තාත්තා හරිම ශක්තිමත් පුද්ගලයෙක් ඒත් දවසක් ඔහු අන්ත අසරණ වුණා
මේ මිහිමඬල අපූර්වත්වය පිරි සෞන්දර්යාත්මක වේදිකාවකි. එහි නළුවන් ලෙසින් අපි විවිධ චරිතයන්ට ජීවය දෙමු. සැබෑ ජීවිතයේ මිහිමඬල මත රංගනයත්, වේදිකාවක් මත හෝ පුළුල් තිරයක් හරහා දිග හැරෙන පතිතයක් ලෙසින් දකින රංගනයකත් ඇත්තේ ජීවී අජීවී විචල්‍යයන් දෙකකි. මේ විචල්‍යයන් දෙකම සාර්ථක ලෙස නිරූපණය කිරීමට හැකි වන්නේ දක්ෂ නළුවෙකුට පමණකි.
ඕනෑම අයෙකුට නළුවෙකු වීමට අවස්ථාව තිබේ. එහෙත් සාර්ථක නළුවෙකු ලෙස දිගු කාලයක් ජනප්‍රියත්වය එක ලෙස රඳවාගෙන සිටීම පහසු නොවන කටයුත්තකි. මෙවැනි ජනප්‍රිය චරිත අපගේ සිනමාවේ හෝ ටෙලි නාට්‍ය කලාවේ හමු වන්නේ බොහෝ අඩුවෙනි. එසේම තාත්වික අභිනයකින් යුතු චරිත නිරූපණය කරන නළුවෙකු හෝ නිළියක දීර්ඝ කාලයක් එම ක්ෂේත්‍රය තුළ ප්‍රතිභා දක්වන්නේ ද ඉතා කලාතුරකිනි. ආනන්ද අතුකෝරල....... ඔහු පුංචි තිරයේ ආදරණීය තාත්තාගේ චරිතයට වැඩිපුරම පණ පොවන නළුවෙකි. පරිණත අත්දැකීම් සමුදායක් පිරි ප්‍රතිභාපූර්ණ නළුවෙකු ලෙස ඔහු ඉතාම සීරුවෙන් තම රංගන කෞශල්‍ය විකසිත කරන්නේ හරි අපූරු ලෙසිනි. පුංචි තිරයේ ආදරණීය තාත්තාගේ චරිතයට පණ පොවන ඔහු තම පෞද්ගලික ජීවිතය ද ඉතාම සැහැල්ලුවෙන් හා සතුටින් ගත කරන්නේ තම සෙනෙහසින් පිරි කැදැල්ලේ ආදරණීය තාත්තාගේ භූමිකාව වඩාත් හොඳින් අර්ථ ගන්වමිනි. මෙලෙසින් සරල, නිහඬ, සැහැල්ලු දිවියක් ගතකරන ආනන්ද අතුකෝරල කලාකරුවාගේ කුටුම්බය වඩාත් හැඩ කරන්නේ ඔහුගේ එකම දියණිය වූ ඉෂාරා අතුකෝරලයි.
තම ආදරණීය පියාගේ අඩිපාරේ යමින් රංගනයෙන් දස්කම් දැක් වූ ඇය මේ වන විට දක්ෂ නිවේදිකාවක ලෙසින් ද වඩාත් ජනප්‍රියත්වයට පත්ව සිටියි. තම ලෙයින් උපන් දියණිය තමාගේම අඩිපාරේ යමින් වේදිකාව හා මාධ්‍ය ක්ෂේත්‍ර තුළ දස්කම් දක්වන විට ඔහුට මහත් ආඩම්බරයකි. ඇය පසුගිය කාලයේදී සමාජ මාධ්‍ය‍ෙය් වඩාත් ජනප්‍රියත්වයට පත් වුණේ වෙනස්ම ව්‍යාපාරයක් ආරම්භ කළ නිසාය. තම පියා සමඟ ‘බර්ගර් බනිස්’ ව්‍යාපාරයක් ආරම්භ කළ මේ දෙදෙනාගේ ව්‍යාපාරයට සමාජ මාධ්‍ය හරහා ඉහළම ප්‍රතිචාරයක් හිමි වුණේ ඔවුන්ට තිබූ ජනප්‍රියත්වය නිසාමය.
සුරූපී තරුණියක ලෙසින් වේදිකාවේ දස්කම් පෑ ඇය මේ වන විට ස්වර්ණවාහිනී සේවයේ නිවේදිකාවක් ලෙස කාර්යබහුල චරිතයක් බවට පත් වී තිබේ. දිනපතා වැඩසටහන් රැසක නිවේදන කටයුතු කරන ඈ සමඟ අප පුංචි පිළිසඳරකට එක්වූයේ තම ආදරණීය තාත්තාගේ සෙනෙහස ගැන අර්ථවත් කතාබහකටය. ඒ කතාබහේ ප්‍රවිශ්ටයට ඇය එකතු කළේ වටිනාම ප්‍ර‍ෙව්ශයකි.
“මගේ ජීවිතයේ ආදරය කියන list එකේ පළමු තැන තියෙන්නේ තාත්තාට. එහෙම වෙන්න හේතු ගොඩක් තියනවා. ඒ අතරින් පළමු හේතුව අපේ අම්මටයි තාත්තාටයි ඉන්න එකම දරුවා මම විතරයි. ඒ නිසා අම්මාට වගේම තාත්තාටත් තියන සෙනෙහස කොයි තරම් ද කියලා වචනවලින් විග්‍රහ කරන්න අමාරුයි. මගේ ජීවිතයේ පරමාදර්ශී චරිතය බවට පත්වෙනවා වගේ තාත්තා පුදුම ඉවසීමක් ඇති පුද්ගලයෙක්. මම හිතන්නේ අපේ තාත්තා දක්ෂ නළුවෙක් වීමට හේතුවත් ඒකම තමයි.
අපේ තාත්තා ජීවිතයේ පොඩි තැනකින් පටන් ගත්තු මනුස්සයෙක්. මගේ අම්මගෙයි තාත්තාගෙයි හමුවීම හා ආදර කතාවත් හරිම ගැඹුරුයි. ඒ දෙන්නා හමුවෙලා තියෙන්නේ බාධක මැද ගෙවී ගිය ප්‍රේමයකින්. ඒ නිසා ඒ දෙන්නාගේ විවාහය ප්‍රමාද වෙනවා. ඒ දෙන්නගේ කැදැල්ලට මාව එකතු වෙන්නේ අවුරුදු 12ක් ගතවුණාට පස්සේ. නමුත් ඒ සියලු කැපකිරීම් මැද අපේ අම්මයි තාත්තායි හරිම සතුටින් ජීවත් වෙනවා. තාත්තා රංගනයට එකතු වෙන්න පෙර රැකියාවක් කළා. ඊට පස්සේ තමයි වේදිකාවෙන් ටෙලිනාට්‍ය ක්ෂේත්‍රයට එකතු වුණේ. දැන් මගේ වයස අවුරුදු 29ක්. මට රංගනයට එකතු වෙන්න අවස්ථාව ලැබෙන්නේ තාත්තා නිසයි. නමුත් දැන් රංගන කටයුතුවලට මට වෙලාවක් නැහැ. නිවේදන කටයුතුවලට සම්පූර්ණම කාලය යොදවනවා. මට ටෙලිනාට්‍ය කිහිපයක් විතරයි රඟපාන්න අවස්ථාව ලැබුණේ. පාර දිගේ, හසරැලි දිය කියන ටෙලිනාට්‍යවල තමයි මම රඟපෑවේ. මම රැකියාව කරනවාට අමතරව සැලොන් එකකුත් කරනවා. ඒ නිසා දැන් මම හුඟක් අවිවේකයි. අපේ ‘බර්ගර් බනිස්’ Shop එකත් නවත්තන්න සිද්ධ වුණා. අපේ පවුලේ එකම දරුවා නිසා පුංචි කාලේ පටන්ම මම හැදුණේ හරිම හුරතලයට. මම තවමත් නිදා ගන්නේ අම්මයි තාත්තයි මැද. ගෙදර හිටපු එකම දරුවා නිසා මට පුංචි පුංචි පිස්සු තිබුණා. අපේ පවුලේ කොල්ලෙකුත් නැති නිසා මට ආසාවක් තිබුණා වාහනයක් ගන්න. ඉතින් මම අවුරුදු 24 දී විතර ඩබල් ඩෝ වෑන් එකක් ගත්තා. මම වාහනය ගත්තාට දැන් මේක පදින්නේ අපේ තාත්තා. එයා හරිම ආඩම්බරෙන් පැදගෙන යනකොට මටත් හරි සතුටුයි. මමත් කවදාවත් මුකුත් කියන්නේ නැහැ.
දවසක් තාත්තා එළියට ගිය වෙලාවක තාත්තාගේ ෆෝන් එකෙන් Call එකක් එනවා. ඒ Call එකට තාත්තා කතා කළේ වචන ගළපගන්න බැරි විදිහට. “දුව මගේ අතින් වාහනය හැප්පුණා” කියලා තාත්තා කිව්වේ හරිම හෙමින්. මම පුළුවන් ඉක්මනට වාහනය ඇක්සිඩන්ට් වුණ තැනට ගියා. වාහනය සම්පූර්ණයෙන්ම කුඩු... මම මුලින්ම හෙව්වේ තාත්තා. තාත්තා පැත්තක ඉන්නවා මම දැක්කා. මම තාත්තා බදාගත්තා. මම එදා තමයි දැක්කේ තාත්තා ඒ තරම් අසරණ වුණු දවසක්. එයා හරි ශක්තිමත් මනුස්සයෙක්. ඒත් එදා තාත්තා පුදුම අසරණ විදිහට මට කිව්වා පුතේ මගේ අතින් වාහනය හැප්පුණා.... දැන් මොකද කරන්නේ” කියලා. මම තාත්තාට කිව්වේ අපි වාහනේ හදාගමු. මට තාත්තා ඉන්නවානේ ඒ ඇති කියලා. එහෙම කියනකොට තාත්තාගේ ඇස්වලට කඳුළු ආවා මම දැක්කා.
ඇත්තටම අපේ තාත්ත හරිම සරල පුද්ගලයෙක්. එයා අනවශ්‍ය කරදරවලට පැටලෙන්න කැමැති නැහැ. අපි තුන්දෙනාගේ බැඳීමට තමයි එයා හරිම කැමැති. අපේ පවුලේ වෙන දරුවෝ නැති නිසා මම හැම ප්‍රශ්නයක්ම සිද්ධියක්ම කියන්නේ අම්මටයි, තාත්තටයි. මට ලොකු යාළුවෝ ප්‍රමාණයක් නැහැ. ඉන්න හොඳම යාළුවෝ දෙන්නා තමයි අම්මයි තාත්තායි. ඒ නිසා අපි අතර අම්මා තාත්තා දුව කියලා ලොකු පරතරයක් නැහැ. අපි රෑට ගෙදර කෑම මේසේදී හැම දෙයක් ගැනම කතා කරනවා. තාත්තා කිසිම දවසක නළුකම හිතට ගත්තු පුද්ගලයෙක් නෙවෙයි. එයා හැම වෙලාවෙම අංක එකට තිබ්බේ අම්මාවයි, මාවයි සතුටින් තියන එක. එයා කො‍ෙහ් හරි රඟපාන්න ගියොත් කොහොමහරි රෑට ගෙදර එන්න තමයි හදන්නේ. ඒ තරමටම අපට ආදරෙයි. තාත්තා රඟපෑමෙන් ලොකු මුදලක් හම්බ කළේ නැති වුණාට ඒකෙන් ලබන ආත්ම තෘප්තිය මුදලට වඩා වටිනවා. ඒ නිසා රඟපාන්නේ තෝරා බේරාගෙන. මගේ ආදරණීය තාත්තා ලෙස ඔහු මට ඉතා ආදරය, සෙනෙහස ආරක්ෂාව සැබෑම අවංකව ලබා දෙන හින්දම රඟපෑමේදිත් එයා තාත්තාගේ චරිතය ඉතාම සාර්ථකව රඟපානවා. වැඩිපුරම ඔහුට තාත්තාගේ චරිතය ලැබෙන්නෙත් ඒ නිසාමයි කියලා මම හිතන්නේ.”
ඉෂාරා පවසන ලෙසින්ම ආනන්ද අතුකෝරල රංගවේදියා ටෙලිනාට්‍ය රැසකම තාත්තාගේ චරිතයට පණ පොවයි. එම සෑම චරිතයම ඉතාම සාර්ථක ලෙස රඟ දක්වයි. ඔහු ආදරණීය පියකු ලෙස තම දියණියට දක්වන සෙනෙහස නිසාම ඔහුට සොබාදහම විසින් ලබා දුන් තිළිණයක් වන්නට ද ඉඩ ඇත.
උපුටා ගැනීම තරුණී පුවත් පත
