කොළඹින් ඉතාලියට පැන්න නැට්ටුක්කාරී…

• හිතපු තරම් ලේසි වුණේ නෑ…

• දවසක මගේම දෙයක් කරනවා…

කොළොම්පුරවරයෙන් හැදී වැඩී හැඩවන මේ නැට්ටුක්කාරි දැන් රංගන ශිල්පිනියක් බවට පත්වෙලා. මේ දිනවල විකාශය වන ටෙලිනාට්‍ය කිහිපයක සුවිශේෂී චරිත නිරූපණය කරමින් ඔබ හමුවට එන ඇය කිත්මි මුතුමැණිකේ. ඇයගේ රංගන ජීවිතයේ මතක සැමරුම් ගැන ‘මව්රට’ අපිත් එක්ක කතා කළා…

මේ දවස්වල ඔබ ඉතාලියට පනින්න සූදානම් වෙනවා නේද?තවම කොළඹ ඉන්නේ. එහෙම අදහසක් නැහැ. ‘කොළඹ ඉතාලිය’ ටෙලිනාට්‍යයේ ‘තාරුකි’ ප්‍රශ්න ගොඩක අතරමං වෙලා ගෙදරට කොටුවෙලා ඉන්නේ. මමත් කැමැතියි වටපිටාව දකිමින් ලස්සන ජීවිතයක් ගතකරන්න. ‘තාරුකි’ වගේ අද සමාජයේ ඕනෑ තරම් ගැහැනු ළමයි ඇති. ඉතින් අවසානයේ ‘තාරුකි’ගේ හැම සිහිනයක්ම බොඳවෙනවා.

අපි මේ දකින්නේ පළමු රංගනයද ‘තාරුකි’ ලෙසට?‘සිහින ගෙනෙන කුමරි’ ටෙලිනාට්‍යයෙත් මම රඟපානවා. හැබැයි මගේ රඟපෑම මුලින්ම දැකගන්නට ලැබුණේ ‘කොළඹ ඉතාලිය’ ටෙලිනාට්‍ය තුළින්.

ඔබට රඟපාන්න හිතුණේ ඇයි?මට මේ අවස්ථාව ලැබුණේ අහම්බෙන්. මම නර්තන ශිල්පිනියක් ලෙසට තමයි මුලින්ම කටයුතු කළේ. චන්දන වික්‍රමසිංහ රංගායතනයට සම්බන්ධ වුණාට පස්සේ තමයි මට රංගනයට වගේම නර්තනයට ආශාවක් ඇති වුණේ. උපුලි කළුපහන, චන්න විජේවර්ධන, චන්දන වික්‍රමසිංහගෙ ගුරුවරුන් යටතේ මම නැටුම් හැදෑරුවා. පස්සේ මට ප්‍රසංග වේදිකාවේ නර්තනය හදාරන්න අවස්ථාව ලැබුණා.

ටෙලිනාට්‍ය ක්‍ෂේත්‍රයට සම්බන්ධ වෙන්න කලින් කිත්මි සිනමාවට සම්බන්ධ වුණා නේද?පත්තිනි, යශෝධරා, අලි කතාව, මහරජ අජාසත් චිත්‍රපටවලට නර්තනයෙන් සම්බන්ධ වුණා. චරිත නිරූපණය කළේ නැහැ. සිනමාවට සම්බන්ධ වෙන්නත් අදහසක් තියෙනවා.

ඔබ රංගනය පිළිබඳ හැදෑරීමක් කළාද?මට මේ විෂය ගැන ඉගෙනගන්න ලොකු වුවමනාවක් තිබුණා. ඉතින් නර්තනයෙන් මම ලබපු අත්දැකීම් එක්ක තවත් ඉස්සරහට යන්න හිතුවා. පස්සේ මම ප්‍රවීණ රංගන ශිල්පී මහේන්ද්‍ර පෙරේරාගේ රංග පාසලට සම්බන්ධ වුණා. ඔය කාලයේ තමයි මට රංගන වරම් හිමිවුණේ. චාලක රණසූරිය මහතාගේ මග පෙන්වීම යටතේ මට රඟපාන්න අවස්ථාව ලැබුණා. ඔය විදියට තමයි මම මේ ගමන ආවේ.

අහම්බෙන් හරි ඔබ දැන් කලා ශිල්පිනියක් බවට පත්වෙලා, ඒ සතුට ගැන කිව්වොත්?ගොඩාක් සතුටුයි. වෙනස්ම අත්දැකීමක්. රඟපාන එක පහසුයි කියලා තමයි හිතෙන්නේ. නමුත් කරලම බලන්න ඕනෑ ඒ වෘත්තිය කොයි වගේද කියලා. හිතන තරම් පහසු නැහැ රඟපෑම. හැබැයි හරිම සුන්දර නවාතැනක් මේ කලාව.

තාත්තාගේ විරෝධය මැද ආපු ගමනක් නේද මේ?තාත්තා නම් කැමැති වුණේම නැහැ මම රඟපානවට. අම්මා කලාවට ගොඩාක් කැමැතියි. ඉතින් අම්මාගෙන් ලැබුණු සහායත් එක්ක මට ගොඩාක් පහසු වුණා මේ ක්‍ෂේත්‍රය ගැන හොයමින් ඉදිරියට යන්න.

ඉදිරි සැලැසුම මේ තුළම රැඳෙන්නද?තව මගේ බලාපොරොත්තු තිබෙනවා. මම දැනට සෞන්දර්ය විශ්වවිලයේ ප්‍රථම වසරේ නර්තනය හදාරනවා. ඒ අතර හොඳ නිර්මාණවලින් මට ආරාධනා ලැබුණොත් තෝරාබේරාගෙන රඟපානවා.

වේදිකා නාට්‍යයක් නිර්මාණ කිරීමට සූදානමක් තියෙනවා නේද?ඔව්… දැනටමත් මම වේදිකා නාට්‍ය දෙකක් ලියලා ඉවරයි. මම රඟපාන්න එන්න කලින් වේදිකා නාට්‍ය නැරැඹීමට ලොකු ආශාවක් තිබුණා. ඉතින් මම හිතුවා දවසක මගේම නිර්මාණයක් කරනවා කියලා. ලබන වසරේ මගේම නිර්මාණයක් වේදිකාගත කරනවා. එයට මේ දවස්වල සූදානමින් ඉන්නේ.

කොළඹින් පටන්ගත්ත ගමන නැවැතත් කොළඹ තුළම නතර වුණා නේද?‘Once upon a time in la‍olombo’ මම සම්බන්ධ වුණු අලුත්ම ටෙලිනාට්‍ය මේ දවස්වල විකාශය වෙනවා. ඉදිරියේදී මේ ටෙලිනාට්‍යයේ ‘සරා’ නමින් දමිළ චරිතයක් නිරූපණය කරනවා. එය මට වෙනස්ම අත්දැකීමක් වුණා මම කරපු අනෙකුත් නිර්මාණවලට වඩා.

වසන්ත විතාරණගේමව් රට