‘ක්‍රිෂ් -3’ චිත්‍රපටය සිනමා රසික පිරිසගේ උණුසුම් ප්‍රතිචාර මැද තිරගත වෙද්දී එහි ප්‍රධාන චරිතය රඟන ජනප්‍රිය නළු රිතික් රෝෂන් ගැන පසුගිය සතියේ දැනගන්නට ලැබුණේ දොම්නස දනවන පුවත් දෙකක්.
රිතික්ට නැවතත් හිසරදය මතුවෙලා. මේ හිසරදය මුලින්ම මතුවුණේ මේ වසරේ මුල් භාගයේ දී. ‘බෑන්ග් බෑන්ග්’ චිත්‍රපටයේ ත්‍රාසජනක දර්ශනයක් රඟපාද්දී හිසට වැදුණු පහරක් හේතුවෙන් තමයි, රිතික්ට හිසරදයක් හැදුණේ. මේ වෙනුවෙන් නොයෙක් ප්‍රතිකාර ගත්ත රිතික්ට පසුගිය ජූලි මාසයේ දී ශල්‍යකර්මයක් සිදුකළා. ඔහුගේ මොළයෙහි සිරවී තිබුණු රුධිර කැටියක් ඉවත් කරන්නටයි ඒ සැත්කම සිදු ෙකරුණේ. රිතික් ගේ මොළයෙහි මාස 2ක් තිස්සේ සිරවී තිබුණු රුධිර කැටියක් සාර්ථකව ඉවත් කළ බවයි, සැත්කම සිදු කළ වෛද්‍යවරු පැවසුවේ.
එයින් පසුව සුවය ලද රිතික් නැවතත් සුපුරුදු පරිදි චිත්‍රපට රූගත කිරීම්වලට එක්වුණා. ඒත් පසුගිය සතියේ දී නැවතත් ඔහුගේ හිස කකියන්නට පටන් ගෙන තිබෙනවා. මේ නිසා ආපසු වෛද්‍ය ප්‍රතිකාර ලබා ගන්න රිතික් කල්පනා කළා. රිතික්ගේ පියා වන ප්‍රවීණ සිනමාකරු රාකේෂ් රෝෂන් ද මේ ගැන දැඩි උනන්දුවක් දැක්වූවා. ඒ අනුව පසුගිය 30 දා රිතික් විදේශගත වුණා. මුලින්ම ඉන්දීය මාධ්‍ය ප්‍රකාශ කළේ රිතික් වෛද්‍ය ප්‍රතිකාර ලබා ගන්න ඇමරිකාවට පිටත්ව ගිය බවයි. කුමන රෝහලක නතර වන්නේදැයි රිතික් හෝ ඔහුගේ පියා හෝ හෙළි නොකළ බවත් ඒ මාධ්‍ය වාර්තාවල සටහන් වුණා. ඉන්පසුව ලද ආරංචිවල සඳහන් වුණේ රිතික්, එංගලන්තයේ රෝහලකින් ප්‍රතිකාර ලබා ගන්නා බවයි. මේ බව තහවුරු කරමින් කතා කළේ රිතික්ගේ පියා.
“රිතික් පිටරට යන්නෙ නිවාඩුවක් ගත කරන්නත් එක්කයි. එයාගෙ යාළුවො කීප දෙනෙකුත් මේ ගමනට එකතු වෙනවා. මුලින් ම ඇමරිකාවට ගිහින් ඊට පස්සෙ තමයි එංගලන්තයට ගිහින් රිතික්ගෙ හිසේ කැක්කුමට ප්‍රතිකාර ගන්නෙ. සමහර මාධ්‍ය වාර්තා කරලා තිබුණා, රිතික්ට ආයෙමත් සැත්කමක් කරනවාය කියලා. එහෙම දෙයක් කෙරෙන්නෙ නැහැ.” ඔහු තවදුරටත් කියා සිටියේ ඉදිරි මාස 6 තුළදී රිතික් කිසිදු රූ ගත කිරීමකට සහභාගි නොවන බවයි.
රිතික් ගේ සෞඛ්‍ය තත්වය මෙවැනි අයහපත් අතකට යොමුවී තිබෙද්දී ඔහුගේ බිරිඳ සුසෑන් ඒ ගැන කිසිවක් ප්‍රකාශ කර තිබුණේ නැහැ. පසුගිය මාස කිහිපය තිස්සේ ම ඇය රිතික් සමීපයෙහි රැඳී සිටින බවක් අසන්නට දකින්නට ලැබුණේ නැහැ. මේ නිසා බොහෝ දෙනා ප්‍රකාශ කළේ සුසෑන්, රිතික්ගෙන් වෙන්වී සිටින බවයි. එවැනි ආරංචියක් පැතිරෙන අතරේදී ඉන්දීය රූපවාහිනී වැඩසටහනකට එක්වූ සුසෑන් පැවසුවේ, දෙසැම්බර් 11 දා විවෘත කෙරෙන තමන්ගේ අලුත්ම වෙ‍‍ෙළඳ සල විවෘත කරන්න රිතික් පැමිණෙන බවයි. ඒ වුණත්, රිතික් නැවතත් ඉන්දියාවට පැමිණෙන්නට බලාපොරොත්තු වන්නේ දෙසැම්බර් 16 දා. ඔහු සුසෑන්ට ප්‍රකාශ කර තිබුණ් දෙසැ. 11දා පැමිණීමට නොහැකි නිසා ඇගේ සමීප යෙහෙළියන් සමඟ වෙළඳ සල විවෘත කරන ලෙසයි.
එදා හින්දි සිනමාව වර්ණවත් කළ දැවැන්ත සිනමාකරු රාජ් කපූර් ගේ මුනුපුරු මිනිබිරියන් අද බොලිවුඩ් සිනමාව තව තවත් ඔප් නංවන අයුරු කිසිවෙකුට වසන් කරන්නට බැහැ. මේ යොවුන් කපූර් පරපුරේ අද වන විට වඩාත් ජනප්‍රියත්වයට පත්ව සිටින්නේ කරීනා කපූර් සහ රන්බීර් කපූර්. කරීනා ගේ පියා රන්ධීර් කපූර්. ඔහු, රාජ් කපූර් ගේ වැඩිමල් පුත්‍රයායි. රන්බීර් ගේ පියා රිශි කපූර්. ඔහු, රාජ් කපූර් ගේ දෙවැනි පුත්‍රයායි.
කරීනා ගේ වයස මේ වන විට අවුරුදු 33 ක්. රන්බීර් 31 වැනි වියෙහි පසුවෙනවා. කරීනා, තමන්ගේ බාල ඥාති සොයුරු රන්බීර් ට දැඩි සෙනෙහසක් දක්වනවා. මෑතකදී රන්බීර් ගැන නොයෙකුත් කතන්දර මාධ්‍යවල පළවෙද්දී ඔහු වෙනුවෙන් කතා කරන්නට ඉදිරිපත් වුණේ කරීනායි. රන්බීර්, ඔහුගේ පෙම්වතිය කට්රිනා කායිෆ් සමඟ ස්පාඤ්ඤයේ මුහුදු වෙරළක සක්මන් කළ ආකාරය දැක්වෙන ඡායාරූප වෙබ් අඩවි වල පළවද්දී රන්බීර් ට වැදුණු ‘මඩ ප්‍රහාර’ වළක්වන්නට වෑයම් කළේ කරීනායි. තම පුතුගේ ස්පාඤ්ඤ ගමන ගැන නොසතුටට පත් රිශි කපූර් සහ නීතු කපූර් යුවළ ඔහුට දෝෂාරෝපණය කළා. ඒත් කරීනා පැවසුවේ රන්බීර් ට ගැළපෙන යුවතිය කට්රිනා නිසා ඔවුන් දෙදෙනා විවාහ විය යුතු බවයි.
පසුගිය සතියේ පැවති ජනප්‍රිය රූපවාහිනී සම්මුඛ සාකච්ඡාමය වැඩසටහනකට සහභාගි වෙමින් කරීනා ප්‍රකාශ කළ කාරණයක් කාගේත් අවධානය දිනා ගත්තා. ජනප්‍රිය චිත්‍රපට අධ්‍යක්ෂ කරන් ජොහාර් මෙහෙයවන 'කොෆි විත් කරන්’ නම් වූ වැඩසටහනට එක්වූ කරීනා පැවසුවේ, තමන් වඩාත්ම ප්‍රිය කරන තැනැත්තිය වන්නේ තම නෑනණ්ඩිය වන කට්රිනා කායිෆ් බවයි. කරීනා, කට්රිනා ව නෑනණ්ඩිය ලෙස හැඳින්වීම බොහෝ දෙනෙකු තුළ කුතුහලයක් ජනිත කරවන්නට සමත් වෙලා. ‘කරීනා, කට්රිනාට නෑනා කියල කිව්වෙ ඇත්තටම රන්බීර්, කට්රිනාව බැඳල නිසාද?’ ඇතැම් අය කරීනා ගේ ප්‍රකාශයෙන් පසුව එලෙස විමසන්නට පටන් ගත්තා. ඔවුන් පැවසුවේ රන්බීර් සහ කට්රිනා ගේ විවාහ ගිවිස ගැනීම හොර රහසේම සිදුවී ඇති බව සැක කළ හැකි බවයි.
කොහොම වෙතත් කරීනා මීට පෙර පවසා තිබුණේ රන්බීර් ගේ විවාහ මංගල දිනයේදී, කට්රිනා චිත්‍රපටවල නිරූපණය කළ ගීතමය නර්තන ජවනිකා තමන් විසින් නිරූපණය කරනු ලබන බවයි. එම දර්ශනවල පෙර පුහුණුවීම් නුදුරු දිනයකදී පටන් ගන්නා බවත් ඇය පවසා තිබුණා.
උපුටා ගැනීම සිළුමිණ
