බුද්ධ පූජාවක් සකස් කළ යුතු නිවැරදිම ආකාරය මෙන්න

අම්මලා ඉස්සෙල්ලාම ඔයාලා කරන්න ඕනෙ ඔයාගෙ ගෙදරට විශේෂ අමුත්තෙක් ආවොත් ඔයාලා කෑමක් දෙන්නේ මොන විදියට ද ඊටත් වඩා හොඳ භාජන වල ඔයාලා බුද්ධ පූජාව පූජා කරන්න ඕනෙ ඒකයි. බුදු හිමියන්ට අත සෝදා ගැනීමට වෙනම භාජනයකට වතුර එකක් පූජා කරන්න. අත පිසදමා ගැනීමට ලේන්සු තියන්න.

ඔයාලා හිතන්න ඕනෙ දැන් බුදු හිමියන් ඔයාගෙ බුදු කුටියේ ඇත්තටම වැඩ ඉන්නවා කියලා එහෙම හිතාගෙන තමයි මෙ බුද්ධ පූජාව අවසානය වන තෙක්ම වැඩ කටයුතු කරන්න ඕනෙ. වෙනම වතුර එකක් පෙරා ගෙන ජග් එකකට දාලා එක පූජා කරන්න. කූල් වතුර, උණු වතුර පූජා කරන්න.

අපි වගේ නෙවෙයි බුදු හිමියන් දවසටම සැතපෙන්නේ පැය 2 යි. අනිත් හැම වෙලාවෙම උන්වහන්සේ අවදි වෙලා ඉන්නේ එ නිසා තමන්ගෙ වැඩ ඉවරයි කියලා ලයිට් ඔක්කොම වහලා නිදාගන්න එපා. බුදු හිමියන්ගේ බුදු කුටිය ළඟින් බුදු රුවට පිටුපසින් ලයිට් එකක් දාන්න. මුහුණට වදින්න දාන්න එපා.

අයිස් ක්‍රීම් ජෙලි වගේ අතුරුපස පූජා කරද්දි හැන්දක් අනිවාර්යයෙන්ම තියන්න. ඔයාල දානය උයන කොට ධර්ම දේශනාවක් අහගෙන උයන්න. බුදු ගුණ සිතමින් උයන්න. ගිලන්පස හදද්දී හැමෝම බොන කෝප්ප වල හදන්න එපා බුද්ධ පූජාවට හැන්ද ඉඳන් ඔක්කොම වෙන් කරගන්න.

අම්මලා ඔයා ඉස්සෙල්ලාම බුදු කුටිය හොඳට පිරිසිදු කරන්න හැබැයි බුදු රුව අල්ලන්න එපා බුදු රුව පිරිසිදු කරන්න පුළුවන් ඔයාගෙ ස්වාමිපුරුෂයාට. ස්වාමිපුරුෂයාට අලුත් බේසමක්, තුවායක් දෙන්න බුදු රුව සේදීමට. ඔයාලට බුදු රුව අල්ලන්න එපා කිව්වේ ඇත්තටම බුදු හිමියන් දැන් ඔයාගෙ බුදු කුටියේ ඉන්නවනම් බුදු රුව ගැහැණු අපට අල්ලන්න බැහැනේ. හරි දැන් ඔයා පසඟ පිහිටුවා බුදු හිමියන් හට නමස්කාර කරන්න දැන් මෙහෙම කියන්න මාගේ මහා කාරුණික බුදු පියාණන් වහන්ස අද දින මා කෙරෙහි අනුකම්පාවෙන් උදෑසන දානයට වඩින ලෙස ආරාධනා කරමි. මේ විදියට 3 වතාවක් කියන්න. දැන් තමයි ඔයා දානය උයන්න ගන්න ඕනෙ. ඔයා දවල් දානය පූජා කරනවා නම් උඩින් තියෙන උදෑසන කියන තැනට දහවල් දානයට කියලා කියන්න ගිලන්පස නම් ගිලන්පස කියලා කියන්න.

ඔයා දානය හෝ ගිලන්පස පිළියෙළ කරද්දි ඔයාගෙ කනට ඇහෙන්න රේඩියෝ එකෙන් හරි රූපවාහිනියෙන් හරි ධර්ම දේශනාවක් අහගෙන කරන්න එතකොට හිතට නරක සිතුවිලි එන්නේ නැහැනෙ. අනිවාර්යයෙන්ම මොනවා පූජා කරත් ඒවා පිළියෙළ කරද්දි ඔයාලගෙ හිතට රාග, ද්වේශ, මෝහ සිතුවිලි එන්න දෙන්නම එපා. ඒක තමයි කරන්න අමාරුම දේ නමුත් එහෙම කරොත් ඔයාලා දිනුම්. ඒකම තමයි ඕනම පින්කමක් දෙවියන් අනුමෝදන් වෙන රහස. ඔයා බුද්ධ පූජාව තියන්න පටන් ගත්තු වෙලාවෙ ඉඳන් ඉවර වෙනකම් අපි හිතමු ඔයාට පැය 4 ක් ගත වුණා කියලා ඔයා දැන් පැය 4 ක් පුරාවටම හිතුවෙ බුදු ගුණ නරක සිතුවිලි යටපත් කර ගත්තා ඒ පින ගොඩාක් බලවත්. මම හිතනවා අම්මලාට තේරුණා කියලා.

මම කලින් කිව්වේ බුද්ධ පූජාව ලෑස්ති කරගන්න විදියනේ. දැන් ඔයා බුද්ධ පූජාව බුදු කුටියට ගෙනියන්න කලින් ඔක්කොම ලෑස්ති කරලා ආයෙත් බුදු කුටිය ගාවට ගිහින් බුදු හිමියන්ට පසඟ පිහිටුවා නමස්කාර කරලා මෙහෙම කියන්න මහා කාරුණික වු බුදු පියාණන් වහන්ස මා විසින් පිළියෙළ කරනු ලැබු උදෑසන දානය පිළිගැන්වීමට අවසර දෙන සේක්වා..!!!

දැන් ඔයා බුද්ධ පූජාව පූජා කරන්න. දැන් සියලුම පූජාවන් පූජා කරන ගාථා කියලා දෙවියන්ට, මළගිය අයට පින් දීලා ඔයාලගෙ පැතුම් කියන්න අවසානයේදී නිවන පතන්න. උදෑසන දානය නම් උදෙ 6 සිට 10 වනතුරු පුළුවන් දහවල් දානය නම් 11 වෙද්දී පූජා කරන්න ඔයා පැය භාගයක් පමණක් ගාථා කියන්න ගන්න 11.30 වෙනකම් දැන් ඉතුරු පැය භාගයේ ඔයා ඔයාගෙ වැඩ කටයුතු කරගන්න හරියටම 12 ට බුද්ධ පූජාව එතනින් ගන්න. බුදු සරණයි!

මෙ වෙද්දී ඔයාලා බුද්ධ පූජාව අවසන් කරන මොහොත දක්වා දැනගත්තා. ඔයා උදෙ දානය පූජා කරත් දහවල් දානය පූජා කරත් ගිලන්පස පූජා කරත් පූජාව තිබ්බා ගාථා කිව්වා අනිත් පැත්තට ඉක්මනින් පූජාව ඉවත් කරන්න එපා. පැය භාගයක් විතර බුදු හිමියන් ඒ දානය වළඳන තුරු හෝ ගිලන්පස වළඳන තුරු ඔයා පොඩ්ඩක් වෙන වැඩකටයුතු කරගන්න ඔන්න අමතක නොකර දැන් පැය භාගයක් විතර ගියාම බුදු කුටියට ළඟට එන්න ඇවිත් මෙහෙම කියන්න මහා කාරුණික වු බුදු පියාණන් වහන්ස ඔබ වහන්සේ වලදා අවසන් වු මෙ බඳුන් සේදීමට මට අවසර දෙන සේක්වා! දැන් අර භාජන ඔක්කොම අරන් ගිහින් හෝදන්න එතකොටත් හිතන්න අනෙ මගේ බුදු හිමියන් වළඳන භාජන මම හෝදන්නේ කියලා ගෞරවයෙන් හෝදන්න. හිතට පුදුමාකාර සැනසීමක් දැනේවි ඔයාලට.

ගොඩාක් අවිවේකී අම්මලා ඉන්නවා තමයි සමහරු රැකියාවට යන අය, එහෙමයි කියලා මේ දේවල් නොකර ඉන්න එපා. මොකද? කැපවීමක් කළොත් තමයි අපිට සැනසීම ලැබෙන්නේ. අපි වෙනුවෙන් බුදු හිමියන් කොයිතරම් දුක් විඳලා තියෙනවාද? අපි හැමෝම බුදු හිමියන්ට ණයයි ඒ නිසා ධර්මය රකින්නා ධර්මය විසින් රකී. එය විශ්වාස කරන්න. අනිවාර්යයෙන්ම මේ විදියට කරොත් අනන්ත වු බුදු ගුණ බලයෙන් අපිට සැනසිල්ල ලැබෙනවාමයි.

රැකියාවට යන අම්මලා ලොකු බිස්කට් පැකට් එකක් තියා ගන්න. ඒකෙන් කාටවත් දෙන්න එපා බුදු හිමියන් උදෙසා පමණක් තියාගෙන උදේට ලස්සන භාජනයකට බිස්කට් ටිකක් තියලා, බුද්ධ පූජාව තියලා, වතුර වීදුරුවක් තියලා, මෙ සියලුම පූජාවන් මගේ බුදු හිමියන්ට පූජා වේවා! පූජා කරමි! කියලා දෙවියන්ට පින් දීලා ඔයා ගෙදරින් පිටවෙන්නට කලින් ඉක්මනින් පූජාව ඉවත් කරලා යන්න. ඕකට මහ ලොකු වේලාවක් යන්නේ නෑනේ අම්මලා උනන්දුව තියෙනවානම් පුළුවන් අනිවාර්යයෙන්ම. බිස්කට් ලොකු බීම බෝතලයක්, පාන් බටර් ගාල, ඔයා උදේට කාර්‍යාලයට ගෙනියන්න උයන කෑම වලින් බත්, එක්ක සම්බෝලයක් හරි එකක් එක්ක හරි බුද්ධ පූජාව තියන්න පුළුවන්. බැහැ කියලා හිතන්න එපා. මම මේ දේවල් කිව්වේ ඔන්න රැකියාවට යන අම්මලාට විතරයි. ගෙදර ඉන්න අම්මලා එහෙම කරන්න එපා ඔයාගෙ අතින් රසවත් දේවල් හදලා පූජා කරන්න .

තවත් දෙයක් කිසිම වේලාවක හිතන්න එපා ලෝබ කමක් නම් එහෙමයි හිතුවොත් වැඩක් නැහැ. ඔයාලා මඟුල් ගෙදරකට වගේ කෑම හදලා පූජා කරන්න පුළුවන්නම් ඒ විදියට පූජා කරන්න. ඔයා කන්න ආසම දේවල් පූජා කරන්න. මම ඔයාලට රහසක් කියන්නම් අපි කැමති දේ අපි දන් දුන්නොත් අපිට එ දේවල් ලැබෙනවා.

උපුටා ගැනීමකි