මෙගා අපහාසයක් නොවේ උපහාසයක් පමණයි - අධ්‍යක්‍ෂ දමින්ද මඩවල

ඔබ කැමැතිද මෙගා නාට්‍ය බලන්න? අවුරුදු ගණන් කොටස් හාර පන්සීයක් තරම් දිගට ඇදෙන මෙගා නාට්‍ය බලන්න ඔබ කැමැතිද? ඔබ කැමැති වුණත්, අකැමැති වුණත් මේ කතා කරන්නෙත් මෙගා නාට්‍යයක් ගැන... ඒත් මේ නාට්‍යයේ නම විතරයි 'මෙගා' හැම ඉරිදාම රාත්‍රි 9.00ට ස්වර්ණවාහිනියෙන් ඔබට 'මෙගා' බලන්න පුළුවන්. 'මෙගා' අධ්‍යක්‍ෂණය කළ 'දමින්ද ඩී. මඩවල' අපට දක්වපු අදහස් තමයි මේ.

මොකක්ද 'මෙගා' කියන්නේ?

හිනායන්න කියලා හිතාගෙන රඟපාන ඒත් මළාට මිනිස්සු හිනස්සන්න බැරි නළු නිළියෝ ටිකක්, අතරමඟින් දාලා ගියපු නාට්‍යය ඉතිරි කොටේ අදින රචකයෙක්, නන්නත්තාර වුණු අරික්කාල් නාට්‍යයට මෙගා සත්කාරය දෙන අධ්‍යක්‍ෂවරයෙක්, ජීවිතයේ යථාර්ථයයි ෂූටිනුයි පැටලුණු ටී බෝයි කෙනෙක්... මෙගා නාට්‍යය මැද බඩී ජීවිත ගෙවන කතාව තමයි මෙගා...'

ඒ කියන්නේ තවත් ටෙලිනාට්‍යයක්...?

'තවත් ටෙලිනාට්‍යයකට වඩා වෙනස් එකක්... ටෙලි නාට්‍ය ගැන යථාර්ථය පෙන්වන නාට්‍යයක්.'

'මෙගා' දීර්ඝ නාට්‍යවලට පහරදීමක් නේද කරලා තියෙන්නේ?

'ඇත්තටම මෙගා නාට්‍යවලට පහරදීමක් මේකෙන් කරලා නෑ. මෙගා කියන්නේ එක්තරා කලාවක්. ඒකේ යථාර්ථය ගැන හාස්‍යමය පසුබිමකින් කතා කෙරෙනවා. අපහාසයක් නෙවෙයි මේක උපහාසයක්..'

ඔබ ගැන ටිකක් කතා කළොත්, ඔබේ කලා දිවියට කොපමණ කලක් වෙනවද?

'මම අවුරුදු 22ක් කලා ක්‍ෂේත්‍රයේ රැඳිලා ඉන්නවා... විවිධ අධ්‍යක්‍ෂවරු එක්ක අධ්‍යක්‍ෂණය සහාය අධ්‍යක්‍ෂණය, නිශ්චල ඡායාරූපකරණය වගේ අංශවලට දායක වුණා. 'තුන්පත් රැළ කියලා කොටස් 18ක ටෙලි නාට්‍යයක් මම අධ්‍යක්‍ෂණය කළා.'

ටෙලිනාට්‍යවලට වඩා ඔබ දායක වෙලා තියෙන්නේ චිත්‍රපටවලට නේද?

'ඔව්... දැනට චිත්‍රපට 36ක් මම සහාය අධ්‍යක්‍ෂණය කරලා තියෙනවා. බඹර වළල්ල චිත්‍රපටය නිෂ්පාදනය කළා. ජාත්‍යන්තර චිත්‍රපට 3කට සහාය අධ්‍යක්‍ෂණයෙන් දායක වුණා. 'කෝච්චියෙන් මඩකළපු යං' කෙටි චිත්‍රපටයට ජාතික චිත්‍රපට සංස්ථාවේ හා ඇජේන්ඩා 14 සම්මාන උළෙලයන්හිදී සම්මාන ලැබුණා...'

සහාය අධ්‍යක්‍ෂණය කළ චිත්‍රපට කිහිපයක නම් සඳහන් කළොත්...?

'අනන්ත රාත්‍රිය, පවුරු වළලු, ඉර මැදියම, ආකාස කුසුම්, පුංචි සුරංගනාවි, සූරිය අරණ, සමනල තටු, සිරිරජසිරි, කුස පබා, බිංදු, මිල්ලෙ සොයා, අස්වැසුම, ඉනිඅවන්, බඹර වළල්ල වගේ ඒවා ප්‍රධානයි.

චිත්‍රපට හා ටෙලිනාට්‍යවලට සීමා වෙලාද ඉන්නේ?

ඇත්තටම නෑ. වේදිකා නාට්‍ය, වාර්තා වැඩසටහන්, කෙටි චිත්‍රපට, වෙළෙඳ දැන්වීම් පවා සහාය අධ්‍යක්‍ෂණය කරලා තියෙනවා. තව පුවත්පත් වාර්තාකරුවකු ලෙසත් සේවය කරලා තිබෙනවා. දැනට, කැලණිය විශ්වවිද්‍යාලය, ශ්‍රී ලංකා රූපවාහිනි අභ්‍යාස ආයතනය, ශ්‍රී ලංකා පදනම යන ආයතනවල බාහිර කථිකාචාර්යවරයකු ලෙස සේවය කරනවා.

අපි නැවත මෙගා නාට්‍යයට ගියොත් මේ නාට්‍යයට දායක වෙන්නේ කවුද?

'මම අධ්‍යක්‍ෂණයෙන් දායක වුණා. නිෂ්පාදනය ඩබ්ලිව්.ඒ.එස්. චාමර, කැමරා අධ්‍යක්‍ෂණය - කපිල සුගත් විජයරත්න, තිර රචනය අසංක සායක්කාර, සංස්කරණය - විරංග කැටිපෙආරච්චි'

කවුද මේකට රංගනයෙන් දායක වෙන්නේ?

ගිහාන් ප්‍රනාන්දු, ජයන්ත මුතුතන්ත්‍රි, දමයන්ති ෆොන්සේකා, සුලෝචනා වීරසිංහ, ටෝනි රණසිංහ, නෙතලි නානායක්කාර වගේ නළු නිළියන් විශාල ප්‍රමාණයක් රංගනයෙන් දායක වුණා.

කොහොමද ලැබෙන ප්‍රතිචාර

බොහෝ අය මේ නාට්‍ය දිහා බලන ආකාරය විවිධයි. ඒ නිසා ලැබෙන ප්‍රතිචාරත් විවිධයි. ක්‍ෂේත්‍රයේ අයට වඩා රසික ප්‍රජාව 'මෙගා' ආදරයෙන් වැලඳ ගත්තා. උපුටා ගැනීම මව්බිම