පිලිස්සුණු Santiago ගුව න්යානය වසර 35කට පස්සේ ඇත්තටම බ්‍රසීලයට ආවාද?

අන්න ඒ වගේ හීනෙකින්වත් නොහිතපු ඒත් ඇත්තටම සිද්ධවුණු අදටත් අබිරහසක් වුණ ගුවන් ගමනක් ගැන තමයි අද මේ කියන්නේ. ඒ තමයි Santiago Flight 513. ලෝකය පුරා ලොකු ආන්දෝලනයකට තුඩු දුන් තවත් එක් නොවිසදුණු අබිරහසක්.

The Weekly World News Tabloid වාර්තාකරු අර්වින් ෆිෂර්ගේ 1989 November 14 කලාපයෙන් මුල්වරට මෙම කතාව විස්මයජනක පුවතක් විදිහට ප්‍රකාශයට පත්කිරීමත් එක්ක විවිධ මාතෘකා මවමින් වසර ගණනාවක් අන්තර්ජාලය පුරා සැරිසරන්න පටන් ගන්නවා. ඇත්තටම මොකක්ද මේ අබිරහස? කිසිම සාක්ෂියක් නැතුව අතුරුදන් වූ ගුවන් යානයක් අවුරුදු 35කට පසු නැවත නිරුපද්‍රිතව ගුවන් පථයකට ගොඩබස්වන්න පුළුවන්ද? ඒක කොහොමද සිද්ධ වුණේ? මං ඔබට පැවැසුවහොත් ගුවන් නියමුවෙක් නැතුව, ඒ කියන්නේ ජීවතුන් අතර සිටින ගුවන් නියමුවෙක් නැතුව මේ යානය සාර්ථකව ගොඩ බැස්සුවා කියලා…! ඔව් එය එහෙම වුණා. 1954 සැප්තැම්බර් 04 සන්තියාගෝ එයාර්ලයින්ස් 513 ගුවන් යානය මගීන් 88ක් සහ කාර්ය මණ්ඩලයේ 04 දෙනකු එක්ක බටහිර ජර්මනියේ ආචෙන් ඉඳලා බ්‍රසීලයේ පෝර්ටෝ ඇලෙගේ‍ර් බලා පිටත් වෙනවා. පැය 18ක වගේ කෙටි ගුවන් ගමනක් තමයි තිබෙන්නේ. නමුත් මේ ගුවන් යානය ඒ වෙනුවට අවුරුදු 35ක කාලයක් මේ ගමනට ගත කරනවා. පැය 18ක ගමන කොහොමද අවුරුදු 35ක ගමනක් වුණේ.

1954 සැප්තැම්බර් 04 ජර්මනියෙන් පිටත් වුණ “සන්තියාගෝ ෆ්ලයිට් 513” යානය අත්ලාන්තික් සාගරයට ඉහළ යම් තැනකදී අතුරුදන් වෙනවා. මේ අතුරුදන් වුණ යානය සොයාගන්න රජය හෙලිකොප්ටර් යානා, හදිසි සෝදිසි හා ගලවා ගැනීමේ කණ්ඩායම් පවා යොදා ගනිමින් පුළුල් මෙහෙයුමක් ක්‍රියාත්මක කරනවා. දින ගණනක් පුරා දැවැන්ත සෝදිසි කිරීමක් කළත් විමර්ශකයන්ට කිසිම හෝඩුවාවක් මේ යානය ගැන ලැබෙන්නේ නැහැ. ගුවන් යානා අතුරුදන් වීම කියන්නේ අසාමාන්‍ය දෙයක් නෙවෙයි. ත්‍රස්තවාදී පැහැර ගැනීම්, කඩා වැටීම් ආදිය බොහෝ අවස්ථාවලදී වාර්තා වෙලා තිබෙනවා. ඒත් අනතුරක් සිදුවූ බවට සලකුණක්, අයහපත් කාලගුණික තත්ත්වයක්, අවම වශයෙන් ගුවන් නියමුවා පාලක මැදිරියට උදවු ඉල්ලා ලබා දුන් පණිවුඩයක් ආදී කිසිදු හෝඩුවාවක් නැතිවම ගුවන් යානයක් අතුරුදන් වෙන්න පුළුවන්ද? කොහොම වුණත් මේ පල රහිත සෝදිසි කිරීම්වලින් පස්සේ ගුවන් යානය කඩන් වැටිලා ඒකෙ සිටිය සියලුම මගීන්ට ජීවිත අහිමි වුණා කියන නිගමනයට එන්න සිදුවෙනවා. අන්න ඒ නිසාම මේ සිදුවීමත් වසර 35ක් යනකන්ම අවධානයට ලක්නොවී කාලයේ වැලිතලාවෙන් වැහිලා සැඟවිලා තිබුණා.

නමුත් ඒ 1989 ඔක්තෝබර් 12 වෙනකන් විතරයි. මොකද “සන්තියාගෝ ෆ්ලයිට් 513” එදා කිසි කෙනකුට නොදන්වා බ්‍රසීලයේ පෝටෝ ඇලෙගේ‍ර් ගුවන්තොටුපළට ගොඩබස්වනවා. හරියටම ගත්තොත් අවුරුදු 35ට කලින් ඔවුන්ගේ ගමනාන්තය විය යුතුව තිබුණ තැනටම ඔවුන් නැවත පැමිණෙනවා. ඒ වසර 35කට පසුව. 1989 ඔක්තෝබර් 12 බ්‍රසීලයේ පෝර්ටෝ ඇලෙගේ‍ර් ගුවන් ගමන් මධ්‍යස්ථානයේ රේඩාර් පද්ධතියට හදිසියේම හදුනා නොගත් ගුවන් යානයක් ගැන සංඥාවක් ලැබෙනවා. ඒත් ඒ වෙලාවේ මේ ගුවන් තොටුපළට එන්න නියමිත කිසිම යානයක් තිබුණේ නැහැ. ඒ නිසාම පාලක මැදිරිය මේ යානය සමඟ සම්බන්ධ වෙන්න ලොකු උත්සාහයක් දරනවා. දිගින් දිගටම උත්සාහ කළත් ඔවුන්ගේ උත්සාහය සාර්ථක වෙන්නේ නැහැ. කොහොම වුණත් හදිසියේ කාර්මික දෝෂයකට ලක්වුණ ගුවන් යානයක් වෙන්න ඇති කියන නිගමනයේ ඉඳලා ඔවුන් මේ යානයට ගොඩබස්වන්න අවස්ථාව ලබා දෙන්න තීරණය කරනවා. ඒත් ත්‍රස්තවාදී ප්‍රහාරයක්ද කියන සැකය නිසාම යානය ගොඩබස්වන ප්‍රදේශය හිස් කරලා ඒ වෙද්දී ගුවන් තොටුපළට ගොඩබැස්වීමට නියමිත යානාවලට ගොඩබැස්වීමක් නොකරන ලෙසත් පිටත් වීමට නියමිත යානාවන් ප්‍රමාද කරන ලෙසත් හදිසි දැනුම්දීම් සිදු කරනවා. ආරක්ෂක අංශ දැනුවත් කරලා ආරක්ෂාව තරකරමින් ඔවුන් යානයට ගුවන් පථයට ගොඩබස්වන්න ඉඩකඩ ලබා දෙනවා. සංඥා රේඩාර් තිරයේ දර්ශනය වෙලා විනාඩි 15 වගේ කාලයක් ඇතුළත ඉතා සාර්ථක ලෙස මේ යානය ගුවන් පථයට ගොඩබස්වනවා.

බැලූ බැල්මටම ඔවුන්ට දකින්න ලැබෙන්නේ ටිකක් පරණ ගුවන් යානයක්. ඒත් මෙය ඉතාමත් සාර්ථකව ගොඩබැස්සුවානෙ. යානය ගොඩබැස්වීමෙන් පස්සේත් පාලක මැදිරිය යානය සමඟ සම්බන්ධ වෙන්න දිගින් දිගටම උත්සාහ කරනවා. ඒත් ඔවුන්ට කිසිම සම්බන්ධතාවක් ගොඩනඟාගන්න හැකියාවක් ලැබෙන්නේ නැහැ. පැයක් විතර බලන් සිටියත් මගීන් කවුරුත් බසින්නේවත්, දොරවල් විවෘත කරන්නෙවත් කිසිම දෙයක් හෝ සිද්ධ වෙන්නේ නැහැ. යානයේ පාලක මැදිරිය එක්ක සම්බන්ධ වෙන්නත් බැරි නිසා ආරක්ෂක අංශවලත් සහයෝගයෙන් යානයේ දොර කඩලා යානයට ඇතුළු වෙන්න ඔවුන් තීරණය කරනවා. යානය ඇතුළේ සම්පූර්ණයෙන්ම දුම පිරිලා 100% ක්ම වගේ යානය ඇතුළත පිච්චිලා. ඒත් පිටතින් සුළු සුළු පලුදුවීම් කිහිපයක් ඇරුණම විශාල හානියක් දකින්න ලැබෙන්නෙත් නැහැ. යානය ඇතුළේ තියෙන දුම ඉවත් කරල බලද්දී ආසන පටිත් පැලඳගෙන මගීන් 92ක් ඉඳගෙන ඉන්නවා ඔවුන්ට දකින්න ලැබෙනවා. හැබැයි ඒ ජීවතුන් අතර ඉන්න මිනිස්සු නම් නෙවෙයි. මිනිස් ඇටසැකිලි. දකින්න ලැබෙන මේ දර්ශනයෙන් ඔවුන් පුදුමයටත් භීතියටත් පත් වෙනවා. මොකද මේ ඔවුන් සිහිනෙකින්වත් බලාපොරොත්තු වුණ දර්ශනයක් නෙවෙයි. මගීන් සියලුම දෙනා මොන විදිහකින් හරි මියගිහින් තිබුණත් යානය සාර්ථකව අරගෙන ආව නිසා ගුවන් නියමුවන් හොඳින් ඇති කියල හිතන ඔවුන් නියමු කුටියට කතා කළත් ප්‍රතිචාරයක් නොලැබෙන නිසා නියමු කුටියේ ‍ෙදාරටුවත් කඩනවා. ඔවුන්ගේ පුදුමය දෙගුණ තෙගුණ කරමින් නියමු කුටිය ඇතුළේ දකින්න ලැබෙන්නෙත් පාලකය පවා තවමත් අතින් අල්ලා ගෙන ඉන්න කපිතාන් මිගෙල් වික්ටර් කියුරිගේ සහ සහායක නියමුවාගේ ඇටසැකිලි. ඒ වගේම ඒ මොහොත වන විටත් මේ යානයේ එන්ජිම නාද වෙමින් තමයි තිබිල තියෙන්නේ. සිතාගත නොහැකි ගැටලුවකට මුහුණ දෙන ඔවුන් ගුවන් යානයේ සඳහන් සන්තියාගෝ කියන නමත් යානය සෝදිසි කිරීමෙන් ලැබෙන Ewa 513 කියන cord එකත් මාර්ගයෙන් මේ පිළිබඳ තොරතුරු සොයනවා. ඒ අවස්ථාවේදී ඔවුන් තවත් පුදුමයට පත් කරමින් දැනගන්න ලැබෙන්නේ වසර ගණනාවකට ඉහතදී ඒ කියන්නේ 1956දී මේ ගුවන් යානය හිමි ගුවන් සමාගම පවා සම්පූර්ණයෙන්ම වහල දාල කියලයි. ඒ වගේම එතනදී ඔවුන් දැනගන්නවා මේ තමයි 1954 සැප්තැම්බර් 04 ජර්මනියෙන් පිටත් වෙලා අත්ලාන්තික් සාගරයට ඉහළින් අතුරුදන් වුණ Santiago Flight 513 නම් ගුවන් යානය කියලා.

එතකොට කොහොමද ගුවන් නියමුවෙක් නොමැතිව මේ යානය නිරුපද්‍රිතව පැමිණියේ? හානියකින් තොරව නිවැරැදිව ගොඩබැස්වීමක් කළේ? කොහෙද මේ යානය අවුරුදු 35ක කාලයක් තිබුණේ? යානයේ මගීන්ට ඇත්තටම මොකද වුණේ? නැවත පැමිණි සන්තියාගෝ යානය ලෝකය හමුවේ ඉතිරි කළ පැනය එයයි. මේ සමඟ විවිධ පිරිස් විවිධ මතිමතාන්තර ගෙනහැර දක්වන්න පටන් ගන්නවා. ඒ අතර තියෙන එක තර්කානුකූල මතයක් තමයි මේ ගුවන් යානය හදිසියේ විවෘත වුණ Time loop එකකට ඇතුළු වෙලා ඉන් පස්සේ එළියට එන්න ඇති කියන මතය. ඒ කාලේ හිටපු සෙල්සෝ ඇටෙලෝ කියන විද්‍යාඥයා තමයි මේ මතය ඉදිරිපත් කරල තිබෙන්නෙ.

Time loop එකක් එහෙමත් නැත්නම් කළු කුහරයක් ගැන තමයි ඔහු මේ සඳහන් කරන්නේ. සාමාන්‍යයෙන් මේ කළු කුහරයක් ඇතුළේ යම් දෙයක් සිර වුණාම සිරවන වස්තුවේ කාලය ගත වෙන්නේ නැහැ. නමුත් එළියේ කාලය ඉතාමත් වේගයෙන් ගත වෙනවා. ඒ කියන්නේ මේ wormhole එකක් ඇතුළේ විනාඩියක් වගේ පොඩි කාලයක් එළියේ අවුරුදු ගාණක් වෙන්නත් පුළුවන්. ඒත් එහෙම දෙයක් වුණා නම් යානය ඇතුළේ හිටිය මගීන් ජීවතුන් අතර ඉන්න ඕනෙ. එහෙනම් ඔවුන් කොහොමද මිය ගියේ කියන ප්‍රායෝගික ගැටලුව මෙතනදී මතු වෙනවා. තවත් මතයක් තමයි මේ යානය පිටසක්වළ ජීවීන් පැහැරගන්න ඇති කියන මතය. එහෙම යානය පැහැරගෙන ඒ මගීන් යොදාගෙන විවිධ පරීක්ෂණ කරලා ඔවුන්ගේ පරීක්ෂණ කටයුතුවලින් පස්සේ නැවත එවන්න ඇති කියන අදහස. එකහෙළාම මේ අදහසත් ප්‍රතික්ෂේප නොවෙන්නේ කාලෙන් කාලෙට අහන්න දකින්න ලැබෙන පිටසක්වළ ජීවීන්ගේ ක්‍රියාකාරකම් නිසාම වෙන්න ඇති. මේ අතර තියෙන තවත් මතයක් වුණේ ටැබ්ලොයිඩ් සඟරාවක් පළකරල තිබුණ වාර්තාවක්. ලෝකප්‍රකට ප්‍රබන්ධ කතා ඉදිරිපත් කරන weekly world සඟරාව මේ පුවතත් පළ කරලා තිබුණා. ඔවුන් මීට පෙර අවස්ථාවකදීත් ගුවන් ගතවී වසර 37ට පසු පෑන්අෑම් ගුවන් යානයක් ගොඩබැස්වූ බවට ප්‍රබන්ධ කතාවක් සමාජගත කරල තිබෙන නිසාම මේ කතාවත් ප්‍රබන්ධයක් වියහැකි බවටත් මත ඉදිරිපත් වුණා. කොහොම වුණත් විදෙස් වෙබ් අඩවි ගණනාවක්ම මේ ගැන විවිධ මත ඉදිරිපත් කරල තිබෙනවා. ඒ වගේම පැහැදිලි මූලාශ්‍ර සොයා ගැනීම අපහසු බවත් බ්‍රසීල රජය මේ පිළිබඳ තොරතුරු වසන් කර තිබෙන බවටත් ඒ අතර ඇතැම් වෙබ් අඩවි වාර්තා කර තිබුණා.

බ්‍රසීල රජය මේ අමුතු සිදුවීම ගැන විමර්ශන කළත් ඒ ගැන අදහසක් ඉදිරිපත් කිරීම ප්‍රතික්ෂේප කරලා තිබෙනවා. වෛද්‍ය ඇටෙලෝ, මන්හා වගේ තවත් බොහෝ පිරිස් මේ පිළිබඳ සම්පූර්ණ තොරතුරු හෙළිදරව් කරන ලෙස ඉල්ලා සිටියත් ඔවුන්ගේ ඉල්ලීම් නම් ඉටුවුණේ නැහැ. යානය කාල විපර්යාසයකට ඇතුළු වෙන්න ඇති කියන වෛද්‍ය ඇටෙලෝ ඉදිරිපත් කරන මතය සම්පූර්ණයෙන්ම ප්‍රතික්ෂේප කළත් රජය වෙනත් විශේෂ අර්ථකථනයක් ඉදිරිපත් කරන්නෙත් නැහැ.

විවිධාකාරයේ මත කිහිපයක්ම ඉදිරිපත් වුණත් තවමත් මේ සිදුවීම සම්බන්ධව නිවැරදි තොරතුරක් නම් ලැබිලා නැහැ. ඇටසැකිලිවලින් පිරුණ ගුවන් යානයක් පළමුවැනි වතාවට දැකගන්න පෝර්ටෝ ඇලෙග්‍රේවල නොසිටි ඕනෑම කෙනකුට සන්තියාගෝ ෆ්ලයිට් 513 කතාව ප්‍රෝඩාවක් කියලා බැහැර කරන්න පුළුවන්. ඒත් අමුතු දෙයක් සිදුවෙලා තිබෙනව. එහෙනම් මේ යථාර්ථය පිළිබඳව සෑම කෙනකුගේම තිබුණ හැඟීම් පුළුල් කිරීමට කාලයද මේ? ඇත්තටම එතකොට සන්තියාගෝ 513 යානයට මොකද වුණේ? පිටසක්වළ ජීවීන් පැහැර ගත්තද? එහෙමත් නැත්නම් කාලතරණය සම්බන්ධ මොකක් හරි කළු කුහරයක නැත්නම් Time loop එකක හිර වුණාද? එහෙම වුණා නම් යානයේ හිටපු මගීන් මියගියේ කොහොමද? ඒක නම් අදටත් ලෝකයා ඉදිරියේ ඇති නොවිසදුණු අබිරහසක්.

උපුටා ගැනීම මව්බිම