මේ දවස්වල මම සයිබර් දානයක් දුන්නා
බොරු දේවල්වලට කාලය මිඩංගු කරන්නේ නෑ...
මට වුවමනා වුණේ ලෝකය දකින්න. සුන්දර තැන් බලන්න, ඒවා විඳින්න තමයි මම පොඩි කාලයේ ඉඳලම සිහින දැක්කේ. වෙලාවකට මම අහලා තියෙන, ෆොටෝ එකකින් හරි දැකලා තියෙන ලෝකයේ ලස්සන තැන් මට හීනෙනුත් පේනවා. ඇත්තටම මේ සොබාදහමට මම ආදරෙයි. ඒ සොබාදහම විඳින එක තමයි මගේ සැනසීම සතුට. ඒ හැර රඟපාන්නවත් වෙන ජොබ් එකක් කරන්නවත් හීනයක් තිබ්බේ නෑ. හැබැයි අපිට අපේ හීනවලට යන්න නම් මුදල් අවශ්‍යයිනේ. ඒ නිසා මම වෘත්තීයමය වශයෙන් ගුවන් සේවිකාවක් වෙන්න තීරණය කළා. ඇත්තටම මගේ වෘත්තීය නිසා මගේ හීනවලට ළං වෙන එක හැම පැත්තකින්ම පහසු වුණා කියලා මම හිතනවා.
දිනිති වල්ගමගේ කියන නම තවදුරටත් ප්‍රේක්ෂකයන්ට නුහුරු නුපුරුදු නමක් නෙමෙයි. පහුගිය දවස්වල විවිධ චරිත සමග දිනිති පුංචි තිරයේදී ප්‍රේක්ෂකයන්ට මුණගැහුණා. ඒ වගේම ඇය මේ දිනවල සමාජ මාධ්‍ය තුළ පවා අතිශයින් ජනප්‍රිය චරිතයක්. පහුගිය දවස්වල ඇය සම්බන්ධයෙන් බොහෝ දෙනෙක් වැඩිපුර කතා කරන්න පටන් ගත්තා. විශේෂයෙන්ම සමාජ මාධ්‍යවල දිනිති ගැන විවිධ කතා පැතිරුණා. කොයි තරම් කටකතා පැතිරුණත් ඒවා තමන්ගේ ජීවිතයට අදාළ කර ගන්නේ නැතිව උත්සාහයෙන් කැපවීමෙන් තමන්ගේ ගමන යනවා කියලා තමයි දිනිති අපිට කිව්වේ.
ඇය වෘත්තීයමය වශයෙන් ගුවන් සේවිකාවක්. ඒ වගේම ජනප්‍රිය රංගන ශිල්පිනියක් වගේම නිවේදිකාවක්. කොයි තරම් කාර්යබහුල වුණත් පිනිපලස පිළිසඳර වෙනුවෙන් අපි දිනිතිට කළ ආරාධනාව ඇය බොහොම කැමැත්තෙන් පිළිගත්තා.
දිනිති කියන්නේ තරමක් කටකාර තරුණියක්. ඒ වගේම හැම වෙලාවකම හිනා වෙලා සැහැල්ලුවෙන් ඉන්න උත්සාහ කරන කෙනෙක්. සමාජ මාධ්‍යවල පැතිරෙන කටකතා ගැන වුණත් ඇය කතා කළේ බොහොම සැහැල්ලුවෙන්.
“මම මේ දවස්වල සයිබර් දානයක් දීලා තියෙන්නේ’’ සමාජ මාධ්‍යවල පැතිරෙන කතා ගැන අපි අහද්දි දිනිති පිළිතුරු දුන්නේ හිනාවෙලා.
“ඇත්තටම සෝෂල් මීඩියාවල ෂෙයාර්
වෙන දේවල් බලලා හිත රිදවා ගන්නවත් නාස්ති කරන්නවත් මට කාලයක් නැහැ. මම
මහන්සි වෙලා වැඩ කරන කෙනෙක්. ඒ නිසා බොරු දේවල්වලට මම කාලය වැය කරන්නේ නෑ.
මම කතා කරන විදිහ, අඳින පලඳින විදිහ අල්ලාගෙන ගොසිප් හදලා ඒවා ශෙයාර් කරලා
රීච් වැඩි කර ගන්න උත්සාහ කරන පිරිසට මම අනුකම්පා කරනවා. මට මඩ ගහලා හරි
කීයක් හරි හොයා ගන්නනේ එයාලා උත්සාහ කරන්නේ. ඒක මටත් පින් ලැබෙන වැඩක්නේ. ඒ
නිසා මම සයිබර් දානයක් දුන්නා කියලා හිත හදා ගන්නවා. සමහර වීඩියෝ
කමෙන්ට්ස් නම් හරිම නිර්මාණශීලීයි. මමත් ඒවා බලනවා. හැබැයි කිසිම වෙලාවක මම
කාගෙවත් හිත රිදවන්නේ, කාටවත් මඩ ගහන්නේ නෑ.”
මේ දවස්වල විකාශය වෙන රැල්ල වෙරළට ආදරෙයි ටෙලි නාට්‍යය තුළින් දිනිතිගේ රංගනයක් දැක බලා ගන්න පුළුවන්. තවත් ටෙලි නාට්‍ය සහ චිත්‍රපට කිහිපයකටම ආරාධනා ලැබිලා තිබුණත් රටේ පවතින අයහපත් වාතාවරණය නිසා ඒ නිර්මාණවල රූගතකිරීම් ප්‍රමාද වෙලා කියලත් දිනිති අපිට කිව්වා. කොහොම වුණත් ඇය රංගනයෙන් දායක වන නිර්මාණ කිහිපයක්ම ඉදිරියේදී විකාශය වීමට නියමිතව තියෙනවා.
දිනිති රංගනයට ප්‍රවේශ වෙන්නේ. අශෝක හඳගමගේ ගේ අක්ෂරය චිත්‍රපටය රඟපෑම තුළින්. ඉන් අනතුරුව වැඩිදුර අධ්‍යාපනය සඳහා දිනිති විදේශගත වෙනවා. අධ්‍යාපනය කටයුතු අවසන් වීමෙන් පසුව ඇයට ගුවන් සේවිකාවක් ලෙසින් ශ්‍රී ලංකන් ගුවන් සේවයේ රැකියාව ආරම්භ කරනවා. ඒ අතරතුර ඇයට නැවතත් රංගනය සඳහා ආරාධනා ලැබෙන්න පටන් ගන්නවා.
” ශ්‍රී ලංකන් එයාර් ලයින් එකට ජොයින් වෙලා වැඩ ටික කරගෙන ඉද්දී චාමර සමරවික්‍රම අයියා මට කෝල් කළා. නිර්මාණ කිහිපයකට ආරාධනා ලැබුණත් මම එක අවස්ථාවක්වත් ලබා ගත්තේ නැහැ. ඔය අතරතුර මට ‘හාරකෝටිය’ ටෙලි නාට්‍යයේ රඟපාන්න ආරාධනාවක් ලැබුණා. සද්ධාමංගල මහත්මයාගේ තිර රචනයක් වන ‘හාරකෝටිය’ ශිවගුරුනාදන් මහත්මයාගේ අධ්‍යක්ෂණයක්. සාරංග, සුරාජ් මාපා, සෙනාලි ෆොන්සේකා වැනි දක්ෂ රංගන ශිල්පීන් ශිල්පිනියන් හාර කෝටියට සම්බන්ධ වෙනවා කියලා දැනගත්තාම ඒ නිර්මාණයට සම්බන්ධ වෙන්න කැමැත්තක් ඇති වුණා. ඒ නිසා මම ඒ අවස්ථාව ලබා ගත්තා. එදා පටන් ගත්ත ගමන තමයි මේ විදියට එන්න ලැබුණේ.”
සිල්ලර සමනල්ලු, No parking, කොළඹ ඉතාලිය, කෝටිපතියෝ, හිරු ඇවිදින් ෂැඩෝ, Black town story වැනි ටෙලි නාට්‍යවලට ඇය රංගනයෙන් දායක වුණා. දිනිති රඟපෑමෙන් සම්බන්ධ වූ ආශාවරී සිනමා නිර්මාණය පසුගිය දවස්වල තිරගත වුණා. ආශාවරී චිත්‍රපටයේ දිනිති රඟපෑ චරිතයට ඉහළ ප්‍රතිචාර ලැබෙනවා කියලාත් දිනිති සිහිපත් කළා. රංගන ශිල්පිනියක් ලෙස වගේම නිවේදිකාවක් ලෙසත් දිනිති කටයුතු කළා. වොයිස් වේදිකාවෙන් ඉවත් වීම සම්බන්ධයෙන් පවා පසුගිය දවස්වල විවිධ මතවාද නිර්මාණය වෙලා තිබුණා. රංගනයට, නිවේදනයට අමතරව නිරූපණය සහ ගායනය හරහාත් අපිට දිනිතිගේ දස්කම් දැකබලා ගන්න හැකියාව තියනවා.
කොහොම වුණත් ජනප්‍රිය රංගන ශිල්පී සංගීත් සතරසිංහ එක්ක එකතු වෙලා පහුගිය දවසක දිනිති හරි අපූරු වැඩක් කරලා තිබුණා. බඩගින්නේ ඉන්න සතුන්ට කෑමවේලක් දෙනවා කියන එකත් ඇත්තටම මේ වෙලාවේ දුෂ්කර දෙයක්. ඒ වගේ දුෂ්කර වෙලාවක සතුන්ට කෑම දුන් සිදුවීම පවා අරගෙන ඇතැම් පිරිස් දිනිතිට දෝෂාරෝපණය කරලා තිබුණා. නමුත් ඇය ගැන දන්න හඳුනන බොහෝ දෙනෙක් ඇයගේ ක්‍රියාවන් අදටත් අගය කරනවා.
“මම සාමාන්‍යයෙන් ලෝකෙට පේන්න පින් කරන්නේ නෑ. මගේ හිතට එකඟව තමයි තව කෙනෙක්ට උදව් කරන්නේ. මගේ අතට සල්ලි එන්න පටන් ගත්ත දවසේ ඉඳලාම මම එක එක අයට උදව් කරලා තියෙනවා. අදටත් හැම මාසෙකම දුප්පත් අහිංසක පවුලකට මම උදව් කරනවා. ඒත් මම මිනිහෙක්ට උදව්වක්වත් කරන්නේ නැති ආඩම්බර කෙල්ලෙක් කියලා දකින පිරිසක් ඉන්නවා. ඒ නිසා තමයි අපි කරන සමහර චැරිටි ප්‍රෝග්‍රෑම් සෝෂල් මීඩියා දාන්නේ. ඒවා දකින තව පිරිසක් රැල්ලට හරි තව කාට හරි උදව් කරනවා නම් ඒකත් ලොකු පිනක්.”
ඇත්තටම දිනිතිට ජනප්‍රියත්වය වෙනුවෙන් අමුතුවෙන් මහන්සි වෙන්න දෙයක් නැහැ. මේ වෙද්දිත් ඇයට ජනප්‍රියත්වය වගේම සමාජය තුළින් ලැබිය යුතු වටිනාකම් ලැබිලා අවසානයි. රැල්ලක් විදියට හරි හොඳ දෙයක් වෙනවා නම් එතැන වටිනාකම වැඩියි කියලා දිනිති අපිට කිව්වා. දිනිති ගැන කතා මවන, ගොසිප් හදන බොහෝ දෙනෙක් ඇයව මුණ ගැහිලා වචනයක්වත් කතා කරලා තියෙන පුද්ගලයන් නෙමෙයි, ඇයව බොහොම හොඳින් හඳුනන අයව තේරුම් ගත් පිරිස ලබා දෙන ආදරයට ඇයත් ඒ වගේම ආදරෙයි කියලාත් දිනිති මතක් කළා.
ආදරය ගැන දිනිතිට තිබුණේ අපූරු කියැවීමක්. නිදහස විශ්වාසය සෙනෙහස කියන හැමදේම එකතු වුණාම තමයි ආදරේ ලස්සන වෙන්නේ. ඒ නිසා හැම වෙලාවකම එකිනෙකා සමග ආදරයෙන් ජීවත් වෙන්න. එකිනෙකා සමග ආදරය බෙදාගන්න කියන ආදරණීය පණිවුඩයත් සමග දිනිති පිනිපලස පිළිසඳරට සමු දුන්නා.
“ආදරය කියන්නේ හරි සුන්දර දෙයක්. ඇත්තටම ආදරේ කියන්නේ විඳින්න තියෙන දෙයක් වුණත් අද සමාජයේ බොහෝ දෙනෙක් ආදරය විඳවනවා. ඒකට හේතුව ආදරයේදී අපි ආත්මාර්ථකාමී වීම කියලා මම හිතනවා. ආදරය හැමතිස්සෙම බෙදා ගත යුතු දෙයක්. බදාගෙන ආදරය කළාම ඉතිරි වෙන්නේ දුකක්. ආදරේදි ආත්මාර්ථකාමී වීම සාමාන්‍ය දෙයක් කියලා කෙනෙක්ට හිතෙන්න පුළුවන්. නමුත් සමහරු ආත්මාර්ථකාමීත්වයේ අන්තෙටම යනවා. එතකොට ආදරේ ලස්සන දකින්න බැහැ. ඒ නිසා කොන්දේසි විරහිතව හැම කෙනෙක්ටම ආදරය කරන්න. අනෙක් කෙනාගේ නිදහසට ගරු කරන්න. එහෙම වුණොත් මේ ලෝකය මීටත් වඩා ලස්සන වේවි.”
නිරෝෂා වාසලඋපුටා ගැනීම අරුණ
