අනුශ්කා විරාට්ගේ ගෙදර
බොලිවුඩ්පුරයේ කතා ෆැක්ටරිවලට දැන් තවත් උණුසුම් මාතෘකාවක් ලැබිලා. මෙහි ප්‍රධාන චරිත දෙක තමයි, සුපිරි ක්‍රිකට් ක්‍රීඩක විරාට් කෝලි සහ සුපිරි නිළි අනුශ්කා ශර්මා. පසුගියදා අවසන් වූ ලෝක කුසලාන ක්‍රිකට් තරග මාලාවේ අර්ධ අවසන් වටයෙන් ලැබූ පරාජයත් සමඟම විරාට් කෝලිට එල්ල වුණේ ගල් මුගුරු. ඔහුට විතරක් නොවෙයි අනුෂ්කාටත් එවැනිම ගල් මුගුරු පොදියක්ම එල්ල වුණා. ඉන්දීය ක්‍රිකට් ලෝලීන් චෝදනා කළේ මේ පරාජයට අනුශ්කාගේ ‘දැඟලිල්ල’ ප්‍රබල හේතුවක් වුණාය කියලයි. ඇය, විරාට් ක්‍රීඩා කරන අතරතුර දී ක්‍රීඩා මණ්ඩපයේ සිට ඔහුට ප්‍රතිචාර දක්වන්නට යාමෙන් මේ ‘වින්නැහිය’ සිදුවූ බවටයි ඔවුන් තව දුරටත් ප්‍රකාශ කරන්නේ. අනුශ්කාට මීට කලිනුත් මෙවැනිම චෝදනාවක් එල්ල වූ බව ඔබට මතක ඇති.
කොහොම වෙතත්, ඒ චෝදනා පසෙකට දැමූ අනුශ්කා මෙවර ද තම පෙම්වතා වන විරාට් ක්‍රීඩා කරන අයුරු නරඹන්නට ඕස්ට්‍රේලියාවට පිටත්ව ගියා. පරාජයේ අමිහිර විඳ ගනිමින් මේ දෙදෙනා ආපසු ඉන්දියාවට පැමිණියේ එකටයි. දෙදෙනා මුම්බායි ගුවන් තොටින් සිය රටට පැමිණෙන අයුරු දිස්වන ඡායාරූප කීපයක් ද පසුගිය සතියේ අන්තර් ජාලයේ සටහන් වී තිබුණා. විරාට් - අනුශ්කා යුවළට දෙහි කැපූ අය සිතුවේ මින් මතු මේ දෙදෙනාගේ පෙම් සබඳකම නොපැවැත්වේවි ය කියලයි.
ඒත්, ඔවුන්ගේ ඒ සිතුවිලි කණපිට හරවමින් පෙරටත් වඩා හොඳින් විරාට් සහ අනුශ්කාගේ පෙම් කතාව ගලාගෙන යනවා. මේ වන විට අනුශ්කා, විරාට්ගේ නිවෙසෙහි රැඳී සිටින බවත් පැවසෙනවා. දැන් විරාට්ගේ පවුලේ උදවිය අනුශ්කාව සලකන්නේ ඔවුන්ගේම ඥාති දියණියක්, සහෝදරියක් හැටියටලු. මේ අතර, ඉන්දීය ක්‍රිකට් ක්‍රීඩක සුරේෂ් රයිනාගේ විවාහ මංගල උත්සවයට සහභාගි වීමට විරාට් ලක ලැහැස්ති වී සිටියා. මේ මංගල උත්සවයට ඔහු සහභාගි වන්නේ තනිවම නම් නොවෙයි. තම පෙම්වතිය අනුශ්කා ශර්මාත් එක්කයි. සුරේෂ් සහ ප්‍රියංකා ගේ විවාහ මංගල උත්සවය පැවැත්වුණේ නවදිල්ලියේ ලීලා පැලස් නම්වූ සුපිරි හෝටලයේදියි.
‘හබි'ත් එක්ක දැන්වීමක
බොලිවුඩ් තිරයේ නිළි රැජනක් හැටියට ඇය කිරුළු දරා සිටියා. මේ වන විට ජීවිතයේ හතර වැනි දශකයෙනුත් අඩකටත් වඩා ගත කර සිටින ඇගේ සුන්දර රූ සපුව වෙනස් වී නැහැ. ඇය තමයි, මධුරි ඩික්සිත්. සිනමා ලොව ඇය පෑ දස්කම් යළි විස්තර කළ යුතු නැහැ. බොලිවුඩ් සිනමාවේ ජනප්‍රියත්වය රැකගත් ඇය රූපවාහිනී මාධ්‍යයටත් එක්වුණා. ඒ, රූපවාහිනී වෙළෙඳ දැන්වීම්වල රඟපෑමෙන් සහ රියැලිටි වැඩ සටහන්වල විනිශ්චයන්ට එක්වීමෙන්.
මධුරිගේ සැමියා, වෛද්‍යවරයකු බව ඔබ දන්නවා. ඔහු, ශ්‍රීරාම් නෙනේ. මෑතකදී ඔහු ද රූපවාහිනී වෙළෙඳ දැන්වීමකට පෙනී සිටියා. තනිවම නොවෙයි. දයාබර බිරිය, මධුරි ය සමඟයි. ‘ඇක්වාගාඩ්’ නිෂ්පාදන වෙනුවෙන් නිර්මාණය කළ රූපවාහිනී වෙළෙඳ දැන්වීමකටයි මේ යුවළ පෙනී සිටියේ. මෙම නිෂ්පාදනයේ හිමිකරු වන යුරේකා ෆෝබ්ස් සමාගමේ සන්නාහ තානාපතිවරුන් දෙපළක් හැටියටත් මධුරි සහ ශ්‍රී රාම්ව පත් කර තිබෙනවා. ඒ නිසයි මේ දෙදෙනාට ‘ඇක්වාගාඩ්’ වෙළෙඳ දැන්වීමක පෙනී සිටින්නට අවස්ථාව සැලසුණේ. මධුරිගේ සැමියා ඉන්දියාවේ හෘද රෝග ශල්‍ය වෛද්‍යවරයෙක්. මධුරි අවසන් වතාවට පෙනී සිටියේ 2014 දී තිරගත වූ ‘ගුලාබ් ගැන්ග්’ චිත්‍රපටයේයි. යළි ඇගේ සිනමා රංගනයක් රසික පිරිසට දැක ගන්නට ලැබෙන්නේ කවදාදැයි තවම හෙළි වී නැහැ.
වසර 30 යුග දිවිය නිමවෙලා
රතී අග්නිහෝත්‍රි, බොලිවුඩ් පුරයේ ජනප්‍රිය තරුවක්. 1979 දී දකුණු ඉන්දීය සිනමාවෙන් රංගන ක්ෂේත්‍රයට පිවිසුණු ඇය, 1990 වසර වනතුරු චිත්‍රපට රැසක රඟපෑවා. ඉන් පසුව සිනමා රංගනයෙන් ඈත්ව සිටි ඇය නැවතත් ඊට එක්වූයේ 2001 දීයි. ඇය විවාහ වුණේ 1985 දීයි. ඇගේ සැමියා අනිල් විර්වානි. මේ වන විට 54 වැනි වියෙහි පසුවන රතී, පසුගිය දා පොලීසියට පැමිණිල්ලක් කරමින් කියා සිටියේ තමන්ට සැමියාගෙන් නොයෙකුත් තාඩන පීඩන එල්ල වන බවයි. ඔහු තමන් වෙත මරණ තර්ජන එල්ල කරන බවත් ඇය ඒ සමඟම සඳහන් කළා. මේ වන විට තමන් සහ අනිල්ගේ තිස් වසරක විවාහ ජීවිතයෙන් සමුගන්නටත් රති තීරණය කර හමාරයි.
ඇය විසින් පොලීසියට කරන ලද පැමිණිල්ල වෙනුවෙන් ක්‍රියාත්මක වූ පොලිස් නිලධාරීන්ට රතී ව මුණ ගැසීමටවත් නොහැකි වී ඇති බවයි පැ‍වසෙන්නේ. ඉන්දියාවේ ලොනවාලා ප්‍රදේශයේ පිහිටි මවගේ නිවෙසෙහි වෙසෙන රතීගෙන් ප්‍රකාශයක් ලබා ගැනීමට ගිය පොලිස් නිලධාරීන් හමුවීමට ඇය උනන්දුවක් දක්වා නැහැ. මේ ගැන මාධ්‍යයට ප්‍රකාශයක් කළ පොලිස් නිලධාරියකු කීවේ රති අග්නිහෝත්‍රි මේ දිනවල යම් කිසි මානසික රෝගයකින් පීඩා විඳින බවක් දක්නට ලැබෙන බවයි. ඇය, විෂාදය නම්වූ මානසික රෝගයෙන් පෙළෙන බව සමහරු පවසනවා. ඇගේ සැමියා වන අනිල් වර්වානි පැවසුවේ රතී නඟන චෝදනා තමන් ප්‍රතික්ෂේප කරන බවයි.
උපුටා ගැනීම සිළුමිණ
උපුටා ගැනීම සිළුමිණ
