තිරයේ බොළඳ පෙම්වතිය වෙන්න මම කැමැති නෑ
මේ දිනවන විකාශය වන ලලයි ලිලයි ලයි ටෙලි නාට්‍යයෙන් රන්සරණිගේ චරිතයෙන් මෙන්ම කවීතා ටෙලි නාට්‍යයේ කවීතාගේ චරිතයෙන් ඔබ හමුවට එන වොල්ගා කල්පනී කියන්නේ පුංචි තිරයට නැතිවම බැරි දක්ෂ රංගන ශිල්පිනියක්. ඉතින් මේ දිනවල බාල මහලු කා අතරත් ඉතාම ජනප්‍රිය චරිතයක් වන වොල්ගා මෙවර ‘හදගැස්ම’ අප සමඟ අදහස් බෙදාගත්තේ මෙලෙසින්.
මේ දිනවල මොකද වෙන්නේ?
මේ දිනවල මගේ කලා වැඩකටයුතුත් කරගෙන සතුටින් හොඳින් කාලය ගත කරනවා.
ඔබේ කලා වැඩ කටයුතු ගැනත් මතක් කළොත්?
තප්පරයක් දෙන්න ටෙලි නාට්‍යයේ වැඩකටයුතු මේ වන විට අවසන් වෙලා තිබෙනවා. ඒ වගේම මේ දිනවල ලලයි ලිලයි ලයි ටෙලි නාට්‍යයේ වැඩකටයුතු කරගෙන යනවා. ඒ වගේම මම රංගනයෙන් දායක වන අලුත්ම ටෙලි නිර්මාණය වන කවීතා ටෙලි නාට්‍යයේ වැඩ කටයුතු ආරම්භ වෙලා තිබෙනවා. එම ටෙලි නාට්‍ය දෙකම මේ දිනවල විකාශය වීමත් සිදු වෙනවා.
කවීතා කියන්නේ තරමක් වෙනස් ආකාරයේ ටෙලි නාට්‍යයක්. ඔබ එහි ප්‍රධාන චරිතයට රංගනයෙන් දායක වනවා. ඒ ගැනත් කතා කළොත්?
ඇත්තටම මට මේ නිර්මාණයට මුලින්ම කතා කරන්නේ එහි තිරපිටපත් රචකයා වුණ බුද්ධිනී ජයවර්ධන අක්කා. මේ නිර්මාණයේ කතා කරන මාතෘකාව තරමක් වෙනස්. අපේ රටේ බොහෝදෙනා වේශ්‍යාවන් ගැන කතා කරන්න බියක් දක්වනවා. ඒ නිසයි මම මේ නිර්මාණය භාර ගත්තේ. ඒ වගේම චිත්‍රපට අධ්‍යක්ෂවරයකුගේ පළමු ටෙලි නාට්‍ය වීමත් මම මේ නිර්මාණය භාරගන්න හේතුවක් වුණා. ඇත්තටම මම මේ නිර්මාණය භාර ගැනීමට විශේෂම හේතුව වුණේ බොහෝදෙනා කතා කරන්න බිය මාතෘකාවක් වන නිසයි.
කවීතාගේ චරිතයට වගේම රන්සරණිගේ චරිතයටත් බොහෝ ප්‍රේක්ෂකයන් ආදරය කරනවා. ඉතින් ඒ ගැනත් කතා කරමු?
ඇත්තටම ඔව්. රන්සරණිගේ චරිතයට බොහෝදෙනා ආදරය කරනවා. රන්සරණි කියන්නෙ අවුරුදු දහඅටක බොහොම බොලඳ, මවුපියන් සමඟ ජීවත්වෙන තරුණියක්. තප්පරයක් දෙන්න ටෙලි නාට්‍යයත් සමඟ ලලයි ලිලයි ලයි නිර්මාණය විකාශය වීම ඇත්තටම මට ලොකු වාසියක්. මොකද මේ චරිත දෙක එකිනෙකට වෙනස් බොහොම අපූරු චරිත දෙකක්. රන්සරණිගේ චරිතයට නම් තරුණ ප්‍රේක්ෂකයන්ගෙන් හොඳ ප්‍රතිචාර ලැබෙනවා.
රංගනයේදී ඔබ විවිධ චරිත කෙරෙහි අවධානය යොමු කරනවා. ඔබ චරිත තෝරා ගැනීමක් සිදු කරනවාද?
මම හරිම විවේකයෙන් වැඩ කරන කෙනෙක්. ලැබෙන හැම නිර්මාණයක්ම මම භාර ගන්නේ නැහැ. ඇත්තටම චරිත ලැබීමේදී මම බොහොම වාසනාවන්තයි. මොකද මම රංගනයට ආපු දවසේ ඉඳන් මට ලැබුණේ විවිධ චරිත. ඇත්තටම මම තිරයේ බොලඳ පෙම්වතිය වෙන්න කැමැති නැහැ. මට රංගනයේදී විවිධ අධ්‍යක්ෂවරුන් යටතේ වැඩ කරන්න ලැබිලා තිබෙනවා. ඒ වගේම මම බොහොම අඩුවෙන් වැඩ කරන කෙනෙක්. ඒ වගේම මම තෝරලා බේරලා තමයි වැඩ කරන්නේ.
ඔබ හොඳම නිළිය කැටගරියේ සම්මාන ලැබූ රංගන ශිල්පිනියක්. ඉතින් වර්තමානයේ කලාකරුවන් ඇගයීම ගැන ඔබ මොකද හිතන්නේ?
සම්මාන ලැබෙනවා කියන්නේ කලාකරුවකුගේ ජීවිතයට ලැබෙන ලොකු හයියක්. ජනප්‍රිය කියන දේ පස්සේ මම කවදාවත් ගියේ නැහැ. නමුත් වොල්ගා කල්පනී කියන නමට ඉස්සරහින් හොඳම කියන කොටස එකතු කරගන්න ඕනෑ කියන බලාපොරොත්තුව මට තිබුණා. ඇත්තටම මගේ ඒ බලාපොරොත්තුව ඉෂ්ට වුණා. ඉතින් මම නම් දකින්නේ කලාකරුවකුට සම්මාන ලැබෙනවා කියන දේ බොහෝ වටින දෙයක්. මොකද අපි ආදරය කරන දෙයට සම්මාන ලැබීමෙන් අපට ඒ ගැන තිබෙන උනන්දුව තවත් වැඩි වෙනවා.
ඔබ ප්‍රේක්ෂකයන්ගේ මතකයේ රැදෙන්නේ ඔබ රංගනයෙන් දායක වූ චරිතවල නම්වලින්. ඇත්තටම එහි රහස මොකක්ද?
මම කරන දේ හරියට කරන කෙනෙක්. මම චරිතයක් කරනකොට බොහොම කැපවීමෙන් කරනවා. ඒ වගේ මම චරිතවලට අවංකව වැඩ කරනවා. ඒ වගේම මම කරන සෑම වැඩකටම මම හරිම ආදරෙයි. මම ඒ චරිත බොහොම ආදරයෙන් ගොඩනඟන නිසා වෙන්න ඇති ප්‍රේක්ෂකයන්ට තවමත් ගුණාදරී, ටුටූ, රන්සරණි වැනි මම රංගනයෙන් දායක වුණ චරිත මතකයේ තිබෙන්නේ.
පුංචි තිරයට සාපේක්ෂව රිදී තිරයේදී ඔබ ප්‍රේක්ෂකයන්ට දැක ගන්නට නොලැබෙන්නේ ඇයි?
කරපු චිත්‍රපට නම් දෙකක් තිබෙනවා. ඉන් එකක් නම් තවම තිරගත වෙලා නැහැ. ළඟදීත් ආරාධනාවක් ලැබුණා. නමුත් මමම ගොඩනඟාගත් සීමාවන් එක්ක ඒ චරිතය භාරගත්තේ නැහැ. නමුත් ඇත්තටම මට ටෙලි නාට්‍යවලට ආරාධනා ලැබෙනවා තරම් සිනමා නිර්මාණවලට ආරාධනා ලැබෙන්නේ නැහැ.
අපේ රටේ වෘත්තීය කලාකරුවන්ට පැවැත්මක් තිබෙනවාද?
ඉස්සර අපි කලාවට සම්බන්ධ වුණ කාලයේදී වගේ නෙවෙයි වර්තමානයේදී කලාකරුවන්ට කලාව තුළින් ජීවත් වෙන්න බැහැ. මම කලාවට ආපු කාලයේදී මම කලාව තුළින් බොහෝ දේවල් කරගත්තා. දැන් කලාව ඇතුළේ විනය කියන දේත් පිරිහිලා ගිහින්. එය මම චෝදනාවක් ලෙස ඉදිරිපත් කරන දෙයක් නෙවෙයි. කොහොම නමුත් මම නම් තවමත් කලාව තුළින් ජීවත් වෙනවා. මේ ක්ෂේත්‍රය ඇතුළේ තමන්ගේ මුදල තීරණය කරන්න ඕනෑ තමන්මයි. මම නිර්මාණයක් භාර ගනිද්දී ඒ නිර්මාණයට මම කොච්චර කැමැති වුණත්, ඒ චරිතයට මම කොච්චර ආදරය කළත් මගේ මුදලට එන්නේ නැත්නම් මම චරිත භාර ගන්නේ නැහැ. මම හිතනවා අපි හැමෝටම ප්‍රතිපත්තියක් තිබෙන්න ඕනෑ කියලා. අපි ප්‍රතිපත්තිගරුක වෙනවා නම් අපේ වෘත්තීය මීට වඩා ලස්සන වෙයි කියලා මම හිතනවා.
ඔබේ අනාගත බලාපොරොත්තු ගැනත් මතක් කළොත්?
කලාව ඇතුළේ හොඳ වැඩ ටිකක් කරගෙන මවුපියන් එක්ක වගේම මම ආදරේ කරන අයත් එක්ක සතුටින් හොඳින්, නිදහසේ ජීවත් වෙන එක තමයි මගේ එකම බලාපොරොත්තුව. එහිදී කාටවත් කරදරයක් නොවී ජීවත් වෙන්නත් මම වග බලා ගන්නවා.
උපුටා ගැනීම මව්බිම
