ජුහී සමඟ ශබානා කේන්තියෙන්

ශබානා ආස්මි සහ ජූහි චව්ලා බොලිවුඩ් සිනමාවේ ජනප්‍රිය තරු දෙකක්. දෙදෙනා රංගනයෙන් දායක වූ චිත්‍රපට එකිනෙකට වෙනස් වුවද දෙදෙනාම ප්‍රවීණ නිළියන් බව නම් අවිවාදිතයි. මේ දෙදෙනා රඟන අලුත් ම චිත්‍රපටය තමයි, ‘චාක් ඇන්ඩ් ඩස්ටර්'. බොලිවුඩ් - සිනමා ‍ලොව නමක් දිනා සිටින ප්‍රවීණ වේෂ නිරූපණ ශිල්පියෙකු වන සුභාෂි සිං ගේ කුලුඳුල් අධ්‍යක්ෂණය වන මේ චිත්‍රපටය රූගත කරද්දී පුංචි ප්‍රශ්නයක් ඇතිවෙලා.

ප්‍රශ්නය මතුවී ඇත්තේ ශබානා සහ ජූහි අතරයි. ඒ, රූගත කිරීම්වලට නිසි වේලාවට නොපැමිණෙන කාරණයක් නිසයි. කලට වේලාවට රූගත කිරීම්වලට නො‍එන්නේ කවුරුන්ද? ජූහි චව්ලා තමයි නියමිත වේලාවට රූගත කිරීම්වලට නොපැමිණෙන්නේ. මේ නිසා ශබානා ආස්මි නිතරම කේන්ති‍ෙයන් සිටි බවයි ආරංචි. රූගත කිරීමක් පටන්ගන්න කලින් සිදු කෙරෙන වේෂ නිරූපණ කටයුතුවලට එක්වන ශබානා, තමන්ට අයිති වැඩ කොටස නිමවූ සැණින් ම චිත්‍රපටය රූගත කරන ස්ථානයට පැමිණෙනවාලු. ඒත් ජූහී එලෙස පැමිණෙන්නේ නැතිලු. ඇය එතැනට එන්නේ විනාඩි කීපයක් ම ප්‍රමාදවීමෙන් පසුවලු. ‘චාක් ඇන්ඩ් ඩස්ටර්’ චිත්‍රපටයේ ශිල්පියෙකු පැවසුවේ ජූහි වේෂ නිරූපණ කාමරයේ අනවශ්‍ය ලෙස කාලය කා දමන බවයි. ඇයගේ ප්‍රමාදය නිසා ශබානා ට දර්ශන තලයේ විනාඩි 30 ක් හෝ 45 ක් පමණ කාලය ගත කරන්නට සිදුවන බවත් ඔහු පැවසුවා.

ජූහී ගේ ප්‍රමාදය ශබානා මුල් දවස් දෙක තුනේදී ඉවසා සිටි බවත් දිගින් දිගටම ප්‍රමාදය සිදුවන විට ඇගේ ඉවසීමේ සීමාව ඉක්මවා ගොස් ඇය ජුහී ට දොස් තැබූ බවත් පැවසෙනවා. මේ ගැන මාධ්‍යවේදියකු ශබානාගෙන් විමසූ විට ඇය කීවේ තමන් සහ ජූහි අතර කිසිදු ප්‍රශ්නයක් ඇති නොවූ බවයි. කාලය කළමනාකරණය කිරීම ගැන තමා ජූහි සමග සුහදව කතා බහ කළ බවයි ඇය කියා සිටියේ.

සැර වැඩි නිසා තහනමක්

සරාගී නිළි සනි ලියොන් නිසා මැවෙන ආන්දෝලනාත්මක පුවත් මේ දිනවල බහුලයි. ඒ ‍ෙහ්තුවෙන් ඇය වෙත මුළු ලෝකයේ ම අවධානය යොමුවීම නිසා ඇගේ ජනප්‍රියත්වය තවත් වැඩිවෙලා. ඇගේ රංගනය ඇතුළත් චිත්‍රපටවලට ද ලැබෙන්නේ ප්‍රේක්ෂක ආකර්ෂණයක්.

පසුගියදා සනි ලියොන් නිසා තවත් ආන්දෝලනාත්මක පුවතක් මැවුණා. ඒ, ඇය ප්‍රධාන චරිතයක් රඟපෑ ‘මස්ටිසාදේ’ චිත්‍රපටය නිසයි. තුෂාර් කපූර්, සුරේෂ් මෙනන් සහ වීර්දාස් සෙසු චරිත රඟපෑ මිලාප් සංව්රි අධ්‍යක්ෂණය කළ මේ චිත්‍රපටය ලිංගත්වය හුවා දැක්වෙන හාස්‍යොත්පාදක චිත්‍රපටයක් (Sex Comedy) හැටියටයි හැඳින්වෙන්නේ. මේ චිත්‍රපටය තිරගත කිරීමට අවශ්‍ය අවසරය ලබාදීම ඉන්දීය රැඟුම් පාලක මණ්ඩලය ප්‍රතික්ෂේප කර තිබෙනවා. ඔවුන් පවසන්නේ ‘මස්ටිසාදේ’ චිත්‍රපටයෙහි ඇතුළත් බොහොමයක් දර්ශන ඉන්දීය සංස්කෘතියට ඔරොත්තු නොදෙන බවයි. මේ චිත්‍රපටය රැඟුම් පාලක මණ්ඩලය දෙවරක් ම නැරඹුවද ප්‍රසිද්ධ මහජන ප්‍රදර්ශනයට අවසර ලබා දී නැහැ. චිත්‍රපටය තිරගත කිරීමට නියමිතව තිබුණේ පසුගිය මැයි පළමුවැනිදායි. තවමත් මේ සඳහා අවසරය ලබා දී නැහැ.

‍මේ නිසා ‘මස්ටිසාදේ’ චිත්‍රපටයේ නිෂ්පාදක ප්‍රිටිෂ් නැන්ඩි සහ අධ්‍යක්ෂ මිලාප් සංව්රි ඉන්දීය රැඟුම් පාලක මණ්ඩලයේ තීරණයට එරෙහිව අධිකරණයේ පිහිට පැතීමට තීරණය කර තිබෙනවා. කෙසේ වෙතත් ඉන්දීය රැඟුම් පාලක මණ්ඩලයේ සාමාජිකයකු ප්‍රකාශ කර ඇත්තේ ‘මස්ටිසාදේ’ චිත්‍රපටයේ ඇතුළත් වන කතාව සහ දර්ශන ඉන්දියාව වැනි රටකට ‘සැර වැඩි’ බවයි. ඉන්දීය රැඟුම් පාලක මණ්ඩලයේ සභාපතිවරයා ලෙස කටයුතු කරන්නේ චිත්‍රපට නිෂ්පාදකවරුයකු ලෙස නමක් දිනා සිටින පහ්ලාජ් නිහාලනියි. මේ චිත්‍රපට ‘තහනම’ ගැන මාධ්‍යවේදීන් ඔහුගෙන් කරුණු විමසා තිබුණා. ඒත් ඔහු කිසිවක් ප්‍රකාශ කර නැහැ.

සනී ලියොන් ගේ අනුරාගික රංගනය නිසා ‘සැර වැඩි වූ’ ‘මස්ටිසාදේ’ චිත්‍රපටය තහනමට ලක්වේවිද, නැතහොත් කපා කොටා තිරගත කිරීමට හැකිවේද යන්න දැන ගත හැක්කේ උසාවි තීන්දුවෙන් පසුවයි.

අමීර් ට නඩුවක් වැටෙයි ද?

රටක ජාතික සංකේත දේශපාලන හෝ වෙ‍ෙළඳ කටයුතු වලට යොදා ගනිමින් ඒවා අවභාවිතයේ යොදා ගැනීම වරදක්. එය අමුතු කාරණයක් නොවෙයි. කවුරුන් හෝ එවැන්නක් සිදුකළහොත් ඔහුට හෝ ඇයට නීතිය ඉදිරියේ දඬුවම් විඳින්නට සිදුවෙනවා. අනුවණ සහ කෛරාටික පුද්ගලයන් තම පටු අරමුණු ඉටුකර ගන්නට ජාතික සංකේත භාවිත කළත් අමීර් ඛාන් වැනි දැනුම් තේරුම් ඇති අයෙකු එවැන්නක් සිදුකළැයි සිතිය හැකිද? ඔව්. අමීර් ඛාන් ද ඒ වරද සිදු කරලා.

‘සත්‍යමේව ජායතේ’, අතිශය ජනප්‍රිය රූපවාහිනී වැඩසටහනක්. (මේ වැඩසටහන ඉදිරිපත් කරන්නේ අමීර් ඛාන්) ඉන්දීය මධ්‍යම රජයේ අවසරයකින් තොරව ‘සත්‍යමේව ජායතේ’ වැඩසටහනේ තේමා වාදනයේදී ඉන්දීය ජාතික ගීතයේ වචන කීපයක් යොදා ගත්තැයි අමීර් ට ‍චෝදනා එල්ල වෙලා.

‘සත්‍යමේව ජායතේ’ යන වචන කීපය ඉන්දීය ජාතික ගීතයේ සඳහන් වෙනවා. මෙම වචන ඉන්දීය රජයේ පූර්ව අවසරයකින් තොරව කිසියම් කාර්යයකට යොදා ගැනීම නීති විරෝධීයි. මෙවැනි අවසරයක් ලිඛිතව ලබාගෙන තිබිය යුතු බැවින් එම අවසරය සඳහන් ලිපිය ඉදිරිපත් කරන ලෙස ඉන්දීය සමාජ ක්‍රියාකාරිකයකු වන මනෝරන්ජන් රෝයි අමීර් ට දන්වා තිබෙනවා. ඔහු මේ දැනුම්දීම සිදු කර ඇත්තේ නීතිඥ මනෝජ් සිං ගේ උපදෙස් මතයි. ‘සත්‍යමේව ජායතේ’ වැඩසටහනේ නිෂ්පාදකවරුන් වශයෙන් කටයුතු කරන අමීර් ට සහ ඔහුගේ බිරිඳ වන කිරන් රාඕට සහ අධ්‍යක්ෂ සත්‍යජිත් භත්කාල් ට යැවූ මේ ලිපියෙහි වැඩිදුරටත් සඳහන් වන්නේ ඉන්දීය රජයේ අවසරය ලැබූ ලිපිය ඉදිරිපත් නොකළ හොත් තමන් නීතිමය ක්‍රියාමාර්ගවලට යොමුවන බවයි.

උපුටා ගැනීම සිළුමිණ