නංගි ගහපු කනේ පාරවල්වලට නිල් වුණා
මන්දාරාම් කතාවෙ ලොකු අක්කගේ චරිතය කියන්නෙ ප්‍රේක්ෂකයො ගොඩක් ආදරයෙන් වැලඳගත්ත චරිතයක්. ඉතින් ලොකු අක්කගේ චරිතය රඟපාන්නෙ නවක රංගන ශිල්පිනියක් මෙන්ම රූපවාහිනී නිවේදිකාවක්වන දර්ශි විජේසුන්දර විසින්. ඉතින් ක්ෂේත්‍රයට අලුත් කෙනෙක් නිසා දර්ශිගේ විස්තර දැනගන්න අපි හිතුවා.
කොහොමද මන්දාරාම් කතාව එක්ක මේ දවස්වල වැඩකටයුතු ?
මන්දාරාම් කතාව මේ වෙද්දි සම්පූර්ණයෙන්ම රූගතකිරීම් කරලා ඉවරයි. ඉතින් මම ඇතුළු හැමෝම ටෙලිනාට්‍යයේ සතුටෙන් වැඩකළා. කතාවෙ පෙන්නනවා වගේම සේපාල අරුන් අම්මා නංගි අපි සියලු දෙනාම පවුලක් වගේ හරි සතුටින් රූගතකරන දර්ශනතලවල හිටියෙ.
දර්ශි කියන්නෙ ඇත්තටම කවුද ?
මම හරි සරල කෙනෙක්. සමහරු හිතනවා ඇති මම කාත් එක්කවත් හිනාවෙන්නෙ නැති අහංකාර කෙනෙක් කියලා. ඇත්තටම මම බයයි ළගින් මිනිස්සු ආශ්‍රය කරන්න.ඕනාවට වැඩිය කතා කරලා හිටියම මිනිස්සු මම ගැන මොනවා හිතයිද කියලා හිතන පුරුද්දක් මට තියනවා. ඒ නිසා වැඩිපුර කැමති නිශ්ශබ්දව පාඩුවෙ ඉන්න.
ඉස්සෙල්ලාම ක්ෂේත්‍රයට ආවෙ කොහොමද ?
ක්ෂේත්‍රයට ඉස්සෙල්ලාම ආවෙ පුංචිකාලෙ වුණ සිද්ධියක් නිසා. මගේ උපන්ගම නවදක්කුලම. නවදක්කුලම ගමේ පදිංචිවෙලා ඉන්න කාලෙදි නිළි රැජින මාලනී ෆොන්සේකා මහත්මිය අහම්බෙන්වගේ අපේ ගෙදරට ආවා. එවලෙ මිනිස්සු වටවෙලා මාලනී ෆොන්සේකා මහත්මිය එක්ක කතා කරනවා ෆොටෝ ගන්නවා. මම ඒ කාලෙ පහේ පන්තියෙ ඉන්න පුංචි ළමයෙක්. ඉතින් මට ඒ ගැන වැඩිය තේරුමක් නැති නිසා මාලනී ෆොන්සේකා මහත්මිය ගැන හොයනවා. එතකොට තමයි දැනගත්තෙ නිළි රැජින මාලනී ෆොන්සේකා මහත්මිය ගැන. ඉතින් මටත් ඕනවුණා කවදාහරි ඇය වගේ රටම දන්න දක්ෂ නිළියක් වෙන්න. ඉතින් මම තරුණ වියට ආවට පස්සෙ තිර පරීක්ෂණ වලට සහභාගි වුණා. මම මුලින්ම රඟපෑවෙ බන්ධනා ටෙලිනාට්‍යයෙ. ඊට පස්සෙ කියාදෙන්න ආදරේ තරම් ටෙලිනාට්‍යයේත් රඟපෑවේ. මාව ප්‍රේක්ෂකයො ගොඩක් දෙනෙක් දැනගත්තෙ මේ දවස්වල විකාශයවන මන්දාරාම් කතාවෙ ටෙලිනාට්‍යයෙන්.
ක්ෂේත්‍රයට එනකොට බාධක තිබුණද ?
මම වීනාවී රංගන ඇකඩමියෙන් ගිහාන් ප්‍රනාන්දු සහ උමයංගනා වික්‍රමසිංහ යටතේ රංගනය හදරාලා තිෙයනවා. රංගනය ඉගෙනගත්තට ක්ෂේත්‍රයට සම්බන්ධ වෙනඑක ලේසි වුණේ නැහැ. පෞද්ගලිකව මම දන්න කවුරුවත් ක්ෂේත්‍රයේ හිටියෙත් නැහැ. ඉතින් නිර්මාණවලට නළු නිළියො තෝරගන්න තිර පරීක්ෂණවලට ගිහින් ප්‍රතික්ෂේප වුණ වාර ගොඩක් තියනවා. හැකියාව තිබුණට අත දෙන්න කවුරුත් හිටියෙ නැහැ.ඒක තමයි මට තිබුණ ලොකුම බාධාව.
මන්දාරාම් කතාවෙ චරිතෙ මුලින්ම භාරගන්නකොට හිතුවද ජනප්‍රිය වෙයි කියලා ?
චරිතය මුලින්ම භාරගන්නකොට නම් හිතුවෙ නැහැ ප්‍රේක්ෂකයා අතර ගොඩක් ජනප්‍රිය වෙයි කියලා. හැබැයි මම නොහිතපු විදිහට ප්‍රේක්ෂකයො මන්දාරාම් කතාවෙ ලොකු අක්කගේ චරිතය වැලඳගත්තා. සමහර ප්‍රේක්ෂකයා කියනවා ඇත්තටම මට එයාලගේ අක්කා වෙන්න තිබ්බා නම් හොඳයි කියලා. ඒ තරමට හොඳ ප්‍රතිචාර ලැබෙනවා.
රංගනය හදාරපු එක නිළියක් විදිහට රඟපාද්දි වැදගත් වුණාද ?
සමහර තැන්වලදි හදාරපු දේවල් ප්‍රයෝජනයට ගත්තා. හැබැයි රංගනය කියන්නෙ පුළුල් විෂයක්. රංගනය කවදාවත් හදාරලා ඉවර කරන්න බැහැ. මම තාමත් රංගනය ඉගෙන ගනිමින් රඟපාන එක කරන්නෙ. රංගන ක්ෂේත්‍රය තුළ මම තාමත් පෙර පාසල් ළමයෙක්.
මන්දාරාම් කතාවේ රඟපාන්නෙ ඇත්තටම අක්කා කෙනෙක් විදිහට අත්දැකීමෙන්ද ?
මම පවුලෙ එකම දරුවා. ඒ නිසා මට අක්කා කෙනෙක්ගෙ අත්දැකීම් නැහැ. හැබැයි මට නංගිලා මල්ලිලා හිටියොත් ඒ විදිහට බලාගනියි කියලා තමයි මම රඟපාන්නෙ. මට ඇත්තටම සහෝදර සහෝදරියො නැති මන්දාරාම් කතාවෙ පවුලට මම ගොඩක් ආදරෙයි.
රංගනයෙදි නිතර රණ්ඩු කරන්න තියෙන නිසා රූගතකිරීම්වලදි තුවාලවෙලා නැද්ද ?
මුල්ම දර්ශනයෙ ඉඳලා තිබුණෙ මටයි, නංගිටයි ගහගන්න. ඉතින් තාත්විකව කරන්න ඕන නිසා අපි දෙන්නා ඇත්තටම රණ්ඩු වුණා. නංගි ගහපු පාරවල්වලට මගේ ඇඟ නිල්වෙලත් තිබුණා. එක දර්ශනයකදි නංගි ගහපු වැලි අහුරක් මගේ උගුරට ගිහින් දවස් දෙකක් විතර කතා කරන්නත් අපහසුවෙන් හිටියෙ. රණ්ඩුවෙන දර්ශනවලදි අධ්‍යක්ෂවරයා කට් කිව්වට පස්සෙත් අපි රණ්ඩු වෙලා තිෙයනවා.
දර්ශි ඇත්තටම නපුරුයිද ?
මම තැනකට ගියහම වුණත් නිශ්ශබ්දව තනියම ඉන්න කැමැති කෙනෙක්. ඉතින් මගේ පෙනුමයි රඟපාන චරිතයත් එක්ක සමහරු මම නපුරු අහංකාර කෙනෙක් කියලා හිතනවා ඇති. හැබැයි මම නපුරු නැහැ සරලව ඉන්නවා.
පවුලෙ අයගෙන් රංගන ජීවිතයට ලැබෙන සහයෝගය කොහොමද ?
පවුලෙ අය හුඟක් කැමැතියි මම රඟපානවා බලන්න. එයාලා ආදරෙයි මම නිළියක් විදිහට කටයුතු කරනවට. ඉතින් මම හිතනවා ඒ සහයෝගය දිගටම මට හම්බවෙයි කියලා.
පවුලෙ අය ඇරුනහම දර්ශිගේ ජීවිතයට සහයෝගය දෙන විශේෂ කෙනෙක් ඉන්නවද ?
තාම නම් එහෙම විශේෂ කෙනෙක් නැහැ. මම තනිකඩයි.
කතාවෙ නම් වැඩිපුර ගවුම් අඳින්නෙ. ඇත්තටම ගවුම් අඳිනවද ?
මන්දාරාම් කතාව නිසා චීත්ත ගවුම් අඳිනවා. පෞද්ගලික ජීවිතයෙදිත් මට ගැළපෙනවා කියලා හිතුණොත් ගවුම් අඳින වෙලාවල් තියෙනවා.
විලාසිතා කරනකොට ආවේණික විදිහක් තියෙනවද ?
විලාසිතා ගැන විශේෂයෙන් හිතන්නෙ නැහැ. මගේ ඇඟට ලස්සන ගැළපෙන විලාසිතා කරනවා.
ලස්සනට ඉන්න මොනවද කරන්නෙ ?
සැලුන් ගිහින් සත්කාර වගේ දේවල් නම් කරනවා. හැබැයි මම ගොඩක් සුදු කෙනෙක් නෙමෙයි නිසා වැඩිය මේකප් පස්සෙ එළවන්නෙ නැහැ.
උපුටා ගැනීම අරුණ
