ඇද වැටෙන තුරු ගී ගයයි
සජීවී රූපවාහිනී වැඩ සටහන්වලට සහභාගි වී සිටිද්දී ඇතැම් අවස්ථාවල ගායක, ගායිකාවන්ට, නළු නිළියන්ට නොසිතූ කරදර සිදුවන්නේ මිලියන ගණනක ප්‍රේක්ෂකයන් ඉදිරියේදීයි.
එවැනි නොසිතූ කරදරයකට පසුගියදා මුහුණ දුන්නේ ජනප්‍රිය ගායිකා රෙබෙකා ෆර්ගසන්. ඇමෙරිකානු රූපවාහිනී චැනලයකින් විකාශය වූ එක්තරා සංගීතමය වැඩ සටහනකට සහභාගි වූ ඇය, හිටි හැටියේ ම වේදිකාව මත ඇද වැටුණේ ගීතයක් ගයමින් සිටිද්දීයි. මේ අනපේක්ෂිත සිද්ධිය ලොව පුරා ප්‍රේක්ෂකයන් මිලියන ගණනකට දැක ගන්නට ලැබුණා.
රෙබෙකා වේදිකාව මත ඇද වැටෙනවාත් සමඟම එම ස්ථානයට ක්ෂණයකින් පැමිණි ඇගේ සහායක ශිල්පිනියක වන මිලීන් ක්ලාස්, ඇයව එහි තිබූ අසුනක දිගා කරවූවා. ඉන් පසුව ඇයව එතැනින් ඉවතට ගෙන ගිය මිලීන් සහ පිරිස ඇයට ප්‍රතිකාර ලබා දුන්නා. රෙබෙකා එම ප්‍රසංගය ආරම්භයේදීම තමන්ට හිසරදයක් තිබෙන බව කියා සිටි බව ඇගේ කළමනාකරු ප්‍රකාශ කළා. ඒත් ඒ බවක් එම වැඩ සටහන නැරඹූ කිසිවකුට හැ‍ඟෙන්නට ඇය ඉඩ තැබුවේ නැහැ. ක්ලාන්ත වී ඇද වැටෙන තුරුම ඇය ගී ගැයුවේ රසික පිරිසගේ උණුසුම් ප්‍රතිචාර මැද්දේයි.
වයසට යද්දි මොන කටකතා ද?
ඉස්සර නම් අපේ ටැබ්ලොයිඩ් පත්තර මං ගැන නොයෙකුත් කටකතා ප්‍රචාරය කළා. එක කාලෙක ප්‍රචාරයක් ගෙන ගියා මම ලෙනාඩෝ ඩි කැප්රියෝ එක්ක ප්‍රේම සම්බන්ධයක් පවත්වනවයි කියලා. ඒත් දැන් නම් ඒ වගේ බොරු ගොතන්නෙ නැහැ. නළු නිළියන් ටිකක් වයසට යනකොට ඔය වගේ කටකතා හැදීම අඩු වෙනවා.” සුරූපී නිළි කේට් වින්ස්ලට් එලෙස කීවේ ඇතැම් පුවත්පත්වලින් සිදු කෙරෙන ‘කයි කතන්දර’ ගෙතීමේ ‘කලාව’ ගැන සිහිපත් කරමින්.
මීට වසර ගණනකට පෙර ‘ටයිටැනික්’ චිත්‍රපටය තිරගත කෙරුණු අවස්ථාවේදීයි, එම චිත්‍රපටයේ පෙම්වතුන් යුවළ ලෙස රඟපෑ ලෙනාඩෝ ඩි කැප්රියෝ සහ කේට් සම්බන්ධ කර කටකතා පැතිරුණේ. ඒත් එහි සත්‍යතාවක් තිබුණේ නැහැ.
මේ වන විට 38 වැනි වියෙහි පසුවන කේට් තවදුරටත් ප්‍රකාශ කළේ නළු නිළියන්ගේ තරුණ බව ඉක්ම යන විට බොහෝ පුවත්පත් ඔවුනට ගරු කරන බවයි.
ඩැනියෙල්ට දිගු වරලස වධයක් වෙලා
ඩැනියල් රෙඩ්ක්ලිෆ් රඟන අලුත්ම චිත්‍රපටය, ‘ෆ්‍රැන්කන්ස්ටීන්'. මේ වෙනුවෙන් තමන්ගේ හිස කෙස් දිගට වවා ගන්න ඩැනියල්ට සිදුවෙලා. ඔහුගේ හිස කෙස් දිගට වැවෙද්දී ඒ දෙස ආදරයෙන් බලන පිරිසකුත් සිටිනවාලු. ඩැනියල් නම් කියන්නේ කාන්තාවන් බොහෝ දෙනෙකු තමන්ගේ දිග කොණ්ඩයට ඇලුම් කරන බවයි.
“කාන්තාවන් මගේ කොණ්ඩෙට ආදරය කළත් මට නම් මේක දැන් වධයක් වෙලා. කොණ්ඩය දිගට වැවෙන්න, වැවෙන්න ඒක හසුරුවා ගන්න එකයි අමාරුම කටයුත්ත වෙලා තියෙන්නෙ. මට තියෙන වැඩ අතරෙ මේ කොණ්ඩය නඩත්තු කරන එක ලේසි දෙයක් නෙමෙයි. මට නම් මේක ගැන කිසිම ඇල්මක් නැහැ.”
ඩැනියල් සුපුරුදු සිනහව පාමින් ප්‍රකාශ කළා.
අලුත්ම ගීතයට පෙත්සමක්
ජනප්‍රිය ගායිකා කැටී පෙරී ගේ අලුත්ම ගීතයක් නිසා පසුගිය දිනවල මහත් ආන්දෝලනයක් මතුවුණා. මේ ගීතය අන්තර්ජාලයට මුදා හැරුණු පසුව එය නැරඹු 65,000 ක පිරිසක් එයට එරෙහිව විරෝධතා පෙත්සමකට අත්සන් තබා තිබෙනවා. මෙම ලේඛනය අන්තර්ජාලයටම එක්කර ඇති බවයි වාර්තා වෙන්නේ.
එම පෙත්සමෙහි සඳහන් වන්නේ කැටී පෙරීගේ ගීතය ආරම්භයේදී එක්තරා පුද්ගලයකු පැලඳ සිටින පෙන්ඩනයක සටහන් වී ඇති ‘අල්ලාහ්’ යන වචනයෙන් ඉස්ලාම් ආගමට අපහාසයක් සිදුකර ඇති බවයි.
කෙසේ වෙතත් එම අන්තර්ජාල විරෝධතා ලේඛනයෙන් පසුව මෙම දර්ශනය ඉවත් කර තිබෙනවා. තමන් ඒ පිළිබඳව සතුටු වන බවයි, පෙත්සම ඉදිරිපත් කරන්නට මුල් වූ ශාසාඩ් ඉක්බාල් නමැත්තා ප්‍රකාශ කළේ. මේ සඳහා අත්සන් තැබූ සියලුම දෙනාට ඔහු තම ස්තූතිය පළ කළා.
ඉන්දියාවට ගියා ම මිරිස් තමයි ප්‍රශ්නෙ
බුදුදහම වැලඳ ගත් හොලිවුඩ් නළුවෙකු සිටිනවා. ඔහු තමයි, සම්මානිත නළු, රිචඩ් ගෙයර්. පසුගියදා ඔහු ඉන්දියාවට පැමිණියේ ‘ද බෙස්ට් එක්සෝටික් මැරිගෝල්ඩ් හොටෙල් - 2’ නම් වූ චිත්‍රපටයේ රූගත කිරීම් කිහිපයකට සහභාගි වෙන්නයි. ඉන්දීය නිළියක වන ලිලෙටි ඩුබේ ද මෙහි ප්‍රධාන චරිතයක් රඟපානවා.
රිචඩ් ගෙයර්ට ඉන්දියාව නුපුරුදු රටක් නොවෙයි. මීට පෙර කිහිප වතාවක්ම ඔහු ඉන්දියාවට පැමිණ තිබෙනවා. ඒ, එක්සත් ජාතීන්ගේ සංවිධානයේ ‘ඒඩ්ස්’ මර්දන වැඩ සටහනේ තානාපතිවරයකු සහ බෞද්ධාගමික වැඩ සටහන්වල ක්‍රියාකාරිකයෙකු හැටියටයි.
ඉන්දියාවට පැමිණි සෑම අවස්ථාවකදීම එරට ආහාර පානවල රස බලන්නට ගෙයර් අමතක කරන්නේ නැහැ. ලිලෙටි ඩුබේ පැවසුවේ ඉන්දියානු ආහාරවලට ඔහු තුළ විශේෂ ඇල්මක් තිබෙන බවයි. “හැබැයි එයා අපේ කෑමවලට දාල තියෙන මිරිස්වල ප්‍රමාණය ගැන නම් නිතරම අහනවා” ලිලෙටි ඩුබේ මඳ සිනහවක් නංවමින් කීවා.
උපුටා ගැනීම සිළුමිණ
