අබිරහසක් වූ ආරුශි තල්වාර් ඝාතනය

ලෝකයේ ජනගහනය ගත්තම ඉදිරියෙන්ම සිටින රටවල්වලින් එකක් විධියට ඉන්දියාව  හඳුන්වන්න පුළුවන්. ඉන්දියාව ගත්තම විවිධ ජාතීන් සිටිනවා. ඉතින් මෙවැනි සමාජ මට්ටම්වල සිටින ඉන්දියාවේ සිදු වූ ද්විත්ව ඝාතනයක් වෙනුවෙනුයි මේ ලිපිය වෙන් වෙන්නේ. 1994 වර්ෂයේ මැයි මාසයේ 24 වැනි දින උපත ලබන ආරුශි තල්වාර් යමක් කමක් තිබෙන පවුලක එකම දියණියයි. 2008 වර්ෂයේ සිදු වූ ද්විත්ව ඝාතන සිදුවීම වනවිට ඇයට වයස අවුරුදු 13 ලබා තිබුණා. ඇයගේ මව සහ පියා සමාජයේ ඉහළ පිළිගැනීමක් තිබූ දෙදෙනෙක්. රාජේශ් සහ නූපුර් තල්වාර් කිව්වම එම ප්‍රදේශයේ ඕනෑම කෙනෙක් ඔවුන්ව හඳුනනවා. මොකද රාජේශ් සහ නූපුර් මෙන්ම රාජේශ්ගේ පියාද වෛද්‍යවරයකු වූ නිසා පවුල් පසුබිම සමාජයේ පිළිගැනීම අතින් ඉහළම තැනක තිබුණා.

රාජේශ් වෛද්‍ය සායනයක් පවත්වාගෙන ගියත් ඔහු එයින්ම යැපුණු කෙනෙක් නෙවෙයි. ඔහු වෛද්‍ය විද්‍යාලයක ඉගැන්වීම් කටයුතුවලද නිරත වූවා. ඉතින් මෙම උසස් පිළිගැනීමක් ඇති පවුල ජීවත් වුණේ ඉන්දියාවේ උත්තර් ප්‍රදේශයේ නොයිඩාවල පිහිටි 25 වැනි අංශයේයි. මේ ආකාරයෙන් ඉන්දියාවෙහි විවිධ අංශ පිහිටා තිබෙනවා. ඉතින් මොවුන් 25 වැනි අංශයේ ජීවත් වුණත් ආරුශි තල්වාර්ගේ මවුපියන්ගේ සායනය පිහිටා තිබුණේ 27 වැනි අංශයේයි.

මේ අය සායනය කරගෙන ගියේ තනිවම නෙමෙයි. 25 වැනි අංශයේ ඔවුන්ගේ සමීප මිතුරු පවුලක් වූ අනීටා සහ ප්‍රෆුල් දුරානි දෙපොළ සමඟ එක්වයි. ඔවුන් දෙපළද වෛද්‍යවරුන් වන අතර උදේ වරුව සහ සවස් වරුව වශයෙන් වෙලාව වෙන් කරගෙනයි වැඩ කළේ.  ප්‍රෆුල් සහ නුපූර් උදෑසන 9 සිට 12 දක්වාත් රාජේශ් සහ ඇනිටා සවස 5 සිට 7 දක්වාත් දිනය බෙදාගෙන සායනයේ වැඩ කටයුතු කරගෙන ගියා.

ඉතින් මෙම කතාවේ විශේෂම චරිතය වූයේ තල්වාර් නිවෙසේ වැඩට සිටි යාම් ප්‍රසාද් බන්ජාඩි. ඔහු නේපාලයේ අර්ඝඛාන්චි ප්‍රදේශයේ ධරපනී නම් ගම්මානයේ හැදී වැඩුණු පුද්ගලයෙක්. ඔහුව නොයිඩාවල අය හඳුනන්නේ හෙම්රාජ් ලෙසයි. 1963 වර්ෂයේ ජනවාරි මස 16 වැනි දින උපත ලද ඔහු 2008 වනවිට වයස අවුරුදු 45ක පුද්ගලයෙක්. තල්වාර් නිවසේ ආහාර පිසීමේ සිට නිවස බලා කියාගන්න තැනට වෙනකම් සියලු කටයුතු සිදු කළේ ඔහු විසිනුයි. ඒ නිසාම තල්වාර් දෙපළ ඔවුන්ගේ වයස 13ක දියණිය වුවද බය නැතිව හෙම්රාජ්  සන්තකයේ තබා යන අවස්ථාද නැතිවාම නොවෙයි.

2008 මැයි 15  වැනි දින තල්වාර් පවුලට සාමාන්‍ය දිනයක්. උදෑසන අවදි වූ ආරුශි තල්වාර් පාසල් යෑම සඳහා පාසල් බෑගය සකසා මුහුණ කට සෝදාගෙන පාසල් නිල ඇඳුම ඇඳගෙන සියල්ල සූදානම් කරගත්තා. උදෑසනින්ම පාසල් යෑම සඳහා නිවස අසලට එන පාසල් වෑන් රථයෙන් පිට වූ ආරුශි පාසලේ එදාට අදාළ විෂයන්වලට සූදානම් වූ අතර නිවෙසේ සිටි ආරුශිගේ මව වන නූපුර් තල්වාර් සායනයට යෑම සඳහා සූදානම් වී උදෑසන 9ට පමණ 27 වැනි අංශය වෙත පිටත්ව ගියා. වෙනදා මෙන් නොව එදින විනාඩි කිහිපයක් පරක්කු වී සායනයට ගිය හෙයින් ඇය පැමිණෙන විටත් ඇයගේ මිතුරා වන ප්‍රෆුල් සායනය විවෘත කර තිබුණා. සමහර දිනවලට උදේ වරුවෙහි රාජේශ් පැමිණියද ඔහු බොහෝ වෙලාවට සායනයට පැමිණියේ සවස් වරුවෙයි.

මොකද ඔහු වෛද්‍ය ශිෂ්‍යයන්ට දහවල් කාලයේදී ඉගෙන්වීම් කටයුතු කළ නිසා. ඉතින් මාසයෙන් වැඩි හරියක් උදේ කාලයේ සායනයට ගිහින් දවල්ට ආරුශිව රැගෙන නිවෙසට ඒමේ කටයුත්ත භාරව තිබුණේ නූපූර් හටයි. එදින නූපුර් දහවල් 12 පසු වූ පසු සායනය වසා දමා ආරුශිව පාසලෙන් ගැනීම සඳහා දහවල් 1ට පමණ පිටත්ව ගියා. ඇය පාසලෙන් එළියට පැමිණි පසුව නූපූර් ආරුශිවද රැගෙන ඇයගේ කාර් රථයෙන් 25 වැනි අංශයේ තිබෙන ඔවුන්ගේ නිවෙස වෙත පැමිණුණා.

වෙනදා දිවා ආහාරය ගන්නේ ආරුශි ඇයගේ මව සමඟ වුවත් එදා දිවා ආහාරය සඳහා ආරුශිගේ පුංචි අම්මා කෙනෙක් වන වන්දනාද එක් වූවා. දිවා ආහාරයෙන් පසුව වන්දනා සමඟම නුපූර් නිවෙසින් පිටත්ව යනවා. ඉන්පසුව නිවෙසේ ඉතුරු වුණේ පාසල් ඇරී නිවෙසට පැමිණි ආරුශි සහ නිවෙසේ සිටින මෙහෙකරු හෙම්රාජ් පමණයි. මෙය සාමාන්‍ය සිදුවීමක්. මොකද ඇයගේ මවුපියන්ගේ කාර්යබහුල ජීවිතය නිසා ඇය සමඟ සිටීමට හැකි වන්නේ රාත්‍රි කෑමේදී පමණයි. ඇයට කතා බහ කරන්න මනසට නිදහසක් දෙන්න හිටියේ හෙම්රාජ් පමණයි. ඒ නිසාම ඒ දෙදෙනා හොඳ යහළුවන් විධියටයි සිටියේ.

ආරුශි ඔය විදියට ගෙදර මෙහෙකරු සමඟ කාලය ගත කරමින් සිටියා. වේලාවද කෙමෙන් කෙමෙන් ගෙවී ගොස් කළුවර වැටෙන වේලාවෙදී ආරුශිගේ මව නුපූර් නිවෙසට පැමිණියා. එහෙත් රාජේශ් නම් තවම නිවෙසට පැමිණෙන ලකුණක් පෙනෙන්න තිබුණේ නැහැ. මොකද සායනය 7ට වැහුවත් ඔහුට සායනයට අමතර රාජකාරි ඕනෑ තරම් තිබුණා. ඒ නිසා දිනපතා රාත්‍රි 9 පසු වෙලා තමයි රාජේශ් නිවෙසට පැමිණෙන්නේ.

රාත්‍රි 9.30ට පමණ සුපුරුදු පරිදි ඔහුගේ රියැදුරු සමඟ කාර් රථය නිවෙස තිබෙන 25 වැනි අංශයට පැමිණි අතර කාර් රථය රථ ගාල වෙත දමා රාජේශ් රියැදුරු උමේශ් සමඟ නිවෙසට ගොඩ වෙනවා. උමේශ් නිතරම තල්වාර් නිවෙසට යන එන අතර නූපූර් මහත්මිය උමේශ් හට සංග්‍රහ කරන්නද අමතක කළේ නැහැ. ඔහොම සුළු මොහොතක් ගෙවී ගිය පසු උමේශ් ඔහු ජීවත් වන නිවෙස වෙත යෑමට පිටත් වෙනවා. ඉතින් මේ ගෙවී යන්නේ ආරුශි තල්වාර්ගේ අවසන් පැය කිහිපයයි. ඉදිරි පැය කිහිපය ඇතුළත ඇය මෙලොවින් සමුගන්න නියමිතයි. රියැදුරු උමේශ් තමයි ආරුශි තල්වාර් ජීවත්ව සිටිනවා දැකපු අවසාන පිටස්තරයා වූවේ.

රාත්‍රි කෑම සඳහා පවුලේ අය හැමෝම මේසෙට ගියා. කෑම පිසීම වෙනදා වගේම හෙම්රාජ් විසින් සිදු කළ අතර පවුලේ අය ආහාර ගත් පසු හෙම්රාජ්ද ඔහුට නවාතැන්ගෙන සිටීමට දුන් කාමරයට වී ආහාර ගත්තා. ඉතින් තව ටික දිනකින් විශේෂ දවසක් උදාවෙනවා. ඒ තමා ආරුශි තල්වාර්ගේ 14 වැනි උපන්දිනය. උපන්දිනය යෙදී තිබුණේ මැයි 24 වැනිදා වුවත් ඇයට තෑගි කලින්ම ලැබෙන්නයි යන්නේ.

රාත්‍රි කෑමෙන් පසුව හෙම්රාජ් පිඟන් සහ අනෙකුත් භාජන පිරිසුදු කර කාමරයට ගිය පසු ආරුශිද නින්දට යන්න සැරසුණා. ඇය කාමරයට ගොස් ‍දොර අඩවල් කර තැබූ අතර හොරෙන් හොරෙන්ම නූපූර් ආරුශිගේ කාමරයට පැමිණියා. ඇය ආරුශිව පුදුම කළේ ඇය අතේ තිබූ අලුත්ම Sony DSC W 130 කැමරාව පෙන්නමිනුයි.

මේක සාමාන්‍ය සිදුවීමක් කියන්න බැහැ. මොකද මොනම හේතුවකටවත් උපන්දිනයකට පෙර මෙහෙම තෑග්ගක් දෙන එක සැක සහිතයි. මොකද දින 9කට කලින් තෑග්ගක් ලැබීම දුර්ලභ සිදුවීමක් නිසා. ඒකත් ආරුශි මැරෙන දවසෙමයි. හරියට නූපුර් ආරුශි මැරෙන බව දැන සිටියා වගෙයි. ඒ කොහොම වුණත් උපන්දිනේට සුබ පතලා ඇය එතැනින් ඉවත් වෙනවා. ඒත් නැවත වාරයක් ඇයට ආරුශිගේ කාමරයට පැමිණෙන්න සිද්ද වෙනවා. ඒත් ඒ වෙලාව වෙනකොට ආරුශි හොඳටම නිදාගෙනයි හිටියේ. සාමාන්‍යයෙන් තල්වාර් පවුලේ වැඩිහිටියන් දෙදෙනා නින්දට යනකොට පාන්දර 12 කිට්ටු වෙනවා. ඉතින් ආරුශිගේ පියා අන්තර්ජාලයේ යම් වැඩක් කර කර සිටියදී එකපාරම සම්බන්ධතාව අවහිර වූ නිසයි නැවත වාරයක් නුපූර්ට ආරුශිගේ කාමරයට එන්න සිදු වෙන්නේ. මොකද WiFi රවුටර් එක තිබුණේ ආරුශිගේ කාමරයේ වීම නිසා. අන්තර්ජාල අවහිරවීම නැවත සකසා කාමරයෙන් පිටතට යන නූපුර් නිදාගැනීම සඳහා තල්වාර් යුවළ නිදාගන්න කාමරය වෙත ගියා. සුළු මොහොතකට පසු රාජේශ්ද නිදා ගැනීම සඳහා කාමරයට ගිය අතර විදුලි පහන් සියල්ලම ඔහු විසින් නිවා දැමුවා.

නිවසට ඇතුළු වීමට තිබෙන ප්‍රධාන දොරෙන් ඇතුළු වූ පසු පෙනෙන්න තිබෙන්නේ දෙපැත්තේ බිත්ති දෙකක් සහ මීටර් කිහිපයක් ඉදිරියෙන් නැවතත් ප්‍රධාන දොරක් පමණයි. දකුණු පැත්තේ බිත්තියේ තව දොරක් තිබෙනවා. ඒ හෙම්රාජ්ගේ කාමරයේ දොරයි. ප්‍රධාන දොරෙන් පිවිසුණු පසුව දෙපැත්තේ තිබෙන බිත්ති දෙක අතරින් මීටර් දෙකක් විතර ගියාම නිවෙස තුළට යන ප්‍රධාන දොර හමුවෙනවා.

ඒ දොරෙන් ඇතුළු වූවායින් පසුව තමා තල්වාර් නිවෙසේ සාලයට යෑමට හැකි වන්නේ. තල්වාර් නිවෙසෙ සාලයේ දකුණු කෙළවරට වෙන්න තව දොරක් තිබෙනවා. ඒ දොරත් හෙම්රාජ්ගේ කාමරයට යෑමට හැකි දොරක් වන අතර සාලයට පිටින් සහ ඇතුළෙන් යන දෙවිධියටම හෙම්රාජ්ගේ කාමරයට ඇතුළු විය හැකිය. සාලය පසු කර කෙළින්ම ගියාම වම් අත පැත්තෙන් තල්වාර් දෙපළගේ කාමරය සහ දකුණු පැත්තෙන් ආරුශිගේ කාමරය මෙන්ම තව ටිකක් ඉදිරියට ගියාම නිවෙසේ කුස්සිය හමු වෙනවා.

ඉතින් පෙර කී පරිදි රවුටරේ සිග්නල් ප්‍රශ්නය නිසා කාමරයට ආ නූපුර් නින්දට ගිය පසුව රාජේශ්ද සුළු මොහොතකට පසු නින්දට යනවා. ඒ නිසාම රවුටර් එක පාන්දර 12.08ට පසුව කවුරුත් භාවිත කරලා තිබුණේ නැහැ. ආරුශිව ඝාතනය කළ ඝාතකයා 12ත් 1ත් අතර පැය තුළදී පැමිණෙන්නට ඇතැයි සිතන්නට පුළුවන්. එහෙත් ආරුශි විසින් පාන්දර 12.30ට පමණ මිතුරකුගේ ජංගම දුරකථනයක් වෙත ඇමතුමක් ලබා දුන් නිසා ඝාතකයා පැමිණ ආරුශි ගොදුරු කරගැනීමට බලා සිටියාද කියන ගැටලුව පැන නැඟෙනවා. මොකද මරණ පරික්‍ෂණ වාර්තාවලට අනුව ආරුශි මිය ගොස් තිබෙන්නේ  පාන්දර 1ට කිට්ටුවෙනුයි.

2008 වර්ෂයේ මැයි 16 වැනි දින කෙමෙන් කෙමෙන් ගෙවී ගොස් උදෑසන හිරු පායන යාමයේ අනෙක් මිනිසුන් දෛනික වැඩවල නිරත වීම ආරම්භ වූවා. සුපුරුදු පරිදි උදෑසන 6ට පමණ කිරි ගෙනෙන තැනැත්තා වන භාරති, තල්වාර් නිවෙසේ පළමු ප්‍රධාන දොර ළඟ තිබෙන සීනුව නාද කරන්න වුණා. ඒත් වෙනදා මෙන් නොව කිරි ගැනීමට කවුරුත් නිවෙස ඉදිරියට පැමිණියේ නැහැ. වෙනදා නම් කිරි ගැනීමට පැමිණෙන්නේ නිවසේ මෙහෙකරු හෙම්රාජ් වුවත් එදින හෙම්රාජ් නොපැමිණි නිසා භාරති නැවත නැවතත් සීනුව නාද කරන්න වුණා.

දිගින් දිගටම සීනුව නාද වූ නිසා නින්දේ සිටි නූපුර් අවදි වී ප්‍රධාන ‍දොර වෙත පැමිණියා. එහෙත් ප්‍රධාන දොර විවෘත කළද ප්‍රධාන දොරට පිටතින් තිබෙන යකඩවලින් තැනූ ආරක්‍ෂක ගේට්ටුව පිටතින් අගුළුලා තිබුණා. සාමාන්‍යයෙන් මෙලෙස අගුළුලා පිටතට යන්නේ හෙම්රාජ් පමණයි. ඒ නිසා හෙම්රාජ්ට භාරති විසින් දුරකථන ඇමතුමක් ගත්තද පිළිතුරු නොදුන් නිසා නූපුර් නිවෙස තුළ තිබෙන යතුරක් භාරතිට දීලා ඇය ලවා ආරක්‍ෂක ගේට්ටුව විවෘත කරගන්නවා.

එලෙස භාරතිගෙන් කිරි බෝතල් ගන්නා නූපුර් නැවත නිවෙස තුළට පැමිණියා. ඇය පැමිණෙනවාක් සමඟම නිවෙසේ සාලය වෙත රාජේශ්ද පැමිණි අතර ඔහු දකිනව සාලය මැද මේසය උඩ තිබෙන විස්කි බෝතලයක්. නූපුර් සිතුවේ එය පානය කළේ රාජේශ් විසින් කියායි. එහෙත් රාජේශ් විස්කි බෝතලයක් පෙර දින රාත්‍රියේ නොබිව් බවට තහවුරු කළ නිසාම එම විස්කි බෝතලයේ අයිතිකරු කවුරුන්දැයි නොදන්න නිසා එය හෙම්රාජ් බීපු විස්කි බෝතලයක් බවට සිතන්නට වුණා. එහෙත් හෙම්රාජ්ට එවැනි මිලෙන් අධික මත්පැන් වර්ගයක් බීමට අවශ්‍යතාවක් නොමැති බව සිතූ රාජේශ්ට යම් සැකයක් ඇති වූවා.

ඉතින් මේ බෝතලය අමුත්තක් නිසාත් හෙම්රාජ් නිවෙසේ නොමැති නිසාත් රාජේශ් පොඩ්ඩක් සෝදිසි කරල බලනවා. සෝදිසි කිරීම සඳහා රාජේශ් සහ නූපූර් සමඟ කිරි රැගෙන ආ භාරතිද එක් වූවා. සාලය සහ හෙම්රාජ්ගේ කාමර සෝදිසි කළ අතරතුර රාජේශ් දකිනවා ආරුශිගේ කාමරයේ දොර යාන්තමින් ඇරිලා තිබෙනවා. රාජේශ් සිතුවේ ආරුශි අවදි වී ඇතැයි කියායි. මොකද ආරුශිගේ කාමරයේ ‍දොර ඇරිය හැක්කේ ඇතුළතින් පමණයි. පිටතින් අරිනවා නම් අනිවාර්යයෙන්ම  දොරේ යතුර තිබිය යුතුයි. යතුර තිබෙන්නේද රාජේශ් සහ නූපූර් නිදාගන්න කාමරයේ ඇඳ අසල මේසේ උඩයි. ඉතින් කෝකටත් කියලා රාජේශ් ආරුශිගේ කාමරය සෝදිසි කර බලනවා.

ආරුශිගේ කාමරයේ ‍දොර අරින රාජේශ් දකින්නේ ලේ විලක් මැද මිය ගොස් වැටී සිටින තමන්ගේ දියණියයි. ඔහුට එය උහුලාගත නොහැකිව කාමරයෙන් ඉවතට පැමිණ වැලපෙන්නට පටන් ගත්තා. රාජේශ්ගේ හැසිරීම දැකලා කාමරය වෙත ගිය නූපූර් එතැනම ගල් ගැසූ අතර ඇය එතැන් පටන් සුළු මොහොතක් යන තුරු ගල් පිළිමයක් වගේ බලාගත් අතේ බලා සිටීමට වුණා. මෙය භාරතිටද උසුලාගත නොහැකි වූවා. මක් නිසාද උදේ සවස නිතර දෙවෙලේ දකින ලස්සන දියණිය කෘෘර ලෙස ඝාතනය වී සිටිනවා දැකීම ඇය සිහිනයකින්වත් හිතපු දෙයක් නොවෙයි. නිවෙස තුළ කෑ ගසා හඬන ශබ්දය ඇසුණ අසල්වාසීන් තල්වාර් නිවෙසට එක් රොක් වූවා. ආරුශි තල්වාර්ගේ උගුරු දණ්ඩ වෙන් වෙන පරිදි තියුණු පිහි පාරකින් කපා දමා තිබෙනවා දැකපු අසල්වාසීන්ද භීතියට සහ ශෝකයට පත් විය.

තල්වාර් පවුල කෙතරම් උසස් පවුලක් වුවත් කෙතරම් මුදල් තිබෙන පවුලක් වුවත් ඔවුන් ජීවත් වූ මෙම නිවෙස මිනිසුන් 20කට 30කට සිටිය හැකි නිවෙසක් නෙවෙයි. ඉතින් උදෑසන 7ට පමණ පොලිසිය පැමිණෙන විට තල්වාර් නිවෙස තුළ 25 වැනි අංශයේ සිටි මිනිසුන් විශාල ප්‍රමාණයක් ආරුශිගේ සිරුර බලන්න පැමිණි සිටි නිසා නිවෙස තුළ ඉතිරිව තිබූ ඇඟිලි සලකුණු හෝ සාක්‍ෂි සියල්ලම විනාශ වෙන්නට ඇතැයි සිතන්න පුළුවන්. කෙසේ හෝ මේ සිදුවීම ප්‍රචාරය වීම නිසා උදෑසන 8 පමණ වන විට මාධ්‍යවේදීන් පවා නිවෙස වෙත පැමිණ සිටියා.

ඉතින් මේ වෙනකොට හෙම්රාජ් අතුරුදන්. උදෑසන 6ට එළියට ගියා යැයි සිතූ හෙම්රාජ් නැවත ගෙදර නොපැමිණීම නිසා පොලිසියේ සැකය ඔහු වෙත යොමු වුණා. ආරුශිගේ පියා ඉන්දියානු මුදල්වලින් රුපියල් 25,000ක් පොලිසියට දීලා පොලිස් නිලධාරීන් කිහිප දෙනෙක් හෙම්රාජ්ගේ නිවෙස පිහිටා තිබෙන ගම්මානය පරීක්‍ෂා කිරීමට පිටත් කර යැව්වා. ආරුශිගේ සිරුර එදින උදෑසනම පරීක්‍ෂා කිරීම සඳහා පරීක්‍ෂණාගාරයට යැවූ අතර එදිනම රාජේශ් විසින් මරණ පරීක්‍ෂණ ප්‍රතිඵලය ලබාගන ඊට පහුවදා ඇයව ආදාහනය කරලා ඔවුන්ගේ චාරිත්‍රවලට අනුව ආරුශිගේ මිනී අළු ගඟේ පා කරන්න යෑමටද සූදානම් වූවා. මේ දේවල් හරි ඉක්මනටයි සිදු වුණේ.

ඉතින් මේ විධියට ගඟේ අළු පා කරපු රාජේශ් සහ නූපූර් චාරිත්‍ර සියල්ලම අවසන් කර වාහනයට ගොඩ වී නිවෙස වෙත පැමිණෙනවා.

දැනට ඝාතකයා ලෙස හංවඩු ගැහිලා ඉන්නේ හෙම්රාජ් නිසා ඔහු සැඟවී සිටිනවා යැයි සැක කරන ස්ථානය සොයා යෑම සඳහා පොලිසියට රජේශ් විසින් මුදල්ද ලබා දුන්නා. ඉතින් පොලිසිය පිස්සුවෙන් වගේ හැම අස්සක් මුල්ලක් නෑරම  හෙම්රාජ්ව සොයා ගියා. ඔහුගේ උපන් ගමට පවා පොලිසිය යැවූවත් ඔහු කාලෙකින් ඒ ප්‍රදේශයට නොපැමිණි බව ගම්වාසීන් දන්වා සිටියා. ඉතින් හෙම්රාජ්ව මේ විධියට දින දෙකක් තිස්සේ සොයලා ඔහුව අවසානයේදී හම්බවෙනවා. හෙම්රාජ්ව හම්බවුණා කියල රාජේශ්ට ඇමතුම එන්නේ ආරුශිගේ මිනී අළු පා කරලා නිවෙසට පැමිණෙමින් සිටින විටයි.

ඔවුන් 25 වැනි අංශයට පැමිණෙන විට 25 වැනි අංශයේ සෙනඟ විශාල ප්‍රමාණයක් පිරී සිටියා. ඒ වෙන මොකක්වත් නිසා නෙමේ මෙතෙක් සැඟවී සිටි හෙම්රාජ් සොයාගත් පණිවුඩේ ලැබුණ නිසායි. ඉතින් හෙම්රාජ් බැලීමට නම් තල්වාර් පවුල ජීවත් වූ ගොඩනැඟිල්ලේ උඩම කොටසට යා යුතුයි. ගොඩනැඟිල්ලේ උඩම කොටසට ගියත් හැබැයි හෙම්රාජ් ළඟට රාජේශ් සහ නූපූර්ට යෑමට හැකි  වුණේ නැහැ. මොකද ඒ වෙනකොට හෙම්රාජ් මිය ගොස් දින දෙකක් පමණ වෙනවා. මුළු උඩු මහලම මළ සිරුර කුණු වෙච්ච ග‍ෙඳන් පිරිල ගිහින් තිබුණේ. ඒ අසල හුස්ම ගැනීමට පවා අපහසු වෙන තරමට හෙම්රාජ්ගේ සිරුර නරක් වී තිබුණා. එහි තේරුම නම් ඔහුත් මිය ගොස් තිබෙන්නේ ආරුශි තල්වාර් මිය ගිය රාත්‍රියේදීමයි.

මෙතෙක් වෙලා සැකකරුවකු වී සිටි හෙම්රාජ් සැකකරුවන්ගේ ලැයිස්තුවෙන් ඉවත් වෙලා යන්නෙ අවාසනාවන්ත විධියට ඔහුත් ආරුශි ඝාතනය වූ වෙලාවෙම ඝාතනය වූ නිසයි. ඉතින් ඒ නිසා අදටත් මේ ද්විත්ව ඝාතන සිද්ධිය අබිරහසක් වී සැකකරුවන් සෑහෙන පිරිසක් මේ වෙනකොට සිටින නඩුවක් බවට පත් වී හමාරයි.

ඒ වගේම මරණ පරීක්‍ෂණයෙන් ලොකු දෙයක් ඔප්පු වීම නිසා මෙම පැටලිලි සහගත ඝාතන ද්විත්වය අපට යම්තාක් ලෙහා ගැනීමට හැකි වෙනවා. ඒ ඔප්පු වූ දෙය නම් ආරුශි තල්වාර් මිය යන විට කන්‍යාවක් නොවී සිටීමයි. ඇය මිය යන අවස්ථාවේ දූෂණය වූ ලකුණක් සොයාගැනීමට නොහැකි වූ අතර කාලයකට කලින් ඇයගේ කන්‍යාභාවය කවුරු විසින් හෝ කෙලෙසා දමා ඇති බවට මරණ පරීක්‍ෂකවරු සොයාගෙන තිබෙනවා. එමෙන්ම ඇය කන්‍යාභාවය නැතිකරගත්තයින් පසුව කිහිප වතාවක්ම ලිංගිකව එක් වන්නට ඇතැයි පරීක්‍ෂකවරු අදහස් ප්‍රකාශ කර සිටියා.

ඉතින් අපිට මේ සම්පූර්ණ කතාව ගැනම ආපහු හැරී බැලුවායින් පස්සේ නිගමනයකට එන්නට පුළුවන් ආරුශි තල්වාර්ගේ පෙම්වතා වයස 45ක හෙම්රාජ් බවට. මක් නිසාද පාසල් ඇරී නිවෙසට පැමිණි පසු රාත්‍රි වනතුරුම ආරුශි සිටින්නේ හෙම්රාජ් සමඟයි. ඒ වගේම ආරුශි ඝාතනය කළ වෙලාවට ආසන්න මොහොතකදී හෙම්රාජුත් ඝාතනය වීම. ඉතින් මේ දේවල් දිහාට හැරුණම අපිට හිතන්න වෙන්නේ මේ අයගේ සම්බන්ධයට අකැමැති කෙනෙක් මේ ඝාතනය කළා කියලයි.

එතකොට ඝාතකයා කවුද? ලොකුම සැකය එල්ල වෙන්නේ ආරුශිගේ පියා වන රාජේශ් වෙතටයි. දෙවැනි සැකය එල්ල වෙන්නේ ආරුශිගේ මව නූපූර් වෙතටයි. මක් නිසාද රාජේශ් යනු පරම්පරාගත නම්බුවක් ඔළුවේ තබාගෙන නම්බුවට කැළැලක් නොවී සමාජයේ ඉහළ තත්ත්වයක සිටීමට අවශ්‍ය බවට විශ්වාස කළ අයෙක් වීමයි. ඉතින් ඒ නිසා ආරුශිගේ සහ හෙම්රාජ්ගේ ලිංගික සම්බන්ධතාව සහ ආදර බැඳීම සමාජගත වුවහොත් හරි හෙම්රාජ් විසින් පිට අයට කිව්වොත් හරි නම්බුවට කැළැලක් වේ යැයි සිතා නූපූර්වත් හවුල් කරගෙන මේ ද්විත්ව ඝාතනය සැලසුම් කරන්නට ඇතැයි සිතන්නට පුළුවන්. එමෙන්ම ඉතිරි වූ සාක්‍ෂි තිබේ නම් ඒවා විනාශ කිරීමට සිතාගන සිතාමතාම 25 අංශයේ මිනිසුන්ට නිවෙස තුළටම පැමිණ සිරුර බැලීමට ඉඩ දීමත් රාජේශ්ගේ සැලසුමේ කොටසක් විය හැකියි. අනිත් කාරණය නම් පැය දෙකක් යන්නත් කලින් මාධ්‍ය ආයතනවලින් පවා මෙතැනට ගෙන්නුවේ රාජේශ් විසින් කියලත් හිතන්නට පුළුවන්. ඊට අමතරව පොලිසියේ අවධානය හෙම්රාජ් වෙත යවා නිලධාරීන් කිහිප දෙනෙක්ව හෙම්රාජ්ගේ ගමට යැවීමත් පොලිසිය නොමඟ යැවීමට කළ උපක්‍රමයක් විය හැකියි.

ඉතින් මේ දේවල් ඔප්පු කරගන්න නම් කිසිම වෙලාවක සාක්‍ෂියක් හමුවූයේ නැහැ. ඉහතින් සඳහන් කරනු ලැබුවේ මේ වනවිට බහුතරය විසින් පිළිගන්න මතයක් පමණයි. ඒ කොහොම වුවත් ඝාතකයා කවුරු වුවත් මොන වරද කළත් වයස 13ක දරුවෙක් මරා දැමීමට ඔහුගේ සිත කෙතරම් දූෂිත විය යුතුද?

උපුටා ගැනීම මව්බිම