අමීර් හිටිගමන් ගණන් උස්සයි
ෆර්හාන් අක්තාර්, ජනප්‍රිය චිත්‍රපට අධ්‍යක්ෂවරයෙක්. ඔහු ළඟදීම අලුත් චිත්‍රපටයක් නිර්මාණය කරන්න සැලසුම් කරමින් සිටිනවා. මේ චිත්‍රපටයේ නිෂ්පාදකවරයා වන්නේ ප්‍රවීණ නිෂ්පාදකවරයකු වන රිටේෂ් සිධ්වානි. ප්‍රධාන නළු නිළි යුවළ හැටියට තෝරාගෙන තිබුණේ අමීර් ඛාන් සහ දීපිකා පදුකෝන්. චිත්‍රපටයේ අධ්‍යක්ෂවරයා සහ නිෂ්පාදකවරයා අමීර් ඛාන් තෝරා ගන්න තීරණය කළේ ඔහු රඟපෑ චිත්‍රපට අතිශය සාර්ථකව තිරගත වන බවට කිසිඳු සැකයක් නැති නිසයි. ඒ බව කවුරුත් දන්නා දෙයක්. මේ ගැන සාකච්ඡා කරන්න අධ්‍යක්ෂ ෆර්හාන් සහ නිෂ්පාදක රිටේෂ්, අමීර් ව මුණ ගැසුණා. චිත්‍රපටයේ කතාව, තිර නාටකය එම කතා බහේදී හොඳින් අව‍බෝධ කරගත් අමීර් ඊළඟට විමසුවේ ප්‍රධාන නිළිය කවුරුන් ද කියලයි. ෆර්හාන් සහ රිටේෂ් කියා සිටියේ දීපිකා පදුකෝන් ඒ සඳහා තෝරාගෙන ඇති බවයි.
අමීර්, දීපිකා සමඟ රඟපෑමට කැමැත්ත පළ කළා. මේ කතාබහේදී ඊළඟට අවධානය යොමුවුණේ අමීර්ගේ ගාස්තුව පිළිබඳවයි. ඔහු කෙළින්ම කියා සිටියේ තමන්ගේ රංගන දායකත්වය වෙනුවෙන්, චිත්‍රපට ප්‍රදර්ශනයෙන් ලැබෙන ලාභයෙන් සියයට අසූවක් ලැබිය යුතු බවයි. අමීර් මෙවැනි ඉහළ ප්‍රතිශතයක් ඉල්ලා සිටීවි යැයි චිත්‍රපටයේ නිෂ්පාදකවරයා හෝ අධ්‍යක්ෂවරයා සිහිනෙකින්වත් සිතුවේ නැහැ. අමීර් රඟපෑ චිත්‍රපට අතිශය ජනප්‍රිය වී අතිවිශාල ආදායම් ලබන බව සත්‍යයක්. ඔහු එවැනි විශාල කොටසක් බලාපොරොත්තු වූයේ ඒ නිසයි. ඒත් ඔහුගේ ඉල්ලීම ඉටුකරන්නට නොහැකි යැයි නිෂ්පාදකවරයාත්, අධ්‍යක්ෂවරයාත් ප්‍රකාශ කළා. මෙයින් නොසතුටට පත් අමීර්, එම චිත්‍රපටයෙන් ඉවත් වීමට තීරණය කළා
අනුෂ්කා - විරාට් විවාහ ගිවිස ගනී?
මෑතකදී ඉන්දියාව සහ ශ්‍රී ලංකාව අතර පැවැත්වුණු ටෙස්ට් ක්‍රිකට් තරගයකදී පිතිහරඹයක යෙදුණු සුපිරි ක්‍රීඩක විරාට් කෝලි එක් මොහොතකදී සුළ‍ඟේ පාවෙන හාදුවක් කාටදෝ දුන්නා. ඔහු ඒ හාදුව දුන්නේ ප්‍රේක්ෂකාගාරයේ සිටි යුවතියකටයි. බොහෝ දෙනෙකු ඇය දෙසට නෙත් යොමු කළා. ඇය තමයි ජනප්‍රිය නිළි අනුශ්කා ශර්මා. ඇය ද විරාට් වෙත ප්‍රතිචාර දැක්වූයේ ඒ අයුරින්මයි. විරාට් සහ අනුෂ්කා අතර මෙතරම් සමීප බවක් ඇත්තේ ඇයිදැයි ඒ සිදුවීමෙන්ම කාටත් වැටහුණා. ඔවුන් දෙදෙනා පෙම්වතුන්. ඒ බව දැන්නම් වසන් කරන්න බැහැ. ඒත් මීට මාස ගණනකට කලින් නම් තමන් අතර පවතින සබඳතාව කොහොමටවත් ඔවුන් දෙදෙනා හෙළිදරව් කළේ නැහැ. “අපි දෙන්නගෙන් කවුරුවත් කිසිම දෙයක් හැංගුවෙ නැහැ. අපි දෙන්නා සාමාන්‍ය විදිහට ජීවත් වෙනවා.
අපි අතරේ තියෙන ආශ්‍රය ගැන වැඩි විස්තර කියන්න අවශ්‍ය නැහැ.” අනුෂ්කා මෙලෙස කීවේ ඇගෙන් මේ සබඳකම ගැන තොරතුරු විමසූ විටදීයි. ඒ වුණත් විරාට් නම් මේ ගැන කිසිම දෙයක් සඟවන්න උත්සාහ කළේ නැහැ. තමන් එදා ක්‍රීඩා පිටියේ සිට හාදුවක් පුද කළේ අනුෂ්කාට බවත් කියන්නට ඔහු පැකිළුණේ නැහැ. ඉන් පසුව ද ඔහු අනුෂ්කා සමඟ පවත්වන පෙම් සබඳකම කිහිප වතාවක්ම හෙළි කළා. මේ නිසා අනුෂ්කාට තව දුරටත් එය රහසක් ලෙස තබා ගන්න හැකිවුණේ නැහැ. තමන් සහ විරාට් අතර ප්‍රේමයක් පවතින බව ඇය ප්‍රසිද්ධියේම පිළිගත්තා.
මධුරිට මරණ තර්ජන
ඉන්දියාවේ බන්ද්‍රා ප්‍රදේශයේ පිහිටි සයිබර් පොලිස් ස්ථානය ක්‍රියාත්මක වන්නේ දුරකථනයෙන් සහ අන්තර් ජාලයෙන් සිදු කෙරෙන තර්ජන හෝ වෙනත් අකටයුතුකම් ගැන සොයා බලන්නයි. පසුගිය දා මේ පොලීසියට බොලිවුඩ්පුරයේ ප්‍රවීණ, සුපිරි නිළි රැජනකගේ පැමිණිල්ලක් ලැබුණා. පැමිණිල්ල සිදු කළේ ඇගේ පෞද්ගලික ලේකම්වරයායි. එයින් කියවුණේ නාඳුනන තැනැත්තෙකු මුදල් ඉල්ලා දුරකථනය ඔස්සේ සිදුකළ මරණීය තර්ජන කිහිපයක් ගැනයි. මේ තර්ජන එල්ල වී තිබුණේ බොලිවුඩයේ සුරූපී තරුව මධුරි ඩික්සිත්ටයි.
ජංගම දුරකථනයකින් මධුරිගේ ජංගම දුරකථනය ඇමතූ මේ නාඳුනන පුද්ගලයා ඇගෙන් මුදල් ඉල්ලා තර්ජනය කර තිබෙනවා. ඔහු මුලින්ම මධුරිව අමතා ඇත්තේ අලුයම 3 ට පමණ බවයි සඳහන් වන්නේ. කෙතරම් මුදලක් ඉල්ලුවේදැයි සඳහන් ව නැතත් එම මුදල නොදුන්නොත් මධුරිත් ඇගේ දරු දෙදෙනාවත් ඝාතනය කරන බවටත් ඔහු තර්ජනය කර තිබෙනවා.
පළමු ඇමතුම මධුරි ගණන් නොගත්තත් ඉන් පසුව ඔහු තවත් එවැනිම මරණ තර්ජන තුන් වතාවක් එල්ල කර තිබෙනවා. මෙලෙස තර්ජනය කරද්දී ඔහු පවසා ඇත්තේ තමන් ඉන්දියාවේ ක්‍රියාත්මක වන පාතාල කල්ලි නායකයකු වන චෝටා රාජන් නමැත්තාව ඇසුරු කරන බවයි. ඒ විතරක් නොවෙයි, පහළොස් වියැති පිරිමි ළමයකුට තමන් විසින් අවි පුහුණුව ලබා දී ඇතැයි ද, ඉල්ලා ඇති මුදල් නොලැබුණහොත් මේ ගැටවරයා මධුරිගේ නිවෙසට එවා ඔහු ලවා වෙඩි තබා, බෝම්බ ප්‍රහාර එල්ල කර මුළු පවුලම විනාශ කරන බවත් පවසා තිබෙනවා. මේවා නොසලකා හැරිය යුතු තර්ජනයන් නොවන බව වටහා ගත් මධුරි තම ලේකම්වරයාට උපදෙස් දුන්නේ වහාම මේ බව සඳහන් පැමිණිල්ලක් පොලීසියට ඉදිරිපත් කරන ලෙසයි.
ඒ අනුව ක්‍රියාත්මක වූ බන්ද්‍රා හි සයිබර් පොලීසිය විසිතුන් වියැති ප්‍රවීන් කුමාර් ප්‍රධාන් නමැති තරුණයකු අත්අඩංගුවට ගත්තා. ඔහු විසින් මධුරිට තර්ජනාත්මක ඇමතුම් දෙන ලද ජංගම දුරකථන ද පොලිස් භාරයට පත්වුණා.
උපුටා ගැනීම සිළුමිණ
