලුවට ලක් කරලා සල්ලි හොයන්න මට අවශ්‍ය නැහැ. ඒ නිසා මගේ ප්‍රමිතිය රැකගෙන මේ දේ කරන්න උත්සාහ කරනවා. මේ වෙනකොට ඇත්තටම තරගය හැදිලා තියෙන්නෙ යූ ටියුබ් ඇතුළු සෝෂල් මීඩීයාවල. සාම්ප්‍රදායික ජනමාධ්‍ය අතර තරගයක් දැන් නැහැ. ඉතින් අපිටත් මේ තරගය ඇතුළේ තරග කරන්න සිද්ධ වෙනවා.
එක් වීඩියෝවක ඔබ කියනවා “මයුරිගේ කතාව”යූ ටියුබ් නාළිකාව ආරම්භ වෙන්නේ මිනිස්සුන්ගේ චින්තනය වෙනස් කිරීමේ අරමුණින් කියලා. මෙතනදි ඔබ බලාපොරොත්තු වෙන්නේ මිනිසුන්ගේ මොන විදියේ චින්තන වෙනසක්ද ?
ඒක මම හිතන්නේ හැම පැත්තකින්ම සිද්ධ වෙන්න ඕන දෙයක් කියලා. ඒක මාර රැඩිකල් විදියට වෙන්න ඕන කියලා මම කියන්නෙ නැහැ. හැබැයි යම් රැඩිකල් බවක් නැතුව මිනිස්සුන්ගේ චින්තනේ වෙනස් කරන්නත් බැහැ. අපි හිතන්න ඕන අපි ගන්න රැඩිකල් පියවර ලංකාවේ සමාජේ ඇතුළේ පැළ කරන්න පුළුවන්ද කියන එක ගැන. පවතින සමාජ ක්‍රමයක් වෙනස් කරන්න තනි ගැහැනියකට හෝ තනි පිරිමියෙකුට විතරක් බැහැ. නමුත් තනි පුද්ගලයො විදියට කරන සටන සමාජ වෙනසක් සිද්ධ වෙන්න යම්තාක් දුරකට බලපානවා. සමාජයක් විදියට හිතන දේවල් වෙනස් විදියේ මුහුණුවරකට අපි ගන්න ඕන සහ ඒ මුහුණුවර පොළොවේ පය ගහපු වර්ශන් එකක් විය යුතුයි. මිනිස්සුන්ව තාර්කික සංවාදයකට ගෙනියන එක තමයි මම බලාපොරොත්තු වෙන්නෙ. යූ ටියුබර් කෙනෙක් විදියට මම මෙතනදි බලාපොරොත්තු වෙන්නේ මහ පොළොවේ පැළ කරන්න පුළුවන් යථාර්ථ‍යක් වෙනස් මානයකින් ඉදිරිපත් කිරීම මිසක් ප්‍රායෝගික නැති පුහු රැඩිකල් මතයන් සමාජගත කරලා වීව්ස් වැඩි කර ගන්න එක නෙවෙයි.
නිවේදන වෘත්තිය තුළ ඔබට ලැබුණු ඇගයුම්, සම්මාන ගැන මතක් කළොත්?
මුලින්ම මට රාජ්‍ය සම්මානයක් හිමි වුණා මම ඉදිරිපත් කරපු “සිංහ රාව” ගුවන් විදුලි වැඩසටහනට. හොඳම සම්ප්‍රවේශකට හිමි සම්මානය, හොඳම වැඩසටහනට හිමි සම්මානයත් සිංහ රාවය වැඩසටහනට හිමි වුණා. 2021, 2022 වගේ වසරවලදි තමයි ඒ සම්මාන මට හිමි වුණේ. නැවතත් 2021 අවුරුද්දෙම හොඳම සම්ප්‍රවේශක විදියට ප්‍රශස්ත ඇගයීමක් හිමි වුණා, ගුවන් විදුලි රාජ්‍ය සම්මාන උලෙළේදී. ස්වාධීන රූපවාහිනිය මඟින් විකාශය කරපු මාණික්කාවත ටෙලි නාට්‍ය මම ගුවන් විදුලියට පිටපත් රචනය කළා. හොඳම රේඩියෝ නිර්මාණාත්මක වැඩසටහනට හිමි ෆිනකල් සම්මානය මාණික්කාවත රේඩියෝ තිර කතාවට හිමි වුණා. මට මේ වසරේ මුලදි ෆිනකල් අවෝඩ්වලින් ප්‍රශස්තතම ගුවන් විදුලි සම්ප්‍රවේශක සම්මානයක් නැවතත් හිමි වුණා.
පෞද්ගලික ජීවිතයේ තොරතුරු ටිකක් කතා කරමු.
මගේ සැමියා තුසිත ගුණසේකර. ඔහු ලක්හඬ ගුවන් විදුලියේ තාක්ෂණික අංශයේ නිලධාරියෙක් විදියට වැඩකටයුතු කරනවා. මට දුවෙක් ඉන්නවා. එයාට වයස අවුරුදු අටයි. දුවටත් කලා හැකියාවන් පිහිටලා තියෙනවා. එයා අවුරුදු පහේදී කොරෝනා ඇඩ් එකකට පෙනී සිටියා. රූපවාහිනියේ ළමා වැඩසටහනකටත් සම්බන්ධ වුණා. එයා පාසල් ඉගෙනීම් කටයුතුවලට අමතරව whyteleafe arts school එකේ ඩ්‍රාමා ඇන්ඩ් තියටර් ඉගෙන ගන්නවා.
කුමුදිකා දර්ශනි
උපුටා ගැනීම සිළුමිණ
