යොහානි.. ඔයා නම් නියමයි…
‘ඇගේ ස්වරය… මනමෝහනීයයි.., හඬන බිලිඳකු නැළවීමටත්… කෝමා තත්ත්වයට පත්වූවකුට නැවැත ජීවය දෙන්නටත් එය හොඳටම සෑහේය…’-ඉන්දියා ටුඬේ
බොලිවුඩයේ සුපිරි තරු ගැන රසවත් වංහුං සහ ඕපාදූප ලියන ‘හාට්’ ටැබ්ලොයිඞ් එකේ අන්තිම පිටුවේ, යොහානි දිලෝකා ද සිල්වා ගැන ලියන්නට ලැබීම සත්තකින්ම ආඩම්බරයකි. ටික්ටොක් හරහා පැමිණ, දාංගලේට වාගේ ඉඟසුඟ නළවා, කටේ තොලේ වදින, නොවදින තාලයට ‘Fun’ ටයිප් එකේ සින්දු කී, ප්‍රවීණ යැයි ලේබලයවත් වැදුණෙ නැති මේ රිලැක්ස් කෙල්ල කෙටි කාලයක් තුළ කළ හපන්කම පුදුමාකාර නොවේද..?
ඇත්තටම එය හරිම පුදුමාකාරය.., ඉන්දියාවේ ජාතික පුවත්පත්වල පවා සිරස්තල ඇගේ නම තවමත් සටහන් වන්නේ ඒ නිසාය..,‘ඉන්දියා ටුඬේ’ සඟරාවෙහි ඊයේ පෙරෙයිදාවක සඳහන්ව තිබුණේ පොළොව යට නිදන්නෙකු මිසක… ‘මැණිකේ මගේ හිතේ’ ගීතය ගැන නොදන්නා කෙනෙකු බොහෝ විට සොයා ගැනීමට අපහසු බවය. සුපිරි සමාජමය වටපිටාව තුළ මෙන්ම පොළොව මත දූවිල්ලෙහි ගමන් ගන්නා මධ්‍යම පන්තික සමාජය තුළද යොහානි ගැන කරන කතාබහ නිමක් නැත. ‘යොහානි’ කියනවාට වඩා කවුරුත් වාගේ ලෙහෙසියටද මන්දා…
‘අර… ‘මැණිකේ මගේ හිතේ’ කෙල්ල… මාරයි නේ, වාසනා පින තියෙන්නේ ඒකට තමා…’ මගතොටේ කවුරුත් වාගේ කියන ඒ වචන සෙට් එක සම්පූර්ණයෙන්ම ඇත්තය. එහෙම නැත්නම් ‘මැණිකේ මගේ හිතේ…’ ගීතයෙහි මුල් අයිතිය හිමි සතිෂාන් රත්නායක වෙත නොපැමිණි වරමක් යොහානි සොයා පැමිණෙන්නේ නැත.
සරල වශයෙන් කෙටිකර ලියනවා නම්, ‘මැණිකේ මගේ හිතේ’ ගීතය දැන් කාගෙත් මුවග රැව්දෙන ගීතයක් වී හමාරය.., ‘ඉන්දියා ටුඬේ’ නමින් ප්‍රචලිත රූපවාහිනී සේවාවක සඳහන්ව තිබුණේ නිවෙසක බාත්රූම් එකේ වාගෙම මුළුතැන්ගෙයිද, බලවතුන්ගේ මෙන්ම වැඩිහිටි පිරිමින්ගේ මුවින්ද එය උදේ හවස මිමිණෙන බවකි. මෙතැනදී කුඩා දරුවන් සහ යෞවන යෞවනියන් ගැන කුමකට පවසනවාද? ඒ තරමට ඔවුන් අතර ‘මැණිකේ මගේ හිතේ’ ගීතය විලාසිතාමය වෛරසයක් වී හමාර යැයි…’ යනුවෙන් එහි සටහන් වී තිබිණි.
ඉන්දියාව නම් අපේ අසල්වැසි රටය.., සුද්දන් අතරද යොහානිගේ ගීතයට මනාපය හිමිවීම අහම්බයක් නොවන්නේද. යුරෝපීය රටවල වීදිවල වයලීනයෙන් සහ සෙක්ෂපෝනයෙන්ද ‘මැණිකේ මගේ ගීතය…’ ඉතාම කන්කලු ආකාරයට වාදනය වෙයි.., වාදකයාගේ පය පාමුල තියෙන තොප්පියට මුදල් නෝට්ටුවක් දමන අතර, අසන්නන් සේම නරඹන්නන්ද එකී වාදනය සිය ජංගම දුරකතනයෙහි දසුන් සහිතවම පටිගත කරගන්නේ ආනන්දනීය හැඟීමෙනි..,වරක්… යම් කතිකාවකදී යොහානි කිසිවකු හා පවසා තිබුණේ, ඇගේ එකම සිහිනය ලක්‍ෂ සංඛ්‍යාත ප්‍රේක්‍ෂක පිරිසක් හමුවේ වේදිකාවක ගී ගැයීමය…’ යැයි කියාය.
යොහානිගේ ඒ සිහිනය සැබෑ වුණාද..?
පුදුමය කියන්නේ එය සැබෑ වීමට ආසන්නය. උතුරු ඉන්දියාවේ නගර දෙකක යොහානි සහභාගි වන සංගීත ප්‍රසංග දෙකක් සඳහා මහා පරිමාණයෙන් වේදිකා ඉදිවෙමින් පවතී.., ඒ වෙනුවෙන් යොහානි තබා ඇති ලංසුව සුළුපටු නැත… එය එක් ප්‍රසංගයක් සඳහා ඉන්දියානු රුපියල් කෝටි ගණනකි. මේ කිසිවක් ‘යොහානි’ හඹා ගිය දෑ නොව.., සිදුවූයේ නොසිතූ ලෙස සියල්ල ඈ සොයා ඒමය.
ඉදිරියේදී ඉන්දියාවේ තිරගත වීමට නියමිත ‘සිද්ධාත්’ චිත්‍රපටයේ තේමා ගීතය සඳහා වන කාන්තා නියෝජනය යොහානිය.., ‘සිද්ධාත්’ වෙනුවෙන් යොහානි ගයන ගීතයට මිලියන 194ක සබ්ක්‍රයිබ්ස් හිමි යූ-ටියුබ් චැනලය ලෙස නම් දරා ඇති Tseries ලේබලය යටතේ අනුග්‍රහය දැක්වේ..,
යොහානිටවත් හිතාගන්නට බැරි තරම් වූ නිධානයක් වැනි මේ දීමනාවන් ඇයට ලැබුණේ වාසනාවටද.., නැත්නම් ඇගේ හැකියාවටද..? හැකියාවට ඔය කී සියල්ල ලැබුණා නම් එවැනි දීමනාවන් ලබන්නට තව ගායක ගායිකාවන් කොතෙක් සිටින්නේද..?හුදෙක්ම මෙය යොහානි දිලෝකා ද සිල්වා ලද උතුම් වාසනා මහිමයකි. ඒ වාසනා මහිමය සමග රිදී සීනුවක් එහා මෙහා සෙලවෙන සරින් ඇසෙන ඇගේ හීනි ස්වරයෙහි අති දක්‍ෂ මෙහෙයවීමද මේ ලැබීම සඳහා එයට දායක වන්නට ඇත.
‘ඇගේ ස්වරය… මනමෝහනීයයි.., හඬන බිලිඳකු නැළවීමටත්… කෝමා තත්ත්වයට පත්වූවකුට නැවැත ජීවය දෙන්නටත් එය හොඳටම සෑහේය…’‘ඉන්දියා ටුඬේ’ හී යොහානි ගැන ලියැවුණු සටහනක් අවසන් වූයේ එලෙසිනි.
ඉන්දියාව ඇතුළු සමස්ත ලෝකය පුරා අන්තර්ජාලය හරහා එතරම් වූ අගයකට සහ වටිනාකමට මැදිව සිටින යොහානිට ශ්‍රී ලාංකේය ප්‍රේක්‍ෂකයන්ගේ චියර් එක හෝ ප්‍රතිචාර නිසි ලෙස ලැබුණාද..?‘නිසි ලෙස’ තබා එය කොයි ලෙසකින්වත් ලැබුණු වගක් පෙනෙන්නට නැත…’
යොහානිගේ සොඳුරු හපන්කම් ගැන මුහුණු පොතෙහි නිර්මාණය වූ පෝස්ටු වෙනුවෙන් සටහන්ව තිබූ ‘කොමෙන්ට්ස් ඉතාම අල්ප විය. ජාත්‍යන්තර තලයට ශ්‍රී ලාංකේය නම ගෙනයන්නට හිමිහිරි දායකත්වයක් දුන් මේ සරල කෙල්ල වෙනුවෙන් ‘සුබපැතුම් යොහානි’ කියා අකුරු කිහිපයක් ටයිප් කරන්නට සමහර සිංහලයන්ට අතපසු වූ හේතු කුමක්ද..?එය පැහැදිලි කුහකත්වයද..,
එහෙම නැතිනම් තවත් කෙනෙකුට යන්නට නොහැකි තැනකට ඈ පය තැබූ වාසනා මහිමයෙහි සතුට ඒ ඒ අයට දරාගන්නට බැරිව ගියාද..?උත්තරය ඇත්තේ, කිසිම වැදගැම්මකට නැති පෝස්ට්වලට පවා උඩ පැන පැන කොමෙන්ට් කළ… යොහානිගේ පෝස්ටුව තැකීමක් නොකර ඉහළට පාස්කර යැවූ කට්ටිය අතය..,හැබැයි.., අපි මෙහෙම කියමු..,
ෂෝට් බ්ලවුස් එකයි, ඉරුණු ඩෙනිමයි ඇන්දට… සෙල්ලක්කාර රිලැක්ස් සින්දුවකට උකුල නළවලා පැද්දුණාට… ‘යොහානි දිලෝකා ද සිල්වා’ මරු කෙල්ලෙකි..,ඉන්දියාව හොල්ලන්නට සමත් වූ ඇයට මෙසේ සුබපතමු..,‘යොහානි… ඔයා නම් නියමයි… ඔහොම යං…’
දමයන්ති රේණුකා ප්‍රනාන්දුඋපුටා ගැනීම මව් රට නිව්ස්
