තෝරා බේරා නොගෙන පෙම් කළ නළුවා

රාජ් කපූර් හින්දි හා ඉංග්‍රීසි භාෂාවනට අමතරව දෙමළ, තෙළිඟු, මලයාලම් හා රුසියානු ආදි භාෂා රාශියක් දැන සිටියේය. “මම හුඟාක් භාෂා ඉගෙන ගත්තේ නිදි යහනේදීයි” වරෙක රාජ් පවසා තිබිණි. එහි අදහස ඔහු එම භාෂා උගත්තේ තම පෙම්වතියන් ගෙන් බව ද? රාජ්ගේ පෙම්වතියන් වූයේ නර්ගීස් හා වෛජන්තිමාලා පමණක් නොවේ. පද්මිණි, සිම් ගරේවාල්, සීනත් අමාන්, මන්දාකිනී මෙන්ම ‘මේරා හාම් ජෝකර්’ චිත්‍රපටයේ රඟපෑ රුසියානු නිළිය ක්සෙතියා ර්යබින්කිනා ද ඔහුගේ පෙම්වතියන් වූ බව කියැවෙයි. අනෙක් නළුවන් තෝරා බේරාගෙන පෙම් කළත් තමන් එසේ නොවන බව රාජ් කපූර් වරෙක හැඟවූයේ මේ ආකාරයෙනි. “දිලිප් කුමාර් ඌරු මස් කන්නේ නැහැ. දේව් ආනන්ද් හරක් මස් කන්නේ නැහැ. මම නං ඒ දෙජාතියමත් තවත් ජාතිත් කනවා.” රාජ්ගේ දියණිය රිතු නන්දා වරෙක පවසා තිබුණේ තම පියා චිත්‍රපටයකට අලුත් නිළියක තෝරා ගත් බව දැනගත් වහා තම මව ඔහු හා ආරවුල් ඇති කරගත් බවය. “ඒ නිළිය යොදාගෙන චිත්‍රපටය කරගෙන යද්දී ආරවුල් දිග්ගැස්සෙනවා. අම්මා පුංචි අපිවත් අරගෙන එයාගේ මහ ගෙදරට යනවා. තාත්තා එහේ එනවා. අම්මා එක්ක කතා නැහැ. හැබැයි තාත්තා අපිව යාළු කරගෙන ඒ හරහා අම්මාවත් යාළු කරගෙන ආපහු අපිවත් අම්මාවත් එයාගේ ගෙදරට එක්කරගෙන එනවා.” තමාට බෙහෙවින් පෙම් කළ තමා ද බෙහෙවින් පෙම් කළ නර්ගීස් තම ජීවිතයෙන් ඈත්වූයේ තමාට ඇය හා විවාහ විය නොහැකි නිසා බව රාජ් දැන සිටියේය. ආර්. කේ. චිත්‍රපට සමාගමෙන් ඉවත්වූ නර්ගීස් ගියේ මෙහෙබුබ් ඛාන් ගේ ‘මදර් ඉන්ඩියා’ චිත්‍රපටයේ රඟන්නටය. එම චිත්‍රපටයේ බිර්ජු ගේ චරිතය රඟපෑමට දිලිප් මහත් කැමැත්තකින් සිටින බව එකල හින්දි සිනමාවේ රහසක් නොවීය. නර්ගීස් හා දිලිප් ඊට පෙර වෙනත් චිත්‍රපටවල පෙම්වතුන් මෙන් රඟපා තිබිණි. ඒ දිනවල ඇය රාජ්ගේ පෙම්වතිය බව දිලිප් දැන සිටියේය. රාජ් තරමටම පෙම් කුරුල්ලකුව සිටි දිලිප් තමාගෙන් වෙන්වූ නර්ගීස්ව දැලේ දමා ගනීවි ද යන බිය රාජ්ගේ සිතේ තිබිණි. අවසානයේ දිලිප් මහත් බලාපොරොත්තු තබාගෙන සිටි ‘බිර්ජු'ගේ චරිතය ඔහුට නොලැබී ගියේය. “මගේ පෙම්වතා හැටියට කාලයක් රඟපෑ දිලිප් කොහොම ද මගේ පුතාට රඟපාන්නෙ? ප්‍රේක්ෂකයන් එය පිළිගන්නා එකක් නැහැ.” යනුවෙන් දිලිප් එම චරිතයට තෝරා ගන්නවාට නර්ගීස් එරෙහි වූ බවත් අවසානයේ ‘මදර් ඉන්දියා’ අධ්‍යක්ෂ මෙහෙබුබ් ඛාන් එම විරෝධතාව පිළිගත් බවත් එකල ප්‍රකට විය. කෙසේ වෙතත් ‘මදර් ඉන්දියා’ වෙතින් හා නර්ගීස් වෙතින් දිලිප් ඈත් කිරීමේ කුමන්ත්‍රණය පසුපස සිටියේ රාජ් කපූර් බව ද ප්‍රකට රහසක් වූයේය. කෙසේ වෙතත් දෛවය ක්‍රියාත්මක වන්නේ කිසිවකු නොසිතා නොපතන ආකාරයටය. අවසානයේ නර්ගීස් විවාහ වූයේ දිලිප් කුමාර් ආසා කළ බිර්ජු චරිතයට පණ දුන් සුනිල් දත් සමඟිනි. වෛජන්තිමාලා මෙන්ම භරත නර්තන ශිල්පිනියක වූ පද්මිණී 14 හැවිරිදිව සිටියදී 1948 දී මුලින්ම රඟපෑවේ ‘කල්පනා’ නමැති හින්දි චිත්‍රපටයේය. එහෙත් පසුකාලීනව ඇය වැඩියෙන්ම රඟපෑවේ දෙමළ චිත්‍රපටවලය. රාජ්ට පද්මිණී මුලින්ම හමුවී ඇත්තේ ඔහු නර්ගීස් හා පෙමින් බැඳී සිටියදීය. රාජ් ‘චෝරි චෝරි’ චිත්‍රපටය රූගත කරද්දී එම චිත්‍රාගාරයේම වෙනත් පසුතලයක පද්මිණී රූගත කිරීම්වලට සහභාගි වීමට පැමිණ තිබේ. ඇය ඒ අවස්ථාවේ නර්ගීස් හා රාජ් යන දෙදෙනා සමඟම මිතුරු වී ඇත. එම මිත්‍රත්වය ඉතා සමීප මිත්‍රත්වයක් දක්වා වර්ධනය වී ඇත්තේ කෙටි කලක් ඇතුළතය. රාජ්ගේ ජීවිතයේ නර්ගීස් පරිච්ඡේදය අවසන් වීම ඔහුට දැනී ඇත්තේ ජීවිතයෙන් කොටසක් බිඳ වැටීමක් ලෙසිනි. නර්ගීස් මොස්කව් බලා ගිය විට දැඩි ලෙස රෝගාතුර වූ රාජ්ට සාත්තු සප්පායම් කර ඇත්තේ පද්මිණී ය. “මම පද්මිණීට ප්‍රධාන චරිතය දීලා ‘ජිස් දේශ් මෙයින් ගංගා බේති හේ’ හැදුවේ නර්ගීස් ඈත්වුණාම රිදුණු මගේ සිතත් ගතත් දෙකම හදන්නට පද්මිණී සමත් වූ නිසායි” වරෙක රාජ් පවසා තිබිණි. රාජ් කපූර් ‘ජිස් දේශ් මෙයින් ගංගා බේති හේ’ චිත්‍රපටයට පද්මිණී තෝරාගත් බව ආරංචි වෙද්දී ඔහුට මෙන්ම පද්මිණීට ද තර්ජනාත්මක ලිපි ලැබිණි. පසු කලෙක අනාවරණය වූයේ බොලිවුඩයේ රාජ් - නර්ගීස් යුගයක් මෙන් රාජ් - පද්මිණී යුගයක් නිර්මාණය වී පද්මිණී තමන්ට අහිමිව යතැයි බිය වූ දෙමළ, තෙළිඟු හා මලයාලම් චිත්‍රපට නිෂ්පාදකයන් එසේ තර්ජනාත්මක ලිපි එවුවා කියාය. ‘ජිස් දේශ් මේන් ගංගා බේති හේ’ 1960 වසරේදී තිරගත වූයේය. එතුවක් සිය සිනමා පට හරහා භාවමය හැඟීම් ඉස්මතු කිරිමට වෙහෙසුණු රාජ් නර්ගීස් ගෙන් වෙන්වීමෙන් අනතුරුව සිනමාවට ශෘංගාරය ගෙන ඒමට උත්සුක වන බව එම චිත්‍රපටයෙන් පැහැදිලිව පෙනිණි. පද්මිණි ප්‍රධාන චරිත රඟපෑ එම චිත්‍රපටයේ මෙන්ම ‘මේරා නාම් ජෝකර්’ (1970) සිනමා පටයේ ද පද්මිණී ගේ ශරීර හැඩයන් හරහා ශෘංගාරය හා ලිංගිකත්වය ඉස්මතු කර ඇති බව දැනගත හැකි වූයේය. ජිස් දේශ් චිත්‍රපටයේ ‘ඔ මෙයින් ප්යාර් කියා’ ගීතමය ජවනිකාවේ පද්මිණී පොකුණකට පැන පිහිනද්දී රාජ් කපූර් ඇගේ රුසිරු දක්වන රූප රාමු ඔස්සේ ශෘංගාරය මතුකර වූයේය. එම චිත්‍රපටය බොක්ස් ඔෆිස් වාර්තා බිහි කළ අතර නර්ගීස්ගේ වෙන්වීම නිසා රාජ් කපූර් විඳි විරහ වේදනාව ඔහු වෙතින් ඈත්ව තිබිණි. 1961 දී පද්මිණී ඇමෙරිකාවේ පදිංචිව සිටි රාමචන්ද්‍රන් නමැති දෙමළ වෛද්‍යවරයා හා විවාහ වී සිනමාවෙන් ඈත්ව ඇමෙරිකාවේ පදිංචියට ගියාය. කෙසේ වෙතත් විවාහ වී අට මසක් ගත වෙද්දී ඇය පළමු දරුවා ප්‍රසූත කළ අතර හින්දි සිනමාව ගිනි ගත්තේ ඒ දරුවාගේ පියා රාජ් කපූර් ය යන කට කතාවෙනි. විවාහයට පෙර ඇය රාජ් හා රඟපෑවේ ‘ආෂික්’ චිත්‍රපටයේය. නමුත් වෛද්‍යවරුන් පැවසුවේ ඇමෙරිකාවට පැමිණීමෙන් පසු ද ඇය නර්තනයේ නියැළීම නිසා දරු ප්‍රසූතිය ඉක්මන් වී ඇති කියාය. පද්මිණී ගේ දුරස් වීමෙන් පසු රාජ්ගේ ජීවිතයට වෛජන්තිමාලා සමීප වූ අතර ඒ පෙම් හබය ගැන අපි මීට පෙර සඳහන් කළෙමු. රාජ් නැවතත් පද්මිණීව යොදා ගත්‍තේ 1970 තිරගත වූ ‘මේරා නාම් ජෝකර්’ චිත්‍රපටයටය. හින්දි සිනමාවට ජාත්‍යන්තර වෙළෙඳ පොළ දොරටු හැරදීමේ පුරෝගාමියා වූ රාජ් කපූර් වරින් වර තම චිත්‍රපටවලට එක්වූ කතා නායිකාවන් හා පෙමින් බැඳුණ ද ඔහු ආත්මීයව බැඳුණේ නර්ගීස්ට බව ඉතා පැහැදිලිය. රාජ්ගේ අනෙකුත් ප්‍රේමයන් සියල්ල සාමාන්‍ය ශාරීරික ආශ්‍ර බව නිවැරැදිය. ලබන සතියේ දිලිප් - මධුබාලා පෙම් හබය කුමාර සිරිවර්ධන උපුටා ගැනීම සිළුමිණ පුවත්පත