‘එක්ස් ෆයිල්ස්’ නැවතත්

චිත්‍රපටයේ ජවනිකාවක් නොවෙයි

ඒඩ්‍රියන් බෲඩ්, හොලිවුඩ් තිරයේ ජනප්‍රිය තරුවක්. ඔහුගේ රැඟුම් ඇතුළත් වූ ‘ඩ්‍රැගන් බ්ලේඩ්’ චිත්‍රපටය මේ දිනවල තිරගත කෙරෙනවා. සුපිරි නළු ජැකී චෑන් අධ්‍යක්ෂණය කළ මේ චිත්‍රපටයට ලොව පුරා සිනමා රසිකයන් වෙතින් උණුසුම් ප්‍රතිචාර ලැබෙද්දී ඒඩ්‍රියන් බෲඩ් හට පසුගිය දා සිදුවුණේ ගැටුමකට මැදි වෙන්නටයි. ඔහු නවාතැන් ගෙන සිටි හෝටලයේදීයි මේ ගැටුම සිදුවී ඇත්තේ. ලාස් වේගාස් නුවර පිහිටි සුපිරි හෝටලයක නවාතැන් ගත් ඒඩ්‍රියන්ව හමුවීමට ඔහුගේ පෙම්වතිය වන ලාරා ලීවෝ පැමිණ තිබෙනවා. තම පෙම්වතිය පැමිණි බව දැනගත්ත ඒඩ්‍රියන්, ඇය සිටි තැනට ගමන් කරද්දී දුටුවේ ඇය ව වටකර ගත් කීප දෙනකු තරමක් හඬ නඟා යම් කිසිවක් පවසන අයුරුයි. තම පෙම්වතියට ඔවුන් කරදරයක් කරන්නට උත්සාහ ගන්නා බවක් හැඟී ගිය නිසා ඉක්මනින් එතැනට පැමිණි ඒඩ්‍රියන්, එම පිරිස සමඟ උණුසුම් වචන හුවමාරුවකට මැදි වුණා. වචන හුවමාරුව කෙළවර වන පාටක් තිබුණේ නැහැ. එය ටිකෙන් ටික උණුසුම් වුණේ එකිනෙකාගේ අතපය විසිකර ගන්නා තත්ත්වයකට ද ළං වෙමින්. මේ වාතාවරණය සුපිරි හෝටලයේ ආරක්ෂක අංශවලට ද සැල වුණා. මොහොතකින් එතැනට පැමිණි ආරක්ෂක නිලධාරීන් කීප දෙනකුගේ මැදිහත් වීම නිසා සිදුවන්නට ගිය ලේ හැලීමක් නතර වුණු බවයි වාර්තා වන්නේ.

ජීවිතය ශක්තිමත්

සුපිරි නිළි ඇන්ජලිනා ජොලීට පසුගිය දා නැවතත් සැත්කමක් සිදු කෙරුණා. එය සිදුකෙරුණේ ඇයව පිළිකා රෝගයට ගොදුරු වීමේ අවදානමෙන් මුදවා ගන්නටයි. හොලිවුඩ් පුරයෙන් ලැබෙන ආරංචිවලින් කියැවෙන්නේ ඇන්ජලිනාගේ ඩිම්බ කෝෂ සහ පැලෝපීය නාළ මේ සැත්කමෙන් ඉවත් කළ බවයි. මේ සැත්කමට මුහුණ දුන් ඇන්ජලිනා මේ වන විට 39 වැනි වියෙහි පසුවෙනවා. කෙසේ වෙතත්, සැත්කම්වලින් පසුව නැවතත් ශක්තිමත්ව ජිවිතයට මුහුණ දීමට අවශ්‍ය ශක්තිය තමන්ට නොඅඩුව ලැබුණු බවයි මේ සුපිරි නිළිය පවසන්නේ. ඇන්ජලිනා චිත්‍රපට අධ්‍යක්ෂවරියක්. 2014 දී තිරගත වූ ‘අන්බ්‍රෝකන්’ ඇයගේ නිර්මාණයක්. මේ චිත්‍රපටයට පාදක වුණේ දෙවැනි ලෝක මහා සංග්‍රාමයේ කැපී පෙනෙන චරිතයක් වූ ඇමෙරිකානු සිරකරු ලුවී සැම්පෙරිනිගේ ජීවිත කතාවයි.

වසර 13 ක විරාමයකින් පසුව නැවතත් ලෝක ප්‍රකට ටෙලි නාට්‍ය මාලාවක් පුංචි තිරයට එක්වීමට නියමිතයි. රූපවාහිනී ප්‍රේක්ෂකයන් ප්‍රිය කරන මේ ටෙලි නාට්‍ය මාලාව, ‘එක්ස් ෆයිල්ස්'. අද්භූත සිදුවීම් වලින් ප්‍රේක්ෂක සිත් කුතුහලයට පත් කරන ‘එක්ස් ෆයිල්ස්’ කතා මාලාවේ සුපුරුදු ප්‍රධාන චරිත දෙක තමයි ෆොක්ස් මෝල්ඩර් සහ ඩානා ස්කලි. මේ චරිත යුගළය නිරූපණය කරන ඩේවිඩ් ඩචොව්නි සහ ගිලියන් ඇන්ඩර්සන් නැවතත් ඒ චරිත ඔස්සේ අද්භූත සිදුවීම් පසුපස ලුහුබඳීවි. එළැඹෙන ගිම්හාන සමයේදී මෙහි රූගත කිරිම් ඇරැඹෙන බවයි, ෆොක්ස් නෙට්වර්ක් සමාගම ප්‍රකාශ කරන්නේ. මෙවර ‘එක්ස් ෆයිල්ස්’ මාලාවට කථාංග 6 ක් ඇතුළත් වන බවයි, එහි අධීක්ෂණ කටයුතු සිදුකරන ක්‍රිස් කාටර් පවසන්නේ. ‘එක්ස් ෆයිල්ස්’ කතා මාලාව 2002 දී අවසන් වුණේ කතාංග නවයක් විකාශය වීමෙන් පසුවයි. මෙය, 1998 දී පුළුල් තිරයටත් එක්වුණා. ඒ, ‘ද එක්ස් ෆයිල්ස් : ෆයිට් ද ෆියුචර්’ යනුවෙන්. 2008 දී ‘ද එක්ස් ෆයිල්ස් : අයි වෝන්ට් ටූ බිලීව්’ යනුවෙන් එහි දෙවැනි කොටස තිරගත වුණා. අලුත් ‘එක්ස් ෆයිල්ස්’ කතා මාලාව රූපවාහිනී චැනල ඔස්සේ විකාශය වන්නේ කවදාදැයි තවම ප්‍රකාශ වී නැහැ.

ජනප්‍රිය සුපිරි නළු බෲස් විල්ස් ප්‍රධාන චරිතයක් නිරූපණය කරන ‘

’ නම්වූ චිත්‍රපටයේ වැඩ කටයුතු පසුගිය පෙබරවාරි මාසයේදී ඇරැඹුණා. මෙහි අධ්‍යක්ෂවරයා ජෝන් පෝග්. තමන්ගේ ජිවිතය අවුල් වීම නිසා සමාජ ද්‍රෝහියකු බවට පත්වන අයකුගේ චරිතයක් බෲස් විල්ස් විසින් මෙම චිත්‍රපටයේ නිරූපණය කරනු ලබන බවයි පැවසෙන්නේ. කෙසේ වෙතත්, මේ චිත්‍රපටයේ රූගත කිරීම් සිදු කිරීමට හැකි වී ඇත්තේ දින 5 ක් වැනි කාලයක් පමණයි. ඇමෙරිකාවේ ක්ලීව්ලන්ඩ් හිදී සිදුකළ මේ රුගත කිරීම්වලින් පසුව නැවතත් එහි වැඩ ඇරැඹීමට තවමත් හැකිවී නැහැ. චිත්‍රපටය වෙනුවෙන් මුදල් යෙදවූ බෙනරොසා පික්චර්ස් සමාගම නිවේදනයක් නිකුත් කරමින් ප්‍රකාශ කළේ නිෂ්පාදන කටයුතුවල කිසියම් ප්‍රමාදයක් නිසා මෙහි වැඩ කටයුතු ඇණහිට ඇති බවයි. නිෂ්පාදන කටයුතු භාර ග්‍රේටර් ක්ලීව්ලන්ඩ් ෆිල්ම් කමිෂන් ආයතනය පැවසුවේ මාර්තු 23 දා ‘වේක්’ චිත්‍රපටයේ රූගත කිරීම් ඇරැඹෙන බවයි. ඒත්, එදින රූගත කිරීම් ඇරැඹුණේ නැහැ. කෙසේ වෙතත්, තතු දන්නා අය ප්‍රකාශ කරන්නේ චිත්‍රපටය රූගත කිරීම් නැවතී ඇත්තේ මුදල් අර්බුදයක් නිසා බවයි.

උපුටා ගැනීම සිළුමිණ