රිතික්,ශාරුක් අභිබවා ෆර්හාන්ට හොඳම නළුවා සම්මානය

59 වන ෆිල්ම් ෆෙයාර් සම්මාන උළෙලේදී හොඳම නළුවාට හිමි සම්මානය දිනා ගැනීමට ''බාග් මීකා බාග්'' චිත්‍රපටියේ රංගනයෙන් දායක වූ ෆර්හාන් අක්තාර් සමත් විය. අදායම් වාර්තා බිඳ දමමින් තිරගත වූ ''ක්‍රිෂ් 3'' චිත්‍රපටියේ රඟපෑ රිතික් රෝෂන් සහ ''චෙන්නායි එක්ස්ප්‍රස්'' චිත්‍රපටියේ රඟපෑ ශාරුක් ඛාන් අභිබවා යමින් ෆර්හාන් අක්තාර් මෙම සම්මානයෙන් පිදුම් ලැබීම විශේෂත්වයකි.ෆර්හාන් රඟපෑ ''බාග් මීකා බාග්'' චිත්‍රපටිය වසරේ හොඳම චිත්‍රපටිය ලෙසද සම්මානයෙන් පිදුම් ලබා ඇත. මේ අතර හොඳම නිළිය ලෙස ''රාම් ලීලා රාම්'' චිත්‍රපටියේ රඟපෑ දීපිකා පදුකෝන් පිදුම් ලබා ඇත. තවද වසරේ හොඳම පිරිමි ගායනයට හිමි සම්මානය ''ආශිකී 2'' චිත්‍රපටියේ ''තුම්හි හෝ'' ගීතය ගායනා කල අර්ජිත් සිං හිමිකර ගනිද්දී වසරේ හොඳම කාන්තා හඬට හිමි සම්මානය ''ලූතේරා'' චිත්‍රපටියේ ''සාවර් ලූන්'' ගීතය ගායනා කල මොනාලි තාකුර්ට හිමිවී ඇත. මොනාලි මෙම සම්මානය හිමි කරගත්තේ ''ආශිකී 2'' චිත්‍රපටියට ගායනයෙන් දායකවූ ශ්‍රියා ගෝෂාල් අභිබවා යමින් වීම විශේෂත්වයකි. හොඳම චිත්‍රපටි අධ්‍යක්ෂණයට හිමි සම්මානය දිනා ගැනීමට ''බාග් මීකා බාග් චිත්‍රපටිය අධ්‍යක්ෂණය කල රාකේෂ් මෙහෙරා සමත්විය. මේ වසරේ සම්මාන උලෙළ සඳහාද නළු නිලියන් රැසක් එක්වී සිටියහ. අශාන් පරණහේවා උපුටා ගැනීම මව්බිම