අඩනිරුවත් චරිත හැමෝටම රඟපාන්න බැහැ! කොටට අඳිනවා කියන්නේ අමුතු දෙයක්ද?
- සමහරු වැඩි කැමැත්තක් නැහැ…
- මට කියලා විශේෂයක් කරන්නේ නෑ…
‘දූවිලි අහසේ’ පියාසර කරමින් ගුවන් සේවිකාවක් ලෙස කටයුතු කරන සුන්දර හැඩකාරියක් තමයි පියුමාලි පාලමකුඹුර. ඇය කලාවට පිවිසෙන්නේ ‘දූවිලි අහස’ ටෙලිනාට්‍ය තුළින්. ඉන්පසු ටෙලිනාට්‍ය රැසක චරිත නිරූපණය කරපු ඇය මේ දවස්වල ‘ෂැඩෝ’ ටෙලිනාට්‍යයේද ‘නුරි’ලෙස රංගනයෙන් දායක වෙනවා. ඉතින් ඇගේ මේ රංගන චාරිකාව ගැන අකුරු කිරීමට අපි පියුමාලිට කතා කළා…
පියුමාලි ඉතින් කොහොමද මේ දවස්වල වැඩකටයුතු..?සුපුරුදු පරිදි හෙමීට කරගෙන යනවා.
මේ දවස්වල ඔබ වෙනස්ම රංගනයකින් ‘නුරි’ ලෙස අපට සමීපවෙනවා. කොහොමද එහි වැඩකටයුතු..?‘නුරි’ – ‘ෂැඩෝ’ ටෙලිනාට්‍යයේ රූගත කිරීම් එක්ක තමයි මේ දවස්වල කාලය ගතකරන්නේ. සාමාන්‍යයෙන් එදිනෙදා දකින චරිතවලට වඩා වෙනස් චරිතයක් තමයි ‘නුරි’ චරිතය.
ඒ වෙනස ගොඩාක් දැණුණේ ‘නුරි’ කරන විලාසිතාවලින් නේද..?ඔව්… ‘ෂැඩෝ’ ටෙලිනාට්‍ය වෙනස්ම මාදිලියේ කතාවක් නිසා අපිට කොටට අඳින්න සිදුවුණා. ඉතින් ‘ෂැඩෝ’ ටෙලිනාට්‍ය කණ්ඩායමට උපරිම නිදහස දුන්නා අපේ ඇඳුම් විලාසිතාවට.
එහෙම කොටට ඇඳලා රඟපානකොට ප්‍රේක්‍ෂකයන්ගේ වැඩි ආකර්ෂණයක් ඇති නේද..?‘ෂැඩෝ’ ටෙලිනාට්‍ය ගොඩදෙනෙක් නරඹනවා. ඒ නිසාම හොඳ ප්‍රතිචාර තියෙනවා. හැබැයි ඉතින් ඔය අතර සංස්කෘතිය පැත්තෙන් බලලා කතා කරන පිරිසකුත් ඉන්නවනේ. ඒ අය වැඩි කැමැත්තක් නැහැ එහෙම අඳිනවට. සාමූහික පැත්තෙන් බැලුවොත් ගොඩදෙනෙක් එහෙම වරදක් කියන්නේ නැහැ. මොකද වර්තමාන සමාජයේ කොටට අඳිනවා කියන එක අමුතු දෙයක් නොවන නිසා.
ඔබ හිටිහැටියේම ‘දෙවනි ඉණිම’ ටෙලිනාට්‍යයෙන් ඉවත් වුණේ ඇයි..?අදටත් මාව ගොඩදෙනෙක් අඳුරන්නේ ‘දෙවනි ඉණිමේ – ටිනා’ ලෙසට තමයි. සමහරු අහනවා ඇයි මම දැන් නැත්තේ, ඉදිරියේදී මොකද වෙන්නේ කියලා විවිධ ප්‍රශ්න අහනවා. ඇත්තටම මම ‘දෙවනි ඉණිමෙන්’ ඉවත් වුණේ මම ගුවන් සේවිකාවක් ලෙසට කටයුතු කරන නිසා. රාජකාරි කටයුතු සඳහා කාලය කළමනාකරණය කරගැනීමට අපහසු නිසා. මම සියලුමදෙනා සමග සුහදව කතාබහ කරලා ටෙලිනාට්‍යයෙන් ඉවත් වුණා.
පියුමාලි ඉදිරියේදී අඩනිරුවත් චරිත එහෙම රඟපෑමට කැමැත්තෙන්ද ඉන්නේ..?එවැනි චරිත රඟපාන අයට මම දොස් කියන්නේ නැහැ. එහෙම චරිත හැමෝටම රඟපාන්න බැහැ. ඉතින් එවැනි චරිතයක් මට රඟපාන්න අවස්ථාවක් ලැබුණොත් මම රඟපාන්නේ නැතිවෙයි. මොකද එවැනි චරිතයකට මට සාධාරණයක් කරන්න අපහසු නිසා.
ඔබේ සැමියා ජනප්‍රිය ටෙලිනාට්‍ය අධ්‍යක්‍ෂවරයෙක්. ඔහු සමග වැඩ කරද්දි ඔබට විශේෂත්වයක් දක්වනව ඇති?නාලක විතානගේ තමයි මගේ සැමියා. ඔහු තමයි ‘ෂැඩෝ’ ටෙලිනාට්‍ය අධ්‍යක්‍ෂණය කරන්නේ. ඇත්තටම ඔහු සුන්දර හදවතක් තියෙන කෙනෙක්. ඔහු සමග නිර්මාණයේදී පවා වැඩ කරන්න හරිම පහසුවක් දැනෙනවා. ඔහු මට කියලා විශේෂයක් කරන්නේ නැහැ. ටෙලිනාට්‍යයේ වැඩ කරන සියලුමදෙනාට උපරිම සහායක් දෙනවා. ඒ වගේම තමයි සමහර අවස්ථාවලදී ඔහු මාව දිරිගන්වන්න උත්සාහ කරමින් මගේ සෙවණැල්ල වගේ මගේ ළඟින් ඉන්න එකම මට ලොකු ශක්තියක්.
කුඩා කාලයේ ඉඳලම තිබුණු ආශාවක්ද මේ ක්‍ෂේත්‍රයට සම්බන්ධ වෙන්න..?එහෙම ලොකු බලාපොරොත්තුවක් තිබුණේ නැහැ. අවස්ථාවක් ලැබුණොත් කරනවා කියලා හිතාගෙන තමයි හිටියේ. හැබැයි දැන්නම් බලාපොරොත්තුවක් තියෙනවා රාජකාරි කටයුතුවලට බාධාවක් නොවන විදියට කරන්න.
රැකියාව එක්ක රංගන කටයුතු කරගෙන යෑමට පුළුවන්ද..?එහෙම ප්‍රශ්නයක් නැහැ. ආයතනයේ නීති-රීතිවලට අනුව වැඩකරගෙන යනවා. ආයතනයෙන් පවා ලොකු සහායක් ලැබෙනවා.
මේ වන විට රටවල් කීයකට විතර ගිහින් තියෙනවද..?හැම රටකටම වගේ ගිහින් සුන්දර තැන් බලලා තියෙනවා.
හිතපු තරම් සුන්දරද කලාව..?හැම දෙයක්ම හොඳ විදියට දකිනකොට කිසිම ප්‍රශ්නයක් නැහැ. ප්‍රශ්න නැතුවාමත් නෙවෙයි. හැබැයි ඒ සියල්ලටම සිනහමුවින් මුහුණ දුන්නාම සුන්දර කලාවක් ලෙසට දකින්න පුළුවන්.
වසන්ත විතාරණගේඋපුටා ගැනීම මව්රට
