මුදුව පලඳින ඇඟිල්ල පටලැවුණු රාජකීය මංගල්‍යය
යුරෝපාකරයේ තවත් රාජකීය මංගල්‍යයක් පසුගියදා අති උත්කර්ෂවත් අන්දමින් පැවැත්විණ. ඒ ස්වීඩනයේ ඔටුන්න හිමි කාර්ල් පිලිප් කුමරුගේ මංගල්‍යයයි. කාර්ල් පිලිප් කුමරු ස්වීඩන ඔටුන්නට හිමිකම් කියන රාජකීයයන් අතරින් තෙවැන්නා වෙයි. මේ අසිරිමත් රාජකීය මංගල්‍යයේ විශේෂත්වය වූයේ ඔටුන්න හිමි කුමරු සාමාන්‍ය තරුණියකගේ අත ගැනීමයි. සාමාන්‍යයෙන් රාජකීයයන් අවාහ විවාහ වෙනුයේ රාජකීය පවුල්වල සාමාජිකයන් සමඟිනි. එහෙත්, කාර්ල් පිලිප් කුමරුගේ හිත ගිය මනාලිය මෝස්තර නිරූපිකාවක වන සොෆියා හෙල්ක්විස්ට්ය.
සොෆියා ඉතා මන බඳින රූ සපුවකින් යුතු තරුණියකි. උඩුකය නිරුවත්ව මෝස්තර නිරූපණයේ යෙදුණු ඇය වරක් ප්‍රසිද්ධ වූයේ නාගයකු ගතේ වෙලාගෙන නිරූපණයේ යෙදීම නිසාය. නාන ඇඳුමින් සැරසීම ස්වීඩනයට අරුමයක් නොවුණත් සොෆියා ඔටුන්න හිමි කුමරා හා ආදරයෙන් වෙළුණු පසු සංයමයකින් යුතුව කටයුතු කළ බව පැවැසේ.
ස්වීඩනයේ කුඩා නගරයක් වන ඇල්ඩාලේන් හි මධ්‍යම පාන්තික පවුලක උපත ලද සොෆියා 2005 වසරේදී ඉගෙනීම සඳහා නිව්යෝර්ක් නුවර බලා ගියාය. එහිදී ගණකාධිකරණය හැදැරු ඇය පසුව යෝග ගුරුවරියක හා වේටර්වරියක ලෙස ද කටයුතු කළාය. ඉන්පසු අප්‍රිකානු රටවල් කීපයක ස්වේච්ඡා සේවිකාවක ලෙස කටයුතු කළ ඇය දකුණු අප්‍රිකාවේ වරප්‍රසාද නොලත් දරුවන්ගේ සුබ සාධනය සඳහා වන ව්‍යාපෘතියක් ඇරැඹීය. මේ වසරේ මාර්තු මාසයේදී ඇය එහි කටයුතුවලින් මිදුණේ රජ කුමරියක ලෙස ඇයට අයත් රාජකාරි කෙරෙහි සිත යොමු කිරීම සඳහාය.
කාර්ල් කුමරු 36 හැවිරිදිය. සොෆියා 30 හැවිරිදිය. ඔවුන්ගේ විවාහ මංගල්‍යය උත්සවය පසුගිය දා පැවැතියේ ස්ටොක්හෝම් අගනුවර රාජකීය මාලිගයේ පිහිටි පල්ලියේදීය. විවාහ උත්සවය ආරම්භයේ සිටම කාර්ල් කුමරු ඉතා කලබලයකින් හා නොඉවසිල්ලෙන් පසුවනු කාගේත් අවධානයට ලක්විණි. මුදු හුවමාරු කර ගැනීමේ අවස්ථාවේදී කුමරු මනාලියගේ නියමිත ඇඟිල්ල වෙනුවට වෙනත් ඇඟිල්ලකට මුදුව පැලඳවීමට ගොස් අසීරුතාවට මුහුණ දුන් අන්දමත් ලොව පුරා පුවත්පත් වාර්තා කළේය.සාම්ප්‍රදායික චාරිත්‍ර වාරිත්‍ර මධ්‍යයේ සිදු කෙරුණ ද මේ රාජකීය විවාහයට කාර්ල් කුමරු හා සොෆියා කුමරියට අභිමත වූ අංගෝපාංග ද එක්කර තිබිණ. රාජකීය මනාල යුවළ හුවමාරු කරගත් මංගල මුදු නිර්මාණය කළේ ද කාර්ල් කුමරු විසිනි. එපමණක් නොව මේ මංගල උලෙළට විශේෂයෙන් සංගීතය ද එක්කර තිබුණේ රාජකීය මනාල යුවළගේ වුවමනාව පරිදිය. මනාල යුවළ මංගල මුදු හුවමාරු කිරීමෙන් අනතුරුව අමුත්තන් වෙත හැරෙද්දී සුප්‍රසිද්ධ ඉංග්‍රිසි ගීතයක් වන ‘Fix You’ ගීතය ගැයුණු අතර ඒ අසා සිටි ඇතැමුන්ගේ දෙනෙත් කඳුළින් බර විණ.
රාජකීය මනාලිය සුදු සිල්ක් සහ ඉතාලි සිල්ක් ඔගැන්සා රෙදි මිශ්‍ර කර නිම වූ මංගල ඇඳුමකින් සැරසී සිටි අතර දියමන්ති සහ පච්ච මැණික් එබ්බ වූ ඔටුන්නක් හිස පැලඳ සිටියාය. එම ඔටුන්න ඇයට තෑගි කරනු ලැබුවේ කාර්ල් කුමරාගේ මවුපියන් වන ස්වීඩනයේ 16 වැනි ගුස්ටාව් රජු සහ සිල්වියා රැජන විසිනි. කාර්ල් කුමරුගේ මනාලියගේ අත රැඳුණු මල් කලඹේ රැඳි මල්වල ඉතිහාසය බ්‍රිතාන්‍ය රාජකීයයන්ගේ ඉතිහාසය කරා ද දිව යයි.
මනාලියගේ මල් කලඹට එක්කළ මල් පොහොට්ටු 1905 වසරේදී ස්වීඩනයේ ඔටුන්න හිමි කුමරා හා විවාහ වූ බ්‍රිතාන්‍යයේ මාග්‍රට් කුමරියගේ මල් කලඹින් ගත් මල් ඉත්තකින් පැළ කරන ලද මල් ගොමුවකින් ගත් මල් පොහොට්ටු වීම මෙහි ඇති විශේෂත්වයයි. මේ කියන මාග්‍රට් කුමරිය බ්‍රිතාන්‍යයේ වික්ටෝරියා මහරැජනගේ තෙවැනි පුත් ආතර්ගේ දියණියයි. 20 වැනි සියවසේ මුල් භාගයේ සිටම ස්වීඩන රාජකීය කුමරියන් විවාහයේදී සිය මල් කලඹට මේ මල් ගොමුවෙන් මල් එක්කර ගැනීම සම්ප්‍රදායක් විය. මාග්‍රට් කුමරිය සිය සැමියා ස්වීඩනයේ රජ වීමට පෙර මියගියාය. ඇය මෙදා මනාලයා වූ කාර්ල් කුමරුගේ මී මිත්තණියයි.
මේ මංගල උලෙළේ තවත් විශේෂයක් වූයේ මංගල කේක් ආකෘතියයි. එය ද සම්ප්‍රදායෙන් බැහැරව රාජකීය මනාල යුවළගේ සිතැඟි පරිදි නවීකරණය කළ බව වාර්තා විය. විවිධ මට්ටමේ තට්ටු කීපයකින් සමන්විත වූ කේක් ආකෘතියේ සෑම කේක් ආකෘතියක්ම මැද එළියකින් බබළමින් තිබිණ. අතිශයින්ම පවුලේ උත්සවයක් ලෙස පැවැතිය ද මේ රාජකීය මංගල උලෙළේ අසිරිය විඳ ගැනීමට සාමාන්‍ය ජනතාව ද පෙළ ගැසී බලා සිටියහ. ඊට අමතරව ස්වීඩනයේ අසල්වැසි යුරෝපා රටවල රාජකීයයෝ ද මංගල උලෙළට සහභාගි වූහ. කාර්ල් කුමරු ස්වීඩනයේ ගුස්ටාව් රජුගේ දෙවැනි දරුවා වන අතර ඔටුන්නට පළමු හිමිකාරත්වය ඇත්තේ කාර්ල් කුමරුගේ වැඩිමල් සහෝදරිය වන වික්ටෝරියා කුමරියටය. කාර්ල් කුමරියගේ පළමු පෙම්වතිය වූයේ එමා නමැති තරුණියකි. දස වසරක් පමණ තිස්සේ පැවැති එම සම්බන්ධය බිඳී යෑමෙන් පසු කාර්ල් කුමරු 2009 අග භාගයේදී සොෆියා හා සමඟ පෙමින් වෙලී ඇත්තේය. සිල්වියා මවු රැජන සිය පුතුට ගැළපෙන මනාලියක නොවන බව පවසමින් මුලදී සොෆියා ප්‍රතික්ෂේප කළ ද පසුව එම විවාහයට සිය අනුමැතිය දුන්නාය. විවාහයෙන් පසු ඇය වම්ලැන්ඩ්හි ආදිපාදවරිය සහ ස්වීඩනයේ සොෆියා යන නිල නාමයෙන් හැඳින්වෙන්නීය.
