අවුරුදු කුමාරි තරගෙට රෙද්ද හැට්ටෙ මහන්නවත් සල්ලි තිබුණෙ නැහැ
මේ දිනවල පුංචි තිරය ඔස්සේ විකාශනය වන ‘සංසාරේ’, ‘දිවිතුරා’ සහ ‘බඹරෙක් ඇවිත්’ ටෙලි නාට්‍ය හරහා ප්‍රේක්ෂකයන් හමුවට එන දක්ෂ ජනප්‍රිය මෙන්ම සුරූපී සුන්දර රංගන ශිල්පිනියක් තමයි විනූ පෙරේරා කියලා කියන්නේ. ඒ වගේම ඇය දක්ෂ නර්තන ශිල්පිනියක් විදිහටත් හඳුන්වලා දෙන්න පුළුවන්. රංගන ශිල්පිනියක්, නර්තන ශිල්පිනියක් ලෙස කාගෙත් හද දිනූ විනූගේ අලුත්ම තොරතුරු දැනගන්න අපි ඇයත් එක්ක කතා කළා.
කොහොමද ජීවිතේ?
ජීවිතේ හොඳයි. මේ දවස්වල නම් ලොකු සතුටක් නැහැ. සාමාන්‍යය විදියට ගලාගෙන යනවා.
මේ දවස්වල කලාවේ මොකද වෙන්නේ?
රංගන සහ නර්තන කටයුතු කරගෙන යනවා. මැයි මාසේ කියන්නේ මංගල උත්සව වැඩි කාලයක්නෙ. මගේ ඩාන්සින් ගෲෆ් එකක් තියෙනවා. එහි වැඩත් කරගෙන ඉන්නවා.
ඔබ රංගනයෙන් දායක වන නිර්මාණ කියක් මේ වෙද්දී විකාශය වෙනවද?
මේ දවස් වල විකාශය වෙනවා සියත නාළිකාවේ රාත්‍රි 8ට ලක්ෂ්මන් පුෂ්පකුමාරගෙ අධ්‍යක්ෂණයක් වන ‘සංසාරේ’, හිරු නාළිකාවේ ‘දිවිතුරා’ විකාශය වෙනවා. ඒ එක්කම අලුතින් හිරු නාළිකාවේම චරිත් අබේසිංහ අධ්‍යක්ෂණය කළ වන ‘බඹරෙක් ඇවිත්’ නාට්‍යය විකාශය වෙන්න පටන් ගත්තා.
ඒ එකිනෙක ගැන කෙටියෙන් කිව්වොත්?
මේ දවස්වල හිට් එකක් සියතේ යන ‘සංසාරේ’. මට ගොඩක් ප්‍රතිචාර ලැබෙන චරිතයක්. හරිම නපුරු සල්ලිකාර ගැහැනු ළමයෙකුගේ චරිතයක්. ඒකාකාරී බවෙන් මිදිලා මට ලැබුණු චරිතයක්. දිවිතුරාත් මට මෑතක ආරාධනා ලැබිලා සම්බන්ධ වූ නිර්මාණයක්. ඒ එක්කම චරිත් අබේසිංහ අධ්‍යක්ෂණයක් වන ‘බඹරෙක් ඇවිත්’ නාට්‍යය ගැන කියන්නම ඕනේ. මම හොයපු විදියේ ලස්සනම ලස්සන සම්භාව්‍යය ගණයට අයත් නිර්මාණයක්. එහි කැමරා කෝණවල ඉඳන්ම මාරම ලස්සනයි. මම හීන මවපු වැඩක්. ඒ නිසා ‘බඹරෙක් ඇවිත්’ නාට්‍යයට මාව තෝරා ගත්ත එකට චරිත් අබේසිංහ අයියට ස්තුතිවන්ත වෙනවා.
වැඩිම ප්‍රතිචාර ලැබුණු නිර්මාණය මොකක්ද?
මේ දවස්වල සියතේ යන ‘සංසාරේ’ නාට්‍යයට. කලින් නම් මම මුලින්ම කරපු දෙරණ නාළිකාවේ විකාශය වූ ‘සංගීතේ’ නාට්‍යයට සහ ශක්ති නාට්‍යයට ලැබුණා. මම වැඩ කරපු හැම නිර්මාණයකටම වගේ හොඳ ප්‍රතිචාර ලැබිලා තියෙනවා, පාරේ දැක්කත් මාව බොහෝ දෙනා හඳුනාගෙන මට හොඳ ප්‍රතිචාර දෙනවා. ඒ ගැන සතුටුයි.
නිළියක් වෙන්න මොන තරම් කැපවීම් කළාද?
මහා ලොකුවට කැපකිරීම් කරලා නැහැ. මම එහෙම කියන්නේ ඉස්සර අපේ ජ්‍යෙෂ්ඨ කලාකරුවන් කැප කිරීම් සෑහෙන කරලා මහන්සි වෙලා එක අවස්ථාවක් පවා ලබා ගෙන තිබුණේ. අද වෙද්දී කලාවට එන්න අවස්ථාවන් ලබා ගන්න පුළුවන් මාධ්‍යයන් ගොඩක් තියෙනවා. ඒ නිසා අපිට අවස්ථාවන් ගොඩක් ලැබෙනවා. ඒ නිසා මෙච්චර කැපවීම් කරා කියන්න තරම් දේවල් මට නැහැ. හැබැයි මගේ අම්මා තාත්තා දෙන්නා නම් ගොඩක් කැපකිරීම් කළා. පුංචි කාලේ ඉඳන් මට අවුරුදු කුමාරියක් වෙන්න වුවමනාව තිබ්බත් අවුරුදු කුමාරි තරගයට රෙද්ද හැට්ටේ මහගන්නවත් සල්ලි තිබුණේ නැහැ. අම්මා තාත්තා ගෙදර මොනවා හරි උකස් තියලා තමයි මාව ඒ තරගවලට අරන් ගියේ. මගේ හීනේ වෙනුවෙන්. මට වඩා කැපකිරීම් කළේ එයාලා. හැබැයි මට නිළියක් වෙන්න ඕනේ කියලා අදහසක් තිබ්බේ නැහැ, මට ඕනේ වුණේ නර්තන ශිල්පිනියක් වෙන්න. ඉතින් අද මම නර්තන සහ රංගන ශිල්පිනියක් වෙලා තියෙන එක ගැන සතුටුයි.
නිළියක් වෙනවට ගෙදරින් කැමති වුණාද?
මුලින්ම නම් මගේ තාත්තා කැමති වුණේ නැහැ. අවුරුදු කුමාරි තරගයට යන්න උදව් කළාට නිළියක් වෙනවට තාත්තා කැමති වුණේ නැහැ. අම්මා නම් කැමති වුණා, අම්මා දන්නවා මම කොහේ ගියත් වැරැද්දක් නම් කරන්නේ නැහැ කියන එක. හැබැයි තාත්තා බයයි. මම එයාගේ හුරතලීනේ. තාත්තගේ අකමැත්තත් පසුකාලීනව මම කරන වැඩ දැකලා එයාම ආඩම්බර වෙනකොට ඒ දේවල් මග හැරිලා ගියා.
මේ මෑතක තාත්තා අහිමි වුණානේ, ඒ හිඩැස වචන කරන්න පුළුවන්ද?
ඔව්. මට එයාව නැති වුණා. ඒ හිඩැස ගැන කියන්න මට තාම තේරෙන්නේ නැහැ. තාම තාත්තා නැතිවෙලා මාසයක් වගේ කාලයක් වෙන්නේ. තාමත් මමයි අම්මයි මල්ලියි, ඒ හිඩැස ඒ හිස්තැන ඒ ලැබුණු ආදරේ ආරක්ෂාව පුරවා ගන්න උත්සාහ කරනවා. මම මල්ලිගේ සහ අම්මගේ හිස්තැන පුරවන්න සහ ඒ දෙන්නා මට දැනෙන හිස්තැන පුරවන්න හදනවා. හැබැයි එතැනදි අපි හරි ෆේල්. තාත්තගේ ආදරේට කිසිම ආදරයක් සමාන කරන්න බැහැ. මගේ පණ ටික තාත්තා. මමයි එයයි තමයි පුළුවන් තරමක් රණ්ඩු වෙන්නේ. අපි දෙන්නා හරියට හස්බන්ඩ් සහ වයිෆ් වගේ. වෙලාවකට දෙන්නට දෙන්නා රුස්සන්නේ නැහැ. අපි දෙන්නට දෙන්නාම දන්නවා අපි හරි ආදරෙයි කියලා. ඒ ආදරේ ගැන අපි කවදාවත් කියලා නැහැ. තාත්තා නැති අඩුව කවදාවත් කාටවත් පුරවන්න බැරි වෙයි. මට පිරිසුදුව ආදරේ කරන්න හිටිය එකම පිරිමි ආත්මය. එයත් මට දැන් නැතිවෙලා. තාත්තව අමතක කරලා හිත හදාගන්න කොහොමත් බැහැ.
පුංචි තිරයෙන් සිනමාවට ඇරයුම් ලැබුණේ නැද්ද?
සිනමාවට අවස්ථාවන් ලැබුණා. සූරිය සුළඟ සහ කම්බිලි චිත්‍රපට දෙකට දායක වුණා. ඒ වගේම මේ වෙද්දී එකම එක අවස්ථාවක් ලැබිලා තියෙනවා මේ වෙද්දී ප්‍රධාන චරිතයකට. ඒක තවම කතා කරගෙන යන නිසා දැන්ම වැඩිවිස්තර කියන්න බැහැ.
දිගටම රඟපාන්නද කැමැත්ත?
මම තනිකඩව ඉන්නවා නම් දිගටම රඟපාන්න කැමතියි. මම විවාහ වෙන්නේ නැතුව අම්මා මල්ලි බලාගෙන දිගටම ඉන්නවා නම් සහ මම ලංකාවේ ජීවත් නොවන ලාංකිකයෙක් එක්ක විවාහ වුණොත් රංගන ජීවිතේ මම දිගටම කරගෙන යයි. එහෙම නැතුව මම විවාහ වෙලා ලංකාවේ ජීවත් වුණොත් හෝ විවාහයෙන් පස්සේ විදෙස්ගත වෙන්න වුණොත් මම රංගන ජීවිතෙන් ඈත් වෙනවා. මොකද මට ඕනේ මගේ අම්මා වගේ වෙන්න. මගේ අම්මා අපේ පවුලේ ජීවිතේ හරි ලස්සනට බලා ගත්තා. තාත්තට, මට සහ මල්ලිට කිසිම අඩුපාඩුවක් වෙන්න අම්මා ඉඩ තියලා නැහැ. කෑම ටික වතුර ටික පවා තාත්තා ඉන්නකම්ම අම්මා ළඟටම දුන්නා. මම ආසයි ඒ ජීවිතේට. හස්බන්ඩ්ට සලකන්න, දරුවන්ව ළඟ තියන් අකුරු කියලා දෙන්න. ඒකට නැනිලා දාන්න මම කැමති නැහැ. මගේ හස්බන්ඩ්ට කෑම ටික උයන්න ඕනේ මමයි. මම ඒකට හරි ආසයි. මම දන්නවනේ නිළියක් කියන්නේ කොච්චර කාර්ය බහුලයිද කියලා. මගේ තියෙන එකම බලාපොරොත්තුව මම කසාද බැන්දොත් කලාවෙන් සමුගනීවි. මම නොබැන්දොත් දිගටම රඟපායි.
දැන් ඔබේ වෘත්තීය රංගනයද?
මගේ වෘත්තීය හෙද වෘත්තීය. මම ඉගෙන ගත්තේ ඒ අංශයෙන්. ඒ වුණාට මට රංගනය එක්ක හෙද වෘත්තීය කරගෙන යන්න අමාරුයි. ඔය දෙකෙන් එකක් තෝරා ගන්න කියලා තාත්තා කිව්වම, මම හිතුවේ මම ඉගෙන ගත්ත දේ මගෙන් නැති වෙන්නේ නැහැ. මට ඕනෙම කාලයක මම ඉගෙන ගත්ත දෙයින් මට රස්සාවක් කරන්න පුළුවන්. හැබැයි වාසනාවට පෙනුමට ලැබුණු දේ තමයි රංගනය. ඒක වැඩිදියුණු කරගෙන ඒ ගැන හදාරන එක මගේ වගකීමක්. ඒ දේවල් කරගෙන ඉස්සරහට යන්න ඕනේ කියලා මට හිතුණා. වාසනාවට අත තියලා රංගන ජීවිතේ මම මගේ වෘත්තිමය ජීවිතේ විදියට තෝරා ගත්තා.
රංගනයට සීමා තියෙනවද?
රංගනයට සීමා නැහැ. නමුත් මට සීමා තියෙනවා. මගේ දෙමාපියන් එක්ක එකට බලන්න පුළුවන් සහ කවදා හරි දවසක මේ ඉන්නේ ඔයාගේ අම්මා කියලා පෙන්වන්න පුළුවන් වැඩ විතරයි මම කරන්නේ. මම මට හරි ආදරෙයි. ඒ නිසා මම ම ගොඩ නගාගන්න මාව කොයි වෙලාවකවත් මානසික වැටෙන්න බැහැ. ඒ නිසා මම කැමතියි කවදා හරි මට ලැබෙන හස්බන්ඩ් සහ දරුවන් පවා නම්බුකාර විදියට ජීවිතේට මුහුණ දෙනවට. ඒ නිසා තෝරා බේරා ගෙන හොඳ ලස්සන වැඩ ආවොත් මම කරනවා.
ආදරේ දකින්නේ කොහොමද?
ආදරේ හොඳයි. හරි කෙනාව ලැබුණොත්. නැත්නම් රැවටීම කියන්නෙම සමහර කෙනෙක්ගේ අවසානය වෙන්න පුළුවන්. මගේ නිර්වචනය නම් ආදරේ හොඳයි හරි කෙනාව ලැබුණොත්. වැරදි කෙනෙක් ලැබුණොත් ජීවිතේම විනාශයි.
ආදරේ අත්දැකීම් ඇති?
ඔව්. කටුක අත්දැකීම් තමයි වැඩිපුරම තියෙන්නේ. අවුරුදු පහක සම්බන්ධයක් මටත් තිබුණා. ඒක නැවතිලා දැන් අවුරුදු එකහාමාරක් විතර වෙනවා. අපි දෙන්නා කතාවෙලා වෙන් වුණේ අපි දෙන්නගෙම තියෙන නොගැලපීම් නිසා. අද එයත් සතුටින් ඉන්නවා. මමත් මගේ වැඩ ටික කරගෙන ඉන්නවා.
මේ වෙද්දී ආදරවන්තියක්ද?
නැහැ. දැන් මම ආදරවන්තියක් නෙවෙයි. මම හිතනවා දැන්මම මට කාටවත් හිත යන එකක් නැහැ.
මොන වගේ කෙනෙක්ද හොයන්නේ?
නිතරම මගේ ගැන හොයලා බලන. මම ළඟින්ම ඉන්න පුළුවන් වෙනස් වෙන්නේ නැති ආදරයක් මට ඕනේ. ඒ කියන්නේ හමුවෙන පළමුවැනි දවසේ ඉඳන් දෙන ආදරේ මට මැරෙනකම්ම ඕනේ. ඒක පොඩ්ඩක් හරි වෙනස් වුණොත් මම පළිගන්නවා. මම නපුරු කෙනෙක්. ඒ හින්දා පළිගන්න රණ්ඩු කර කර ඉන්න බැහැනේ. මම හොයන ආදරේ මට දෙන්න පුළුවන් කෙනෙක් තමයි මම හොයන්නේ. විශේෂයෙන්ම බොරු කියන්නේ නැති වෙන්න ඕනේ. මාව විශ්වාස කරන කෙනෙක් වෙන්න ඕනේ. මම එයාව සීයට දෙසීයක් විශ්වාස කරනවා. මම කවුරුත් කියන දේ විශ්වාස කරන්නේ නැහැ මගේ ඇස් දෙකෙන් දකිනකම්. මගේ විශ්වාසය රකින්න පුළුවන් මගේ ළඟින් ඉන්න පුළුවන් මගේ ගැන හොයලා බලන වෙනස් වෙන්නේ නැති ආදරයක් දෙන්න පුළුවන් පිරිමියෙක් තමයි මම හොයන්නේ.
නිළියක් වෙන්න දැකපු සිහිනය සැබෑ වීම ගැන අද මොකද හිතෙන්නේ?
සිහිනය සැබෑ වීම ඇත්තටම අහම්බයක්. මොකද මම කාගේවත් පස්සෙන් ගිහින් අනේ මට වැඩක් දෙන්න කියලා නැහැ. මගේ ළඟට වැඩ ඇවිත් තියෙනවා. ඒ ගැන මට හරි සතුටුයි. විශේෂයෙන් ක්ෂේත්‍රයේ දැවැන්තයන් එක්ක මට වැඩ කරන්න ලැබිලා තියෙනවා. ඒ ගැන හිතනකොට මට මගේ ගැන පුංචි නිහතමානී ආඩම්බරයක් තියෙනවා.
උපුටා ගැනීම අරුණ
