මම අරගත්තේ හරිම වාසනාවන්ත තීරණයක්
ඇක්ටින් ඇකඩමියක් පටන් ගත්තා.
මේ දිනවල ඔහු අපට මුණගැසෙන්නේ ස්වාධීන රූපවාහිනියේ විකාශය වන ‘තත්පරයක් දෙන්න’ ටෙලි නාට්‍යයේ පොලිස් නිලධාරි ධර්මජිත් ලෙසිනි. ඔය අතර රිදී තිරයේ ද මේ දිනවල තිරගත වන සිහින සමීකරණ සිනමා නිර්මාණයේ ත්‍රිරෝද රථ රියැදුරුගේ චරිතය වන අසංකට ජීවය දෙන්නේ ද ඔහුමය. ඉතින් ප්‍රේක්ෂක ආදරය එක ලෙස සැමදා ලබන පූජන දන්දෙණිය සමඟයි අද අපේ මේ කතාබහ.
තත්පරයක් දෙන්න ‘ධර්මජිත්’ ගෙන්ම මේ කතාව පටන් ගමු?
ඇත්තටම කිව්වොත් ධර්මජිත්ට මේ වෙලාවේ ගොඩක් හොඳ ප්‍රතිචාර ලැබෙනවා. ප්‍රේක්ෂකයන්ගෙන් වගේම ක්ෂේත්‍රයේ අයගෙනුත් එක ලෙස ඒ ප්‍රතිචාර ලැබෙනවා. ඒක ඇත්තටම හොඳ තත්ත්වයක්.
පිටපත අතට ලැබුණහම හිතුව ද තත්පරයක් දෙන්න ටෙලි නාට්‍යය මේ විදිහට හිට් වෙයි කියලා?
මේ ළඟ ළඟම මම ‘ප්ලීස් ෂෙයාර් දිස්’ කියන මිනි සීරිස් ටෙලිනාට්‍යයේ පොලිස් චරිතයක් කරලත් තිබුණා. එතකොට ඒ කතන්දරයත් එක්ක මට මේ කතාව කියවද්දි තේරුණා, පිටපතේ ලස්සන කතාවක් ගෙතිලා කුතුහලය දනවන පොඩි හැඩයක් තියෙනව කියල. අනික මම හරිම ආසයි රසික අයියගේ ලිවීමට. ඔහුගේ පිටපත් ඇතුළේ නළු නිළියන්ට ගොඩක් තොරතුරු තියෙනවා.
ඔය අතරේ සිහින සමීකරණ අසංක ගැනත් කතා කළොත්?
තවම චිත්‍රපටය තිරගත කිරීම ආරම්භ කළා විතරයි. නමුත් ඒකත් මම හරිම කැමැත්තෙන් කරපු වැඩක්. මේ චරිතය බොරු කරන, වංචා කරන චරිතයක් නෙමෙයි. අසංක ආදරය කරන්න ගන්නවානේ. ඒකත් එක්ක වෙනස්වන චරිතයක්.
රිදී තිරයේ පෙම්වතෙක් වෙන්න උත්සාහ කරනවා?
ඇත්තටම පෙම්වතෙක්ගේ චරිතයක් මම තවම කරලා නැහැ. අපි දකින රොමෑන්ස් කියන එකක මම තවම වැඩ කරලා නැහැ. ගොඩක් වෙලාවට අපිට හම්බවෙන්නේ පොඩි රියැලික්ස්ටික් එකේ යන ලව් තමයි.
සිහින සමීකරණ ඔබේ පළමු සිනමා නිර්මාණය ද?
ඔව්. චිත්‍රපටයක් විදිහට එන පළමු සිනමා නිර්මාණය. මීට කලින් මම ප්‍රියන්ත කොළඹගේ මහත්මයාගේ ‘ආදරණීය කතාවක්’ චිත්‍රපටයේ සුළු චරිතයක් රඟපාලා තියෙනවා. නමුත් ප්‍රියන්ත කොළඹගේ මහත්මයා තමයි මුලින්ම සිනමාවට කතා කරන්නේ. එතකොට මම ප්ලේ හවුස් එකේ ඉන්න කාලේ. ඒකේ අපි කළා ‘මාස්’ කියලා නාට්‍යයක්. ඔහුගේ පුතත් සමඟ මම ඒකේ රඟපෑවේ. ඊට පස්සේ තමයි සකූගේ කතාවේත් රඟපෑවේ. කොහොම වුණත් චිත්‍රපටයක දැනෙන චරිතයකින් එන පළමු අවස්ථාව තමයි සිහින සමීකරණ කියන්නේ.
සිහින සමීකරණ අසංකට ආරාධනාව ලැබුණේ කොහොමද?
මේ පිටපත ලියන්නේ දර්ශන විද්‍යා අරවින්ද. ඔහු මගේ හිතවතෙක්. සසික අයියාව දැනගෙන හිටියට ලොකු සම්බන්ධයක් තිබුණේ නැහැ. සහාය අධ්‍යක්ෂ ඉන්දික ධර්මතිලක හරහා තමයි මට මේ ආරාධනාව ලැබෙන්නේ. චිත්‍රපටයක් කිව්වහම මම ඉතාම කැමැති වුණා. අනික පිටපතෙත් තිබෙනවා ලස්සන කතාවක්.
පූජනට ලැබෙන චරිත ගැන ගොඩක් දෙනෙක් කතාබහට ලක්කරනවා?
මට ඒක ලැබෙන්නේ කොහොම ද කියන එක සම්බන්ධයෙන් අදහසක් නැහැ. නමුත් මම හරි ආසාවෙන් ඒ චරිතය භාර ගන්නවා. සමහර වෙලාවට මම හිතන්නේවත් නැතිව කරපු දේවල් කතාබහට ලක්වෙනවා. ප්‍රේක්ෂකයා ලබාදෙන අදහසට සතුටුයි.
ඔබ තෝරාගත් ක්ෂේත්‍රය ගැන අද වෙනකොට මොකද හිතෙන්නේ?
ඇත්තටම සතුටුයි. මේ ලෝකේ ඉතින් ඉතාම සුළු පිරිසකටනේ තමන් කැමැති දේ කරන්න හම්බ වෙන්නේ. ඒ පැත්තෙන් බලනකොට මම හිතෙනවා මම අරගෙන තියෙන්නේ හරිම වාසනාවන්ත තීරණයක් කියලා. මේක නිකම්ම කරන්න බැහැ. හැමෝගෙම සහයෝගය ඕනෑ. මම ආසා දේ කරන්න ලැබෙනවාම කියන්නේ මනුස්සයකුට ජීවිතයේ ඊට වැඩිය සතුටක් නැහැනේ.
වේදිකාවේ වැඩකටයුතු කොහොමද?
පසුගිය දවස්වල මකරෙක් ඇවිත් කියලා වේදිකා නාට්‍යයක් නිෂ්පාදනය කරලා දර්ශන වාර කිහිපයක් කළා. ඒක සමන් පුෂ්පකුමාරගේ රචනයක්. ඊට කලින් සිහින රඟහලේ වැඩකටයුතු කරමින් හිටියා. ඉදිරියට දර්ශන වාර කිහිපයකට ආරාධනා ලැබිලා තියෙනවා. ඇත්තම කිව්වොත් පසුගිය කාලවකවානුවල වේදිකාවට වැඩිය ගොඩවීමට අවස්ථාවක් හම්බවුණේ නැහැ.
මේ දවස්වල චිත්‍රපටයක වැඩ කරනවා කියලා ආරංචියි?
ඔව්. චමින්ද ජයසූරිය අධ්‍යක්ෂණය කරන Father චිත්‍රපටයේ රූගත කිරීම් රන්මිහිතැන්න ටෙලි සිනමා ගම්මානයේ සිදුවෙනවා. මම තමයි මෙහි ප්‍රධාන චරිතයෙන් දායක වෙන්නේ. ඒක තමයි මට තියෙන ලොකුම සතුට. ඒ අවස්ථාව සම්බන්ධයෙන් මම හරිම කෑදරයි. හේතුව මෙහි පිටපත ඉතාම ඉහළ ගණයේ පිටපතක්. ඊට අමතරව මේකට රංගනය සහ තාක්ෂණය පැත්තෙන් දායකවෙලා ඉන්න පිරිස ගැන බැලුවත් මේකට දායක වෙලා ඉන්නේ අතිදක්ෂ පිරිසක්.
ධර්මජිත්ගේ තත්පරයක් දෙන්න අවසානයේ සාර්ථක වේවිද?
ඒක ඉතින් නරඹලාම තමයි කියන්න වෙන්නේ.
මේ නිර්මාණය මේ තරම් සාර්ථක වීමේ රහස මොකක්ද?
තත්ත්පරයක් දෙන්න ටෙලි නාට්‍යය මේ තරම් දුරට සාර්ථක වෙන්න ප්‍රධානම හේතුව විදිහට දකින්නේ එහි පිටපත. එකේ ගෞරවය පුද කරන්න ඕනෑ රසික සුරවීර ආරච්චිට. වෙනස් විදිහට හිතන, වෙනස් දේවල් බලමින් ලියන රචකයෙක්. එයාගේ ඔළුවේ මැවෙන චිත්‍රයක්නේ අපිට පිටපතක් විදිහට දෙන්නේ. දර්ශන තලයට ගියාට පසුව සුපුන් අයියා හදලා දෙන අවකාශය සහ නිදහස ඉතාම වටිනවා. අධ්‍යක්ෂ සුපුන් අපිට නිදහසේ රඟපාන්න ඉඩ දෙනවා. අපි මොන නැටුම නැටුවත් වැඩක් නැහැනේ, අපි පේන තැන තීරණය කරන්නේ කැමරා අධ්‍යක්ෂවරයානේ. චින්තක සෝමකීර්තිත් අමතක කරන්න බැහැ. හැමෝගෙම ටීම්වර්ක් එක ලැබුණහම වැඩ කරන්න ලේසියි.
අලුත් වැඩක් පටන් ගත්තා කියලත් ආරංචියි?
මේ අවුරුද්දේ ජනවාරිවල ඇක්ටින් Troup ඇකඩමි කියලා ආයතනයක් දෙල්කඳ ආරම්භ කළා. ඒකෙ ටිකක් වෙනස් විදිහේ විෂය නිර්දේශයක් තමයි රංගනය සම්බන්ධයෙන් කතාබහ කරන්නේ. ඇත්තටම කියන්න සතුටුයි එහි පළමු පාඨමාලාව අවසානයේ ඊට සහභාගි වූ සියලුම දෙනා ‘ෆාදර්’ චිත්‍රපටයේ චරිතවලට රංගනයෙන් දායක වුණා. ඒක පාඨමාලාවේ හැදෑරීම අනුව ලබාගත්තු අවස්ථාවක්, මට හරිම සතුටුයි. මොකද නළුවන්ට කර්මාන්තයක් විදිහට මේක ගැන මොකක්ද තියෙන අභියෝගය කියන එකයි මම ප්‍රැක්ටිස් කරන්න ගත්තේ. මෙහි අලුත්ම පාඨමාලා ආරම්භය එළැඹෙන ජූලි 07 වැනිදා ආරම්භ කිරීමට තීරණය කරලා තිබෙනවා. මේ දවස්වල ලියාපදිංචි කිරීම් ආරම්භ කරලයි තියෙන්නේ. වයස අවුරුදු 18 සිට 40 දක්වා වයස් කාණ්ඩයේ අයට ලියාපදිංචි වෙන්න පුළුවන්.
උපුටා ගැනීම දිවයින
