නාට්‍යයක රඟපාන්න දෙනව කියලා අයුතු යෝජනාවක් ගෙනාවා
ටීවී දෙරණ නාළිකාවෙ විකාශය වන අම්මා වගේ ටෙලි නාට්‍යය වසර එකහමාරක් තිස්සෙ ප්‍රේක්ෂක ප්‍රතිචාර මැද සාර්ථකව ඉදිරියට යමින් තිබෙනවා. ඉතින් "අම්මා වගේ" ටෙලිනාට්‍යයට වසර එකහමාරක කාලයක් ගතවීම නිමිත්තෙන් අපි හිතුවා එහි ප්‍රධාන රංගන ශිල්පිනී ජෙනීෂා දංදෙණිය එක්ක කතා කරන්න.
ජෙනීෂා කොහොමද "අම්මා වගේ" එක්ක වැඩකටයුතු ?
ප්‍රධාන නිළිය විදිහට අවුරුදු එකහමාරක ඉඳන් අම්මා වගේ ටෙලි නාට්‍යයත් එක්ක එකතුවෙලා සාර්ථකව වැඩකරගෙන යනවා. ඉතින් මේ කාලය ඇතුළත පොඩි ළමයි අතර අම්මා වගේ ටෙලි නාට්‍යය ගොඩක් ජනප්‍රිය වෙලා තියනවා. යන හැම තැනකදීම පොඩි ළමයින්ගෙන් මට වැඩිපුර ප්‍රතිචාර හම්බෙනවා.
කොහොමද රංගන ක්ෂේත්‍රයට ආවෙ ?
නිරූපිකාවක් විදිහට තමයි මම මුලින්ම ක්ෂේත්‍රයට එන්නෙ. 2021 පැවැත් වුණ sri lanka next top model පැජන්ට් එකේ තරගකාරිනියන් විදිහට සම්බන්ධ වෙනවා. ඒ තරගයේ පළවැනි ස්ථාන මම ජයග්‍රහණය කරනවා. එතනින් පස්සෙ මම වෙළෙඳ දැන්වීම් නිරූපිකාවක් විදිහට කලා ක්ෂේත්‍රයට සම්බන්ධ වෙනවා. වෙළෙඳ දැන්වීම්වල නිරූපණ කටයුතු කරන අතරතුර හසුන් සමීර අධ්‍යක්ෂණය කරපු ඇස් ටෙලි නාට්‍යයේ රඟපාන්න අවස්ථාව ලැබෙනවා. ඒ තමයි මගේ රංගන ජීවිතයේ ආරම්භය. ඇස් ටෙලි නාට්‍යයෙන් අනතුරුව ජයප්‍රකාශ් ශිවගුරුනාදන් සර් අධ්‍යක්ෂණය කරපු කෝලම් කුට්ටම ටෙලි නාට්‍යයෙත් රඟපෑවා. දැන් මේ දවස්වල ටී.වී. දෙරණ නාළිකාවෙ විකාශය වෙන අම්මා වගේ ටෙලි නාට්‍යයේ ප්‍රධාන නිළිය විදිහට සම්බන්ධ වෙලා ඉන්නවා.
ප්‍රධාන චරිතයක් රඟපාන්න ලැබුණ එක අභියෝගයක්ද ?
අභියෝගයක් වගේම ඒක වගකීමක් කිව්වොත් හරි. අම්මා වගේ ටෙලි නාට්‍යයේ මට රඟපාන්න තියෙන්නෙ දරුවො පිහිටන්නේ නැති බිරිඳකගේ චරිතයක්. තාම තරුණ වයසෙ ඉන්න මට විවාහ ජීවිතය ගැනවත් මවක් වීම ගැනවත් කිසිම අත්දැකීමක් නැහැ. ඉතින් මට මේ චරිතයෙන් ආරාධනා ලැබෙනකොට මම මුලින්ම හෙව්වෙ ඒ වගේ දරුවන් නැති කාන්තාවක් ගැන. දරුවො නැති නිසා ඔවුන්ගේ ජීවිත මොනවගේ තත්ත්වයකද තියෙන්නෙ කියලා හොයලා බලලා තමයි චරිතයට ගැළපෙන විදිහට මම රංගනය ගෙඩනගා ගත්තෙ. ඉතින් මේ වගේ වගකීම් සහගත අභියෝගාත්මක චරිතයකට මාව තෝරගත්ත එකට අම්මා වගේ ටෙලි නාට්‍යයේ තිර රචකාවිය තනූජාවි විජේවික්‍රම අක්කටත් අධ්‍යක්ෂ දිලුක ප්‍රසාද් අයියටත් ටී.වී දෙරණ නාළිකාවටත් ස්තුතිවන්ත වෙනවා.
පවුලෙ අය කැමැති වුණාද කලාවට සම්බන්ධ වෙනවට ?
මම හැදුණෙ වැඩුණෙ ඉංගිරිය බුලත්සිංහල ප්‍රදේශයේ. ඉතින් අපේ පවුලෙ ඉන්නෙ අම්මයි, අප්පච්චියි, නංගියි, මමයි. මට නිරූපිකාවක් වෙන්න ඕන කිව්වහම තාත්තා නම් ගොඩක් අකැමැති වුණා. හැබැයි අම්මා නම් මගේ කැමැත්තට ඉඩදීලා තිබුණා. ඉතින් මුල් කාලෙ අප්පච්චිට නොකියා හොරෙන් තමයි නිරූපණ කටයුතුවලට සම්බන්ධ වුණේ. පස්සෙ අම්මත් එක්කම අප්පච්චිට බලකරලා කියලා කැමැති කරවගෙන තමයි කොළඹ ඇවිත් නිරූපිකාවක් විදිහට ක්ෂේත්‍රයට සම්බන්ධ වුණේ. හැබැයි කලින් අකැමැති වුණාට දැන් නම් අප්පච්චි මාව ටී.වී එකේ දැකලා ගොඩක් සතුටු වෙනවා. ක්ෂේත්‍රයේ දුර ගමනක් යන්න අම්මයි අප්පච්චියි මට හැමවෙලේම ආශිර්වාද කරනවා.
කොළඹදි හීන හැබෑ කරගන්න එක ලේසි වුණාද ?
කොළඹ කියන්නෙ වෙනස්ම ලෝකයක්. කොළඹ මම දන්න කියන කවුරුවත් හිටියෙ නැහැ. ඉතින් කොළඹ ආපු අලුත හරි නුහුරු නුපුරුදු ගතියක් දැනුණෙ. නිතරම ගෙදර මතක් වෙලා අම්මට කතා කළා. හැබැයි කොළඹට ආපු ඉලක්කය නම් මම කොයි වෙලාවකවත් අතෑරියෙ නැහැ. මම තනියම හොයාගෙන නිරූපිකාවක් වෙන්න ඉගෙනගන්න ගමන් නිරූපිකාවක් විදිහට කටයුතු කළා. ඒත් එක්කම සෝමලතා සුබසිංහ මහත්මියගේ රංගන පාසලෙන් රංගනය හැදෑරුවා. සමාජය ගැන මිනිස්සු ගැන අධ්‍යයනය කරලා ජීවිත ගැන ඉගෙනගත්තා. ඒ විදිහට හැකියාව ගොඩනගාගෙන නිරූපණ ක්ෂේත්‍රයෙන් අනතුරුව රංගන ක්ෂේත්‍රයට සම්බන්ධ වුණා. ඇත්තටම ලේසි ගමනක් නෙමෙයි මම ආවෙ. කවුරුවත්ව අඳුරන්නෙ නැති කොළඹ පළාතට ඇවිත් හරි කටුක විදිහට ආරම්භ කරපු ගමනක් තමයි අද වෙද්දි මේ විදිහට සාර්ථක කරගන්න පුළුවන් වෙලා තියෙන්නෙ.
ක්ෂේත්‍රයට අයුතු යෝජනා ආපු අවස්ථා තියනවද ?
එක්තරා ටෙලි නාට්‍යයකින් රඟපාන්න අවස්ථාව දෙන්නම් කියලා මට අයුතු යෝජනාවක් කළා. මට ඕන මගේ දක්ෂතාවයෙන් හැකියාවෙන් ක්ෂේත්‍රයේ හොඳ ගමනක් යන්න මිසක කාගෙවත් අත නැළවෙන බෝනික්කෙක් වෙන්න නෙමෙයි. ඉතින් මම ඒ යෝජනාව ප්‍රතික්ෂේප කළා.
රංගනය නිසා දැන් නිරූපණය අතෑරලද ?
2021 වසරේ සහභාගි වුණ පැජන්ට් එකෙන් හොඳට අත්දැකීම් ලබාගත්ත නිසා තවත් පැජන්ට්වලට නම් මම තරග කරන්න සහභාගි වුණේ නැහැ. එහෙමයි කියලා මම නිරූපණය අතෑරලා නැහැ. රඟපෑමට අමතරව මේ වෙද්දි රූපවාහිනී වෙළෙඳ දැන්වීම් නිරූපිකාවක් විදිහට කටයුතු කරගෙන යනවා.
නිරූපණයෙදි විවිධ විදිහෙ ඇඳුම් අඳින්න වෙන එකට එකඟද ?
නිරූපණයෙදි ඇඟ වැසුණු වගේම ඇඟ අැරුණු ඇඳුමුත් අඳින්න වෙනවා. ඒක ක්ෂේත්‍රයේ වරදක් නෙමෙයි. නිරූපිකාවො දැනගන්න ඕන ගෞරවනීය විදිහට ක්ෂේත්‍රයේ කටයුතු කරනවද නැත්තන් නිරුවත ප්‍රදර්ශනය කරන නිරූපිකාවක් වෙනවද කියලා. මම නම් මගේ ප්‍රතිරූපයට හානිවෙන විදිහෙ ඇඳුම් කවදාවත් නිරූපණයෙදි අඳින්නෙ නැහැ. තෝරා බේරාගෙන සීමාවකට අනුව තමයි නිරූපිකාවක් විදිහට කටයුතු කරන්නෙ.
පෞද්ගලික ජීවිතයේදි විලාසිතා කරන්නෙ මොන විදිහටද ?
ගෑනු ළමයෙක් වුණහම විලාසිතා කරන්න ඕන. ඉතින් ඇඳුම් විලාසිතා ගැන කිව්වොත් කොට ගවුම්වලට වැඩිය දිග ගවුම් ඇඳලා ක්‍රේල් කොණ්ඩෙ කඩලා පාරෙ යනකොට ගොඩක් අය කියනවා මම ලස්සනයි කියලා. ඒ නිසා මම දිග ගවුම් අඳින්න වැඩිපුර කැමැතියි. හැබැයි එහෙමයි කියලා මම එක රාමුවකට කොටුවෙලා නැහැ. අවස්ථාව අනුව තැනට ගැළපෙන විදිහට කොට ගවුමුත් අඳිනවා. ඒ වගේම නවීන විලාසිතා කරන්න මම ගොඩක් කැමැතියි. ඉතින් බුරිය ප්‍රදේශය විදලා කරාබුවක් දාලා තියනවා. අතේ ටැටූ එකකුත් කරලා තියනවා.
විලාසිතාවලට පවුලේ අයගෙන් ප්‍රශ්නයක් නැද්ද ?
මුල් කාලෙ නම් මගේ විලාසිතාවලට ගොඩක් ප්‍රශ්න ඇතිවුණා. ගෑනු ළමයෙක් විලාසිතා කරා කියලා අසංවර වෙන්නෙ නැහැ. විලාසිතා කියන්නෙ කලාවක්. මම හිතන විදිහටමයි මගේ අම්මා හිතන්නෙ. අම්මට මාව විශ්වාස නිසා කරන විලාසිතාවලට කැමැති වුණා. දැන් නම් පවුලෙ අනිත් අයගෙනුත් එච්චර ප්‍රශ්නයක් නැහැ මම කරන විලාසිතාවලට.
පහුගිය දවස්වල අලුත් අවුරුද්ද වෙනුවෙන් කරපු ඡායාරූප වගයක් සමාජ මාධ්‍යවල හුඟක් කතාබහට ලක්වෙලා තියනවා..
ඔව් නිරූපිකාවක් විදිහට වෘත්තීය පටන්ගන්නකොට මගේ මුල්ම පොටෝ ෂූට් එක කරපු මාදව පතිරගේ අයියම තමයි මේ පාර අවුරුද්දට ගමේ ගියහම මාව අල්ලගෙන ඒ පොටෝ ෂූට් එක කළේ. නෙළුම් මල් එක්ක බුලත් හෙප්පුවක් අතේ දරාගෙන ලුංගියකින් සහ හැට්ටයකින් සැරසිලා බුරිය ප්‍රදේශයට කරාබු පලඳගෙන කොණ්ඩෙත් ස්ට්‍රෙට් විදිහට සකසලා කරපු වෙනස් විදිහෙ අවුරුදු පොටෝ ෂූට් එකක් නිසා ඒ ගැන සමාජ මාධ්‍යවල ගොඩක් කතාබහට ලක්වුණා.
ඇඟේ හැඩය ලස්සනට තියාගන්න මොනවද කරන්නෙ ?
කෑම බීමෙන් නම් මම වැඩිය පරිස්සමක් නැහැ. හැබැයි නිතරම යෝගා ව්‍යායාම කරනවා. නිරූපිකාවක් විදිහට වැඩකරන කාලයේ ඉඳලා ව්‍යායාම කරලා ලස්සනට ඇඟ හැදුවා. ඒ පුරුද්ද තමයි තාම තියෙන්නෙ. මොන වැඩේ තිබුණත් සතියකට දෙපාරක්වත් යෝගා කරලා ඇඟ සිහින් හැඩයට තියාගන්න උත්සාහ කරනවා.
තරුණියක් විදිහට ආදරය ගැන මොකද හිතන්නෙ ?
ආදරය කියන්නෙ මානසික නිදහස කියලයි මම හිතන්නෙ. මානසික නිදහස නැති නම් ජීවිතයක් විනාශ වෙන්න වුණත් පුළුවන්. මමත් කාලයක් ඒ විදිහට මානසික නිදහස ඇතුව ලස්සන ආදරයක් වින්දා. අද මම යම් තරමකින් හරි සාර්ථක නිරූපණ ශිල්පිනියක් නිළියක් වෙලා ඉන්නෙ මගේ පරණ පෙම්වතා හින්දා. වෙන ගෑනු ළමයි නම් නිරූපිකාවක් වෙන්න ඕන කිව්වහම පෙම්වතුන් ගොඩක් වෙලාවට කරන්නෙ විරුද්ධවෙන එක. හැබැයි මගේ හිටපු පෙම්වතා මාව ක්ෂේත්‍රයේ ඉදිරියට යවන්න අවශ්‍ය පහසුකම් ආරක්ෂාව වගේ දේවල් සලසලා දීලා ලොකු සහයෝගයක් මට දුන්නා. හැබැයි සම්බන්ධතාව පවත්වගෙන යද්දි එක එක ප්‍රශ්න ආවා. ඉතින් අපි දෙන්නා කතා කරලා වෙන් වුණා. ඒ මොනවා වුණත් මම අදටත් කියන්නෙ මගේ පරණ පෙම්වතා හින්දා තමයි අද මම සාර්ථක නිරූපිකාවක් නිළියක් වෙලා ඉන්නෙ කියලා.
ආපහු ආදරය ගැන හිතුවෙ නැද්ද ?
මේ වෙද්දි මම ආදරවන්තියක්. එයා කලා ක්ෂේත්‍රයට සම්බන්ධ කෙනෙක්. එයාගෙනුත් මට ලොකු මානසික නිදහසක් එක්ක හොඳ ආදරයක් ලැබෙනවා. කලා ක්ෂේත්‍රයට සම්බන්ධ කෙනෙක් නිසා වැඩකරනකොට ආරක්ෂාවක් රංගනය ගැන දැනුම වගේ ගොඩක් දේවල් ලැබෙනවා.
පෙම්වතත් එක්කම ක්ෂේත්‍රයේ ඉදිරියට යන්නද අදහස ?
ඔව්. එයත් එක්ක අත් අල්ලගෙන රංගනය ගැන තව හදරාලා විවිධ චරිත කරන්න පුළුවන් දක්ෂ චරිතාංග නිළියක් විදිහට ක්ෂේත්‍රයේ ඉදිරියට යන්න බලාපොරොත්තු වෙනවා.
උපුටා ගැනීම අරුණ
