ගෝරිල්ලන් බලන්න ක්ලින්ටන් ඇවිත්
කීර්තිමත් ඔස්කා සම්මානයකට ද නිර්දේශව තිබෙන ‘විරුන්ගා’ නම් වූ වාර්තාමය චිත්‍රපටය පසුගිය දා නිව්යෝක් නුවර චිත්‍රකලා කෞතුකාගාරයේ දී තිරගත වුණා. මේ වාර්තා චිත්‍රපටය නිර්මාණය වී ඇත්තේ කොංගෝ රාජ්‍යයේ කඳුකරයෙහි වෙසෙන ගෝරිල්ලාවන් රැක ගැනීමේ අරමුණ පෙරදැරි කරගෙනයි. ‘විරුන්ගා’ වාර්තාමය චිත්‍රපටයේ විධායක නිෂ්පාදකවරයා ලෙස කටයුතු කළේ ජනප්‍රිය හොලිවුඩ් නළු ලියොනාඩෝ ඩි කැප්රියෝ යි. මේ සඳහා කොංගෝ රාජ්‍යයේ විරුන්ගා ජාතික වනෝද්‍යානයේ කාර්ය මණ්ඩලයේ ද සහයෝගය ලැබී තිබෙනවා. මේ චිත්‍රපටය තිරගත කළ දිනයේදී එය නැරැඹීමට අතිවිශේෂ අමුත්තකු ද නිව්යෝක්හි චිත්‍රකලා කෞතුකාගාරයට එක්වුණා. ඔහු තමයි ඇමෙරිකාවේ හිටපු ජනාධිපතිවරයකු වූ බිල් ක්ලින්ටන්. ඔහුගේ බිරිය, ඇමෙරිකාවේ හිටපු රාජ්‍ය ලේකම් හිලරි ක්ලින්ටන් ද මෙය නැරැඹීමට එක්ව සිටියා. ‘විරුන්ගා’ චිත්‍රපටය ළඟ එන ඔස්කා සම්මාන උලෙළේ හොඳම වාර්තාමය චිත්‍රපටය සඳහා නිර්දේශිත නාම ලේඛනයට ද ඇතුළත්ව තිබෙනවා.
සුපිරි නිළියට වැඩිම මනාප
ලොව වඩාත්ම අගය කළ යුතු කාන්තාව ලෙස පසුගිය දා නම් කෙරුණේ සුපිරි නිළියක සහ චිත්‍රපට අධ්‍යක්ෂවරියක ලෙස ජනාදරය දිනා සිටින ඇන්ජලීනා ජොලී යි. ඇය එලෙස කිරුළු පැලඳු‍වේ අන්තර්ජාලය ඇසුරු කරගෙන ‘යූ ගොව්’ නම්වූ පර්යේෂණ ආයතනය විසින් සිදු කරන ලද සමීක්ෂණයකින් ලැබූ ප්‍රතිඵල අනුවයි. මේ සමීක්ෂණයට 25,000 ක් දෙනා සහභාගි වී තිබුණා. ඒ අය අතරින් වැඩිම මනාපය ප්‍රකාශ කර තිබුණේ ඇන්ජලීනාටයි. මේ සමීක්ෂණයේ දෙවැනි ස්ථානය හිමිවුණේ තලේබාන් ප්‍රහාරයකට ලක්වී දිවි ගලවා ගත් 17 වියැති මලාලා යුසෆ්සායි දැරියයි. ඇමෙරිකාවේ හිටපු රාජ්‍ය ලේකම් හිලරි ක්ලින්ටන්, දෙවැනි එලිසබෙත් රැජින සහ ඉන්දීය කොංග්‍රස් පක්ෂයේ නායිකා සෝනියා ගාන්ධි යන අය මනාප ලැයිස්තුවේ ඊළඟ ස්ථාන හිමිකරගෙන තිබෙනවා. මෙම සමීක්ෂණයට රටවල් 23 ක් දායක වී ඇති බව වාර්තා වෙනවා. ජනප්‍රිය ගායිකා සෙලින් ඩියොන්ට මේ සමීක්ෂණයේදී හිමි වී ඇත්තේ හයවැනි ස්ථානයයි. ටේලර් ස්විෆ්ට් සහ බියොන්සෙ ක්නොව්ලස් යන ගායිකාවන්ට එකොළොස් වැනි සහ දොළොස් වැනි ස්ථාන හිමිවෙලා. ජනප්‍රිය නිළි ජෙනිෆර් ලෝරන්ස් ද මේ ලැයිස්තුවේ ඊට පහළින් සිටිනවා.
ජෙනිෆර් ‘කේක්’ අත්දැකීම් හෙළි කරයි
සුපිරි නිළි ජෙනිෆර් ඇනිස්ටන් මඳ කලකට පසුව නැවතත් හොලිවුඩ් සිනමාවට එක්වී සිටිනවා. ඇයගේ නවතම රැඟුම් ඇතුළත් වන්නේ ‘කේක්’ නම් වූ චිත්‍රපටයේයි. මේ චිත්‍රපටය ඇමෙරිකා එක්සත් ජනපදය ඇතුළු ලොව පුරා රටවල් රැසකම තිරගත කිරීම ආරම්භ වන්නේ පෙබරවාරි අග හරියේදීයි. මහජන ප්‍රදර්ශනයට කලින් ‘කේක්’ චිත්‍රපටය කලාකරුවන් සහ මාධ්‍යවේදීන් හමුවේ පසුගිය දා තිරගත වූ බවයි පැවසෙන්නේ. චිත්‍රපටය නැරැඹු බොහෝ දෙනෙකු ජෙනිෆර්ගේ රඟපෑම් අගය කරමින් අදහස් පළ කළා. ඔවුන් පැවසුවේ ඇගේ රංගනය වෙනුවෙන් නිසැකවම සම්මාන ලැබෙනු ඇති බවයි. ” ‘කේක්’ චිත්‍රපටයේ රඟපෑමෙන් මගේ හැකියාව තවත් මුවහත් වුණා. සුවිශේෂ වූ අත්දැකීම් සම්භාරයක්ම ලැබුණා ය කිව්වොත් හරි. මට ලැබුණු චරිතය වෙනුවෙන් මම කැපවුණා.” ජෙනිෆර් වෙතින් ලද අත්දැකීම් එලෙස හෙළි කළා. මේ වන විටත් ගෝල්ඩන් ග්ලෝබ් සම්මානය සඳහා ඇගේ නම නිර්දේශ වී තිබෙන බවයි ආරංචි.
ඩැනියෙල්ගේ පරණ කතාවම හොඳයිලු
ඩැනියෙල් රැඩ්ක්ලිෆ් උපන්නේ එංගලන්තයේ. ඒ නිසා ඔහුගේ ඉංග්‍රීසි භාෂාව උච්චාරණය කිරීම. ඇමෙරිකානු ඉංග්‍රීසි භාෂාවට වඩා වෙනස්. ඒ වුණත් ඩැනියල්ගේ උච්චාරණ ශෛලිය ඔහුගේ රංගන ජීවිතය ඔපවත් කරන්නට හේතුවක් වුණා. කොහොම වෙතත් ඇතැම් චිත්‍රපට නිෂ්පාදකවරුන් ඔහුගෙන් ඉල්ලා සිටින්නේ මේ ශෛලිය වෙනස් කරන්න ය කියලයි. ඔවුන් බලාපොරොත්තු වන්නේ ඩැනියල්ගේ දෙබස් උච්චාරණය ඇමෙරිකානු ජාතිකයන් මෙන් වෙනසකට ලක් කරන්නයි. මෙය ඩැනියල්ගේ රසික පිරිසට නම් සුබදායී ආරංචියක් නොවේවි. හේතුව ඔවුන් කැමැති මේ ‘හැරී පොටර්’ එදා මෙන් කතා කරන අයුරු දකින්නටයි. ඇත්තටම ඩැනියල් කැමැති නැහැ, තමන්ගේ උච්චාරණ විධිය වෙනස් කරන්න. ඔහු සුපුරුදු ස්වරයෙන්ම ඉදිරියටත් කතා කරාවි. මේ වන විට ඩැනියල් පදිංචිව සිටින්නේ ඇමෙරිකාවේ නිව්යෝක් නුවර. ඔහු වඩාත් කැමැති ඇමෙරිකානු චිත්‍රපට නරඹන්නටලු.
උපුටා ගැනීම සිළුමිණ
