චරිතාංග නිළියක් විදිහට නිරුවත් දර්ශනයක රඟපෑවා

පුංචි තිරයේ නිතරම පේන්න ඉන්න තරින්දි ප්‍රනාන්දු මේ වෙද්දි රිදී තිරයෙත් පෙරළිකාර පියවරක් තබලා තියනවා. ඒ මේ දවස්වල සාර්ථකව තිරගතවන my red comrade චිත්‍රපටයෙන්. මේ නිසා තරින්දි එක්ක කතා කරන්න වගේම ඔබටත් දැනගන්න බොහෝ දේ ඇති කියා අපි විශ්වාස කරනවා.

My red comrade ගැන තරින්දි දකින්නෙ මොන විදිහටද?

සාම්ප්‍රදායික විප්ලවවාදියෙක් සහ යාවත්කාලීන නූතන තරුණ ගෑනු ළමයෙක් අතර සිදුවන සංවාද වාද විවාද එක්ක යන සිද්ධිදා මයක් තමයි my red comrade තුළින් කියන්නෙ. මේ රට වෙනස් කරන්න ඕන කියලා හැමදාම හැමෝම කරන පම්පෝරි සාකච්ඡා අරගලවලට වැඩිය සංස්කෘතික මිනිසෙක් විදිහට තමන්ගෙන් රටට වියයුතු යුතුකම් වගකීම්වලින් මේ රට වෙනස් කරන්න පුළුවන් කියන පණිවිඩය my red comrade තුළින් හෙට රටේ අනාගතය බාරගන්න ඉන්න තරුණ පරම්පරාවට ලබාදෙනවා.

My red comrade වගේ වෙනස් විදිහෙ බරපතළ චිත්‍රපටයකට සම්බන්ධ වෙන්න හිතුවේ ඇයි?

සිනමාවෙත් ටෙලිනාට්‍යවලත් මීට කලින් මම රඟපෑවෙ බරපතළ කමින් අඩු සරල චරිත. ඉතින් my red comrade අධ්‍යක්ෂ සුදත් මහදිවුල්වැවගෙන් මට පිටපත ලැබිලා ඉස්සෙල්ලාම කියවනකොට ලොකු චකිතයක් බයක් හිතුණා බරපතළ වෙනස් විදිහෙ පණිවිඩයක් දෙන චිත්‍රපටයක ප්‍රධාන චරිතය රඟපාන්න තියන එක ගැන. My red comrade කියන්නෙ රංගනයෙදි මම දාගෙන හිටපු ප්‍රතිපත්තිවලට හාත්පසින්ම පටහැනි නිර්මාණයක්. හැබැයි මම ඉස්සර ඉඳලම කැමැති දෙයක් තමයි අභියෝගවලට. ඉතින් නිළියක් විදිහට මේ අභියෝගයට මුහුණ දෙන්න ඕන කියලා මම හිතුවා. මාව my red comrade වලට තෝරගන්නකොට සමහරු කිව්වා මම ටෙලිනාට්‍යය නිළියක්නෙ. පුංචිතිරයේ පෙන්නන රංගන විලාසයෙන්ම මම සිනමාවෙදිත් රඟපාන්න ගියොත් චිත්‍රපටය අවුල් වෙයි කියලා. ඒ අභියෝග සියල්ල මැද්දෙ මට ලැබුණු චරිතයට උපරිම සාධාරණයක් ඉටුකළා කියලා ප්‍රේක්ෂකයන්ගෙන් ලැබෙන ⁣ප්‍රතිචාරවලින් මම හිතනවා.

My red comrade කියන්නෙ වැඩිහිටියන්ට පමණක් සීමාවුන චිත්‍රපටයක්. මෑතකදි ඉඳලා තරින්දි සංස්කෘතියෙන් පිටපැණලා රඟපාන නිළියක් වෙලාද ?

My red comrade චිත්‍රපටය තුළ මගේ නිරුවත් දර්ශනයක් අඩංගුවෙලා තියනවා. රංගනයෙදි මට සීමා මායිම් ප්‍රතිපත්ති තියනවා හැබැයි my red comrade කියන්නෙ මගේ සීමා මායිම් ප්‍රතිපත්තිවලින් එහාට නොගිය නිර්මාණයක්. චිත්‍රපටයේ ගුණාත්මක තත්ත්වයත් එක්ක ඇත්තටම ඒ නිරුවත් දර්ශනය එච්චර බරපතළ එකක් නෙමෙයි. ලංකාවෙ කාන්තාවක් චිත්‍රපටයක නිරුවත් දර්ශනයක රඟපානවා කිව්වහම ඒ ගැන විශාල වශයෙන් කතාබහ වෙනවා වගේම මඩ ප්‍රහාරවලට ලක්වෙන තත්ත්වය වැඩියි. එවැනි අභියෝගාත්මක තත්වයක් උඩ චරිතාංග නිළියක් කියන පද⁣නමේ ඉඳගෙන නිරුවත් දර්ශනය රඟපාන්න එකඟවුණේ චිත්‍රපටය මගින් ප්‍රේක්ෂකයන්ට දෙන පණිවිඩයේ වටිනාකම නිසා. නිළියක් විදිහට මම සංස්කෘතියෙන් පිටපැනලා රඟපානවා කියන එකට උත්තරෙත් my red comrade තුළ තියනවා. චිත්‍රපටයෙ කියන විදිහට ලංකාවෙ මිනිස්සු සංස්කෘතිය විදිහට හඳුන්වන්නෙ ඉතිහාසයට. සංස්කෘතියයි ඉතිහාසයයි පටලවගෙනයි අද මිනිස්සු සමහර දේවල් විවේචනය කරන්නෙ. චරිතාංග නිළියක් විදිහට මම නිරුවත් දර්ශනයක රඟපෑවා මිසක අසංස්කෘතික දෙයක් කළේ නැහැ. සමහරු මගේ නිරුවත් දර්ශනය දැකලා අහන්න පුළුවන් තරින්දි සංස්කෘතියෙන් පිට පැනලද කියලා. මම එයාලගෙන් අහන්න කැමැතියි සංස්කෘතිය කියන්නෙ මොකක්ද කියලා වගේම ඒ අය සංස්කෘතිකයිද කියලා. ශ්‍රී ලංකාවේ ගොඩක් මිනිස්සු නිරුවත් සහ ලිංගික දර්ශන තියන විදේශීය චිත්‍රපට රූපවාහිනී කතාමාලා උනන්දුවෙන් රස කරකර බලලා නළු නිළියන්ගේ රඟපෑම් වර්ණනා කරනවා. හැබැයි ලංකාවෙ නිෂ්පාදනය කරන නිර්මාණාත්මක චිත්‍රපටයක ලංකාවෙම නිළියක් නිරුවත් රංගනයක් කරලා තියනකොට ඒකට ගරහනවා. ඉතින් මට ඇත්තටම තියන ප්‍රශ්නයක් ලංකාවෙ මිනිස්සු ලංකාවෙම නිළියකට ජාත්‍යන්තර මට්ටමට යන්න අත නොදෙන්නෙ ඇයි කියලා. හැබැයි ඒ අයගේ සහයෝගය හිමි නොවුණත් මේ වගේ සංස්කෘතියෙන් එහාට ගිය සමාජයට හොඳ පණිවිඩයක් දෙන නිර්මාණවල ඉදිරියෙදිත් මම රඟපානවා.

නිරුවත ගැන තරින්දිගේ අදහස මොකක්ද?

නිරුවත කියන්නෙ සුන්දර දෙයක්. හැබැයි විශේෂිකරණයට ලක්නොවිය යුතු සාමාන්‍ය දෙයක්. සංස්කෘතිය රකිනවා කියාගන්න සමහර මිනිස්සු අම්මට ගැහැනුන්ට ගරු කරනවා කියලා අන්තර්ජාලයේ වැඩිම වාර ගණනක් නිල් චිත්‍රපට හොයපු රටක් මේක. සමාජ මාධ්‍යවල වුණත් ගැහැනුන්ට ගරහන්නෙ සීමාවක් නැතුව. ඉතින් මම මිනිස්සුන්ගෙන් ඉල්ලන්නෙ ඉතිහාසයත් එක්ක පටලවගත්තු වචනවලට විතරක් සීමාවුන සංස්කෘතියට කොටුවෙන්නෙ නැතුව යාවත්කාලීන වෙලා විවෘත මනසකින් දේවල් දිහා දකින්න කියලා.

අද වෙද්දි පුංචි තිරයේ නිතරම පේන්න ඉන්න නිළියක්. ඒ තත්ත්වයට දියුණු වෙන්න පුළුවන් වුණේ කොහොමද ?

මුලින්ම මම ක්ෂේත්‍රයට එනකොට කලා ක්ෂේත්‍රයේ ඉන්න කිසිම කෙනෙක්ව පෞද්ගලිකව දැනගෙන හිටියෙ නැහැ. මම ගොඩක් කැපකිරීම් කරලා ඉවසලා ක්ෂේත්‍රයේ මේතාක් දුර ආවෙ. රංගනයට මම ගොඩක් ආදරය කළා. ඒ ආදරයත් එක්ක චරිත තාත්විකව කරන්න පුළුවන් හැකියාවක් මං තුළම ගොඩනැගුණා. හැකියාව නිසා මම අද වෙද්දි හැම නාළිකාවකම වගේ විකාශය වන ටෙලිනාට්‍යවල ඉන්නවා. ඉතින් මගේ අම්මා විශ්වාස කළා කවදාහරි මම රටේම දක්ෂ ජනප්‍රිය නිළියක් වෙයි කියලා. අද වෙද්දි රටේ ගොඩක් දෙනා මාව දක්ෂ නිළියක් විදිහට පිළිඅරගෙන තියනවා. හැබැයි මගේ ඒ දියුණුව බලන්න අම්මා අද ජීවතුන් අතර නැහැ. ඒ වුණත් මම විශ්වාස කරනවා අම්මගේ ආශිර්වාදය හැමදාම මට තියනවා කියලා.

නිතරම ටෙලිනාට්‍යවලට හිටියට රංගනයන් එකට එකක් වෙනස්. එකම චරිතයට කොටුවෙන්නෙ නැතුව ක්ෂේත්‍රයේ ඉදිරියට ගියෙ කොහොමද ?

නළුවෙක්ට නිළියෙක්ට තියන ලොකුම අභියෝගය තමයි නාළිකා කිහිපයක එකම වෙලාවක විකාශය වන ටෙලිනාට්‍යවල වෙනස් විදිහට රඟපාන එක. හැම ටෙලිනාට්‍යයකම එකම විදිහට රඟපානවා නම් ප්‍රේක්ෂකයො ඒ ⁣නළුවා නිළියව ප්‍රතික්ෂේප කරන්න තියන ඉඩකඩ වැඩියි. ඉතින් මම නිතරම ප්‍රේක්ෂකයන්ට වෙනස් දෙයක් දෙන්න උත්සාහ කරන නිසා එකම විදිහෙ චරිත භාරගන්නෙ නැහැ. භාර අරගෙන තියන චරිත අතර සමානකමක් දැක්කොත් වෙනස් විදිහට මම රංගනය හදාගන්නවා. මම ඇත්තටම තාම රංගනය ඉගෙනමින් ඉන්න කෙනෙක්. අධ්‍යක්ෂකවරුන්ගෙන් ප්‍රවීණ නළු නිළියන්ගෙන් වගේම ආධුනික නළු නිළියන්ගෙනුත් මගේ රංගන ජීවිතයට ගන්න තව දේවල් තියනවා. ඉතින් මගේ හීනය තාම සම්පූර්ණ වෙලා තියෙන්නෙ පුංචියට. ඉස්සරහට මහන්සිවෙලා රංගනය වෙනුවෙන් තවත් කැපවෙලා රංගන හීනය ලොකුවටම සම්පූර්ණ කරගන්නවා.

ජනප්‍රියත්වයත් සමඟ හැදෙන කටකතා ගැන අදහස මොකක්ද ?

අනිත් රටවල නළු නිළියන්ට සාපේක්ෂව ලංකාවෙ නළු නිළියන්ට කටකතා හැදෙනවා වැඩියි. ඒ ගැන මගේ අදහස නම් නළු නිළියන්ට කටකතා විවේචනය එල්ලවෙන්න ඕන කියලයි. තමන්ගෙ ඉලක්කවලට යන්න පන්නරය ලැබෙන්නෙ කටකතා විවේචන තුළින් කියලයි මම හිතන්නෙ. මටත් සෑහෙන්න පද හැදුණා කටකතා විවේචන එල්ල වුණා. හැබැයි ඒ දේවල්වලට මම දක්වපු ප්‍රතිචාරය තමයි මම අද ඉන්න සාර්ථක තත්ත්වය. ඉතින් මම ඒ අයට ස්තූති කරනවා මට විරුද්ධව පද හදලා කටකතා පතුරවලා විවේචන එල්ල කරලා රංගන ක්ෂේත්‍රයේ ඉහළට යන්න මට රුකුල් දීපු එකට.

බැංකු රැකියාව අතෑරලා රංගන ක්ෂේත්‍රයට ආපුඑක ගැන අද වෙද්දි තෘප්තිමත්ද?

රංගන ක්ෂේත්‍රයට ආපු මුල් කාලෙදි ඇතිවුන විවිධ සිද්ධීන් කලකිරීම් එක්ක මට හිතුණා ආපහු බැංකු රැකියාවට යන්න. හැබැයි මම ඒ දේවල් දරාගෙන මහන්සිවෙලා රංගන ක්ෂේත්‍රයම අල්ලගෙන හිටියා. අද වෙද්දි මට දැනෙන්නෙ වෘත්තීන් අතරින් සුන්දරම වෘත්තීය රංගනය කියලා. ආයතනයක් ඇතුළෙ හිරවෙලා වැඩකරනවට වැඩිය එක එක තැන්වලට ගිහින් මිනිස්සු ආශ්‍රය කරලා ජීවිතයට දේවල් එකතු කරගන්න ගමන් රංගනය වගේ වෘත්තීයක යෙදීම හරිම නිදහස්.

නිතර කාර්යබහුල වෙලත් කොහොමද හැමදාම ලස්සනට ඉන්නෙ?

කොච්චර කාර්යබහුල වුණත් මම ඇඟ ගැන හිතනවා. හැබැයි මම ලොකුවට සැලුන් පස්සෙ යන්නෙ නැහැ. සුදු වෙන්න ඉන්ජක්ෂන්වත් කෘතිම දේවල්වත් පාවිච්චි කරන්නෙ නැහැ. ස්වභාවිකව මට ලැබිලා තියන හමේ පාට සහ ඇඟේ හැඩය නඩත්තු කරනවා. මම කෑමට වැඩි තැනක් දීලා තියනවා. හැබැයි චරිතයක් ලැබුණහම ඒ චරිතෙ විදිහට ඇඟ පවත්වගෙන යනවා. රූගතකිරීම් නැති දවස්වලට ජිම් ගිහින් ව්‍යායාම කරලා ඇඟ හැඩට තියාගන්න නිතරම උත්සාහ කරනවා.

දැන්ම ආදරයක් විවාහයක් ගැන හිතන්න අදහසක් නැද්ද?

මම දැන්ම ආදරය සහ විවාහය ගැන කතාකරන්න කැමති නැහැ. මේ වෙලාවෙදි මගේ පවුලෙ අයගේ සහ ප්‍රේක්ෂකයන්ගේ අවංක ආදරය මට ලැබෙනවා. ඒ ආදරය දැනට මට ඇති. ආදරය සහ විවාහය ගැන කතාකරන්න දවසක් එයි. එදාට මම ඒ ගැන සතුටින් කියන්නම්.

මොනවගේ කෙනෙක්වද බලාපොරොත්තු වෙන්නෙ?

ආදරේදි සල්ලිවත් පෙනුමවත් මම බලන්නෙ නැහැ. අවංක විදිහට ආදරේ කරන මගේ වැඩවලට සහයෝගය දෙන මම වගේම පිස්සු නටන කෙනෙක්ට තමයි මම කැමති.

ක්ෂේත්‍රයේ කෙනෙක්ගෙන් ආරාධනාවක් ආවොත්?

තමන්ගෙ පෙම්වතියට අවංකව ආදරය කරන ගරු කරන සම්බන්ධෙ නැවතුන කාලෙක වුණත් ආදරෙන් කතා කරන කෙනෙක් නම් ක්ෂේත්‍රයේ වුණාට ප්‍රශ්නයක් නැහැ.

උපුටා ගැනීම අරුණ