ගැහැනියක් තනියම ඉන්නකොට මිනිස්සු එන්නේ වැරැදියට…
- ඒ අයට මම උත්තර දුන්න විදිය ඒ මිනිස්සුම දන්නවා…
- ජීවත් වෙන්න පොඩි ගානක් ලැබුණම ඇති…
ජීවිතය ගැටගහ ගන්න තමයි අපි කවුරුත් දඟලන්නේ. නමුත් ගැහැනියක් තනියම ජීවිතයක් ගැටගහගන්න දරන උත්සාහයත් එක්ක ඇයගේ ජීවිතයට ඇතිවන බාහිර බලපෑම් සමඟ ගෙවන ජීවිතය මොනවගේද කියා ඔබට අමුතුවෙන් කිවයුතු නැහැ. ඉතින් එලෙස ජීවිතයට එන අභියෝග ජයගනිමින් මුහුණ දෙන ජනප්‍රිය රංගන ශිල්පිනියක් තමයි මේධා ජයරත්න. ඇයගේ ජීවිතය සහ ඒ බලපෑම් කොයි වගේද කියා අපි ඇය සමග කතාබහ කළා.
මේ දවස්වල මේධාගේ කාලය ගෙවීයන්නේ කොයි විදියටද?
මේ දවස්වල ඉතින් මම කාලය ගතකරන්නේ ගෙදර වැඩ කටයුතුත් එක්ක තමයි. එළියට බහින්නවත් බැහැනේ. ඉතින් නිදහසේ ගෙදරට වෙලා ඉන්නවා.
පසුගිය දවස්වල ඔබ සමග වැඩ කළ ශිල්පීන් කිහිපදෙනෙකුට කොරෝනා ප්‍රශ්න මතු වුණා. ඔබත් බයෙන්ද හිටියේ?
ඔව්… මම සමග වැඩ කරපු ශිල්පීන් කිහිපදෙනෙකු අසනීප වුණා. බයක් නම් ඇති වුණේ නැහැ. අපිට දැන් කොරෝනා එක්ක ගැටෙමින් තමයි ජීවත් වෙන්න වෙලා තියෙන්නේ. අද හොඳට හිටියත් හෙට මොනවගේ තත්ත්වයක් උදාවෙයිද කියලා කියන්න බැහැ. හැමදේටම මුහුණ දෙන්න බලන් ජීවත් වෙනවා.
පසුගිය දවස්වල නටපු නැටිල්ලට නිර්මාණ ගොඩාක් මගහැරෙන්නට ඇති?
‘හිරු මෙගා ස්ටාර්ස් 2’ වගේම ‘හිරු මෙගා ස්ටාර් සීසන් 2’ ඒකෙත් මට වැඩ කිරීමට හැකි වුණා. හැබැයි ‘සීසන් 3’ වැඩ සටහනේදී මගේ ලොකු වෙනසක් ප්‍රේක්‍ෂකයන්ට දැනුණා. ඒ වගේම මම ඒ වෙනුවෙන්ම මහන්සි වුණු නිසා නිර්මාණ ගොඩාක් මට මගහැරුණා.
දැන් ඔබට නිර්මාණවලින් ලැබෙන ආරාධනා කොයි වගේද?
‘හිරු මෙගා ස්ටාර්’ එකෙන් පසු මට නිර්මාණවලින් ආරාධනා ගොඩාක් ලැබුණා. මොකද පසුගිය දවස්වල මාව සම්බන්ධ කර ගැනීමට ටිකක් අපහසු වුණා. මම සම්බන්ධ වුණු ටෙලිනාට්‍ය විස්සක් විතර තිබෙනවා විකාශය වීමට.
තනිකඩව ගෙවන ජීවිතයත් එක්ක බාහිරින් එන බලපෑම් පීඩනවලට ඔබ ගැහැනියක් ලෙසට මුහුණ දෙන්නේ කොහොමද?
එවැනි ප්‍රශ්නවලට මුහුණ දීමේ ආත්මශක්තියක් මට තියෙනවා. මම ප්‍රශ්නවලින් පැනලා, හැංගිලා ඉන්න කෙනෙක් නෙවේ. විවිධ අයගෙන් විවිධ බලපෑම් ආවා. ගැහැනියක් තනියම ඉන්නකොට මිනිසුන් බලාපොරොත්තු වෙන දේවල් ගැන අමුතුවෙන් කියන්න අවශ්‍ය නැහැ. එවැනි පුද්ගලයන්ට මම පිළිතුරු දුන්න විදිය ඒ මිනිසුන්ම දන්නවා.
ඔබේ සැමියා ජනප්‍රිය අධ්‍යක්‍ෂවරයෙක්. පසුගිය කාලේ සිදුවුණු ප්‍රශ්නත් එක්ක නැවැත ඔබට ඔහුගේ නිර්මාණයකට ආරාධනා කළොත්?
මගේ පෞද්ගලික ජීවිතය නිර්මාණ සමග සසඳන්න යන්නේ නැහැ. ආරාධනාවක් ලැබුණොත් මම නිර්මාණය මගේ වෘත්තීය ගැන හිතලා මම සම්බන්ධ වෙනවා.
ඔබ වෘත්තීය රංගන ශිල්පිනියක්. එහෙත් දැන් තිබෙන වාතාවරණයත් එක්ක වෙන දෙයකට යොමු වෙන්න අදහසක් නැද්ද?
මට ජීවත් වීමට සාමාන්‍ය මුදලක් තිබුණාම ඇති. මහා පරිමාණයෙන් මම හොයන්න යන්න කැමැති නැහැ. ලද දෙයින් මම සතුටුවෙලා ජීවත් වෙනවා.
– වසන්ත විතාරණගේ
