මම අඳින ඇඳුම් තෝරන්නේ එයා

දෙවෙනි ඉනිමෙන් බොහෝ රසික පිරිසක් දිනාගෙන ‘පාවෙලා වලාකුළේ’ ටෙලි නාට්‍යයෙන් රසික අවධානයට පාත්‍ර වූ නදුනි මේ දිනවල ‘ඉස්කොලේ’ ටෙලි නාට්‍යයේ පාසල් ගුරුවරියක ලෙස කාගේත් හොඳ හිත දිනාගත් යොවුන් පරපුරේ කලාකාරිනියක්. මේ දිනවල ඇය ‘දියණි’ ටෙලි නාට්‍යයෙන් ඔබේ ආලින්දයට පැමිණෙනවා.

නදුනි ඔබත් රංගනයට එන්නෙ අවුරුදු කුමරියක් වෙලාද?නැහැ. මගේ මුල්ම බලාපොරොත්තුව තිබුණෙ ගුවන් සේවිකාවක් වෙන්නයි. මම ඉගෙන ගත්තෙත් ගුවන් සේවිකාවක් වෙන්න හිතාගෙන. ඒත් අතරමගදි දෛවය මාව කලාව වෙත යොමුකළා.

ජනප්‍රිය, යොවුන් නළුවකුගේ ආදරණීය බිරිඳ වන්නේ කලාවට ආවට පස්සේද?අපි දෙන්නම කලාවට සම්බන්ධ වෙන්න පෙරයි හමුවුණේ. ගායනා තරගයකට ඉදිරිපත් වෙලා ඒකට සූදානම් වෙන්න වොයිස් ට්‍රේනින් පන්තියකට ගිය අවස්ථාවකදී තමයි අපි දෙන්නා හමුවුණේ. එතැනදි තමයි අපේ ආදරේ පටන් ගත්​තේ. අවුරුදු හතරක ප්‍රේම සම්බන්ධයක ප්‍රතිඵලයක් විදිහට තමයි 2019 අවුරුද්දේ විවාහ වුණේ.

දිනූෂ – නදුනි ආදර කතාවට බාධා ආවෙ නැද්ද?ඒ ගැන නම් හරිම සතුටුයි. අපේ ආදරයට කාගෙන්වත් බාධා ආවෙ නැහැ. හැබැයි ආදරය පටන් අරන් අවුරුදු 2ක් විතර ගෙවල්වලට රහසින් ප්‍රේම සම්බන්ධය පවත්වගෙන ගියා. ඊට පස්සෙ අපි ගෙවල්වලට කිව්වම අපි දෙන්නගෙම ගෙවල්වලින් කැමැත්ත ලැබුණා.

තවමත් පදිංචිය ගමේද?අපි දෙන්නගේම ගම නුවර. විවාහ වුණාට පස්සෙත් කාලයක් යනකම් පදිංචි වෙලා හිටියේ නුවරම තමයි. ‘දෙවෙනි ඉනිම, පාවෙලා වලාකුළේ’ ටෙලි නාට්‍යවල වැඩ කරද්දිත් අපි නුවර ඉඳලාම ෂූටින්වලට ආවා. අපේ පහසුව ගැන හිතලා දැන් අපි බොරලැස්ගමුවේ පදිංචි වෙලා ඉන්නවා.

බිරිඳක් ලෙස නදුනි ගත කරන ජීවිතය කොයි වගේද?ගෘහණියක් විදිහට ගෙදර වැඩ කරන්න, උයන පිහන දේවල් කරන්න මම ගොඩක් කැමතියි. අපි දෙන්නට විවේකයක් ලැබෙන හැම වෙලාවෙම මම ගෙදර කෑම හදනවා. අපි දෙන්නා ගොඩක්ම කැමති ගෙදරට වෙලා නිදහසේ ඉන්නයි.

සැබෑ දිවියේදි වගේම රංගනයේදිත් දිනූෂට පෙම් කරනවාද?‘පාවෙලා වලාකුළේ’ ටෙලි නාට්‍යයේ මම දිනූෂගේ පෙම්වතිය විදිහට රඟපෑවා. ඊට පස්සෙ නම් අපි පෙම්වතුන් ලෙස රඟපෑවේ නැහැ. දෙන්නටම එකම ටෙලි නාට්‍යයට දායක වෙන්න ලැබුණත් පෙම්වතුන්ගේ චරිතය නම් දෙන්නටම ලැබෙන්නේ නැහැ. ඒත් මම කැමතියි අපි දෙන්නටම එකම නිර්මාණයක රඟපාන්න ලැබෙනවට. එතකොට අපි දෙන්නටම එකට ගත කරන්න අවස්ථාව ලැබෙන නිසා.

දිනූෂගෙන් ගෙදර වැඩවලට ඔබට සහයෝගයක් ලැබෙනවද?එයා උදව් කරන්නේ එයාට හිතුණොත් විතරයි. නැතිනම් පාඩුවේ ඉන්නවා.

නදුනි චරිත තොරගන්නේ දිනුෂගේ අනුමැතිය ඇතිවද?නැහැ. ඒ ගැන අපි අතර ලොකු කතාවක් නැහැ. මට ගැලපෙන දේවල් මම කරනවා. හැබැයි මම අඳින ඇඳුම් පැළඳුම් ගැන නම් එයා ලොකු අවධානයක් දක්වනවා. මම ගොඩක් ෂොපින් යන කෙනෙක්. එයා එක්කම ෂොපින් ගිහින් ඇඳුම් ඇඳලා පෙන්නලා තමයි මම ඇඳුම් තෝරගන්නේ.

නදුනිගේ ගායිකාවක් වීමේ බලාපොරොත්තුව දැන් නැතිවෙලාද?අපි දෙන්නම සංගීතයට ආසයි. කොවිඩ් එන්න කලින් අපි දෙන්නම සංදර්ශනවලට සහභාගි වුණා. මේ දවස්වල නම් සංදර්ශන නැහැ. ඒත් ඉදිරියේදී විදේශයන්හි පැවැත්වෙන සංදර්ශන කිහිපයකට සහභාගි වෙන්න බලාපොරොත්තු වෙනවා.

මේ දිනවල කාර්ය බහුල වගේම රසික ප්‍රතිචාරත් ඉහළයි නේද?මේ දවස්වල ‘එන කවන්ටර් ටූ’ සහ ‘දියණී’ ටෙලි නාට්‍යවලට අමතරව තවත් ටෙලි චිත්‍රපටයකට දායක වෙන නිසා ටිකක් කාර්ය බහුලයි. ‘ඉස්කෝලෙ’ ටෙලි නාට්‍යයේ ගුරුවරියගේ චරිතය නිසා මාව ගොඩක් අය හඳුනනවා. ඊට අමතරව ‘දියණි’ ටෙලි නාට්‍යයේ ද්විත්ව චරිත නිරූපණයටත් හොඳ ප්‍රතිචාර ලැබෙනවා.

ධම්මිකා සුරංජි පතිරණඋපුටා ගැනීම අරුණ