සම්මානනීය නළු, හැරිසන් ෆෝඩ් ඉන්දුනීසියානු රජයේ උදහසට ලක්වී තිබෙනවා. ඔහුට එවැනි අකරතැබ්බයකට මුහුණ දෙන්නට සිදුවුණේ ඔහු එක්තරා රූපවාහිනී වැඩ සටහනක් එරට තුළ රූපගත කිරීමෙන් පසුවයි. ‘Years of Living Dangerously’ නම් වූ රූපවාහිනී වාර්තාමය වැඩ සටහනක් රූපගත කරන්නට ඉන්දුනීසියාවට පැමිණි හැරිසන් ෆෝඩ්, එරට වන සම්පත් කටයුතු පිළිබඳ ඇමැති සුල්කිෆි හසන් සමඟ රූපවාහිනී සම්මුඛ සාකච්ඡාවක් පැවැත්වූවා.
එහිදී ෆෝඩ් මෙම ඇමැතිවරයා වෙත ඉන්දුනීසියාවේ සිදුවන වන සංහාරය සහ කාලගුණ විපර්යාස පිළිබඳව ප්‍රශ්නයක් යොමු කළා. ෆෝඩ්ගේ ප්‍රශ්නයට හරි හැටි පිළිතුරක් දීමට නොහැකි වූ ඇමැතිවරයා ඒ මොහොතේ දී දැඩි අපහසුතාවකට පත්වුණා.
වැඩ සටහනින් පසුව හැරිසන් ෆෝඩ් හට දැනුම් දී ඇත්තේ වහාම ඉන්දුනීසියාවෙන් පිටවන ලෙසයි. මේ පිළිබඳව අදහස් දැක්වූ ජනාධිපති උපදේශකයෙකු වන ඇන්ඩි අරීෆ් පැවසුවේ හැරිසන් ෆෝඩ් ගේ සම්මුඛ සාකච්ඡාවේ දී ඇමැතිවරයාට කියන්නට ඉඩ ලැබුණේ වචන කිහිපයක් පමණක් බවයි. මේ රූපවාහිනී වැඩ සටහන තුළින් ඉන්දුනීසියානු රාජ්‍ය ආයතනයක් විවේචනය කිරීමේ අරමුණ කුමක්දැයි ප්‍රශ්න කළ යුතු බවත් ඔහු පැවසුවා.
‘ජුරාසික් වර්ල්ඩ්’ තව දුරයි
ජනප්‍රිය චිත්‍රපට අධ්‍යක්ෂ, ස්ටීවන් ස්පිල්බර්ග් නිර්මාණය කළ ‘ජුරාසික් පාක්’ චිත්‍රපටය තිරගත වුණේ 1993 දී. එය ලොවපුරා රටවල් රැසක තිරගත වුණේ ඩොලර් බිලියන 1.9ක ආදායමක් උපයා ගනිමින්. (මේ චිත්‍රපටය ශ්‍රී ලංකාවේ ද තිරිගත වූ බව ඔබට මතක ඇති.) ළමා සහ යොවුන් පරපුරත්, වැඩිහිටියනුත් ප්‍රිය කළ මේ චිත්‍රපටයේ 4 වැනි කොටස මේ වන විට තිරගත වීමට සූදානම්. ‘ජුරාසික් වර්ල්ඩ්’ යනුවෙන් නම්කර ඇති මේ චිත්‍රපටය අධ්‍යක්ෂණය කර ඇත්තේ කොලින් ට්‍රෙවොරෝ. චිත්‍රපටයේ නිෂ්පාදන කර්තව්‍යය තමයි, ස්ටීවන් ස්පිල්බර්ග්ට පැවරී තිබෙන්නේ.
නුදුරු දිනයක දී ‘ජුරාසික් වර්ල්ඩ්’ තිරගත කිරීමට මුලදී තීරණය වී තිබුණත්, පසුගිය සතියේ දී එම තීරණය වෙනස් වෙලා. චිත්‍රපටය බෙදාහරින යුනිවර්සල් සමාගම ප්‍රකාශ කළේ එය 2015 ජූනි 12 දා සිට ලොව පුරා තිරගත කිරිම ආරම්භ කරන බවයි.
ඩිනාට දික්කසාද වෙන්න ඕනලු
හොලිවුඩ් සිනමාවේ ජයදද නැංවූ සුපිරි නළු ක්ලින්ට් ඊස්ට්වුඩ් ගේ විවාහ ජීවිතයේ දෙදරා යෑමක් ගැන මේ පිටුවෙන් පසුගිය සතියේ ඔබ කියවන්නට ඇති. ඒ ආරංචිය සනාථ කරවන තවත් පුවතක් දැන ගන්නට ලැබුණා. ක්ලින්ට් ඊස්ට්වුඩ්ගේ බිරිය වන ඩිනා පසුගිය සතියේ ඇමෙරිකානු අධිකරණය ඉදිරි‍ෙය් පෙත්සමක් ගොනු කරමින් ප්‍රකාශ කළේ තමන්ට සැමියාගෙන් නිත්‍යානුකූලව වෙන්වීමට අවශ්‍ය බවයි.
ඇමෙරිකාවේ මොන්ටෙරි පළාතේ ශ්‍රේෂ්ඨාධිකරණය හමුවේ ගොනු කළ මෙම පෙත්‍සමෙහි ඇය සඳහන් කර තිබුණේ ක්ලින්ට් ඊස්ට්වුඩ්ට දාව උපන් තම දියණියකට ඔහු ගේ ආධාරයත්, ආරක්ෂාවත් තව දුරටත් ලැබිය යුතු බවයි. මෝගන් නම් වූ මේ දියණිය දැන් යොවුන් වියේ පසුවෙනවා.
ඊස්ට්වුඩ් ගේ බිරිය ඩිනා රූපවාහිනී නිවේදිකාවක්. පසුගිය අගෝස්තු මාසයේ අගදී ඇයට තම සැමියා සමඟ සම්මුඛ සාකච්ඡාමය වැඩ සටහනක් ඉදිරිපත් කරන්නැයි ඇය සේවය කරන රූපවාහිනී නාළිකාවෙන් දන්වා තිබුණා. ඒත් ඇය ඒ වැඩසටහන මඟහැරිය බවයි ආරංචි.
අම්ම වුණත් කෙල්ල වගේ
ජනප්‍රිය නිළි පෙනිලෝප් කෲස් පසුගිය කාලය තුළ ප්‍රසිද්ධියේ පෙනී සිටියේ නැහැ. අය ‘ප්‍රසූත නිවාඩු’ ලබාගෙන සිටියා. පසුගිදා ඇය දෙවැනි වතාවටත් මවු පදවිය ලැබුවා. දෙවැනි වතාවේදී ඇයට ලැබුණේ දියණියක්.
මෑතකදී ඇය, තම සැමියා වන ජාචියර් බාඩෙම් සහ දෙහැවිරිදි වැඩිමල් පුතා සමඟ ප්‍රංශයේ කෝසිකා වෙරළේ කාලය ගතකරමින් සතුටින් සිටින අයුරු බොහෝ දෙනෙකුට දැකගත හැකිවුණා. දෙවැනි වතාවටත් දරුවෙකු ලැබූව ද ඇය වෙතින් කිසිදු තරබාරු ගතියක් දකින්න ලැබුණේ නැහැ. බොහෝ දෙනා පෙනිලෝප්ව දැක්කේ තරුණියක විලසින්. ඇගේ වයස අවුරුදු 39ක් වුවත් ඇය එවැනි වයසක් පසුකරමින් සිටින බවට සේයාවක්වත් තිබුණේ නැහැ. පෙනිලෝප්, තම සැමියා සහ පුතු සමඟ මුහුදේ ස්නානය කරන අයුරු එතැනට පැමිණ සිටි අයට දැකගත හැකිවුණා.
පැපරාසි නිසා නිදහසේ යන්නත් නෑ
නිකොල කිඩ්මන් පසුගිය සතියේ නිව්යෝර්ක් නුවර පැවැත්වුණු නිව්යෝර්ක් මෝස්තර සතියේ එක් දිනයකට සහභාගි වුණා. එහි දී ඇය ප්‍රේක්ෂකාගාරයේ අවධානය තමන් වෙත දිනා ගත්තේ සුපුරුදු විලසින්. ඇයට ලැබුණේ උණුසුම් ප්‍රතිචාරයක්. ඒ වුණත්, ඊට පැය කිහිපයකට කලින් මේ සුපිරි නිළියට මුහුණ දෙන්නට සිදුවුණේ අප්‍රසන්න අත්දැකීමකට. ඇය තම මෝටර් රථයෙන් බැස, මෝස්තර සන්දර්ශනය පැවැත්වූ ස්ථානයට පදික වේදිකාවක් මතින් ඇවිදගෙන එද්දී කිසියම් පුද්ගලයකු පාපැදියකින් ඇය සමීපයට පැමිණියා. ඔහු ගේ අතක කැමරාවකුත් තිබුණා. ඔහු තම කැමරාවෙන් නිකොල්ගේ සමීප ඡායාරූපයක් ගන්නට උත්සාහ කළ හැටියේම නිකොල් ඒ පාපැදියේ ගැටී බිම වැටුණා. තත්පර කිහිපයකින් නැඟී සිටි නිකොල් වටපිට බැලුවා. පාපැදිකරුවා පොලිස් භටයෙකුගේ ග්‍රහණයට පත්වුණා. නිකොල් නැගිට්ටේ තම වම් පාදයේ වළලුකර පෙදෙස අල්ලාගෙනයි. ඒත් ඇයට තුවාලයක් වුණේ නැහැ. අර පැපරාසියා ද පොලිස් අත්අඩංගුවට පත්වුණේ නැහැ.
උපුටා ගැනීම සිළුමිණ
