ඔළුව විකාර කරවන හිත බය කරවන සේරා නෝනාගේ අද්භූත බංගලාව.

හොල්මන් ඉන්න ගෙවල් ගැන අපි නිතර අහල දැකල තිබෙනවා. සාමාන්‍යයෙන් හොල්මන් ගෙයක් කියන්නෙ මීට වසර ගනණකට ඉහතදී මිය ගිය පුද්ගලයකුගේ ආත්මය ඒ නිවෙසේ සිටීමයි. ඉතින් ඒ වගේ හොල්මන් ගෙදරක සාමාන්‍යයෙන් හොල්මන් කරන්නේ ඒ නිවෙසේ මුල් පදිංචිකරුවන්. අපි මෙවැනි කතා අනන්ත අප්‍රමාණව අසා තිබුණත් Winchester Mystery House විදිහට හඳුන්වන්නේ ඇත්තටම දකින කෙනෙක් හොල්මන් වෙලා යන ගෙදරක්.

මෙහි මුල් පදිංචිකරුවන් වන්නේ සේරා වින්චෙස්ටර්. 1839 වර්ශයේදී උපත ලබන සේරා වින්චෙස්ටර් තමා මේ මොළේ විකාර වෙන හොල්මන් ගෙදර නිර්මාණය කිරීමට මූලික වූ තැනැත්තිය. ඇයගේ උපන් නාමය වනුයේ සේරා ලොක්වුඩ් පර්ඩි. සේරා වින්චෙස්ටර් යනුවෙන් නම වෙනස් වන්නේ ඇයගේ විවාහයෙන් පසුවයි. ඉතින් මෙවැනි ගෙයක් නිර්මාණය කරන එක ඇයට ඒ තරම් ලොකු දෙයක් නොවෙයි. හේතුව තමයි ඇය විවාහ වූ පුද්ගලයා ඉතාමත් ධනවත් කෙනෙක් සහ ඔහුගේ පවුල සමාජයේ උසස්  තැනකට හිමිකම් කීම. ඉගෙනීම අතින්ද ඉහළටම ගිය සේරා පර්ඩි පාසල් සමයේදී හාදකම් කිහිපයක් පැවැත් වුවත් ඇය ඉගෙනීමෙන් පසුව විවාහ ජීවිතය සඳහා තෝරාගනු ලැබුවේ විලියම් වින්චෙස්ටර්වයි. ඇය විලියම්ව විවාහ කරගත් නිසා විලියම්ගෙ වාසගම භාවිත කරන්න සිදු වූවා. ඉතින් ඒ නිසාම ඇයගේ නම සේරා ලොක්වුඩ් පර්ඩි කියන නමින් මිදී සේරා ලොක්වුඩ් වින්චෙස්ටර් ලෙස වෙනස් වූවා වගේම ප්‍රසිද්ධියක්ද උසුල්ලනට වුණා.

මේ දෙදෙනා ආදරය කළා සෑම දෙයකටම ඔවුන් දෙදෙනා එකටම සිටියා. ඔහොම කාලය ගෙවීගෙන යනකොට සේරාට සතුටු දායක ආරංචියක් ලැබෙනවා. ඒ ඇය ගැබ්ගෙන ඇති බවයි. ඇය වයස අවුරුදු 27දී මෙලොවට දියණියක් බිහි කළා. ඇත්තෙන්ම සතුටුදායක සිදුවීමක් වුවත් දියණිය සේරාගෙ සහ විලියම්ගෙ සිත් බිඳ දමමින් මාසයකටත් වඩා අඩු කාලයක් ආයු වළඳා මෙලොව හැර දමා ගියා. ඒ සිද්ධියෙන් පස්සෙ සේරා වින්චෙස්ටර් ලොකු මානසික පීඩනයකට ලක් වෙනවා. ඒ වගේම ඒ ඔවුන් දෙපළගෙ පළමු මෙන්ම අවසාන දරුවාද වූවා.

ඉතින් කාලය සමඟම සේරා මේ දේවල් විඳ දරාගෙන හිත එක තැනකට ගෙන කාලයක් ජීවත් වූවා.

මෙලෙස වසර 15ක් ගෙවී ගිය සේරාගෙ ජීවිතය තව තවත් අදුරු වෙන්නට ගත්තේ ඇය ආදරය කළ සැමියාද  ඇයව හැරදමා මෙලොවෙන් නික්ම ගිය පසුවයි. සේරාට වයස 42ක් වී තිබියදියි විලියම් වින්චෙස්ටර් මියගියේය. 1881 වර්ෂයේදීයි. ඉතින් ඔහුගේ වියෝව නිසා ඔහුගේ ව්‍යාපාරවලින් 50%ක තරම් විශාල කොටස් ප්‍රමාණයක් සේරා සතු වෙනව. එහි වත්කම ඩොලර් මිලියන 20ක්. එනම් වර්තමානයේ ඩොලර් මිලියන 500කට වඩා වැඩි ධනස්කන්දයක්.

විලියම් වින්චෙස්ටර් කියන්නෙ මේ කතාවෙ එක් චරිතයක් පමණක්ම නොවෙයි. ඔහු සැබවින්ම ලොව හිටපු ජනප්‍රිය ව්‍යාපාරිකයෙක්. ඔහු වෙළෙඳාම් කළේ වෙන මොනවත් නොවෙයි අවි ආයුධ. වින්චෙස්ටර් රයිෆල් කාලෙ වෙළෙඳපොළේ යම් කොටසක් ආක්‍රමණය කරලයි තිබුණේ. ඉතින් මේ ව්‍යාපාර සේරා සතු වුණාට පසු ඇය ඩොලර් 1000ක් එනම් වර්තමාන මුදල්වලින් ඩොලර් 25,000ක් වැනි විශාල මුදලක් දිනකට ඉපයුවා.

නමුත් කොපමණ මුදල් තිබුණත් ඇයට තමන්ගෙ පාළුව මකාගන්න කිසිම විදියක් තිබුණේ නැහැ. විලියම් මිය ගිහින් වසර 3ක් පමණ ගත වුණා. 1884 වර්ෂයේදී සේරා වින්චෙස්ටර් විසින්  කැලිෆෝනියා ප්‍රාන්තයේ විකුණන්න දමා තිබූ විශාල ඉඩමක් මිලට ගන්නේ ඇයටම කියා නිවෙසක් සාදාගැනීම සඳහායි. ඇය තමාට ආවේණික විදිහට නිවෙස සාදාගන්න සිතූ අතර ඒ සඳහා සැලසුමක්ද ඇයට තිබුණා.

එහෙත් ඇය සිතුවේ කුඩාවට නිවෙස සාදා ගැනීමටයි. නමුත් නිවෙස සිතුවාට වඩා ලොකු මහල් නිවෙසක් බවට පත් වූවේ සේරාගෙ කැමැත්ත මතයි. ඉතින් මේ ලෝකෙ කවුරුත්ම හදන්නෙ නැති ජාතියෙ නිවෙසක් ඇය සාදා නිම කළා. සාමන්‍ය නිවෙසක පඩිපෙළ තිබෙන්නේ සෑම පඩියක්ම එකම ප්‍රමාණයටයි.

අපේ ගෙදරක එහෙම එක එක විදියේ උසවල්වලට පඩිපෙල් හැදුවොත් ඒ වැඩේ භාරගත්ත මේසන් බාස්ට බැනුම් අහන්න වෙනවා. ඒත් මේ ගෙදර නම් මක බාස් හදල වගේ තියෙන පඩිපෙල් ඔක්කොගේම පඩි එකකට එකක් වෙනස්. සමහර තැන්වල පඩිපෙළ උඩට පහළට ගියාට ඒ පඩි පෙල්වල කෙළවර තිබෙන්නේ එක්කො බිත්තියක් නැත්නම් වැඩකට නැති ‍ෙදාරක්.

මේ සමහර මහල්වල සිට ඉහළ බැලූ විට ඊට උඩ තට්ටුව පේන්නෙ ජනේලයක් හරහායි. ඉතින් මේ විදියට සම්පූර්ණ නිවෙසම ලීයෙන් නිම කරල තිබෙනවා. මේ විදියට නිවෙස නිමකර තිබූ නිසා ප්‍රදේශවාසීන් තුළ විවිධ කතා ගොඩ නැඟුණා. හොල්මන් නැතත් මේ ගෙදර ගෘහ නිර්මාණය සෑහෙන ගුප්ත නිසා නිවෙස සාදපු කාලයේ සිටම විවිධ කටකතා පැතිර ගිය නිසා මේ නිවෙස දිනෙන් දින ජනප්‍රියතාවට පත් වුණා. ඊටත් වඩා මේ තරම් විශාල නිවෙසක පදිංචිව සිටින එකම කෙනා වුණෙත් සේරා වින්චෙස්ටර් නිසා වට පිටාවෙ ඉන්න අයගෙ කුතුහලය තවත් වැඩි වුණා.

සිතෙන තරමට මේක පිස්සු බංගලාවක්. ඒ වගේම නිවෙස නිමවන්න වඩුවන් පැය 24ම වෙහෙසුණා කියල ඉතිහාස කතාවල සඳහන් වෙනවා.

නිවෙස සෑදීමට සාමාන්‍ය ලී ගැනීමට සේරාට වුවමනා වුණේ නැහැ. ඇයට අවශ්‍ය වූයේ නොදිරා කාලාන්තරයක් පවතින ලීවලින් නිවෙස සාදා නිම කිරීමටයි. එම නිසා ඇය නිවෙස සාදා නිම කිරීමට රෙඩ්වුඩ් ශාකය භාවිත කළා. ඒත්  ලීවලින් සැදූ නිවෙසක් බවට පෙනෙනවාට ඇය ඒ තරම් කැමැත්තක් නොදැක්වූ නිසා නිවෙසට යොදා තිබෙන ලී ඇයට අවශ්‍ය පාටවලින් වර්ණ ගන්වා ගත් අතර මෙම සුවිසල් මන්දිරය සම්පූර්ණයෙන් තීන්ත ආලේප කිරීමට මහත් වෙහෙසක් දරන්නට වුණා. එමෙන්ම ගැලුම් 20,000ක් පමණ තීන්තද අවශ්‍ය වූ අතර දින කිහිපයක් තිස්සේ මහන්සි වී වැඩ කිරීමට තීන්ත ආලේප කරන්නට පැමිණි මිනිසුන්ට සිදුවුණා.

මෙම මහල් නිවාසය කෙතරම් විශාලද යන්න කියනවා නම් නිවෙස කාමර 161කින් යුක්තයි. මහල් කිහිපයකින් යුත් මේ සුවිසල් නිවෙසේ ජනේල් පියන් 10,000කට අධිකයි. නිවෙස වැඩි හරියක් දැවවලින් සාදා නිමකර ඇති නිසා ගින්නක් හට ගත්තොත් එය නිවීම සඳහා ගිනි නිවීමේ උපකරණ සහිත ස්ථාන 47ක් මෙහි පිහිටා තිබෙනවා. මෙහි ආරම්භක සමයේදී මහල් 7ක් තිබූ බවට කියවුණත් අද වන විට මුල් කාලයේදී තිබූ නිවෙසෙන් අඩක් පමණයි දැකගන්න ලැබෙන්නෙ. හේතුව තමා 1904 වර්ෂයේදී පැමිණි භූකම්පනය. ඒ වන විටත් සේරා වින්චෙස්ටර් ජීවත්ව සිටි අතර ඇය භූකම්පනය නිසා කැඩී ගිය නිවෙස නැවත අලුත්වැඩියා කළා.

 කොයි තරම් විශාල නිවෙසක් වුණත් මේ නිවෙස බලා කියාගන්න කාමර පිරෙන තරම් මිනිසුන් සිටියේ නැහැ. සිටිය එකම කෙනා සේරා පමණයි. මං කලින් කිව්වනේ මේ ගෙදර පඩිපේළි සහ කාමරවල වහලයෙ සවි කරල තිබෙන ජනේල ගැන. ඊට අමතරව මේ නිවෙසේ ඇතැම් ‍ෙදාරවල් පිහිටා තිබෙන්නේ ඉහළ මහලයන්වල. ඒ ‍ෙදාරවල් බැලූ බැල්මට ලස්සන වුණත් ලොකු භයානක කමක් තිබෙනවා. හේතුව තමා නොදන්න කෙනෙක් ඒ ‍ෙදාරවල් ඇරගෙන නිවෙසින් එළියට එන්න උත්සාහ කළොත් තට්ටු දෙකකින් විතර බිමට වැටෙන්න වෙනවා. සරලවම කිව්වොත් ඒ ‍ෙදාරවල් උඩ තට්ටුවල ඉඳල නිවෙසින් පිටට එන්නයි නිර්මාණය කරල තියෙන්නේ. මෙවැනි ‍ෙදාරවල් සේරා මොනවාට නිර්මාණය කළාද කියල නම් හිතාගන්න බැහැ. එමෙන්ම සේරා වින්චෙස්ටර් මේ අමුතු නිවෙස සැදුවෙ මියගිය විලියම් සහ ඇගේ දියණියගේ ආත්ම ගෙන්වා ගැනීමට කියල මිනිසුන් විශ්වාස කරන්න ගත්තා. ඉතින් සේරා මේ නිවෙසෙ හොල්මන් සමඟ ජීවත් වූවාද කියන්න නම් දන්නේ නැහැ සාක්ෂි නැති නිසා. විලියම් වින්චෙස්ටර් රයිෆල් සමාගමක අයිතිකරුවෙක් නිසා ඔහුගෙ සමාගමෙ නිෂ්පාදිත රයිෆල්වලින් මිය යන මිනිසුන්ගෙ ආත්මවලට නවාතැන් ගැනීමට මෙතරම් විශාල නිවෙසක් ඉදිකළා කියලත් සමහර මිනිස්සු විශ්වාස කළා. ඒ කොහොම වුණත් මේ හොල්මන් ගෙදර හොල්මන් නැතත් ඇත්තටම හොල්මන් වෙලා යන විදිහට නිර්මාණය කරල තිබෙනවා. තවත් අමුතුම දෙයක් තමා මේ නිවෙසෙහි කාමරවලින් කාමරවලට වෙනම සම්බන්ධ වෙන ‍ෙදාරවල් තිබීම. සේරා මේ දොරවල් තබන්නට ඇත්තෙ වින්චෙස්ටර් නිවෙසට පැමිණෙන හොල්මන්වලට අපහසුවක් නොවෙන්න කාමර වෙත යෑමට කියලයි ඇතැමකුගේ මතය වෙන්නේ.

ඉතින් මේ වෙනස්ම තාලයේ නිවෙස තුළ ජීවත් වූ සේරා අවාසනාවන්ත විදිහට 1922දී මිය පරලොව ගිය පසු මෙම නිවෙසේ භාරකාරිත්වය ලැබෙන්නේ සේරාගෙ ලේලියක වූ මේරියන්ටයි. මේරියන්ට නම් මේ නිවෙස සේරාට තරම් වැදගත් දෙයක් වුණේ නැහැ. ඇයට අනුව මේ නිවෙස වැඩ බැරි වඩු බාස්ලා, මේසන් බාස්ලා හදපු නිකම්ම නිකන් විකාර නිවෙසක් විතරයි. ඒ නිසා ඇයට මෙම නිවෙස වෙන්දේසි කිරීමට අවශ්‍ය වෙනවා. නමුත් මේරියන්ට ලේසි වුණේ නැහැ. නිවෙසේ  සියලුම භාණ්ඩ සහ නිවෙස විකුණා දමන්න සති 6ක් ගත වෙලා තිබෙනවා.

අවසානයේදී නිවෙසේ බඩුමුට්ටු වෙන්දේසි කර නිවෙස විකුණා දමන්නේ ඩොලර් 135,000ක් වැනි මුදලකටයි. මේ දේවල් වුණේ සේරා මැරිල ලොකු කාලයක් ගත වෙලා නම් නොවෙයි. ඇය මියගොස් මාසයක පමණ කාලයකින් වෙන්දේසිය ඇරඹුණු අතර සති 6ක් මුළුල්ලේ වෙන්දේසිය පැවතිලා අවසානයේදී නිවෙස මිලදීගත් පුද්ගලයා නිවෙස සංචාරක හෝටලයක් බවට පත් කරගෙන මුදල් ඉපයීම ආරම්භ කළා. නවාතැන් පහසුකම් සහ කෑම බීම සෑම දෙයක්ම එහි තිබූ බවට සඳහන්.

මෙතෙක් හිතාගෙන සිටි නිවෙසට වඩා ඇත්තෙන්ම මෙහි ගැඹුරක් තිබෙන බව වටහා ගැනීමට නිවෙස මිලට ගත් පුද්ගලයාට ටික කාලයක් ගියා. මෙහෙම මාස කිහිපයක් ගෙවී ගිය පසු මිලට ගත් තැනැත්තාට නිවෙසේ තිබී රහස් කාමර කිහිපයක් හමු වී තිබෙනවා. ඒවා සේරා විසින් හරියාකාරව සඟවා තබාගෙන සිටි අතර කාමර සාමාන්‍ය කාමර මෙන්ම ලස්සනට හැඩගන්වා තිබුණා. එපමණක් නොව 2016 වසරේ, එනම් මේ මෑත කාලයේදීත් වින්චෙස්ටර් නිවෙසේ රහස් කාමරයක් සොයාගෙන තිබෙනවා. මේ නිවෙසට පැමිණි සංචාරකයන්ගේ අදහස් අනුව නිවෙස ඔවුන්ගේ මනස විකාර කරන්නට සමත් වූ අතර මෙවැනි ගෘහ නිර්මාණ ශිල්පයක් මින්පෙර දැක නැති බවට අදහස් දක්වා තිබෙනවා. මේ වෙනකොට මෙම නිවෙස නැරඹීමට විවෘත කර ඇති අතර මෙම නිවෙසට පැමිණෙන බොහෝ අය කියා සිටින්නේ තමන්ට ගුප්ත බවක් දැනෙනවා වගේම නිවෙස සකසා තිබෙන ආකාරය දකින විට අමුතු භීතියක්ද දැනෙන බවයි. ඒත් සමහර අයෙක්ට නම් මෙහි ගෘහ නිර්මාණය හාස්‍යයට කරුණක් වී තිබෙනවා. සේරා වින්චෙස්ටර්ගේ ආත්මය මෙම නිවෙසේ අදටත් තිබෙන බවට මතයක් තිබෙන නිසාම සමහර අය එය තදින්ම විශ්වාස කරනවා. ඒ කොහොම වුවත් කාලය ගෙවී ගොස් වසර 100කට වඩා කාලයක් මේ භූමියේ තිබෙන මේ මහල් නිවෙස අද වන විට පැරණි බව නිසාම ගුප්ත පෙනුමකින් බලාගන්නට පුළුවන්.

ජීවිතයේ වැඩියෙන්ම ආදරය කළ තම සැමියා වන විලියම් වින්චෙස්ටර් සහ දියණිය මියයෑම ඇයට තදින්ම දැනෙන්නට ඇති. ඒ නිසාම ඇයට දැනුණු පීඩනය නිසාම මෙවැනි අද්භූත නිවෙසක් නිර්මාණය කිරීමට පෙලඹෙන්නට ඇති. මොකද මුදල්වලින් අඩුවක් ඇයට තිබුණෙත් නැති නිසා. තනිව ජීවත් වීම කටුක වූ නිසාත් ඇය හොල්මන් සමඟ ජීවත් වනවා යැයි සිතා මෙවැනි නිවෙසක් තැනුවා වෙන්නත් පුළුවන්. මොකද මේ තරම් කාමර සංඛ්‍යාවක් තනි පුද්ගලයකුට කිසිම විදියකින් අවශ්‍ය නැති නිසා. ඉතින් මෙම නිවෙස අද වනවිට Winchester Mystery House යනුවෙන් හඳුන්වන්නේද මෙහි තිබෙන මේ අද්භූත අබිරහස් බව නිසාමයි.

උපුටා ගැනීම මව්බිම