මම ටෙලි නාට්‍යයක් අධ්‍යක්ෂණයට ලෑස්ති වෙනවා.
කලා ක්ෂේත්‍රයේ විවිධ චරිත අතර ගයත්‍රි ඩයස් කියන්නේ හැමෝගේම අවධානයට ලක්වෙන චරිතයක්. ආකර්ෂණීය පෙනුම සහ දක්ෂතාව නිසාම ටෙලි තිරයේ නිතර දෙවේලේ දකින චරිතයක් ඇය. රංගන ශිල්පිනියක් සේම රූපලාවණ්‍ය ශිල්පිනියක් ලෙසද දිගු ගමනක් පැමිණි ඇය මේ දිනවල නාළිකා කීපයකම විකාශය වන ටෙලිනාට්‍ය කීපයක විවිධ චරිතවලට පණ පොවනවා. කලා ක්ෂේත්‍රය ගැන සේම රූපලාවණ්‍ය ක්ෂේත්‍රය ගැනද එදා සිට අද දක්වා ඇය නොඅඩුව ලබන ජනප්‍රියත්වය ගැනද අප සමඟ ඈ බොහෝ දේ පැවසුවා.
ඉතින් ගයත්‍රි කොහොමද ජීවිතේ?
ප්‍රශ්න කෝටියක් මැද්දෙන් තාමත් ජීවත් වෙනවා. මේ ලෝකේ හැමෝටම පොදු වෙච්ච කොරෝනා වසංගතය තමයි තියෙන ලොකුම ප්‍රශ්නේ. ඒත් අපි අපේ වැඩ කටයුතු කරගෙන යනවා. රූපලාවණ්‍යාගාර නම් වහලා. ඒත් රූගත කිරීම් නම් කරගෙන යනවා.
මේ දිනවල කෙරෙන කලා කටයුතු ගැන කිව්වොත්?
මේ දවස්වල ස්වර්ණවාහිනී නාළිකාවේ "පාර දිගේ" කියලා ටෙලි නාට්‍යයක් විකාශය වෙනවා. ජයප්‍රකාශ් සිවගුරුනාදන් අධ්‍යක්ෂණය කරන්නේ ඒක. ඒකේ පුෂ්පා නෝනාගේ චරිතය මම කරන්නේ. ස්වාධීන රූපවාහිනියේ විකාශය වන "කොළඹ ඉතාලිය" කියන ටෙලි නාට්‍යයෙත් මම රඟපානවා. ඊට අමතරව හිරු නාළිකාවේ විකාශය වන "මහවිරු පන්ඩු" ටෙලි නාට්‍යයේ ධර්මා කුමරියගේ චරිතය මම රඟපානවා. "කකුළුවෝ මකුළුවෝ" කියලා ටෙලි නාට්‍යයක් සියත නාළිකාවේ විකාශය වෙනවා. ඒකෙත් මම රඟපානවා. ඒ වගේම මම තවත් අලුත් වැඩකට අතගහලා ඉන්නේ.
මොකක්ද ඒ අලුත් වැඩේ ?
මම අලුත් ටෙලි නාට්‍යයක් අධ්‍යක්ෂණය කරන්න ලෑස්ති වෙනවා. මේ දවස්වල ටිකක් වැඩිපුර ඒ වෙනුවෙන් මහන්සි වෙනවා. පිටපතේ වැඩකටයුතු ටිකක් කරගෙන යනවා. තවමත් නළුනිළිවරණය තියලත් නැහැ. ඉදිරියේදී ඒ ගැන තොරතුරු කියන්නම්. මේ නිර්මාණයට චන්න අයියාත් (චන්න පෙරේරා) රඟපාන්න ඉඩ තියෙනවා.
අධ්‍යක්ෂණය කියන්නේ ලේසි පහසු කටයුත්තක් නෙවෙයි. ඒ ගැන පෙර හැදෑරීමක් කරල තියෙනවද?
ඇත්තටම මම හැම දෙයක් ගැනම ගොඩක් සූක්ෂ්මව නිරීක්ෂණය කරන කෙනෙක්. මට හොඳට ලියන්න පුළුවන්. මම ගොඩක් දේවල් නිහඬව ලියලා තියෙනවා. මම කෙටි චිත්‍රපට කීපයක් කරලා තියෙනවා. ඒවා ලොකුවට ජනගත කරලා නැහැ.
"පාර දිගේ" ටෙලි ටෙලිනාට්‍යයේ ඔබේ චරිතය විශේෂයි?
පුෂ්පා නෝනාගේ චරිතය කියන්නේ තමන්ගේ පවුලටම කැපවුණු ගෘහණියකගේ චරිතයක්. එයාගෙ සැමියා කරන ගොඩක් දේවල් එයා දන්නේ නැහැ. නානායක්කාර (රොෂාන් පිලපිටිය) කියන්නේ එයාගේ දෙවෙනි සැමියා. එයා මැණික් ව්‍යාපාරිකයෙක්. මැණික් ව්‍යාපාරය මගේ පළමු සැමියාගේ. එයා මියගියාම සැමියාගේ සේවකයාව තමයි පුෂ්පා විවාහ කරගන්නේ. සැමියන් දෙන්නෙකුගෙන් දරුවෝ දෙන්නෙක් ඉන්න මවක් ඇය. සමාජය දිහා උපේක්ෂාවෙන් බලන තමන්ගේ සැමියාව සහ දරුවන්ව විශ්වාස කරන නිවුණු චරිතයක්. ඇත්තටම ගොඩක් සංකීර්ණ චරිතයක් මට සරලව ඉදිරිපත් කරන්න වෙලා තියෙන්නේ.
මෑත කාලයේ ගයාත්‍රිව වැඩිමනත් දකින්නේ ඉතාම සීමිත පරාසයකට කොටු වුණු චරිතවල පමණයි.
ඇත්තටම දශක දෙකක් තිස්සේ ඉන්දියානු ටෙලිනාට්‍ය විකාශය කරලා කරලා ඒවයේ චරිතවල තියෙන ග්ලැමර් එක ගොඩක් දෙනෙක් බලාපොරොත්තු වුණා ලංකාවේ නාට්‍යවලත්. ඒ ග්ලැමර් එක තියාගන්න ගොඩක් වයස අඩු අයව අම්මලාගේ චරිතවලට ගත්තා. දැනටත් කුසුම් රේනු අක්කලා, මොරීන් චාරුනී අක්කලා ඉඳීද්දි අපිව ඒ චරිතවලට ගන්නවා ග්ලැමර් එක තියාගන්න. අදටත් කුසුම් රේනු අක්කලා ලස්සනයිනේ. ඒත් අපිවත් අම්මලාගේ චරිතවලට සම්බන්ධ කරගත්තා. මම පබළු ටෙලිනාට්‍යයේ තමයි මුලින්ම අම්මා කෙනෙක්ට රඟපෑවේ. බිමල් ජයකොඩි මගේ සැමියාට රඟපෑවා. පබෝදා සංදීපනී මගේ දුවට හිටියේ. ඒක හොඳ වටින නිර්මාණයක්. ඊට පසුකාලීනව දිගින් දිගටම මට අම්මලාගේ චරිතවලට කතා කළා. ඒත් ඔක්කොම වැඩත් භාරගත්තේ නැහැ මම. එහෙම කතා කරපු හැම චරිතෙම රඟපෑවා නම් මම මේ වෙද්දි ලොකු ළමයි බර ගාණකගේ අම්මා වෙලා. (සිනාසෙමින්) ඒ නිසා මම ඉතාම සීමිත චරිත ගණනක් රඟපෑවේ. මේ කාලේ විකාශය වන නාට්‍යවල ගත්තොත් කොළඹ ඉතාලිය නාට්‍යයේ මම විවාහක චරිතයක් නෙමෙයි කරන්නේ. ඒ වගේම මහවිරු පණ්ඩු ටෙලිනාට්‍යයේත් ධර්මා කුමරියගේ චරිතය ටිකක් වෙනස්.
ගයත්‍රී ක්ෂේත්‍රයට ඇවිත් කොච්චර කල්ද?
මම ක්ෂේත්‍රයට එනකොට අවුරුදු දාසයයි. දැන් අවුරුදු විස්සකට වැඩියි මම වැඩ පටන් අරගෙන.
ආපු ගමන්මඟ ගැන ආයෙමත් හැරිලා බැලුවොත්?
සුන්දර විදිහට ජීවත් වෙනවා නම් මේක හරිම සුන්දර තැනක්. කලා ක්ෂේත්‍රය කියන්නේ හැම අතින්ම අපි අපේ ගෞරවය කලාවට දෙනවා නම් ඒක අපිට කලාවෙන් ලැබෙනවා. කලාකරුවන් වීම ලොකු භාග්‍යයක්. මේ හැමදේටම ගොඩක් මහන්සි වුණා. මේක ලෝකේ හොඳම වෘත්තියක්. ලංකාව වගේ රටක ඒ වගේ ක්ෂේත්‍රයක අපි අමාරුවෙන් ඇවිත් මේ දේවල් ගොඩනඟා ගත්තේ. දැන් වගේ ඉස්සර ලේසි නැහැ ක්ෂේත්‍රයට එන්නත්. ආපසු හැරිලා බලද්දි මට හරි සතුටුයි. මම හොඳ නිර්මාණවලට දායක වුණා. දැනටත් හොඳ නිර්මාණවලට සම්බන්ධ වෙනවා.
කලාවට එන එක දැන් ලේසි දෙයක්ද?
ඒක එහෙම වෙලා. දැන් විවිධ නාළිකා ඔස්සේ විකාශය විවිධ නිර්මාණ බැලුවම එක පේනවා. කලා ක්ෂේත්‍රයෙන් ඉතාම සුළු පිරිසයි. ඒත් දැන් එක ටෙලි නාට්‍යයකින් අලුත් චරිත කීයක් නම් හඳුන්වා දෙනවාද? ආවාට කමක් නැහැ. එයාලා දක්ෂයි. ඔවුන්ට දක්ෂතාවය තියෙනවා නම් ඔවුන් ක්ෂේත්‍රයේ රැඳෙයි. හැමදාම එකම අයටත් රජ කරන්න බැහැනේ. ඒත් ප්‍රමිති සහගතව වැඩිහිටියන්ට ගරු කරලා ඉන්න ඕනේ. අදටත් මාලනී ෆොන්සේකා මහත්මිය දැක්කම අපේ කකුල් පණ නැති වෙනවා. ඒ ගරුත්වය තියෙනවා නම් හරි වටිනවා. ලේසියෙන් ආවා වගේම මේක රැක ගන්නත් ඕනේ.
අනික් රංගන ශිල්පිනියෝ වගේම ඔබත් කලාවට ඇවිත් යම් ජනප්‍රියත්වයක් ලබාගෙන කලක් නිහඬ වුණා?
ඔව්. මමත් එහෙම හිටියා අවුරුදු දහයක් දරුවන් ලැබුණු නිසා. අපි ජීවිත කාලයේ මොන දේ කළත් විවාහ වෙලා දරුවන් ලැබෙන කාලෙට ඒ වගකීම් ටික කළ යුතුයි. ඒව එහෙම නොකළොත් අපිට අවසාන කාලේ ගොඩක් දුක් විදින්න වෙනවා. මට මගේ ලොකු දුව ලැබුණේ අවුරුදු දහනවයේදී. ඒ මගේ හොඳම කාලේ. මට නිර්මාණ සෑහෙන්න ගලාගෙන ආපු කාලේ. ජෝ අබේවික්‍රම මහත්මයා පවා මගේ ගෙදරට ආවා මාව නිර්මාණවලට ගන්න. නමුත් මම ඒ දවස්වල රංගනය අතහැරියා මගේ දරුවෝ හදන්න ඕනේ නිසා. මගේ පොඩි දුවත් ලැබුණාට පස්සෙයි මම ක්ෂේත්‍රයට නැවත ආවේ. ඒ පටන් ගැන්ම තමයි දැන් මේ ආපසු යන්නේ.
සිනමා නිර්මාණවලට ඔබට ලැබෙන ඉඩකඩ අඩුයි?
ඒ දෙය සිද්ධ වුණේ මම කාලයක් නිහඬව හිටපු නිසා. මම විවාහ වුණේ රඟපාන්න පුළුවන් කාලේ. ඒ නිසා ආපු සිනමා නිර්මාණවලට මට සම්බන්ධ වෙන්න බැරි වුණා. ඒත් පසුකාලීනව සිනමා නිර්මාණවල මට චරිත ලැබුණා. ඒත් ලොකුවට මිනිසුන් අතර කතාවෙන්න පුළුවන් චරිතවලට දායක වෙන්න ලැබුණේ නැහැ. මම හිතන්නේ දැන් නම් මගේ ඒ හොඳ කාලේ පසුවෙලා කියලා. ඒ නිසා මට කරන්න පුළුවන් චරිතයකට සම්බන්ධ වෙනවා හැරෙන්න වෙන කරන්න දෙයක් නැහැ.
කොරෝනා වසංගතය රූපලාවණ්‍ය ක්ෂේත්‍රයටත් බලපාලා නේද?
අවුරුදු එකහමාරක කාලයක් අපේ ක්ෂේත්‍රයේ හොඳටම කඩාගෙන වැටිලා තියෙන්නෙ. පසුගිය වසර ආරම්භයත් එක්කම කොරෝනා වසංගතය පිරිහීම නිසා ලොකුම බලපෑම වුණේ රූපලාවණ්‍ය ක්ෂේත්‍රයට. එහි බලපෑම අදටත් එහෙමයි. මේ ක්ෂේත්‍රයේ හැමෝගෙම ආදායම වැටිලා තියෙන්නෙ. මේක කවදා ඉවරවෙන ප්‍රශ්නයක්ද දන්නේ නැහැ.
කලා ක්ෂේත්‍රයේ මේ දිනවල වැඩකටයුතු කෙරෙනවා. වේෂ නිරූපණ ශිල්පීන් සෞඛ්‍යාරක්ෂිතව තමන්ගේ දායකත්වය ලබාදෙන්න ඕනේ. ඒ ගැන කතා කළොත්?
අනිවාර්යයෙන්ම. ඒක හොඳ ප්‍රශ්නයක්. වේශ නිරූපණ ශිල්පියකුගෙන් තමයි මේ වසංගතය පැතිරෙන්න ලොකුම අවදානම තියෙන්නේ. මට තනියම මගේ මේක්අප් එක හදාගන්න පුළුවන්. ඒත් හැමෝටම එහෙම කරන්න බැහැ. ඒ නිසා වේශ නිරූපණ ශිල්පියාගේ සහයෝගය ඕනේ. ඒ නිසා ඒ උපකරන මෙවලම් හොඳට ජීවානුහරණය කරලා සැලකිලිමත්ව මේ කටයුත්ත කරන්න ඕනේ. එහෙම නැති වුණොත් අපේ කලා ක්ෂේත්‍රයත් වේගයෙන් කඩාගෙන වැටෙනවා. දැන් පෙන්නගන්න තියෙන්නෙත් ටෙලිනාට්‍ය ටික විතරයි. ඒ ටික කරගන්නත් බැරි වෙනවා.
රංගනය සහ රූපලාවණ්‍ය යන දෙකෙන් එකක් තෝරගන්න කිව්වොත් ඔබේ තේරීම?
එහෙම නම් තෝර ගන්න බැහැ. ඒක මගේ දරුවෝ දෙන්නගෙන් එක්කෙනෙක් තෝරගන්න කියනවා වගේ ප්‍රශ්නයක්. මට එකක්වත් අතහරින්න බැහැ. රූපලාවණ්‍ය ක්ෂේත්‍රයෙන් තමයි මට ආදායම එන්නේ. රංගන ක්ෂේත්‍රය නිසා මගේ මානසික ආතතිය නැති වෙනවා. ඒ වගේම මුදලුත් ලැබෙනවා. මේ කාලේ හැටියට මේ ක්ෂේත්‍ර දෙකම මට ඕනේ.
හැමෝම තරුණ තරුණියෝ කතා කරන්නේ ගයත්‍රිගේ ස්වරූපය ගැන. එදා ඉඳලා අද වෙනකන් කොහොමද එක වගේම ස්වරූපයක් පවත්වාගෙන ඉන්නේ?
වයස කියන්නේ ඉලක්කමක් විතරයිනේ. පොඩි කාලේ මම ඉස්කෝලෙට එනවට මගේ ළමයි හරිම ආසයි. එයාලා කියන්නේ අම්මි හරි පොඩි පාටයි. අපේ යාළුවන්ගේ අම්මිලාගේ වයස පේනවා කියලා. පෙනුම මෙහෙම තියාගන්න හිතත් ලොකු බලපෑමක් කරනවා. මම දන්නේ නැහැ මම ගොඩක් හොඳ කෙනෙක්ද කියලා. නමුත් මම හැමෝටම උදව් කරගෙන හැම වෙලාවෙම සතුටින් ඉන්න උත්සාහ කරනවා. කිසිම කෙනෙකුට වෛර කරන්න හිතෙන්නේ නැහැ. ඒක මට බලපානවා ඇති කියලා මම හිතනවා. ඒ වගේම මම සමාන්‍ය විදිහට කනබොන කෙනෙක්. හිත හොඳීන් ඉන්න එක තමයි මගේ රහස.
ඔබට විවිධ කාලවල විවිධ කටකතා හැදෙනවා. ඒ ගැන කියන්න යමක් ඇති?
මම යම්කිසි පෙනුමකට ඉන්නවා නම් ඒ හේතුව උඩ තමයි ඔය කටකතා හැදෙන්නේ. කාටහරි මොකක්හරි ප්‍රශ්නයක් තියෙනවා නම් මාව පොඩ්ඩක් ඇදගෙන නටනවා. ඔය ගොසිප් පේජ් කරන අය ඒවායින් කීයක් හරි හොයාගෙනනේ ජීවත් වෙන්නේ. ඒ නිසා මම ඒ ගැන වැඩිය හොයන්නේ නැහැ. ගොසිප් කියන එක කලාකරුවෙක්ට ඒ තරම් අදාළ නැහැ.
ගයත්‍රි කියන්නේ ලස්සන දුවලා දෙන්නෙක්ගේ අම්මා කෙනෙක්?
ඔව් මට දුවලා දෙන්නෙක් ඉන්නවා. ලොකු දුව මලීෂා, පොඩි දුව දුආෂා. මගේ පොඩි දුව කෙටි චිත්‍රපට අධ්‍යක්ෂණය කරනවා. එයාගේ තාත්තා එක්ක එකතු වෙලා කෙටි චිත්‍රපට අධ්‍යක්ෂණය කරනවා. එයාට යූටියුබ් චැනල් එකක් තියෙනවා. ලොකු එක්කෙනා නම් ඒ තරම් රංගනයට කැමති නැහැ. එයාට ඕනේ ඉගෙන ගන්න. ළමයි දෙන්නාම චන්නගේ නිර්මාණවල රඟපාලා තියෙනවා. නමුත් එයාලට ක්ෂේත්‍රයේ දීර්ඝකාලීනව රැඳෙන්න කැමැත්තක් නැහැ. අපෙන් ඒකට කිසිම බල කිරීමක් නැහැ. ජනප්‍රියත්වයට එයාලා පොඩ්ඩක්වත් කැමැති නැහැ. එයාලාට උපතින්ම ජනප්‍රියත්වය ලැබුණු නිසා එයාලා ඒකට කැමති නැහැ. එයාලාට ඕනේ සාමාන්‍ය විදිහට ජීවත් වෙන්න.
"Single Parent" සංකල්පය දැන් සමාජයේ කතාබහට ලක්වුණාට ඉස්සර ඒ දිහා සමාජය බැලුවේ අතෘප්තිකර හැඟීමෙන්?
ලංකාවේ ගත්තොත් Single Parent කෙනෙක් වෙන්නේ කසාදයෙන් ඉවත්වෙලා දරුවන් සමග තනියෙන් ජීවත්වනවා නම්. නමුත් ලෝකේ අනෙක් රටවල Single Parent විවාහ නොවීත් ඉන්නවා. දරුවන් අරන් හදාගෙන හෝ තමන්ගේ දරුවන් හදාගෙන. නමුත් ලංකාව ඇතුළේ ඒක හරි වෙනස්. ලංකාවේ තව කෙනෙක්ගේ අමාරුව, දුක හරිම ලැජ්ජා සහගත ලෙස හෙළා දකින සමාජ මට්ටමක් ඉස්සර තිබුණේ. නමුත් මේ වෙනකොට ඒක වෙනස් වෙලා තියෙනවා. ඉඪදඨතඥ නචපඥදබ කිව්වම පිරිමි කෙනෙක් වෙන්නත් පුළුවන්, ගැහැනු කෙනෙක් වෙන්නත් පුළුවන්. Single Parent කෙනෙක්ට ජීවිතයට මූණදෙන්න හයිය වැඩියෙන් ලැබෙනවා.
අපිට කතා නොකරම බැරි කෙනෙක් ඉන්නවා. ඒ චන්න පෙරේරා.
චන්න අයියා කියන්නේ ලක්ෂෙකින්වත් හොයාගන්න බැරි තාත්තා කෙනෙක්. එයා එයාගේ දරුවන්ව හොඳට බලාගන්නවා. මං ගැන බලනවා. දරුවන්ගේ අධ්‍යාපන කටයුතුවලට, ඔවුන්ව සතුටු කරන්න පුළුවන් උපරිමය එයා කරනවා. ලංකාවේ මිනිස්සු අපේ පවුල දිහා බලන විදිහේ ලොකු වැරැද්දක් තියෙනවා. අපි එහෙම වෙන් වුණා කියලා දරුවෝ තනිකරලා නැවත විවාහ වෙලා ඉන්න අය නෙමෙයි. අපි එක තැනකදි නතර වුණා. දැන් දරුවෝ දෙන්නෙක්ගේ මව පියා වෙලා ඉන්නවා. ඒ දරුවන්ගේ වගකීම්වලට තමයි අපේ ජීවිත බැඳීලා තියෙන්නේ. චන්න අයියා ගැන මට කියන්න වචනයක් ඇත්තෙම නැති තරම්. ඒ තරම් හොඳ තාත්තා කෙනෙක් එයා.
ඉදිරි බලාපොරොත්තු, ඉලක්ක ගැන කතා කරමු?
ටෙලි නිර්මාණ ගොඩකට ආරාධනා ඇවිත් තියෙනවා. චිත්‍රපට දෙක තුනකට ගිවිසුම් අත්සන් කරලා තියෙනවා. ඒවා කොයිකාලේ කරයිද දන්නේ නැහැ. ලෝකෙට බලපාලා තියෙන මේ ප්‍රශ්නත් එක්ක දැන් හැමදේම අඩාළ වෙලා. හැකි ඉක්මණින් මේ සියල්ල යථා තත්ත්වයට පත්වෙන්න ඕනේ. කලාවෙන් සහ රූපලාවණ්‍ය ක්ෂේත්‍රයෙන් තවත් ඉදිරියට ගිහින් මැරෙනකන් දරුවෝ දෙන්නාව බලාගෙන ඉන්න එක තමයි මගේ බලාපොරොත්තුව.
නිර්මාණි බණ්ඩාරනායකඋපුටා ගැනීම සරසවිය
