මං කරන්නේ මේන් රෝල් එක.. යොහානි ලෝකෙම අල්ලද්දි ටාෂියා පාකිස්තානේ වැඩ අල්ලයි…
- පුදුමාකාර සතුටකින් ඉන්නේ…
මැණිකේ ගීතයෙන් ලොවක් වසඟකළ යොහානි ද සිල්වා ගෙන් පසුව තවත් සුබ ආරංචියක් අපිට මේ දවස්වල අහන්නට ලැබෙනවා. ඒ නව පරපුරේ දක්‍ෂ රංග ශිල්පිනියක් වන ටාෂියා කාලිදාසට පාකිස්තානයේ ටෙලිනාට්‍යයක ප්‍රධාන චරිතයක් නිරූපණය කිරීමට අවස්ථාව ලැබීමත් එක්ක. ඒ සියලුම වැඩකටයුතු අවසන් කර ඇය පසුගියදා ලංකාවට පැමිණියා. ඉතින් ඇයගේ නාමයත් ජාත්‍යන්තරයට එකතු වෙන උණුසුමත් එක්කම ඇයගේ ඉදිරි ගමනට සුබපැතුම් එකතු කරමින් ටාෂි සමග ඒ නිර්මාණය ගැන වැඩි විස්තර අපි කතා කළා…
ටාෂි ජාත්‍යන්තරයට යන්න සූදානමින් සිටින බව ආරංචියක් පැතිරෙනවා. ඇත්තද මේ කතාව?සමහරවිට එහෙම වෙන්නත් පුළුවන්.
ඉතින් අපටත් කියන්න මේ පැතිරෙන කතාවේ සුලමුල?මම මාස තුනක් විතර පාකිස්තානයේ හිටියේ. එහෙ මිනි සීරියස් ටෙලිනාට්‍යයක ප්‍රධාන චරිතයක් රඟපෑමට මට අවස්ථාව ලැබුණා. ඒ වැඩකටයුතු අවසන් කරලා පසුගිය දහඅටවැනිදා තමයි මම ලංකාවට ආවේ. ඒ ඇවිල්ලා ඒ ගැන මම ඉස්සෙල්ලාම විස්තර ටික දෙන්නෙත් ‘මව්රට’ ජාතික පුවත්පතට. සතුටුයි මට ඒ ගැන කියන්න අවස්ථාව ලබාදෙන එකට.
ඔබට කොහොමද පාකිස්තානයේ ටෙලිනාට්‍යයකට සම්බන්ධ වෙන්න අවස්ථාව ලැබුණේ?ශ්‍රී ලංකා යුද හමුදාවෙන් තමයි මට ආරාධනාවක් ලැබුණේ මෙහෙම ටෙලිනාට්‍යයක් කරනවා එයට අයැදුම් කරන්න කියලා. ඔය විදියට ඉතින් මම විස්තර දැනගෙන අයැදුම්පතක් දැම්මා. පාකිස්තානයේ ටෙලිනාට්‍ය අධ්‍යක්‍ෂ නබිත් ඩෙක් පසුව මට කතා කළා. පසුව තමයි මාව ඒ චරිතයට තෝරා ගත්තේ (Sinf-e-Aahan) අයෝම ගැහැනිය එහි අදහස. ඒ නිර්මාණයේ පුහුණුවන යුද සෙබළියකගේ චරිතයක් තමයි මම රඟපාන්නේ. ලංකාවෙන් ඒ ටෙලිනාට්‍යයේ රඟපාන්නේ මම විතරයි.
ඉතින් ජාත්‍යන්තරයේ ජයගත්ත ශිල්පීන් සමග එකට රඟපාන්න ලැබීම ගැන මොකද හිතෙන්නේ?ඒ ගැන නම් කියන්න වචන නැහැ. පුදුමාකාර සතුටක් තියෙන්නේ.
‘කොවිඞ්’ ප්‍රශ්නයත් එක්ක අවදානමක් තිබුණේ නැද්ද ඒ ප්‍රදේශයේ?පාකිස්තානයේ ඇබටාක්ඩි නගරයේ තමයි සම්පූර්ණ රූගත කිරීම සිදුකළේ. හමුදා කඳවුරක් ඇතුළේ. ඒ නගරයේ ‘කොවිඞ්’ ප්‍රශ්න නැහැ. අඩු තරමේ මුඛ ආවරණයක්වත් දාන්නේ නැහැ. මට තිබුණු බය ‘කොවිඞ්’ ප්‍රශ්නත් එක්ක ලංකාවෙන් යන්න පුළුවන් වෙයිද කියලා තමයි හිතහිතා හිටියේ.
විදේශීය ශිල්පීන් සමග ගත්ත අත්දැකීම කොයි වගේද?ලංකාවට වඩා ඉතින් කලා නිර්මාණ අතරින් තවත් දියුණු රටක්. ඒ නිසා එහිදී නිර්මාණ කරන විදිය අමුතුවෙන් කියන්න ඕනෙ නැහැ. මම එහෙට ගියාට පස්සේ පුහුණුවක් දුන්නා පැරිෂුට්වල යන්න, වෙඩි තියන්න එහෙම.
භාෂා ප්‍රශ්නයත් මතුවෙන්න ඇති නේද ඔබට?එහෙම ප්‍රශ්නයක් නම් තිබුණා. නමුත් මාස ගානක් ඒ ශිල්පීන් සමග කටයුතු කරපු නිසා මම භාෂාව පවා පුරුදු පුහුණු වුණා. පස්සේ ඉතින් ඔවුන් කියන විදියට මට සාර්ථක රංගනයක් නිදහසේ කරන්න පුළුවන් වුණා.
ලංකාවෙ ප්‍රේක්‍ෂකයන්ටත් මෙය දැකබලා ගන්න අවස්ථාව උදාවෙයිද?ඔව්… ඒ අය පවසපු විදියට ඉදිරියේදී ලංකාවෙත් ඒ නිර්මාණය සියලුම ජනතාවට නැරැඹීමට ඉඩකඩ ලැබේවි.
පාකිස්තානයේ ටෙලිනාට්‍ය නිසාමද ඔබ අතරමගදී ‘චලෝ’ ටෙලිනාට්‍යයෙන් ඉවත් වුණේ?කෙටියෙන්ම පැවැසුවොත් අතරමගදී මට ‘චලෝ’ ටෙලිනාට්‍යයෙන් ඉවත් වෙන්න සිද්ධ වුණේ ඒ නිසා තමයි.
වසන්ත විතාරණගේඋපුටා ගැනීම මව්රට
