ශලනි ප්‍රනාන්දුගෙන් ලොක්කි සහ ළිහිණි ගැන අහමු
කොහොම ද මේ දවස්වල ජීවිතේ?හොඳින් සතුටින් වගේ ම කාර්යබහුලව ජීවිතය ගෙවනවා.
කලා කටයුතුවල විස්තර කිව්වොත්?සුපුරුදු ලෙස දෙවැනි ඉනිමේ වැඩකටයුතු වගේ ම ලොක්කී ටෙලිනාට්‍යය රූගත කිරීම් මේ දිනවල සිදු කරනවා. ඊට අමතරව ටෙලි නාට්‍යවලින් බැහැරව යම් කලා කටයුතු කිහිපයකට ආරාධනා ලැබුණා. ඒවා තුළිනුත් ප්රේක්ෂකයන් අතරට ඒමට බලාපොරොත්තු වෙනවා.
මේ දවස්වල ප්රේක්ෂකයන් වැඩිපුර ම කතා කරන්නේ චූටි මැණිකෙ කියල ද? නැත්නම් ලොක්කි කියල ද?මේ දවස්වල නම් ලොක්කි කියලා යි බොහෝ දෙනෙක් ආමන්ත්‍රණය කරන්නේ.
බොහෝ කාලයක් චූටි මැණිකෙගෙ චරිතය කරලා ලොක්කිගේ චරිතයට අනුගත වෙන්න අසීරු වුණා ද?ඔව්. එය මට සැබැවින් ම අභියෝගයක් වුණා. නමුත් ලොක්කිහි අධ්‍යක්ෂ හර්ෂ උඩකන්දගෙන් ලැබුණු සහයෝගය මත චූටි මැණිකෙගෙ චරිතයෙන් මිදී ලොක්කිට වෙනස් හැඩයක් එක් කරන්න මට හැකියාව ලැබුණා. ඒ නිසා එකී අභියෝගය සාර්ථකව ජය ගත්තා කියා මං හිතනවා.
ඔබ කලා ක්‍ෂේත්‍රයට පිවිසෙන්නේ කොහොම ද?මම 2017 වසරේදී දෙරණ අවුරුදු කුමරිය කිරුළ දිනා ගැනීමට සමත් වුණා. එකී ජයග්‍රහණයෙන් අනතුරුව ලක්සිරි මහතාගේ ස්ක්‍රීන් ටෙස්ට් එකකට මුහුණ දී ළිහිණිගේ චරිතයට මාව තෝරා ගත්තා. කලා ක්‍ෂේත්‍රය තුළ මා මුලකුරු කියවන්නේ ඒ ආකාරයට යි.
බොහොමයක් රූ රැජිණන්ගේ රංගනයට පිවිසුණ ත් ඔවුන්ගේ ගමන එක් චරිතයකට පමණක් සීමා වෙනවා. ඔබගේ ගමන්මග ස්ථාවර කර ගැනීමට ඔබ ගත් ව්‍යායාමයන් විස්තර කළොත්?මං එයට විශේෂ ව්‍යායාමයක් දැරුවේ නැහැ. එවැනි අසාර්ථක වූවන් තුළ නොදුටු මා තුළ දුටු විශේෂත්වයක් අධ්‍යක්ෂවරුන්ගේ දෘෂ්ටියට ගෝචර වන්නට ඇති.
දීර්ඝ කාලීන ටෙලිනාට්‍යවලට සම්බන්ධ වන බොහොමයක් ප්‍රවීණයන් එකී චරිතවලින් ඉවත් වන්නේ එහි ගුණාත්මකභාවය පිළිබඳ ගැටලු ඇති නිසා යි. නවකයන්ට එකී ගැටලුව බලපාන්නේ නැද්ද?නැහැ. ප්‍රවීණයන් හා නවකයන් අතර පවතින පරස්පරතාව එය යි. නවකයන්ට ක්‍ෂේත්‍රය තුළ ස්ථාවර වීමට එවැනි තීන්දු තීරණවලට එළැඹෙන්න අපහසු යි.
මෙගා නාට්‍යවල තිර පිටපත් එවෙලෙහි ලැබීම තුළ චරිතයට සාධාරණයක් ඉටු කිරීමට අවකාශ අහිමි වෙනව ද?නැහැ. දීර්ඝ කාලීන ටෙලිනාට්‍යවල ස්වභාවය එය යි. එය රංගන ශිල්පියෙකුට හෝ රංගන ශිල්පිනියකට ලැබෙන අභියෝගයක්. එය සාර්ථකව ජය ගැනීමට රංගන ශිල්පියා දක්ෂ විය යුතු යි.
ඔබ ෆැෂන් කරන්නේ තෝරා බේරාගෙන යැයි කිව්වොත් මං නිවැරදි ද?ඔව්. එය සියයට සියයක් නිවැරදියි. මං fashion trends පසුපස එළවන්නේ නැහැ. යම් විලාසිතාවක් මම අනුගමනය කරන්නේ මට ගැළපෙනවා නම් විතරයි. සමහරක් ට්‍රෙන්ඩ්ස් කල් පැන ගියා ම එය මගේ ෆැෂන් එකක් වෙනවා. එය මං තීරණය කරන්නේ එක් එක් අවස්ථාවන්ට අදාළ විධියට වගේ ම ගැළපෙන විදිහට යි.
ගැමි පෙම්වතියගේ චරිතයට ශලිනි කොටු වෙලා කිව්වොත්?මගේ බාහිර ස්වරූපය අනුව ලැබෙන චරිත එයට බෙහෙවින් සමීප යි. නමුත් මං එකී කාණ්ඩය තුළ කොටු වෙලා නැහැ. music videos තුළින් මගේ වෙනස් ම ස්වරූපයන් දැකගන්න පුළුවන් වුණා. ග්‍රාමීය චරිත නිරූපණය කිරීමට මට අවස්ථාව ලැබුණ ත් එකී චරිත එකිනෙකට හාත්පසින් වෙනස්.
රංගනය හදාරා තිබෙනව ද? නැහැ. ඉදිරියේදී හැදෑරීමට බලාපොරොත්තු වෙනවා.
ප්‍රවීණයන්ගෙන් ලැබුණු දායකත්වය ගැන කිව්වොත්?ඔවුන්ගෙන් ලැබුණු දායකත්වය අතිවිශාලයි. දෙවැනි ඉනිම ටෙලි නාට්‍යයේ හිමාලි අක්කා වගේ ම ලොක්කිහි රඟපෑ ප්‍රවීණයන්ගෙන් ලැබුණු ආදරය වගේ ම මගපෙන්වීම තුළ මා ලැබූ අධ්‍යාපනය මෙතෙකැයි කියන්න අපහසු යි.
ඔබට මෙතෙක් රඟපෑමට නොලැබුණු, නමුත් රඟපෑමට කැමැති චරිතයක් තිබෙනවා ද? මං අභියෝග භාර ගන්න ගොඩක් කැමති කෙනෙක්. ඒ නිසා අභියෝගාත්මක චරිතයකට මුහුණ දෙන්න ආසාවෙන් බලාගෙන ඉන්නවා.
චරිතයක් තෝරා ගැනීමේදී ස්වයං වාරණයකට යටත් වෙනව ද?ඔව්. අනිවාර්යයෙන් ම. චරිතයක් භාර ගැනීමට පෙර එකී චරිත ස්වභාවය පිළිබඳව මං අධ්‍යයනය කරනවා. එකී චරිතය සඳහා භාවිත කරන ඇඳුම් පිළිබඳව ත් මං බෙහෙවින් සැලකිලිමත් වෙනවා. ඒ අනුව මට ගැළපෙන චරිතයක් නම් මම භාර ගන්නවා.
මේ දවස්වල චූටි මැණිකෙට ප්‍රේම ආරාධනා වැහි වැහැලා කියන්නේ ඇත්ත ද?ඔව්. ප්‍රේම ආරාධනා නම් ගොඩක් ලැබෙනවා. නමුත් ඒවා පිළිගන්නේ නැති නිසා ගැටලුවක් නැහැ.
ප්‍රේම ආරාධනා පිළිගන්නේ නැත්තේ දැනටමත් හිත කෙනකුට දීපු නිසා ද?එහෙමමත් නැහැ. (හිනාවෙමින්)
ඔබගේ අනාගත බලාපොරොත්තු මොනවා ද?මම වැඩිදුර අධ්‍යාපනය ලබන්නේ මෝස්තර නිරූපණ අංශයෙන්. එහි වැඩ කටයුතු වගේ ම හොඳ නිර්මාණ තුළින් කලාවේ දිගු කාලයක් රැඳී සිටින්නට බලපොරොත්තු වෙනවා.
උපුටා ගැනීම මව්බිම
