මනසට දිව ඔසුවක් වන සක්මන් භාවනාව
ඒ භාග්‍යවත් වූ අසම සම වූ අසරණ සරණ වූ මටම ස්වාමි වූ, මාගේ ස්වාමි වූ පාරමිතා 30 ක් පුරන ලද මනු ලොව බුදුබව ලැබු ලැබූ දෙවියන්ට දෙවිවූ, බඹුන්ට බඹු වූ, සියලු කෙලෙස් නැසූ ඒ ගෞතම නම් වූ බුදුරජාණන් වහන්සේට ද අතීතයේ, අනාගතයේ, පහල වුණා වූ පහල වන්නා වූ ඒ බුදුරජාණන් වහන්සේලාට ද ඒ බුද්ධ රාජ්‍යන්ම ද මාගේ ආත්මය කය, සංසාර චක්‍රය, විඥාන ධාතුව
පූජා කරමි පූජාම වේවා!
පූජා කරමි පූජාම වේවා!!
පූජා කරමි පූජාම වේවා!!!
මෙසේ ඉහත සඳහන් පාඨය බුදුන් වැඳීමේදී ද සතර ඉරියව්වෙදිම භාවිතා කරන්න. එසේ කිරීමෙන් මහත් ඵල මහානිසංස ගෙන දේ. සක්මන් භාවනාව මනෝ විද්‍යාත්මකවද ඉතාමත් සුවදායී භාවනාවක් වේ. මානසික ආතතිය, විශාදය, අධික තරබාරුකම, ආතරයිටීස්, කොරස්ටොල්, දියවැඩියාව වැනි රෝග තත්ත්වයන් නසා දැමීමට උපයෝගී වන මනෝ විද්‍යාත්මක, ශාරීරික, අධ්‍යාත්මික භාවනාවකි.
ඔබට දිනයේ පහසු වේලාවක් වෙන්කර ගන්න. ආරම්භක කාලසීමාව විනාඩි 15 කින් පටන් ගමු. පළමුව තමන්ගේ නිවසේ, කාමරයේ, ආලින්දයේ, නිදහස් තුරු සෙවනක, නිස්කලංක තැනක්, නිදහස් තැනක්, ගල් තලාවක් දිය ඇල්ලක් ළඟත් මේ සක්මන් භාවනාව කිරීම සුදුසුය.
1. ප්‍රථමව වම් අත අඩින් දකුණු අත තබන්න. කය ඍජුව තබාගෙන අඩි 3 ක් 5 ක් අතර සීමාවක් බලන්න.
2. තමන් ගමන් කරන පාදය කෙරෙහි මනස යොමු කරන්න.
3. දකුණු පා ඉදිරියට තබමි, වම් පා ඉදිරියට තබමි දකුණු පා ඉදිරියට තබමි. වම් පා ඉදිරියට තබමි යන වශයෙන් පාද මාරු කරමින් එම ඉරියව්වටම මනස යොමු කරමින් සක්මන් භාවනාව අරඹන්න.
4. තමන් යම් දුරක් ගොස් හැරෙන විට දකුණු පාදයෙන් දකුණු දිශාවට හැරෙමි, වම් පාදයෙන් දකුණු දිශාවට හැරෙමි. නැවත දකුණු පා ඉදිරියට තබමි. වම් පා ඉදිරියට තබමි. දකුණු පා ඉදිරියට තබමි. වම් පා ඉදිරියට තබමි. මනසින් කියමින් සක්මන් භාවනාව පුරුදු කරන්න.
(තමන් කරන සක්මන් ඉරියව්ව මනස සමග එකතු කරමින් කළ යුතුය.)
එසේ නොවුනහොත් දුර ගමන් යන සිත වනයක ඉන්න කුළු මීමකු මෙන් පාලනය කරගත නොහැකි සිත වෙනස් වී භාවනාවෙන් ඵල නොලැබේ. මේ භාවනාව අලුයම, රාත්‍රිය, නිශ්ශබ්ද පරිසරයක කිරීම ඉතා සුදුසුය. ටික කලක් භාවනා කිරීමෙන් පසු නැවතත් සක්මන් භාවනාව තව ගැඹුරින් කරමු.
- දකුණු පාදය ඔසවමින් නවමින් බිමට තබමි, වම් පාදය ඔසවමින් නවමින් බිමට තබමි, දකුණු පාදය ඔසවමින් නවමින් බිමට තබමි, වම් පාදය ඔසවමින් නවමින් බිමට තබමින් සක්මන් භාවනාව කරමු.
- හැරෙන අවස්ථාවේදී දකුණු පාදයෙන් හැරෙමින් දකුණු දිශාවට වම් පාදයෙන් හැරෙමින් දකුණු දිශාවට යන වශයෙන් භාවනාව කරන්න.
- සක්මන් භාවනාව කිරීමේ අවසානයේ සබ්බේ දුක්ඛා බලප්පත්තා යන ගාථාව හා කරණීය මෙත්ත සූත්‍රය කියමින් දෙවියන්ට පින් දෙමින් භාවනාව නිමා කරන්න. එය මහත් ප්‍රතිඵල ද අන් දවසේ භාවනාව ආරම්භ කිරීමට ද මහෝපකාරී වේ. දෙවියෝද, මනුස්සයෝද අමනුස්සයෝද තමන්ට ප්‍රිය මනාප වේ.
මෙසේ භාවනාව විනාඩි 15 සිට පැය 2 ක් 3 ක් 4 ක් දක්වා දීර්ඝ කරන්න. එය මනසට කරදරයක්, වදයක් බාධාවක් නොවන සේ කාලය සහ මනස සකස්කර ගන්න. යම් කෙනකුට පාද නවාගෙන වාඩිවී කරන භාවනා අපහසු අයට මේ භාවනාව මානසික සුවයක් ගෙනදේ. කර්මය අහෝසි කරමින් සතර අපායෙන් මිදී නිවන් දක්වා යන ගමනට මේ භාවනාව හේතුවේ. ගල් ඇනෙන රළු පොළවක කළේ නම් පාදයට දැනෙන එම ස්පර්ශයන් පවා වෙනස්වීම් පවා මෙනෙහි කරමින් කරන්න. ටික දිනක් මේ භාවනාව කරන විට යම් විධියක බාදක පැමිණේවි. සේ වූ විට වීර්යයෙන් සති, සමාධි, ප්‍රඥාව මෙහෙයවා විදර්ශනාවෙන් බුදුගුණ මෙනෙහි කරමින් ධර්මය අසමින් භාවනාව නැවත ආරම්භ කරන්න.
විද්‍යාත්මකව ගත්තත් පා පතුල් යට පිහිටන ඉතා සියුම් නිල තෙරපීම්වලින්ද, ස්නායු තෙරපීම් තුළින්ද මොළයේ රුධිර සංසරණ පද්ධතිය ඔක්සිජන් මොළය වෙත හොඳින් ගමන් කිරීමෙන් මොළය සුවපත් වේ. අතීත මතකයන් අමතක වීම වර්තමාන මානසික පීඩනයන් අනාගත ඉලක්කයන් කරා පහසුවෙන් ගමන් කිරීමට සක්මන් භාවනාව මනෝ විද්‍යාත්මක ප්‍රතිකර්මයකි. තථාගත නම් වූ භාග්‍යවත් වූ බුදුරජාණන් වහන්සේ ද අවසාන මොහොත දක්වාම සක්මන් භාවනාව කළ සේක. මෙසේ භාවනා කිරීමෙන් මානසික ආතතිය අඩු වී විශාදය නමැති රෝගය නැතිවී ශාන්තවත් වූ ඉවසීමක් ඇති මනසක් ඇති පුද්ගලයෙක් වනු ඇත. මේ භාවනාවට ජාති, ආගම්, පාට, පක්‍ෂ භේද, ස්ත්‍රී පුරුෂ, වැඩිහිටි, ළමා කියා භේදයක් නොමැත. ඔබ භාවනාව පුහුණු කරන අතර ගෙදර ඉන්න අන් අයට ද මෙම භාවනාව පුරුදු පුහුණු කරන්නේ නම් ඔබගේ නිවසේ ද සමගිය සාමය වර්ධනය වනු ඇත. මේ සඳහා තවත් විස්තර දැනගැනීමට අවශ්‍ය නම් පහත සඳහන් දුරකථන අංකයට අමතන්න.
සතර මග වැරදුන අප සැමට සතර අපාය තිඹිරි ගෙයක් කරගත් අපට ඉන් මිදීමට ලොව්තුරා බුදුරජාණන් වහන්සේ දේශනා කළ පරිදිම මේ සක්මන් භාවනාව නිවන් සුව පිණිසම හේතු වේවා. වාසනා වේවා.
